Vwelana naabali naarongoli-u kokami-a!

1-2. N’nga Yohova unokhuziwa nan’ni ninga unofuna niirenga n’ni?

YOHOVA unokhuziwa na mwemo munoirela i-yo vyongo naavwi-u. Yesu atoonga ira ninofwanela dhiveliwangana afwi-u ninga mwemo munovidhiveliwana i-yo okene. (Mat. 22:37-39) Vinothapulela ira ninofwanela riyela rima atu oi kai Makristau afwi-u. Ninofwanela thonyi-edha riya rimau vosazi-edha Yohova Nlungu wenuo “unokhumi-edha dhuwa atu apama na othakalene, thitho unorumbwi-edha dhongwe atu olongomana na o-olongomanene.”—Mat. 5:45.

² Angalive ira Yohova unodhiveliwana atu othene, liye unodhiveliwana maningi atu anom’vwela. (Ju. 14:21) Liye unofuna ira nim’sazi-edhenga. Liye unofuna ira nidhivelanenga maningi naabali na arongoli-u thitho ira naathonyi-edhenga udhivela waimbarimbari. (1 Pe. 4:8; Aro. 12:10) Udhivela uongiwile va lembali, unofwanafwana na wenuo unothonyi-edha i-yo bali-u wenuo unovwelanana i-yo venango fwi-u wavarimani.

3. N’nga nithuulelengan’ni va mwasa wa dhivelo?

³ Udhivela uli ninga mafolori enao anofuneela samaleliwa pama ira taulukule. Rumiwi Paulo atolangi-a Makristau afwee ira: “Mudhowenave dhiveliwana abali.” (Aeb. 13:1) Yohova unofuna ira nidhowenave thonyi-edha udhivela afwi-u. Muyofunjedha yei ninotapanya mwasee ninofuneela i-yo dhiveliwana Makristau afwi-u thitho mwemo munofuneela i-yo dhowanave irangana vyevyo.

MWASIWA NGWAN’NI NINOFUNEELA DHIVELIWANGANA AFWI-U?

4. Movwelana na Salimo 133:1, n’nga ninathonyi-edhe a-vi ira ninosimba vwelalwi-u? (Muone thitho iruthiruthi.)

⁴ Muleri Salimo 133:1. Mulimbo lemba masalimola atoonga ira vwelana na atu enao anom’dhiveliwana Yohova ‘kwapama thitho kosangalali-a’ thitho vyevi pyaimbarimbari. Mutu aonanga muri nlukhulu thitho obaleya dambo nlilothene, unooda i-ya uthuulela. Vyevi vinooda ireya thitho vwelano wenuo Makristau una aliwa. Ninowaonecha abali naarongoli-u ninoonana fendo dhingasi vasumana. N’nga ninathonyi-edha a-vi ira ninoasimba? Naonanga ira abali naarongoli-u mbofuneya maningi pingoni thitho wa i-yo, ninooda roma asimbanga maningi.

5. N’nga atu enango tanokhuziwa a-vi taona nidhivelananga?

⁵ Atu enango tafiya fendo yoroma vamigumanoni anokaana ifunelo taona moda munodhivelana i-yo. Vyevi vinowairi-a simikizela ira tatofwanyadi imbarimbari. Yesu aongile ira: “Atu othene anodha idhiwa ira muli anamafunjedhanga mwadhivelangana.” (Ju. 13:35) Ifwanafwani-o va mwasa wen’na ndi Chaithra, wenuwo uli universidadi thitho unofunjedha Bibilya na Amboni dha Yohova. Liye atorumela ixikarta yoitanela wu gumano wa gawo. Angafile dambo loroma wu gumononi, atoowandela rongola am’funji-a Bibilya ira: “Anamabalanga katinandikhumbarelevo. Mbwenye vagumanula, dambo limbo-i baa-i tatondikhumbarela atu 52! Ndavwa ira Yohova unandithonyi-edha udhivela dhela m’banja leli namiyene thitho ndifuna kala mubanja leli.” Chaithra atoodhowanave funjedha thitho abadiziwile mu yawa ya 2024. Va-eeni aonanga mabasi-u apama thitho moda munodhivelana i-yo, unoroma funa labela Yohova.—Mat. 5:16.

6. N’nga vwelana naabali naarongoli-u unonibarela a-vi?

⁶ Vwelana naabali naarongoli-u unonibarela. Paulo atoolimbi-a Makristau afwee ira: “Malomwee, mudhowenave limbi-ana dambo na dambo, hora iliyothene . . . ira inyengo yakopolo ya vyodawa ya-aumi-e rima wa mutu uliwethene wa nyo.” (Aeb. 3:13) Nasukwala venango naroma dimela mundhila ya longomano, Yohova unooda i-ndi-edha basa Kristau mwinango ira anikami-e. (Sal. 73:2, 17, 23) Thitho nalimbi-iwa vyongo vinoroma niwendela pama.

