N’nga munasazi-edhe a-vi levelela wa Yohova?

1-2. (a) N’nga ndi vahora iivi levelela unakale aliwa orucha maningi? (b) N’nga Denise airile n’ni vothonyi-edha levelela?

N’NGA vinouruchani levelela atu enango? Anjinji a i-yo vinonirucha simbwasimbwa akala mutu utoonga venango irana vyongo vinipei-idhe rimani maningi. Mbwenye pyoodeya i-ya nyanyuwa nolevelelanga. Mwaifwanafwani-o, kaonani vyairile rongola mwinango dhinalee Denise,a wenuo athonyi-edhe levelela mu ndhila yavakhundu maningi. Mu yawa ya 2017, Denise na banjalee tatoodhowa maona limburo wu sede li-u la Mboni dha Yohova lelo lali langairile dhuleliwa wene. Vyawelela aliwa mudhi, motorista mwinango atooimwanana tekenya pama karwee voi atoodima karwiwa. Ngoviyo ingaireile, Denise atoo-ileya. Angasisimuwile, atoovwa ira a-imee tatoopeya maningi thitho manee Brian atookwa vangoviyo. Vothuulela vyaireilevyo, Denise aongile ira: “Ndatoosukwala thitho vyatoondidodomi-a mathuulelo maningi.” Vasogolovee liye atoovwa ira kavali yongo iliyothene yam’dodomi-idhe motorista ira ngoviyo iireye thitho kaana yorucha iliyothene yokhuza manungwee. Ee-no atom’vepa Yohova ira am’kami-e kala warendele.

² Motorista aadimiluo aakale ira atookaana landu opha mutu mwangovi thitho aafwanyeye ira utodawi-a vyongo, anga-eliwile perezoni. Tribunalelo laongile ira tongiwa wa seluo wanyindela umboni wafuna onga Denise. Denise aongile ira: “Ndadhivwa ninga mutu utokaula ilonda yanga yasoniwile nokutulelavo munyu unjinji namwasa oi ndafuneela onga vyongo vyothakala vyaireilevyo.” Vangavirile masumana oyeva, Denise atoodhowa wu Tribunale maonga umboni vamethoni va mutu airi-idhe ira banja liwa ligumanena nyarwa ilukhulu. N’nga Denise aongilen’ni? Liye atom’vepha mulimbo tonguo ira am’vwele tangaranga motoristuo.b Angamari-idhe onga, namatonguo atoomori-a mi-odi thitho atoonga ira: “Wa vyawa 25 ndikadhi ndilabanga basa yen‘na, kandinavwevo ninga vyevi. Kandinaonevo odaweliwa avephanga ira odawuo avweliwe tangaranga. Kandinavwevo madhu othonyi-edha udhivela nolevelela ninga weu.”

3. Chini yam’kami-idhe Denise ira alevelele?

³ N’nga chini yam’kami-idhe Denise ira alevelele? Liye atoothuulela levelela wa Yohova. (Mik. 7:18) Nasimbanga Yohova vonilevelela, vinooda nikami-a ira na-iyene thitho nilevelelenga atu enango.

4. N’nga Yohova unofuna ira niirengan’ni? (Aefeso 4:32)

⁴ Yohova unofuna ira nilevelelenga atu enango na rima othene ninga mwemo munoniirela liye. (Muleri Aefeso 4:32.) Liye unodedi-edhela ira nilevelelenga atu enao anonidawela. (Sal. 86:5; Luk. 17:4) Muyofunjedha yei ninotapanyani vyongo viraru vyevyo vinanikami-e ira nilevelelenga na rima othene.

KAMUVWALAVWALI-ENGA MODA MUNODHIVWELA NYO

5. Movwelana na lemba la Sanganiko 12:18, n’nga ninovivwa a-vi mutu mwinango anidawela?

⁵ Ninooda sukwala maningi namwasa wa vyongo viongile mutu mwinango venango viniirele liye simbwasimbwa akala ira mutuo ngu fwi-u wavarimani venango bali-u. (Sal. 55:12-14) Hora dhinango upha unovwa i-yo unofwanafwani-edheliwa nolathiwa na mbene. (Muleri Sanganiko 12:18.) Ninooda dhilimbi-edha vwalavwali-anga moda unodhivwela i-yo mbwenye irana vyevi unofwanafwana no-iyachi mbene vailondanivo. Moladana na vyevi, kaninadedi-edhele ira niromenga dhivwa pama vovwalavwali-a moda unodhivwela i-yo.

