MURU OFUNJEDHA 15
NYUMBO 30 Atate Wanga, Mulungu Wanga Ndiponso Bwenzi Langa
“Kwivela wa Nlungu chiyongo yapama maningi” wa i-yo!
“Mbwenye miyo, kwivela wa Nlungu chiyongo yapama maningi.”—SAL. 73:28.
VINOFUNA I-YO FUNJEDHA
Muyofunjedha yei ninotapanyani vinaire i-yo ira Yohova akale fwi-u thitho irana vyevyo munanikami-edhele aliwa.
1-2. (a) N’nga ninofuneela n’ni ira mutu mwinango akale fwi-u? (b) N’nga ninotapanya n’ni muyofunjedha yei?
N’NGA nyo mutokaana fwinyu wavarimani? N’nga mwaromile a-vi vwelana na liye? Vinooneya ira mwatooroma waredha na liye, idhiwa nyarwa dhinogumanana liye, idhiwa vinodhiveliwana liye thitho vinoidanana liye. Venango mwatoona ira utokaana makalelo apama enao afuna nyo a-arela thitho vyevi vyatouwiri-ani ira mum’dhiveliwengana maningi.
2 Ira mutu akale fwinyu vanofuneeleya hora thitho thindhi. Ndi mwemo munokalela aliwa uxamwalinyu na Yohova. Muyofunjedha yei ninotapanyani vinaire i-yo ira Yohova akale fwi-u thitho irana vyevi unonikami-edhela aliwa. Yoroma dhoweni nitapanyeni mwasiwa unofwanelela i-yo vilimbi-edha ira Yohova akale fwi-u wavarimani.
3. Mwasiwa ngwan’ni ninofwanela thuulela upama okala vauxamwali na Yohova? Muongemo.
3 Mo-okaikela, munooda rumela ira kala fwee wa Yohova kwapama. Mbwenye thuulela upama okala fwee wa Yohova unooda nilimbi-a ira nidhowenave limbi-a uxamwalula. (Sal. 63:6-8) Mofwanafwani-a, ninooda idhiwa ira udya vyodya vyapama, iranga mawaredhelo olimbi-a manungo, gona mokwakwanela thitho umwa ma-inje manjinji kofuneya. Mbwenye atu anjinji katinothuulela vyongo vyevi thitho katinosamalela tutuliwa. Mbwenye mutu athuulela upama oiranga vyongo vyevi paevo vanoirana liye maningi. Mofwanafwana na vyevi, ninoidhiwa ira kala vauxamwali wapama na Yohova kwapama. Mbwenye thuulela upamuo ndi weo unanilimbi-e ira nivilimbi-edhenga ulukhuli-a uxamwalula.—Sal. 119:27-30.
4. N’nga madhu anofwanyeya va Salimo 73:28 tanothonyi-edha ira mulimbo lemba Salimula adhivwa a-vi?
4 Muleri Salimo 73:28. Salimo 73 lalembiwile na Asafu venango zizalee. Mulimbo lemba salimula ali levi weniyo asakuliwile ira amaombenga nyumbo vakachisini wa Yohova. Vinooneya ira liye ali angam’labele Yohova wahora indendai. Mbwenye vahora inango afuneela vithuucha thitho thuucha atu enango ira kwivela wa Nlungu kwapama. N’nga upamee ngoi a-vi?
“KWIVELA WA NLUNGU” UNOIRI-A IRA NIKALENGA OSANGALALA
5. (a) Mwasiwa ngwan’ni ninosangalala nakala vauxamwali na Yohova? (b) Movwelana na lemba la Sanganiko 2:6-16, n’nga zelu dha Yohova dhinanikami-e a-vi, n’nga dhinanibarele a-vi?
5 Nakala va uxamwali wapama na Yohova ninokala osangalala maningi. (Sal. 65:4) Mwasiwa ngwan’ni vili-eeno? Yoroma, vyongo vinoniwendela pama namwasa o-arela malangi-o azelu anofwanyeya M’madhwee. Malangi-o enala tanonivunela ira na-airenga vyothakala thitho na-asimbwenga dawi-a vyongo. (Muleri Sanganiko 2:6-16.) Thitho Bibilya linoonga ira: “Osangalala ndi mutu unokaana zelu, na mutu unofunjedha vyongo vile vinam’kami-e kala ozindiyela.”—San. 3:13.