7. N’nga udhivela unonikami-a a-vi ira nikale ovwelana? (Akolose 3:13, 14)

⁷ Ninofwanya maraeli-o manjinji na mwasa oi nili mugulu lelo atwee anodhilimbi-edha thonyi-edhana udhivela. (1 Ju. 4:11) Mofwanafwani-a, udhivela unonilimbi-a ira ‘nilolelengana nolevelelana na rima othene’ thitho vyevi vinonikami-a ira nivwlanenga. (Muleri Akolose 3:13, 14; Aef. 4:2-6) Ee-no nakala vamigumanoni ninovivwa pama kwaranya moda munovivwela i-yo akala nili mugulu nlilothene lavailambo yavathi.

NITHONYI-EDHENGANA LEMEZO

8. N’nga Yohova unonikami-a a-vi ira nikale ovwelana?

⁸ Vwelano wi-u wavailambo yothene ngodabwi-a. Yohova unonikami-a ira nivwelanenga angalive ira kanili olongomana. (1 Ak. 12:25) Bibilya linoonga ira ‘Nlungu unonifunji-a ira nidhivelanenga.’ (1 At. 4:9) Vyevi vinothapulela ira dhela malembani, Yohova unoniwandela vyongo vinofwanela i-yo irana ira nivwelanenga. Nafunjedhanga thitho a-rela malangi-o a Nlungu, ninokala nifunji-iwanga na Nlungu. (Aeb. 4:12; Yak. 1:25) Vi ndi vyevyo Amboni dha Yohova vinodhilimbi-edha aliwa irana.

9. N’nga ninofunjedhavo n’ni va lemba la Aroma 12:9-13 va mwasa othonyi-edhana lemezo?

⁹ N’nga ndi makhundo avi amadhu a Nlungu enao ananikami-a ira nivwelanenga? Kathuulelani vyaongile Paulo va Aroma 12:9-13. (Muleri.) Madhu anofuna i-yo tapanya mboi “vamwasa othonyi-edhana lemezo, muromenga ngunyo.” N’nga madhu enala anothapulela n’ni? Ninofwanela roma i-yo thonyi-edha atu enango udhivela waimbarimbari moira vyongo mowalevelela, awachela pama nyumbani wi-u thitho ava-a vyongo. (Aef. 4:32) Kaninofwanela dedi-edha ira bali venango rongola arome nithonyi-edha udhivela. Ninofwanela roma ndi i-yo irana vyevyo. Pyovweya ira Yesu aongile ira: “Va-a unosangalali-a maningi kwaranya wachela.”—May. 20:35.

10. N’nga ninakaena a-vi thindhi va mwasa othonyi-edha lemezo? (Muone thitho iruthiruthi.)

¹⁰ Yoiri-a ifunelo choi angaongile ira vamwasa othonyi-edhana lemezo niromenga ndi-iyo, Paulo atoonilimbi-a thitho ira “nikale athindhi a-kala apwando.” Mutu wathindhi unolimbi-edha basa thitho unoilaba na rimee othene. Lemba la Sanganiko 3:27, 28 linonilimbi-a ira: “Khuimwanane irela vyapama atu enao anofwanela wee airela yvongo vyapamavyo akala unooda akami-a.” Ee-no naona mutu mwinango angali vanyarwani ninofwanela dhilimbi-edha m’kami-a. Kaninoira vyongo movwalavwali-a venango thuulelanga ira mutu mwinango unom’kami-a.—1 Ju. 3:17, 18.

11. N’nga chini inanikami-e ira nivwelanenga naafwi-u?

¹¹ Ndhila inango inathonyi-edhele i-yo ira ninolemeza afwi-u khuwalevelela mombaranya tanidawela. Lemba la Aefeso 4:26 linoonga ira: “Dhuwa kalivire mungali onyanyuwene.” Mwasiwa ngwan’ni lembali linoonga vyevyi? Versu 27 linoonga ira: ‘Kamum’va-e ngari Namanami-a.’ Madhwee, Yohova utooniwandela moweli-edhaweli-edha ira nilevelelengana. Lemba la Akolose 3:13 linonilimbi-a ira ‘nidhowenganave levelelana na rima wethene.’ Levelela atu enao anonidawela unonikami-a ira nivwelanenga. Nairanga vyevyi vinokami-a ira nikale ovwelana mokami-iwa na zimu ochena vokala mwarendele wenuo uli ninga yomangelela yovwelani-a. (Aef. 4:3) Mogwandela ninooda onga ira levelelana unonikami-a ira nivwelanenga thitho nikalenga mwarendele.

12. N’nga Yohova unanikami-e a-vi ira nilevelelenga afwi-u?

¹² Pyaimbarimbari ira hora dhinango vinooda nirucha levelela atu enango tanidawela. Mbwenye ninooda kwakwaneli-edha mokami-iwa na zimu ochena. Vasogolo vokami-iwa kaana udhivela waimbarimbari thitho thindhi, Malemba anonilimbi-a thitho ira: “Mukale olimba mosogoleliwa na zimu.” Mutu wenuwo unosogoleliwa, unokala wathindhi maningi mokami-iwa na zimu ochena. (Muone madhu achindo ava lemba la Aroma 12:11.) Ee-no zimu ochena unooda nikami-a ira nithonyi-edhengana udhivela waimbarimbari thitho nilevelelengana na rima wethene. Ngumwasee ninovepha Yohova ira anikami-enga.—Luk. 11:13.

