Va-a unosangalali-a maningi kwaranya wachela

1-2. N’nga panduchiwa mundhila yoi nisangalalenga namwasa ova-a a-kala wachela unonikami-a?

YOHOVA anipanduchile mundhila yoi nisangalalenga maningi nakala ova-a. (May. 20:35) N’nga vyevi vinothapulela ira kaninosangalala nawachela? Kabe. I-yo othene ninoidhiwa moda munosangalalela i-yo nawachela yotuva. Mbwenye, ninosangalala maningi nava-a atu enango vyongo. Thitho Yohova atoonipanducha mundhila yen’na ira inikami-enga. Mwasiwa ngwan’ni ninoonga ee-no?

² Ndhila inipanduchele Yohova, inonikami-a ira niodenga wenjedhela imwerumweru yi-u. Ninooda wenjedhela imwerumweru yi-u nakaangana hora yoi niva-enga atu enango vyongo. Onga imbarimbari, ndhila yanipanduchele Yohovila njapama maningi.—Sal. 139:14.

3. Mwasiwa ngwan’ni ninooda onga ira Yohova ndi “Nlungu waimwerumweru”?

³ Malemba anosikimizela ira va-a unonikami-a kala osangalala, ee-no pyo-odabwi-a ira anoonga thitho ira Yohova ndi “Nlungu waimwerumweru.” (1 Ti. 1:11) Liye ngunamava-a lukulu thitho ngwaromi-idhe va-a. Rumiwi Paulo atoonga ira namwasa wa liye, “nitokaana ingumi, ninowenda thitho nitokalao. (May. 17:28) “Vyotuva vyothene vyapama na vyolongomana,” vinokumela wa Yohova.—Yak. 1:17.

4. Chini inanikami-e ira nisangalalenga maningi?

⁴ I-yo othene ninofuna kala osangalala maningi namwasa ova-a. Ira vyevi viodeye ninofwanela m’sazi-edhanga Yohova vamwasa ova-a. (Aef. 5:1) Ninotapanyani thitho vinaire i-yo akala atu enango katinosimba vyongo vinoava-a i-yo. Vyevi vinonikami-a ira nidhowenganave kala osangalala, venango wenjedhela imwerumweru yi-u namwasa ova-a.

NIM’SAZI-EDHENGA YOHOVA VAMWASA OVA-A

5. N’nga ndi vyongo vinango viivi vinoniva-a Yohova?

⁵ N’nga Yohova athonyi-edhe mundila dhivi ira ngova-a? Dhoweni nitapanyeni myasa mingasi. Yohova unoniva-a vyongo vyofuneeleya vaingumii-u. Pyaimbarimbari ira kaninakaena vyongo vyothene vinofuna i-yo. Mbwenye Yohova unoniva-a vyongo vyofuneeleya vaingumii-u. Mwaifwanafwani-o, unoniva-a vyodya, vyowara na vogona. (Sal. 4:8; Mat. 6:31-33; 1 Ti. 6:6-8) N’nga Yohova unaaniva-a baa-i vyongo vyofuneya namwasa oi chiizoyee? Kabe. Mwasiwa ngwan’ni unoniva-a vyongo vyevi?

6. N’nga ninofunjedhavon’ni va lemba la Mateu 6:25, 26?

⁶ Mogwandela, ninooda onga ira Yohova unoniva-a vyongo vyofuneeleya vaingumini namwasa oi unonidhiveliwana. Kathuulelani madhu aongile Yesu anofwanyeya valemba la Mateu 6:25, 26. (Muleri.) Yesu atoofunji-a vo-indi-edha basa vyopanduchiwa. Voonga vya mbalame Yesu aongile ira: “Aliwa kadhinodhala mbeu venango a-nda venango thitho lokota vyodya mathathani.” Adhamale atoonga okoka ira: “Mbwenye Babinyu wadhulu unodhidyi-a.” Voi e-no atoofuka ira: “N’nga nyo kamuli apareso yavadhulu kwaranya mbalamedho?” Veva likundo toi Yohova unoona ira arumiwee mbapereso yavadhulu kwaranya vinyama. Akala Yohova unosamalela vinyama, kaninofwanela kaikelanga ira unodha nikami-a fwanya vyongo vyofuneya. Liye uli ninga baba waudhivela wenuo unodhilimbi-edha fwanyela banjalee vyongo vyofuneeleya namwasa waudhivela.—Sal. 145:16; Mat. 6:32.