6. N’nga yairi-idhe chini ira mulimbo lemba masalimula asukwale?
6 Pyaimbarimbari ira afwee a Yohova tanooda sukwala. Vahora inango mulimbo lemba Salimo 73 atoosukwala namwasa othuulela vyongo vyodaweya. Liye atoosukwala namwasa oona atu othakala o-oova Nlungu venango o-o-arela makhundo a Nlungu vyongo viawendelanga pama. Liye anoona modaweya ira atu odawa thitho odhiulukhuli-a kalanga ofuma, atutu lapama thitho katagumanana nyarwa. (Sal. 73:3-7, 12) Liye atoodhodhomeya mathuulelo moi vahora inango atooroma kaikela akala ira m’labela Yohova kwapamadi. Namwasa osukwala liye aongile ira: “Mwaimbarimbari, ndicheni-idhe rimanga vapezi, thitho ndito-ambamo mandhani mwanga vapezi vothonyi-edha ira ndili o-odawa.”—Sal. 73:13.
7. N’nga inanikami-e chini ira ni-iye sukwala? (Muone iruthiruthi.)
7 Angalive ira mulimbo lemba Salimula atoosukwala maningi, atooira vyongo vyevyo vyam’kami-idhe ira achinje mathuulelwee. Liye atoovolowa “limburo lopambuleya latitimi-o la Nlungu” thitho Yohova atom’kami-a. (Sal. 73:17-19) Yohova wenuo ndi fwi-u wavarimani unoidhiwa nasukwala. Yofuneya maningi ndi lobela wa liye thitho a-relanga malangi-o enao anoniva-a liye dhela m’madhwee thitho pingoni. Naira ee-no ninooda kaana kopolo dooda vilelana nyarwa dhi-udho. Masiki ira vyosukwali-a vikale vinjinji, Yohova unooda nididili-a, nikami-a kala osangalala.—Sal. 94:19.a
Levi wenuo alembile Salimo 73, angaimenle “m’mamburo ophambuleya a Nlungu” (Muone ndima 7)
“KWIVELA WA NLUNGU” UNONIKAMI-A KAANA INGUMI YAPAMA THITHO IDEDI-EDHO
8. N’nga kala vauxamwali na Yohova unanikami-e mundhila dhiivi?
8 M’kwivela Nlungu unonikami-a thitho mundhila dhinango dhofuneya. Yoroma, ninokaana ingumi yapama. Yanambili, ninokaana idedi-edho yakopolo. (Jer. 29:11) Dhoweni nitapanyeni makhundo menli apamala.
9. N’nga kala vauxamwali na Yohova unanikami-e a-vi ira nikaena ingumi yapama?
9 Nakala vauxamwali wapama na Yohova ninokaana ingumi yapama. Atu anjinji malamboano enao ta-anororomela ira utokala Nlungu, katinoidhiwa mwasee ukalele i-yo naingumi, thitho tanothuulela ira vadhavira hora atu othene tanodha wukwa. Mbwenye i-yo nitofunjedha madhu a Nlungu thitho ninororomela ira Nlungu “utokalaodi thitho unovelela yotuva waatu enao anom’funafuna na rima othene.” (Aeb. 11:6) Yohova atoonipanducha ira nim’labelenga ee-no masiki malamboano ninokala osangalala nam’labelanga.—Dot. 10:12, 13.
10. Movwelana na lemba la Salimo 37:29, n’nga atu anom’nyindela Yohova tana idedi-edho yoi a-vi?
10 Atu anjinji tanoona ira ingumi khudhowanga basani, kaana banja thitho lokotanga kobiri ira tadhadhi-indi-edhenga basa tadhaulula. Vya Nlungu katinovithuulela navang’onovene. Mbwenye i-yo nitoidhiwa ira Yohova unosamalela arumiwee. (Sal. 25:3-5; 1 Ti. 6:17) Ninororomela Nlungu thitho nitoidhiwa ira unodha kwakwaneli-edha vilanyedhile liye. Nitokaana idedi-edho ira sogolou ninodha m’lambela modhowa nodhowa Paradaizoni.—Muleri Salimo 37:29.