6. N’nga hora dhinjinji ninoirecha a-vi mutu mwinango anidawela?

⁶ Hora dhinjinji yongo yoroma inoirecha i-yo, nasukwali-iwa kunyanyuwa. Bibilya linorumeli-a ira ninooda nyanyuwa. Mbwenye linoniwenjeli-a ira kanirumele ira nyanyuwao unitongenga. (Sal. 4:4; Aef. 4:26) Mwasiwa ngwan’ni? Namwasa oi hora dhinjinji ninoirecha vyongo motukulela moda unodhivwela i-yo. Thitho nyanyuwa kaunokaana vyo-arelavo vyapama. (Yak. 1:20) Kathuulelani ira nyanyuwa unoireya okhene, mbwenye ninaasakula ira nikaleve onyanyuwene.

7. N’nga hora dhinango ninodhivwa a-vi atu enango tanisukwali-a?

⁷ Naireliwa vyongo vyothakala, ninovwa upha mundhila dho-iyana i-yana. Mwaifwanafwani-o, rongola mwinango dhinalee Ann aongile ira: “Ndingali mwana, babanga atoomwadhana na m’manga nodhowa mathela nyabasa wenuo ali makayayanga. Ndavivwa ira ndito-iiwa. Angabalile a-ima, ndaona ira a-imao anotukula limburo langa. Ndaulukunle ndidhivwanga ninga mutu o-ofuneya.” Rongola mwinango dhinale Georgette, atoonga moda mwadhivwela liye man’nee angairile vyongo mo-ororomeleya. Liye aongile ira: “Miyo na man’nanga naidhiwilena ningali a-ima. Nairela vambo-i upainiya, ngu mwasee ndatoosukwala maningi.” Rongola mwinango dhinalee Naomi aongile ira: “Ndali ndha-anathuulelevo ira mananga unodha ndisukwali-a. Ee-no angaongile ira ukadhi aonelanga vyaumandhave molokota, ndadhivwa ira nditonami-iwa thitho nditoireliwa vyongo vyo-olongomana.”

8. (a) N’nga ndi myasa inango iivi inaniiri-e ira nilevelelenga atu enango? (b) N’nga levelela unonikami-a a-vi? (Muone kwadru yoi “N’nga munaire a-vi akala mutu mwinango utousukwali-ani maningi?”)

⁸ Kaninaode tonga vyevyo atu enango vinaonge aliwa venango irana. Mbwenye ninooda dhitonga moda unairele i-yo vyongo. Thitho ndhila yapama inokalavo kulevelela. Mwasiwa ngwan’ni ninoonga e-no? Namwasa oi ninom’dhiveliwana Yohova thitho liye unofuna ira nilevelelenga. Hora dhinjinji ninooda irana vyongo mo-othuulela pama thitho vyevyo vinooda kuza manungwi-u. (San. 14:17, 29, 30) Kathuulelani vya rongola mwinango dhinalee Christine. Liye aongile ira: “Ndanyanyuwa maningi ndanooimwanana theelela. Ndanoofiya voimwanana sakula vyodya vyofwanelela thitho ndinoimwanana gona mokwakwanela. Vinondirucha tonga moda unodhivwela miyo thitho vyevyo vinokuza maningi moda unoirela miyo vyongo na man’nanga naatu enango.”

9. Mwasiwa ngwan’ni kaninofwanela lokotanga vyarimani?

⁹ Akala mutu unidawele kanofuna nipepesa, ninooda yevi-a nyarwa dhinokalavo. N’nga ninairena a-vi vyevi? Georgette um’mongile i-yo ndulimu aongile ira: “Miyo na mananga banja lingamadhi ndatoo-iya m’nyanyuwela thitho nlokotedha vya rimani angalive ira vyatoonditukulela hora injinji. Vyo-arelavyee pyoi ndatoofwanya rendele warimani.” Na-iya lokota vya rimani, ninobarela rimi-u ira na-anyanyuwenga voira vyongo naatu enango. Naira e-no ninokala niviirelanga yongo yapama maningi, yeyo ndi-iya thuulela vyongo viireilevyo noroma okoka sangalala. (San. 11:17) N’nga a-vi akala munoona ira kamunakozeye levelela?