7. N’nga ninasazi-edhe a-vi Yohova vamwasa ova-a? (Muone thitho iruthiruthi.)

⁷ Molandana na Yohova, i-yo thitho ninooda ava-a atu enango vyongo namwasa owadhiveliwana. Mwaifwanafwani-o, n’nga mutom’muidhiwa Kristau mwinango wenuo unofuneela vyodya venango vyowara? Yohova unooda u-indi-edhani basa ira mum’kami-e fwanya vyongo vyofuneeleya. Atu a Yohova anoidhiweyana ira anokami-ana vaireya masoka avilengo. Mwaifwanafwani-o, vahora ya sau wa COVID-19, abali naarongola tanoovelela vyodya vyowara na vyongo vinango waatu enao tarucheya. Thitho atu anjinji tanoovelela kobiri dhokami-ana vabasa yavailambo yothene. Vyevi vyatookami-a ira gulu livelelenga kami-o vailambo yothene. Abali naarongola tatooira vyongo movwelana na lemba la Aebere 13:16 lelo linoonga ira: “Kamudiwale irana vyongo vyapama nogawela atu enango vyongo vinanyo, namwasa oi Nlungu unosangalala na sembe dhoi e-no.”

8. N’nga kopolo dha Yohova ndhinonikami-a a-vi? (Afilipi 2:13)

⁸ Yohova unovelela kopolo. Yohova utokaana kopolo dho-okaana madile thitho unosangalala velela kopolodhee waarumiwee. (Muleri Afilipi 2:13.) N’nga mwatooroma lobelavo ira Yohova auva-eni kopolo naifunelo yoi murambele vyowesedha venango ira muvilele yorucha ilukulu? Venango mwatoom’vepavo ira auva-eni kopolo dhoi muode irana vyongo vyofuneeleya vadambolo. Akala liye atoouva-ani kopolo mungam’vepile, munooda rumelela vyalembile rumiwi Paulo. Liye aongile ira: “Va vyongo vyothene ndinokaana kopolo kumela wa Nlungu unondiva-a kopolo dhinofuneela miyo.”—Afl. 4:13.

9. N’nga ninasazi-edhe a-vi Yohova vokami-a atu enango na kopolo dhi-u? (Muone thitho iruthiruthi.)

⁹ Angalive ira nili o-olongomana, ninooda m’sazi-edha Yohova vokami-a atu enango na kopolo dhi-u. Pyaimbarimbari ira kaninaode va-a mutu kopolo, mbwenye ninooda indi-edha basa kopolo dhi-u ira naakami-e. Mwaifwanafwani-o, akala vatokala Kristau oulula venango unobulela, ninooda m’kami-a mabasa avandhe venango m’gulela vyongo. Akala pyoodeya ninooda laba basa vambo-i naaliwa yocheni-a va Nyumbani ya Umwene. Na-indi-edhanga basa kopolo dhi-u mundhila dhedhi, ninokami-a atu enango enao anom’lambela Yohova.

10. N’nga madhwi-u analimbi-e a-vi atu enango?

¹⁰ Muthuulelenga ira madhu mbakopolo. N’nga vatokala mutu mwinango unom’mwidhiwa nyo ira unooda dhivwa pama mwam’simba kumela vathi varima? N’nga munom’mwidhiwa mutu mwinango wenuo unofuneela limbi-iwa? Akala ndi e-no, munooda ira pama onga na mutuo. Munooda irana vyevyo voira dhowa maongana liye, m’ligarela, m’lembela karta venango m’tumizela mamesage. Kaiira munofuneela onga mwadodoliso maningi. Madhu oyeva thitho okumela vathi varima, anooda m’kami-a Kristau fwinyuo ira akaleve ororomeleya venango ira arome dhivwa pama vanyarwa dhinogumanana liye.—San. 12:25; Aef. 4:29.

11. N’nga Yohova uno-indi-edha a-vi basa zelu dhee?

¹¹ Yohova unova-a zelu. Yakobo atoolemba ira: “Akala mutu mwinango unorambulela zelu, avephenga wa Nlungu thitho liye unodham’va-a, namwasa oi liye unovelela modhala mandha waatu othene thitho unovelela mo-oumeleliwa.” (Yak. 1:5; madhu achindo.) Lembali linothonyi-edha ira Yohova kanoumeleliwa na zeludhee, liye unodhivelela waatu modhala mandha. Thitho lembali linoonga ira Yohova ava-anga zelu unoonga “mo-onyoza” venango ira “mo-ofwanyela mutu uliwethene mwasa.” Liye kanoiri-a ira nidhionenga ninga atu o-ofuneya namwasa oi nitom’vepha ira anisogolelenga. Mbwenye unonilimbi-a ira nim’vephenga zelu.—San. 2:1-6.

