Musakulenga vyongo vinam’sangalali-e Yohova

1. N’nga ndi yorucha ivi inogumanana i-yo nothene?

DAMBO linlothene ninofuneela sakula vyoira. Vinango mwavyongovi vinokala vyo-orucha ninga sakula vyongo vinadye i-yo bebe-i, venango vinadye i-yo vahora inofuna i-yo gona. Mbwenye vatokala vyongo vinango vinokala vyorucha namwasa oi vinokuza thuthuli-u, atu anowadhiveliwana i-yo, lambela wi-u thitho akala ninodha kala osangalala venango kabe. Ninofuneela sakula vyongo vinanikami-e i-yo thitho banja li-u. Mbwenye yofuneya maningi choi ninofuna ira vyongo visakhunle i-yo vim’sangalali-enga Yohova.— Aro. 12:1, 2.

2. N’nga ndi vyongo viivi vinanikami-e ira nisakulenga vyongo mwazelu?

² Vyongo vyo-arelavi, vinodha ukami-ani ira musakulenga pama vyoira (1) idhiwa makhundo othene, (2) idhiwa mathuulelo a Yohova vamwasuo thitho (3) fwanafwani-edhela vyo-arelavovyee. Muyofunjedha yei ninotapanyani vyongo viraru thitho ira nifunji-enga dodoliso li-u vozindiyela.—San. 2:11.

MUIDHIWENGA MAKHUNDO OTHENE

3. Muonge ifwanafwani-o yothonyi-edha sakasaka makhundo othene mwa-anasakule vyoira?

³ Yongo yoroma ira mutu asakule pama vyoira, kuidhiwa makhundo othene. Mwasiwa ngwan’ni vyongo vyevi ndi vyofuneya? Nifwanafwani-edhele ira mutu utokaana yorucha ilukulu thitho utogumanana ifirimero. N’nga ifirimero unodha m’va-a mirombwe a-anam’fuke mulimbo buleluo? Kabe. Nyo thitho munodha sakula vyoira mwaidiwa mukhundo othene okuza mwasuo. N’nga munaire a-vi vyevi?

4. Movwelana na lemba la Sanganiko 18:13, n’nga munasikimizele a-vi ira munoidhiwa makhundo othene? (Muone thitho iruthiruthi.)

⁴ Hora dhinjinji fuka vyofuka unonikami-a ira niidhiwe vyongo. Nifwanafwani-edhele ira mutu mwinango utouitanani ira mumawaredhe. N’nga munofwanela dhowao? Akala mutuo kamunamuidhiwe pama thitho kamunoidhiwa ira mawaredhelwe anakale moi a-vi, munodha m’fuka vyofuka vi: “N’nga mawaredhelo anaireele wani? N’nga anaireye hora yan’ni? N’nga unakale atu oinjiva moi a-vi? N’nga mbaani unofunanga ing’anela mawaredhelwao? N’nga baatu avi aitaniwile? N’nga unodha kala vyoi a-vi? N’nga unodha kala vyomwa vyolezeli-a?” Vyowakula vya vyofuka vyevi vinodha ukami-ani ira musakule pama vyoira.—Muleri Sanganiko 18:13.

5. N’nga munofwanela iran’ni mwaidhiwa makhundo othene?

⁵ Mwaidhiwa makhudwao munofwanela sakasaka pama ira muidhiwe mwasa othene. Mwaifwanafwani-o, n’nga munaire a-vi mwavwa ira unodha kala thitho atu o-o-arela makhundho a Bibilyani? Venango atu tanodha mwa vyomwa vyolezeli-a vo-okala mutu owaing’anela. N’nga mawaredhelo enala katinodha chinja nokala mawaredhelo oophi-a? (1 Pe. 4:3) Ee-no nifwanafwani-edhele ira mawaredhelwao ali va hora inodhowa nyo migumanoni venango muurumiwini. Mwaidhiwa makhundo othene okuza mwasuo, munodha sakula pama vyoira. Mbwenye vatokala thitho vyongo vinango vinofwanela nyo irana. Vasogolo voi nyo mutoidhiwa pama mwasuo munofwanela thuulela mwemo Yohova munauonele liye —San. 2:6.

MUSAKESAKENGA MATHUULELO A YOHOVA VA MWASUO

6. Movwelana na lemba la Yakobo 1:5, mwasiwa ngwan’ni ninofwanela m’vepa Yohova ira anikami-e?

⁶ Muvepenga Yohova ira aukami-eni idhiwa mathuulelwe. Yohova unoniwandela ira unodha niva-a zelu dhedho dhinanikami-e idhiwa Akala ninofuna ira vyongo vinanisangalali-e. Liye unovelela zelu dhedhi “modhala mandha waatu othene thitho unovelela mo-oumeleliwa.”—Muleri Yakobo 1:5.

