Mulabenga basa yolaleela mwathindhi ninga Yesu

1. N’nga ndi yongo iivi ino-iyani-a arumiwi a Yohova naatu enango?

YONGO imbo-i ino-iyani-a atu a Yohova naatu anoonga ira ndi Makristau,a ndi thindhi linokaana aliwa volaba basa yolaleela. (Tit. 2:14) Hora dhinango munooda onanga ira basa yolaleela, kinousangalali-ani. Venango munooda dhivwanga ninga mwemo mwadhivwela ndimuwa mwinango oi ngwathindhi. Liye aongile ira: “Hora dhinango ndinoona ira kandinosangalala na basa yolaleela.”

2. N’nga ndi vyongo viivi vyevyo vinairi-e ira hora dhinango na-asangalalenga na basa lolaleela?

² Venango munosangalala noirana maurumiwi enango no-iyana laba basa yolaleela. Mwasiwa ngwan’ni ninoonga ee-no? Ninoonga ee-no namwasa oi ninolaba naatu basa yomangamanga nokami-a nyumba dha gulu, laba basa yovelela kami-o vaireya masoka avilengo thitho nalimbi-anga abali ninooda onanga mombaranya vyo-arelavovyee. Ninoona rendele na udhivela nalabanga basa vambo-i naabali-u thitho naidhiwa ira tanosimba vyongo vinoira i-yo. Hora dhinango ninolaleela tatamo limbo-ive thitho wa vyawa vinjinji kaninofwanya atu avifunelo. Venango ninogumanana atu anokhonda milanywi-u. Ninoidhiwa thitho ira vahora inokwivela aliwa komoni, atu anjinji tanodha runi-anga milanywi-u. (Mat. 10:22) N’nga chini inonikami-a ira nidhowenave dhiveliwana basa yolaleela thitho ilabanga mwathindhi?

3. N’nga lemba la Luka 13: 6-9 linothonyi-edha a-vi thindhi lana Yesu?

³ Thuulela ifwanafwani-o ya Yesu, unooda nikami-a ira nilabenga basa yolaleela mwathindhi. Angali vailambwila liye ka-iidhe laba basila mwathindhi. Thitho atoodhowanave kaana thindhi komoni waurumiwee. (Muleri Luka 13:6-9.) Yesu ali ninga mutu asamalela munda wamauva wenuo asamalela thitho muri wasavu wa vyawa 3. Mbwenye muree kwaava-idhe vyova-a. Yesu atoolaleela wa Ayuda wa vyawa 3 thitho anjinji mwaaliwa katavuruwana milanywee. Mbwenye Yesu kaa-iidhe alaleela. Liye atooira molandana na mulimbo samalela mudule moi kaa-iidhe samalela murule nodedi-edhanga ira unodha va-a. Yesu atoodhowanave kaana thindhi vokami-a Ayudao ira taroromele milanyu yapama.

4. N’nga ninatapanye vyongo vinai viivi vaifwanafwani-o ya Yesu?

⁴ Muyofunjedha yei ninotapanyani moda mwathonyi-edhele Yesu thindhi simbwasimbwa wa myedi 6 yomari-a yaurumiwee. Tapanya vyongo vyafunji-a liye thitho vyaira liye unodha nikami-a ira i-yovano nidhowenave kaana thindhi malamboano. Ninoona mwemo munam’sazi-edhele i-yo muvikhundo 4 vi: (Muone “likhundo loi vyevi vingamadhi” likhundo la valemba la Luka 10:1.) (1) Liye anoothuulela maningi vyoira ifunelo ya Yohova, (2) anookaana ifunelo na maulosi, (3) anoonyindela maningi Yohova ira am’kami-enga, thitho (4) anoororomela ira atu enango anodha m’vuruwana.

ANOO-INDI-EDHELA IFUNELO YA YOHOVA

5. N’nga Yesu athonyi-edhe a-vi ira irana ifunelo ya Nlungu kofuneya?

⁵ Yesu anoolaleela mwathindhi milanyu yapama ya Umwene namwasa oi anooidhiwa ira vyevyo ndi vyafuna Nlungu ira liye airena. (Luk. 4:43) Yesu aona ira basa yolaleela yali yofuneya maningi wa liye. Masiki komoni wa urumiwee, liye anoowenda “masidadi na masidadi, thitho mamidhi na mamidhi” nofunji-a atu. (Luk. 13:22) Atoofunji-a thitho anamafunjedha enango ira talabenga vambo-i na liye basa yolaleela.—Luk. 10:1.