12. N’nga ndi vahora ivi vanava-e i-yo atu enango zelu?

¹² N’nga ninam’sazi-edhe a-vi Yohova vamwasa ova-a atu enango zelu? (Sal. 32:8) Atu a Yohova atokaana ngari ilukulu yofunji-a atu enango vyongo vinoidhiwa aliwa. Mwaifwanafwani-o, ninofunji-a anamalaleela achineneeva moda unalaleele aliwa. Andimuwa avapingoni anokami-a moleva rima arumiwi okami-a thitho abali obadiziwa ira tasamalelenga pama vizo viwa pingoni. Thitho atu enango ana dodoliso lomanga, anofunji-a afwiwa ira talabenga vambo-i basa yomangamanga mugulu li-u.

13. N’nga nafunji-anga atu enango, ninasazi-edhe a-vi moda Yohova munova-ela liye zelu?

¹³ Atu anofunji-a afwiwa, anofwanela sazi-edha moda Yohova munova-a liye zelu. Muthuulelenga ira Yohova unova-a zelu modhala mandha. I-yo thitho nafunji-anga atu enango vyongo viidhi i-yo, ninofwanela irangana modhala mandha. Kaniovenga funji-a atu enango vyongo voova ira anodha nilanda limburo. Kaipama thuulelanga ira: ‘Ndafunjedhile ndekene, naliyene thitho afunjedhe ekene.’ Rima wenuo ngo-ofuneya vari vaatu a Nlungu. Malomwee ninoira vyongo vyothene vinaode i-yo ira naafunji-e yongo iliyothene iidhi i-yo kalanga ninga “ninaava-a ingumii-u.” (1 At. 2:8) Ninodedi-edhela ira “naaliwene thitho tadha kale ofwanelela funji-a atu enango.” (2 Ti. 2:1, 2) Naira ee-no, ninokami-a atu enango ira takale ova-a modhala mandha thitho osangalala.

AKALA ATU ENANGO KATINOSIMBA NAAVA-A VYONGO

14. N’nga atu anjinji anoiran’ni naava-a vyongo?

¹⁴ Nava-a vyongo simbwasimbwa abali naarongoli-u, hora dhinjinji anosimbecha. Anooda nilembela karta venango nisimba mundhila dhinango. (Ako. 3:15) Mutu anisimba moi e-no vinonisangalali-a maningi.

15. N’nga ninofwanela thuulelan’ni akala atu enango katinisimbile?

¹⁵ Imbarimbari choi kai hora dhothene vevo atu vanosimba aliwa vyongo viirile i-yo. Hora dhinango ninooda velela hori-u, kopolo na vyongo vi-u mbwenye vasogolovee, dabwanga ira mutuo kanonisimba vavyongo vim’mwirele i-yo. Akala vyevi vitoniireela, n’nga ninaire a-vi ira na-anyanyuwe nodhowanave kala osangalala? Nithuulelenga madhu alemba vakumenle yofunjedha yei, la Mayirelo 20:35. Kaiira ninosangalala na vyongo vinoira mutu nam’va-a vyongo. Ninoodave kala osangalala masiki vioneenga ira mutuo kanosimba. N’nga chini inanikami-e? Dhoweni nioneni vyongo vingasi.

16. N’nga nithuulelengan’ni naava-a atu enango vyongo?

¹⁶ Mathuulelwi-u takalenga osazi-edha Yohova. Liye unovelela vyongo vyapama waatu mo-obala akala anosimba venango kabe. (Mat. 5:43-48) Yohova unolanyedha ira navelelanga vyongo “mo-odedi-edhela wachela yongo iliyothene,” pyoi “yotuva yi-u inodha kala ilukulu.” (Luk. 6:35) Madhu oi “yongo iliyothene” anooda thapulela thitho vyevyo vinaire atu enango vothonyi-edha simba. Akala atonisimba venango kabe, hora dhothene Yohova unodha niweli-edha namwasa wa vyongo vyapama viirele i-yo atu enango thitho namwasa ‘ova-a mosangalala.’—San. 19:17; 2 Ak. 9:7.