7. N’nga ninaidhiwe a-vi mathuulelo a Yohova? Muonge ifwanafwani-o

⁷ Mwalobelanga wa Yohova ira aukami-eni, mukaengana ifunelo ira muone moda muwakunle liye lobelo linyu. Mufwanafwani-edhele ira muli va ulendo. Thitho mutodhimela mbwenye munofuka mutu watatamonimo ira aukami-eni. N’nga munovenyathi liye a-anauwakuleni? Kabe kamunaire vyevyo. Munodha m’vuruwana pama auwandhelangani mwemo munawendhele nyo. Molandana na vyevi, mwalobela wa Yohova ira auva-eni zelu musakesakenga yowakulaye vosakasaka malamulo na makhundo a Bibilyani enao anovwelana na mwasuo. Mwaifwanafwani-o, vothuulela akala ira munodhowa umawarendhelo uongile i-yo maromelou, munooda thuulela vinoonga Bibilya vyokuza mapwando othakala, vwelana naatu othakala thitho funeya o-ela wu Mwene va limburo loroma malo mwa vyofuna vi-u. —Mat. 6:33; Aro. 13:13; 1 Ak. 15:33.

8. N’nga munaire ira mufwanye makhundo anaukami-eni? (Muone thitho iruthiruthi.)

⁸ Mbwenye hora dhinango munodha funeelanga mutu ira aukami-eni fwanya vyongo vinosakasaka nyo. Bali venango rongola oidhiwa vyongo vinjinji maningi, unodha ukami-ani va mwasuo. Mbwenye munodha ganyali maningi mwasakasakanga vamwekene. Munodha fwanya makhundo apama maningi vyongo vyokami-a vofunjedha bukhu losakasakela myasa la Amboni dha Yohova thitho Malemba Othandiza pa Moyo wa Chikhristu. Muthuulele ira ifunelo inyu choi muondenga saka vyongo vinam’sangalali-e Yohova.

9 N’nga ninaidhiwe a-vi akala vyongo visakunle i-yo vinodha m’sangalali-a Yohova (Aefeso 5:17)

⁹ N’nga ninasikimizele a-vi ira vyongo visakunle i-yo vinom’sangalali-a Yohova? Yoroma ninofwanela m’mwidhiwa pama. Bibilya linoonga ira: “Akala munomuidhiwa Nlungu, wenuo ndi ochena kwaranya, unodha kala ovwechecha vyongo.” (San. 9:10) Ee-no ira mutu akale ovwechecha vyongo, unofwanela idhiwa pama makalelo a Yohova, ifunelwe thitho vyongo vinodhiveliwana liye na vyongo vinoidanana liye. Mudhifuke ira, ‘movwelana na vyongo vinoidhiwa miyo vyokuza Yohova, n’nga ndinasakule irana vyongo viivi vinam’sangalali-e?’—Muleri Aefeso 5:17.

10. Masiwa ngwan’ni makhundo a Bibilyani mbofuneya maningi kwaranya sanganiko venango ikalelwi-u?

¹⁰ Ira nim’sangalali-e Yohova, hora inango ninofwanela sakula vyongo vinasukwali-e atu anonidhiveliwana i-yo. Mwaifwanafwani-o, anamabala tanooda limbi-a mwaniwa ira ateliwa na lombwana okaana vyongo vyapama venango unoona aliwa ira unooda ava-a kobiri dhinjinji angalive ira lombwanuo kali vauxamwali wapama na Yohova. Pyaimbarimbari ira aliwa anofuna ira mwaniuo asamaleliwenga pama. N’nga mbaani unam’kami-e limbi-a uxamwalee na Yohova? N’nga Yohova unouna a-vi mwasula? Ninooda fwanya yowakula yei va lemba la Mateu 6:33. Va lembali, Makristau anolimbi-iwa ira “ta-elenga wu Mwene valimburo loroma va ingumiiwa.” Angalive ninolemeza anamabali-u, thitho atu atatamo li-u, yofuneya maningi wa i-yo kum’sangalali-a Yohova.

FWANAFWANI-EDHELA VYO-ARELAVOVYEE

11. N’nga ndi kalelo livi linoongiwa va Afilipi 1:9, 10 lelo linanikami-e fwanafwani-edhela na visakunle i-yo?

¹¹ Mwasakasakanga makhundo a Bibilyani ovwelana na mwasa unosaka nyo, muthuulelenga pama vyo-arelavovyee. (Muleri Afilipi 1:9, 10; muone makhundo ofunjedhela) Zindiyela unodha ukami-ani ira muthuulelenga vyo-arelavovyee va vyongo vinasakule nyo. Hora dhinango vinodha kala vyo-orucha sakula vyoira mbwenye hora dhinango vinodha kala vyorucha. Zindiyela unodha ukami-ani ira musakulenga vyoira mwazelu masiki vamwasa unoona nyo ira ngorucha maningi.