6. N’nga vali vwelana oi a-vi vari volaleela na mabasa enango anoireya guluni? ( Muone thitho iruthiruthi.)

⁶ Malamboano thitho laleela milanyu yapama ndi basa ilukhulu yeniyo Yohova na Yesu inofuna aliwa ira niilabenga. (Mat. 24:14; 28:19, 20) Vatokala vwelana vari va basa yolaleela na maurumiwi enango mugulu la Nlungu. Mwaifwanafwani-o, ninomanga nyumba dha gulu venango tumikela va Beteli vokami-a basa yolaleela. Ninolaba vambo-i naaliwa basa yovelela kami-o waabali naarongoli-u vaireya masoka avilengo vofuna akami-a ira tarome thitho irana vyongo vyokhuza lambela thangani-avo laba basa yolaleela. Nazindiyela funeya wa basa yolaleela nothuulela ira yen’na ndi basa ilukhulu inofuna Yohova ira nililabe, ninodha limbi-iwa nolaba vambo-i basila hora dhothene. Ndimuwa mwinango wavapingoni wau Hungary, ndhinalee János, aongile ira: “Ndinothuulela ira vatokala basa iliyothene gulunimu yeniyo inavolowele limburo vabasa yolaleela thitho ira basila njofuneya maningi.”

7. Mwasiwa ngwan’ni Yohova unofuna ira nidhowenave laleela? (1 Timoteo 2:3, 4)

⁷ Ninodha dhowanave kaana thindhi va urumiwi-u naonanga atu ninga mwemo munoanela Yohova. Liye unofuna ira atu anjinji tavwe milanyu yapama nokala arumiwee. (Muleri 1 Timoteo 2:3, 4.) Ee-no unonifunji-a basa inalabenga i-yo yovulumucha ingumila. Mwaifwanafwani-o, bukhu loi Mwaadhiveliwengana Atu—Mwaafunji-enga inoniva-a malangi-o apama enao ananikami-e ira nitapanyenga naatu naifunelo yowakami-a ira takale anamafunjedha a Yesu. Masiki atu ta-avuruwane va-eeni, venango tanodha kaana ngari yofunjedha vya Yohova wari vanyarwa ilukhulu komoni wa-anafiye. Venango tanodha thuulela vyongo vyaawandela i-yo va-eeni noroma funanga m’lambela Yohova. Mbwenye vyevi vinoodha odheya akala ninodhowanave laleela.

NIKAENGANA IFUNELO NA MAULOSI A BIBILYANI

8. N’nga idhiwa maulosi wakami-idhe a-vi Yesu idhiwa moda mwafuna liye indi-edha basa horee?

⁸ Yesu anooidhiwa ira maulosi a Bibilyani tanodha kwakwaneli-edhiwa. (Dan. 9:26, 27) Liye anooidhiwa ira unodha ira urumiwee wa vyawa 3 nameya. (Luk. 18:31-34) Anooidhiwa thitho vyaonga maulosi vyokhuza moda mwafuna liye wukwa. Vyevi vyatom’kami-a ira aode laba basa pama vahoree. Ee-no anolaleela mwathindhi naifunelo yoi amari-e basa lava-iwile liye.

9. N’nga maulosi a Bibilyani tanonilimbi-a a-vi ira nilaleelenga mwathindhi?

⁹ Vwechecha maulosi a Bibilyani unodha nikami-a ira nilaleelenga mwathindhi. Ninoidhiwa ira vyoira thitho makhalelo aatu malamboano, ndi vyevyo vinoongelatu Bibilya ira vinodha ireya malambo omari-a. Ninoidhiwa thitho ira a-rana-arana weo ulivo vari va mautongi avadhulu availambo yothene ya Britaniya na Amerca na vilambo vinango vyovwelana, vinokwakwaneli-edha maulosi oonga vya mwene wau Norti na wau Suli “hora yomari-a.” (Dan. 11:40) Ninovwechecha thitho ira utongi wa Britaniya na Amerca unoimelela manyalo aifwano iongiwile va lemba la Danieli 2:43-45. Kaninokaikela ira ninga munoongela maulosi, vachineneeva Umwene wa Nlungu unodha nonga maguverno aatu. Maulosi enala anonikami-a idhiwa hora ili-iyo thitho anonilimbi-a ira nilaleelenga mwathidhi.