“VARIVINYU KAVAKHALE KANGANA”

13. N’nga chini inairi-e ira na-avwelanenga?

¹³ Pingoni munokala atu o-iyana amaziza thitho makalelo. (1 Ti. 2:3, 4) Mbwenye akala kaninoira polepole, i-yana weu unoniiri-a ira ni-iyane mathuulelo vamwasa ninga vyowara, vibalei-a, makalelo thitho vyosangalali-a. (Aro. 14:4; 1 Ak. 1:10) Ndivinofuna Nlungu ira nidhivelanenga, ninofwanela kala osamala ira na-aonenga ira mathuulelwi-u mbapama kwaranya mathuulelo aatu enango.—Afl. 2:3.

14. N’nga ninofwanela dhilimbi-edha irana n’ni, ninga mwasiwa ngwan’ni?

¹⁴ Nikami-enga thitho ira pingoni mukale vwelano vodhilimbi-edha kala olimbi-a hora dhothene. (1 At. 5:11) Vachineneeva atu anjinji enao takhumi-iwele pingoni venango enao ta-iidhe gumaneya atowelela pingoni. Ninofwanela awachela mosangalala. (2 Ak. 2:8) Ifwanafwani-o ndi vyam’mwireele rongola mwinango wenuo awelele wu Nyumbani ya Umwene vangavirile vyawa 10. Liye aongile ira: “Mutu uliwethene anoosangalala na miyo thitho ndimwenyula.” (May. 3:19) N’nga rongolula avivwa a-vi? Liye aongile ira, “vyatoondikami-a idhiwa ira Yohova unaandikami-a ira ndirome okoka kala osangalala.” Nakalanga olimbi-a waatu othene, Kristu unooda ni-indi-edha basa vosisimula atu enao ‘anolaba basa lonchenyeli-a na yonyemela.’—Mat. 11:28, 29.

15. N’nga ndi ndhila dhinando dhivi dhinalimbi-edhelena i-yo vwelano? (Muone thitho iruthiruthi.)

¹⁵ Vyoonga vi-u vinooda kami-a thitho ira nivwelanenga. Lemba la Yobo 12:11 linoonga ira: “N’nga kai vale libaru lino-iyani-a madhu ninga mwemo lumi muno-iyani-edha aliwa dhiva wa vyodya?” Mutu oidhiwa piya unowesa yodyayee a-anava-e atu enango. I-yo thitho ninofwanela thuulela na-anaonge vyongo vinofuna i-yo onga. (Sal. 141:3) Nionechechenga ira vyongo vinofuna i-yo onga vikalenga vyolimbi-a, vyosisimula thitho ‘vyokami-a atu anofuna vuruwana.’—Aef. 4:29.

16. N’nga mbani simbwasimbwa unofwanela dhilimbi-edha limbi-anga atu enango?

¹⁶ Alombwana thitho anamabala anofwanela vilimbi-edha ira vyoonga viwa vikalenga vyolimbi-a. (Ako. 3:19, 21; Tit 2:4) Andimuwa avapingoni, naaliwene thitho mbaanamakumbiza a mabila a Yohova anofwanela thitho kala olimbi-a. (Esa. 32:1, 2; Agl. 6:1) Sangani mwinango wa Bibilyani unoonga ira: “Madhu oongiwa va hora yofwanelela mbapama maningi.”—San. 15:23.

“NITHONYI-EDHENGANA UDHIVELA WAIMBARIMBARI MU VYOIRA VI-U”

17. N’nga ninasikimizeli-e a-vi ira nitokaana udhivela waimbarimbari waabali naarongoli-u?

¹⁷ Rumiwi Juwau atonilimbi-a ira “kanidhivelanenga na madhu baa-i venango na valomoni baa-i, mbwenye nithonyi-edhengana udhivela waimbarimbari mu vyoira vi-u.” (1 Ju. 3:18) Ninofwanela dhivelangana naabali naarongoli-u khumela vathi va rima. N’nga ninairena a-vi vyevi? Nawaredhanga maningi naabali naarongola paevo vanoroma i-yo dhivelana thitho vwelana maningi. Ee-no mukaengana hora yowaredha naabali naarongola vamigumanoni thitho muurumiwini. Muwendelenga thitho atu enango. Nairangana vyevi ninothonyi-edha ira ‘Nlungu unonifunji-a ira nidhivelanenga.’ (1 At. 4:9) Ninodha sikimizela ira “ndi pama thitho vyosangalali-a maningi abali takala vambo-i movwelana.”—Sal. 133:1.