11. N’nga inoireya chini nakala vauxamwali na Yohova, n’nga liye unodhivwa a-vi?
11 Kala vauxamwali na Nlungu kokami-a mundhila dhinango. Mofwanafwani-a, Yohova utonilanyedha ira unodha nilevelela nachinyuwa. (Esa. 1:18) Ee-no kaninokalela viombanga landu na vyongo vyadawi-idhe i-yo walelene. (Sal. 32:1-5) Thitho ninokala osangalala voidhiwa ira ninom’sangalali-a Yohova. (San. 23:15) Onga mwaimbarimbari, vatokala maraeli-a manjinji enao anafwanye i-yo namwasa okala vauxamwali na Nlungu. N’nga ninalimbi-e a-vi uxamwalula?
N’NGA NINADHOWENAVE A-VI “M’KWIVELA NLUNGU”?
12. N’nga ndi vyongo viivi vinaire nyo ira mukale vauxamwali na Yohova?
12 Akala muli Kristau obadiziwa, vinooni-a ira muli wale vauxamwali na Yohova. Mutofunjedha makhundo manjinji aimbarimbari oonga vya Yohova Nlungu na Kristu Yesu, mwatoochinyuwa madawinyu, munororomela maningi Nlungu thitho munovilimbi-edha irana vinofuna liye. Mbwenye ira nikaleve fwee wa Nlungu ninofwanela dhowanave irangana vyevi.—Ako. 2:6.
13. N’nga ndi vyongo viivi viraru vinanikami-e ira nidhowenave kala vauxamwali na Yohova?
13 N’nga chini inanikami-e ira nidhowenave kala vauxamwali na Yohova? (1) Ninofwanela dhowanave leri thitho funjedha madhu a Nlungu. Nafunjedhanga, ifunelo yi-u kikalenga idhiwa makhundo oroma oonga vya Nlungu khabe. Mbwenye nisakesakenga vinofuna Nlungu ira niire, a-relanga makhundo afwaidhe i-yo m’madhwee. (Aef. 5:15-17) (2) Ninofwanela limbi-a iroromelwi-u vothuulela umboni oi liye unonidhiveliwana. (3) Nidhowenave idanana vyongo vinoidanana Yohova thitho rambelanga atu anoirana vyevyo.—Sal. 1:1; 101:3.
14. Movwelana na lemba la 1 Akoritiyo 10:31, n’nga ninaire a-vi ira nim’sangalali-enga Yohova malambo othene? (Muone thitho iruthiruthi.)
14 Muleri 1 Akoritiyo 10:31. Nidhowenave iranga vyongo vinom’dhiveli-a Yohova. Vatokala vyongo vinjinji vinofuneela i-yo irana a-kala kalelangave dhowa malaleela venanga fwanyeya va migumanoni. Vyoira vi-u dambo nlilothene vim’dhiveliwi-enga Yohova. Mofwanafwani-a, Yohova unosangalala nakalanga oona rima va vyongo vyothene thitho va-a atu enango vyongo vi-u. (2 Ak. 8:21; 9:7) Liye thitho unosangalala nasamalilanga tutuli-u. Mofwanafwani-a, ninofwanela kala osamala na vyongo vinodya i-yo venango umwa irangana vyongo vinanikami-e ira nikaena tutu lapama. Yohova unonidhiveliwana maningi aona ira ninaavilimbi-edha irana vyongo vinom’sangalali-a masiki ira vyongovyo vioneenga ninga ving’ono.—Luk. 16:10.
Yohova unosangalala nawendi-anga karo mosamala, iranga mawaredhelo olimbi-a manungo, udya yodya yapama thitho kala atu ova-a (Muone ndima 14)
15. N’nga Yohova unofuna ira niirenga a-vi na atu enango?
15 Yohova unoriyela rima atu olongomana na o-olongomanene. (Mat. 5:45) Liye thitho unofuna ira i-yo thitho niirenga vyongo mothuulela atu enango. Mofwanafwani-a, Kristau unofwanela ira ‘a-aongelenga, . . . mutu uliwethene vyongo vyothakala, thitho kadhiveliwenga kangana, mbwenye akale opwaseya waatu othene.’ (Tit. 3:2) Ee-no kaninonyoza atu enango namwasa oi katinororomela Yohova. (2 Ti. 2:23-25) Ninokala vauxamwali na Yohova navilimbi-edhanga kala oriya rima thitho othuulela afwi-u.