10. N’nga maulosi a Bibilyani ananilimbi-e mundhila dhinango dhivi ira nilaleela mwathindhi?

¹⁰ Maulosi enango a Bibilyani tatokaana milanyu yeniyo inofunechecha i-yo wandela atu enango. Rongola mwinango wau Dominican Republic dhinalee Cariie, aongile ira: “Maulosi osangalali-a aongile Yohova okhuza sogolo lapama, anondilimbi-a ira ndiwandelenga atu enango milanyu yapama.” Liye atoowenjedhela onga ira: “Ndaonanga nyarwa dhinogumanana atu malamboano, vinodithuucha ira vyolanyedhavyo kavinokhuza miyo ndekhene, mbwenye vinokhuza thitho atwao.” Maulosi a Bibilyani anondilimbi-a ira ndidhowenganave laba basa yolalela namwasa oi ndinoidhiwa ira Yohova ngwenuo unondhikami-a. Leila, wenuo inokala Hungary aongile ira: “Lemba la Esaya 11:6-9 linondilimbi-a ira ndilaleelenga milanyu yapama masiki waatu anooneya ira katinovuruwana. Ndinoidhiwa ira mutu uliwethene unodha chinja akala ira unokami-iwa na Yohova.” Bali mwinango wau Zambia, dhinale Christopher aongile ira: “Movwelana na lemba la Marku 13:10, milanyu yapama inolaleeliwa vailambo yothene thitho ndinoona ira ndingari ilukhulu kwakwaneli-edha naatu maulosi enala.” N’nga ndi maulosi avi a Bibilyani enao anoulimbi-ani ira mudhowenganave laleela?

NIM’NYINDELENGA YOHOVA IRA ANIKAMI-E

11. Mwasiwa ngwan’ni Yesu anoofuneya m’nyindela Yohova ira adhowanave laleela mwathindhi? (Luka 12:49, 53)

¹¹ Yesu anoonyindela maningi Yohova ira am’kami-enga ira adhowenave laleela mwathindhi. Angalive ira Yesu ali wadodoliso, anooidhiwa ira milanyu yapama ya Umwene inodha nyanyuwi-a atu thitho inodha iri-a ira tam’runi-enga maningi. (Muleri Luka 12:49, 53.) Ee-no namwasa oi anoolaba basa yolaleela, anamasogolela amareligiao tanooidanana na liye thitho moweli-edha weli-edha tafuna m’pha. (Ju. 8:59; 10:31, 39) Mbwenye liye anoodhowanave laleela namwasa oi anooidhiwa ira Yohova ali na liye. Liye aongile ira: “Yohova kanandi-iyevo namwasa oi ndinoira vyongo vinom’sagalali-a.”—Ju. 8:16, 29.

12. N’nga Yesu akhozeeli-edhe a-vi anamafunjedhee ira tadhowenganave laleela angalive ira tanooni-iwa nyarwa?

¹² Yesu anotuucha anamafunjedhee ira tam’nyindelenga maningi Yohova naifunelo yoi aakami-enga. Moweli-edha weli-edha, liye anowasikimizeli-a ira Yohova unodha akami-a masiki vahora inooni-iwa aliwa nyarwa. (Mat. 10:18-20; Luk. 12:11, 12) Ee-no atowalimbi-a ira mukalenga osamala. (Mat. 10:16; Luk. 10:3) Atowalangi-a ira katikanyi-edhenga atu oi katinofuna vuruwana. (Luk. 10:10, 11) Atoawandela thitho ira tatawenga taoni-iwanga nyarwa. (Mat. 10:23) Angalive ira Yesu ali wathindhi thitho kaaira vyongo mwakomove vyevyo vyaa-ele ingumiiwa vangovini.—Ju. 11:53, 54.

13. Mwasiwa ngwan’ni kaninofwanela kaikelanga ira Yohova unodha nikami-a?

¹³ Malamboano ninofuneela thitho Yohova ira anikami-e laleela mwathindhi angalive ira ninooni-iwa nyarwa. (Apk. 12:17) Mwasiwa ngwan’ni kaninofwanela kaikelanga ira Yohova, unodha nikami-a? Kathuulelani lobelo la Yesu lelo linofwanyeya va lemba la Juwau kapitulo 17. Yesu atoovepha Yohova ira aing’anelenga arumiwee. Thitho Yohova atoowakhula lobelolo. Bukhu la Mayirelo linoonga mwemo Yohova munokami-edhela liye arumiwi ira talaleelenga mwathindhi masiki vahora inooni-iwa aliwa nyarwa. Mulobelolee, Yesu atoovepha Yohova ira: “Aing’anelenga atu enao anovuruwana milanyu inolaleela arumiwi. atu enala anothangani-avo nyo. Yohova ka-iidhe wakula lobelo la Yesu. Liye unodha ukami-ani nyo ninga mwakami-edhele liye arumiwi.—Ju. 17:11, 15, 20.