VYONGO VINAUKAMI-ENI IRA MU-IYE NYANYUWA

10. Mwasiwa ngwan’ni ninofuneela viva-anga hora yokwakwanela ira rimi-u ukale limburonimwee? (Muone thitho viruthiruthi.)

¹⁰ N’nga munaire a-vi ira mwa-adhowenave nyanyuwa? Ndhila imbo-i kudhiva-a hora yokwakwanela ira riminyu ukale limburonimwee. Mutu opeya ava-iwa mirombwe, vanofuneela hora yokwakwanela ira ilondayo iile. I-yo thitho ninooda funeela hora yokwakwanela ira niode levelela mutu kumela vathi va rima.—Nam. 3:3; 1 Pe. 1:22.

11. (a) N’nga lobelo linanikami-e a-vi ira nilevelelenga?

¹¹ Mum’vepenga Yohova ira aukami-eni levelelanga atu enango.c Ann um’mongile i-yo ndulimu, atoonga mwemo lobelo mwam’kami-edhe aliwa. Liye aongile ira: “Ndatoovepha wa Yohova ira alevelele uliwethene banjani mwi-u namwasa wa vyongo vyo-ofwanelela vyaongile liye venango irana. Ndidhamale ndatoom’lembela karta babanga na i-yaneuo voawandela ira nditowalevelela.” Ann atoorumela irana vyevi mbwenye kwaali okweya. Liye aongile ira: “Thuulela nosazi-edha Yohova vokala olevelela, unokami-a babanga na i-yanee ira tafunjedhe vyokuza Yohova.

12. Mwasiwa ngwan’ni ninofwanela m’nyindelanga Yohova malo mothuulelanga moda munodhivwela i-yo? (Sanganiko 3:5, 6)

¹² Mum’roromelenga Yohova a-kala nyindelanga moda munodhivwela nyo. (Muleri Sanganiko 3:5, 6.) Hora dhothene Yohova unoidhiwa vyongo vili vyapama wa i-yo. (Esa. 55:8, 9) Thitho liye kananiwandele ira niirenga vyongo vyoi vinooda niphei-a. Ee-no anilimbi-anga ira nilevelelenga, ninoidhiwa ira irana vyevyo kokami-a wa i-yo vano. (Sal. 40:4; Esa. 48:17, 18) Mbwenye akala ninonyindela moda munodhivwela i-yo, kaninaode levelela atu enango. (San. 14:12; Jer. 17:9) Naomi um’mongile i-yo ndulimu aongile ira: “Voroma ndaona ira kandinaode m’levelela mananga wenuo aonela vyongo vyaumandhave. Ndaova ira ndam’levelela unodha ira okoka venango kanoidhiwa moda mundikuzele aliwa. Mbwenye ndatoothuulela ira Yohova unovwechecha moda unovwela miyo. Ee-no ndatoozindiyela ira angalive Yohova unovwechecha moda unovivwela miyo, kavinothapulela ira unorumela ira na-alevelelenga atu enango. Liye unoidhiwa moda mundikuzele aliwa thitho vanofuneela hora yokwakwanela ira ndi-iye kala onyanyuwa, mbwenye unofuna ira ndilevelelenga.”d

MUTHUULELENGA VYONGO VYAPAMA

13. Movwelana na lemba la Aroma 12:18-21, n’nga ninofwanela iran’ni?

¹³ Ira nilevelele mutu unisukwali-idhe maningi, vanofuneela vyongo vinjinji a-kala i-yachi onga vyongo viireilevyo baa-i. Akala mutu unidaweluo ngu bali venango rongoli-u, ifunelwi-u ikalenga dhi-a rendele. (Mat. 5:23, 24) Malo monyanyuwa nithonyi-edhenga tangaranga thitho malo molokota vyarimani, nilevelelenga. (Muleri Aroma 12:18-21; 1 Pe. 3:9) N’nga chini inanikami-e ira niirengana vyevi?