17. Chini inanikami-e kaana mathuulelo ofwanelela? (Luk. 14:12-14)

¹⁷ Likundo lava lemba la Luka 14:12-14. (Muleri.) Linooda nikami-a kaana mathuulelo ofwanelela nava-anga vyongo. Kai vyodaweya va-a vyongo atu anaode niva-a thitho vyongo sogolou. N’nga a-vi akala nitozindiyela ira hora dhinango ninova-echa vyongo vofuna ira nidhafwanye vyongo vinango sogolo? Ninooda ira pama wesedha vyongo vyaongile Yesu. Ninooda dhilimbi-edha va-a vyongo mutu um’mwidhi i-yo ira kananiva-e yongo iliyothene. Naira e-no ninooda sangalala namwasa oi ninodha kala nim’sazi-dhanga Yohova. Mathuulelo enala anodha nikami-a ira nikaleve osangalala angalive ira atu enango katinosimba.

18. N’nga ninofwanela iranan’ni, n’nga mwasiwa ngwan’ni?

¹⁸ Nirambelenga kaikela vifunelo vyaatu enango. (1 Ak. 13:7) Akala mutu mwinango kathonyi-edhe simba vavyongo vim’mwirele i-yo, ninooda dhifuka ira: ‘N’nga mutula ngo-osimbadi, venango ute diwala simba?’ Pyoodeya ira vatokala vyongo viiri-idhe ira a-asimbe mundhila dhathuulela i-yo. Atu enango anokala tasimbanga na rimani mbwenye imwanananga thonyi-edha simbao. Atu enango anooda kaangana manyadho takami-iwanga simbwasimbwa akala ndulimu aliwa mbakami-a atu enango. Akala vyongo vili a-vi, udhivela ngunanikami-e ira na-akaikelenga vifunelo vya Makristau afwi-u nodhowanave kala osangalala.—Aef. 4:2.

19-20. N’nga leva rima unanikami-e a-vi naava-anga atu enango vyongo? (Muone thitho iruthiruthi.)

¹⁹ Mukalenga oleva rima. Vamwasa ova-a modhala mandha, Mwene Solomu atoolemba ira: “Ponya pawaa vama-injeni namwasa oi vavira malambo manjinji unodha ifwanya.” (Nam. 11:1) Lembali linothonyi-edha ira atu enango anooda simba vyongo vyaairele i-yo vavira hora injinji, venango “malambo manjinji.” Dhoweni nitapanyeni ifwanafwani-o vamwasa wen’na.

²⁰ Vyawa vinjinji ndulimu, mwadhi namaing’anela isa mwinango atootumiza karta wa rongola mwinango wenuo ali angabadiziwile wene vom’limbi-a ira akaleve ororomeleya. Vangavirile vyawa 8, rongoluo atoom’lembela karta yoonga ira: “Nditothuulela vyoulembelani karta ira nduuwandeleni vyoi mukadhi mundikami-anga wa vyawa vinjinji, angalive ira nyo kamunoidhiwa.” Atoodhowanave onga ira: “Milanywinyu yali yolimbi-a, thitho lemba la-edhi nyo kartanimu ndilelo landifiile varimani moi kandinolidiwala.”a Angaongile nyarwa dhagumanana liye, rongoluo atoonga ira: “Hora dhinango ndanoofuna ndinga-iidhe yongo iliyothene thangani-avo imbarimbari, mbwenye lemba la-edhi nyo kartanimu latoondilimbi-a moi kandawelenle nduli.” Atoowenjedhela thitho onga ira: “Wavyawa 8 vyothene vyevi, kavali yongo iliyothene indilimbi-idhe kwaranya lembali.” Mwadhi namaing’anela isuo, vinooneya ira atoosangalala maningi wachela kartali “vangavirile vyawa vinjinji.” I-yo thitho ninooda simbiwa vavira hora indendai kumela vevo vava-idhe i-yo mutu mwinango vyongo.

21. Mwasiwa ngwan’ni munofunechecha m’sazi-edha Yohova vamwasa ova-a?

²¹ Muyofunjedha yei nitoonani ira Yohova anipanduchile mundhila yavakhundu. Angalive ira ninosangalala nawachela, ninosangalala maningi nava-a atu enango vyongo. Ninodhivwa pama nakami-anga Makristau afwi-u thitho ninosangalala tanisimbanga. Mbwenye akala mutu utonisimba venango kabe, i-yo ninosangalala namwasa oira vyongo vyofwanelela. Kamudiwale ira mwava-anga vyongo, “Yohova unodha uva-ani vyongo vinjinji kwaranya vyevyo.” (2 Li. 25:9) Kaninava-e vyongo kwaranya moda munaniva-e Yohova. Kavali yongo yosangalali-a ninga weli-edhiwa na Yohova. Ee-no dhoweni nidhowenanive m’sazi-edha Babi-u wadhulu wenuo uli ova-a.