12-13. N’nga zindiyela unanikami-e avi ira nisakulenga vyoira mwazelu vamwasa wa basa?

¹² Kathuulelani ifwanafwani-o ila. Munosakasaka basa linaukami-eni ira musamalelenga banja linyu. Mbwenye vatofwanyeya mabasa menli. Munothuulela makhundo othene ninga tundo wabasiyo, hora inalabenga nyo thitho lapela wa uledo na vyongo vinango. Mbwenye nyo munodhiveliwana basa imbo-i namwasa oi uledwe ngoyeva thitho mwemo munapagaleliwenga nyo. Angalive ira vili e-no vatokala makhundo enango anofwanela nyo athuulela mwa-ana sakule vyoira.

¹³ Mwaifwanafwani-o, n’nga basalo munodha lilabanga fiyedha hora yamigumanoni? N’nga linodha umalelani mahora anofuna nyo waredhanga na banja linyu thitho lilimbi-a ira likale vauxamwali wapama na Yohova? Idhiwa vyofuka vyevi unodha ukami-ani ira “vyongo vyevi ndi vyofuneya maningi,” thitho ndi vyokuza lambela winyu nosamalela banja linyu kwaranya kaana kobiri dhinjinji. Mwaira ee-no munodha sakula vyoira vinairi-e ira Yohova auraeli-engani.

14. N’nga zindiyela thitho dhiveliwana atu enango unanikami-e avi ira nirambelenga asukwali-a?

¹⁴ Zindiyela unodha nikami-a ira nithuulelenga vyongo vinasakule i-yo munakuzele aliwa atu enango naifunelo yoi nirambelenga “asukwali-a.”( Afl. 1:10) Vyevi ndivyofuneya maningi nasakulanga myasa dhokuza vyowara nodhibalei-a. Mwaifwanafwani-o, i-yo ninodha dhiveliwana maxitilu enango a vyowara venango dhibalei-a mundhila inango. N’nga a-vi akala abali naarongola thitho atu enango tanosukwala na vyongo visakunle i-yo? Zindiyela unodha nikami-a ira niodenga vwechecha moda munodhivwela atu enango. Dhiveliwana atu enango unodha nilimbi-a ira nithuulelenga “vyoganyali-a atu enango” thitho ira nikale odhiyevi-a. (1 Ak. 10:23, 24, 32; 1 Ti. 2:9, 10) Naira ee-no ninodha sakula vyongo vinothonyi-edha ira ninodhiveliwana thitho lemeza atu enango.

15. N’nga ninofwanela thuulelan’ni na-anasakule vyoira vamwasa ofuneya maningi?

¹⁵ Mwasakulanga vyoira vamwasa ofuneya maningi, muthuulelenga moda munavikwakwaneli-edhe nyo. Yesu atoonifunji-a ira “nithuulelenga pereswee.” (Luk. 14:28) Ee-no muthuulelenga injiva wahora thitho vinofuneela ira vyongo visakunle nyo viodeye. Hora dhinango munodha funeelanga tapanya na banja linyu ira muidhiwe mwemo mutu uliwethene munakami-edhele liye va vyongo visakunle nyo. Mwasiwa ngwan’ni irana vyevi kofuneya? Vinodha ukami-ani idhiwa akala vyongo visakunle nyo visaka-edha ndivyofineya venango akala vatokala ndhila dhinago dhapama maningi. Mbwenye mwatapanyanga naatu abanjani mwinyu mwaavuruwanenga atwao, aliwa tanokala okozeya ukami-ani ira vyongo visakunle nyo viwende pama.—San. 15:22.

MUSAKULENGA VYONGO VINAODEYE

16. N’nga ndi vyongo viivi vinaukami-eni ira musakule vyoira mwazelu? (Muone kwadru loi “Vyongo vinaire nyo ira musakule vyoira mwazelu.”)

¹⁶ Akala muno-arela vyongo vyothene vitapanyileni i-yo muyofunjedhila, muli okozeya sakula vyongo mwazelu. Mutofwanya makhundo anaukami-eni ira musakule vyoira vinasangalali-e Yohova. Va-eni munodha m’vepa Yohova ira aukami-eni vavyongo visakunle nyo ira viuwendeleli pama.

17. N’nga yofuneya maningi chini ira nisakule vyoira mwazelu?

¹⁷ Angalive ira fendo dhinjinji ndulimu mwatoosakulavo vyoira mwazelu, muthuulelenga ira yongo yaukami-idheni ira musakule pama kai zelu dhinyu venango dodoliso linyu mbwenye ndi zelu dhokumela wa Yohova. Liye ekene ngwenuo unoukami-ani idhiwa vyongo, vwechecha thitho zindiyela vyoi ndi vikundo vilukulu vya zelu dhedhi. (San. 2:1-5) Yohova unodha ukami-ani sakula vyoira vinousangalali-ani.—Sal. 23:2, 3.