14. N’nga ninofwanela dhilimbi-edha iran’ni, n’nga mwasiwa ngwan’ni?

¹⁴ Ninofwanela dhilimbi-edha ira nionenga mutu unidaweluo ninga mwemo munom’monela Yohova. Yohova unosakula ira nionenga vyapama mwa mutu. (2 Li. 16:9; Sal. 130:3) Akala ninofuna ira nionenga vyongo vyapama mwa mutu, ninooda fwanya ndi saasawa thitho akala ninofuna fwanya vyongo vyothakala mwa mutu. Navilimbi-edha fwanya vyongo vyapama mwaatu enango, vinooda kala vyo-orucha ira naalevelelenga. Mofwanafwani-a, bali mwinango dhinalee Jarrod aongile ira, “ndinoona ira kavinondirucha levelela bali ndafwanafwani-edhela vyongo vidawi-idhe liye na vyongo vyapama vinoirana liye.”

15. Mwasiwa ngwan’ni m’mwandela mutu ira nditoulevelela kofuneya?

¹⁵ Yongo inango yofuneya maningi kuwandela mutu uudaweleni ira mutom’levelela. Mwasiwa ngwan’ni? Kaonani vyaongile Naomi, wenuo um’mongile i-yo ndulimu. Liye aongile ira: “Mananga atoondifuka ira, ‘n’nga utondilevelela?’ Ndifunanga onga ira ‘nditoulevelela,’ ndatookameya. Voi e-no ndatoozindiyela ira kandim’levelele na rima othene. Vangavirile hora ndatooda onga madhu mwakopolo madhu enala ira, ‘nditoulevelela.’ Ndatoodabwa maningi na mwemo mwadhivwele liye thitho na miyene ndatokaana rendele warimani. Kumela vahora yeniyo ndatooroma okoka m’roromela thitho va-eeni ninovwelana maningi.”

16. N’nga mufunjedhilen’ni va mwasa olevelela?

¹⁶ Yohova unofuna ira nilevelelenga. (Ako. 3: 13) Mbwenye, hora dhinango vinooda nirucha ira nilevelelenga atu enango. Mbwenye ninooda akala ninorambela vwalavwali-a moda munodhivwela i-yo nodhilimbi-edhanga ira na-adhowenganave nyanyuwa. Nairangana vyevi, ninooda dhowanave kaana mathuulelo ofwanelela.—Muone kwadru yoi “Vyongo viraru vinaukami-eni ira mulevelelenga.”

MUTHUULELENGA MODA LEVELELA MUNOUKAMI-EDHELANI ALIWA

17. N’nga levelela unonikami-a a-vi?

¹⁷ Nitokaana myasa minjinji yoniiri-a ira nilevelelenga atu enango. Dhoweni nioneni dhinango mwa myasa dhedhi. Yoroma, ninosazi-edha thitho sangalali-a Babi-u watangaranga, Yohova. (Luk. 6:36) Yanambili, ninofuna thonyi-edha simba ira Yohova unonilevelela moriya rima. (Mat. 6:12) Thitho yanararu, ninokaana manungo apama navwelananga maningi naatu enango.

18-19. N’nga chini inaireye nalevelelanga?

¹⁸ Nalevelelanga atu enango, ninofwanya maraeli-o oi kanaadedi-edhela. Mofwanafwani-a, kaonani vyam’mwireele Denise, wenuo um’mongile i-yo ndulimu. Angalive ira vahora yeniyo liye kaaidhiwa, mutu airi-idhe ngovule atoira masaka-edho ofuna dhipha. Mbwenye, atookuzeya maningi na vyam’mwirele Denise vom’levelela thitho atoroma funjedha Bibilya na a Mboni dha Yohova.

¹⁹ Hora dhinango na i-yene thitho vinooda niruchanga levelela mutu unidawele. Mbwenye levelela atu enango kokami-a maningi. (Mat. 5:7) Ee-no, dhoweni niireni vyongo vyothene vinaode i-yo ira nim’sazi-edhenga Yohova vamwasa olevelela atu enango.