NINOODA KALA VAUXAMWALI NA YOHOVA MASIKI NINGADAWI-IDHE VYONGO VINANGO
16. N’nga mulimbo lemba Salimo 73 aromile dhivwa a-vi vangavirile hora?
16 N’nga munaire a-vi akala mutoroma dhiona ira kamuli ofwanela dhiveliwiwa na Yohova? Ninga muongele i-yo wale, mutu wenuo alembile Salimo 73 atokaana thitho mathuulelo enala. Liye atoonga modhikhumbanyedha ira: “Manyalwanga ta-anle vang’ono dimela, manyalwanga ta-anle vang’ono theredhuwa.” (Sal. 73:2) Liye aongile ira rimanga wanoondipa maningi, ali o-okaana zelu, thitho ali ninga inyama yo-othuulela vamethoni va Yohova. (Sal. 73:21, 22) N’nga atoofiya vothuulela ira Yohova kanom’dhiveliwanave na mwasa wa vyadawi-ile liye?
17. (a) N’nga mulimbo lemba masalimo airile a-vi vahora yasukwanle liye maningi? (b) N’nga ninofunjedhavon’ni va ifwanafwani-oee? (Muone thitho iruthiruthi.)
17 Mbwenye kavavirile hora indendai ira mulimbo lemba Salimula zindiyela ira Yohova ka-iide. Vinooneya ira angasukwanle maningi atoozindiyela ira afuneela limbi-a uxamwalee na Yohova. Vale liye aongile ira: “Mbwenye vachineneeva miyo ndili na nyo [Yohova] hora dhothene. Mutondi-inda dhandha langa lodyana. Munondisogolela na mathuulelwinyu thitho vasogolovee munodha ndiva-a titimi-o.” (Sal. 73:23, 24) I-yo thitho nasukwala nim’vepenga Yohova ira aniva-e kopolo. (Sal. 73:26; 94:18) Masiki ira nyalo li-u litheredhuwe wahora yoyeva, kanikaikelenga ira Yohova tilipandhe li-u thitho “ngokozeya nilevelela.” (Sal. 86:5) Vahora inosukwala i-yo maningi paevo vanofuneela i-yo limbi-a uxamwali-u na Nlungu.—Sal. 103:13, 14.
Naona ira nitofooka mwauzimu, ninofwanela kwivela wa Yohova nopingeyanga maningi nolambela wi-u (Muone ndima 17)
NIDHOWENAVE “KWIVELA WA NLUNGU” FIYEDHELA DHOWA NODHOWA
18. Mwasiwa ngwan’ni ninaonge ira kwivela wa Yohova khuna madile?
18 Kavali madile vamwasa om’kwivela Nlungu thitho m’mwidhiwa pama. Bibilya linoonga ira ndhila dha Yohova thitho zeludhee “torucha dhivwechecha.”—Aro. 11:33.
19. N’nga wama Salimo unonisikimizeli-edha vyan’ni?
19 Salimo 79:13 Linoonga ira: “I-yo aatu thitho mabila anokumbiza nyo ninodha usimbani modhowa nodhowa. Ninodho onga ira muli ofwanelela lambeliwa wu maziza na maziza.” I-yo thitho nadhowanave limbi-a uxamwali-u na Nlungu ninodha wachela maraeli-o fiyedha modhowa nodhowa. Mofwanafwana na mulimbo lemba masalimula, ninodha onga molimba rima ira: “Nlungu tilipandhe la rimanga thitho yotuva yanga fiyedha modhowa nodhowa.”—Sal. 73:26.
NYUMBO 32 Khalani Kumbali ya Yehova!
a Atu enao tanosukwala venango vikhumbanyedha wa hora indendai tanofuneela kami-o la ximitari. Ira muidhiwe vinjinji muone Nsanja ya Olonda, N. 1 2023.