14. N’nga ninoidhiwa a-vi ira ninodhowanave laleela mwathindhi? (Muone thitho iruthiruthi.)

¹⁴ Vevo komoni vanowandamela aliwa, hora dhinango vinooda kala vyorucha laleela mwathindhi milanyu yapama. Angalive ira vinodha kala ee-no, ninodha fwanya kami-o linafuneele i-yo. (Luk. 21:12-15) Moladanana Yesu naanamafunjedhee, ninorumela ira atu tasakulenga okhene vuruwana venango khabe thitho ninorambela kangana naaliwa. Angalive muvilambo vinango basa li-u linokhondi-iwa abali-u tanodhowanave laleela milanyu yapama namwasa oi tanom’nyindela Yohova a-kala kopolo dhiwa. Molandana na mwemo Yohova mwavelele liye kopolo waarumiwee hora yaarumiwi, unoniva-a kopolo ira basa yolaleela iireye mokwakwanela movwelanana mwemo munofuna liye. (2 Ti. 4:17) Ee-no kamunofwanela kaikela ira mwanyindelanga Yohova munodha dhowanave laleela mwathindhi.

NIROROMELENGA IRA ATU ENANGO TANODHA VURUWANA

15. N’nga chini yathonyi-edha ira Yesu anororomela ira atu tanodha vuruwana milanywee?

¹⁵ Yesu kaakaikela ira atu enango tanodha vuruwana milanyu yapama. Vyevi vyatom’kami-a ira asangalalenga na urumiwee. Mwaifwanafwani-o, komoni wa 30 EC, Yesu anoona atu anjinji tavuruwananga milanyu yapama thitho tatooafwanafwani-edhela na munda weo mbeudhe dhidhowarala. (Ju. 4:35) Vangavirile yawa imbo-i liye atoawandela anamafunjedhee ira: “Vatokala vyongo vinjinji vinofuna a-ndiwa.” (Mat. 9:37, 38) Va-anavire hora indendai atoweli-edha onga ira: “Vatokala vyongo vinjinji vinofuna a-ndiwa . . . Mum’vephe mwinya munda ira atumize anamalaba o-anda.” (Luk. 10:2) Yesu ka-iidhe roromela ira atu tanovuruwana milanyu yapama thitho tanoosangalala aliwa tairana vyevi.—Luk. 10:21.

16. N’nga vifwanafwani-o vya Yesu vinathonyi-edhe a-vi ira atu enango anodha vuruwana milanywee yapama? (Luka 13:18-21) (Muone thitho iruthiruthi.)

¹⁶ Yesu atoofunji-a anamafunjedhee ira taonenga milanyu yalaleela aliwa kala yofuneya. Vyevi vyatoowalimbi-a ira tadhowenganave kaana thindhi. Mwaifwanafwani-o, dhoweni nione vifwanafwani-o vili vyevyo vyaongile liye. (Muleri Luka 13:18-21.) Yesu atoo-indi-edha basa isimbeu ya mostarda vofuna funji-a ira milanyu ya Umwene inodha laleeliwa modabwi-a thitho kavali mutu uliothene unaimwanani-e vyevi. Liye thitho atoo-indi-edha basa rombwe otupi-ana mapau vofuna thonyi-edha mwemo milanyu ya Umwene munofuna aliwa dhalaleeliwa nokami-a atu ira tachinje, angalive ira chinjao ya-aoneenga mombaranya. Veva Yesu atookami-a anamafunjedhee ira milanyu inolaleela aliwa inodha kami-a atu anjinji.

17. N’nga ndi myasa iivi inaniiri-e dhowanave laba basa yolaleela?

¹⁷ Ninolimbi-iwa laba mwathindhi basa lolaleela naona mwemo munokami-edhela aliwa atu vailambo yothene. Yawa iliothene atu mamiliyau tanodhecha wu ithuuleloni thitho tanoroma funjedha Bibilya. Atu mamiliyau anjinji tanobadiziwa noroma laba vambo-i na i-yo basa lolaleela. Kaninoidhiwa ira mbaatu oinjiva moi a-vi enao tanavuruwana milanywi-u, mbwenye ninoidhiwa ira Yohova unodhowanave gumani-a gulu nlukhulu lelo inofuna dhavulumuwa va nyarwa ilukhulu. (Apk. 7:9, 14) Mwinya wa munda unoonave ira vatokala vyo-anda vinjinji ee-no nitokaana myasa yapama inoniiri-a dhowanave laleela.

18. N’nga ninofuna ira atu enango taniona tazindiyelenga n’ni?

¹⁸ Hora dhothene anamafunjedha a Yesu tanoidhiweya namwasa wa thindhi liwa lolaleela. Atu taona limba rima waarumiwi volaleela, tanozindiyela ira tawenda na Yesu. (May. 4:13) I-yo thitho atu taonanga limba rima wi-u volaleela tanozindiyela ira ninom’sazi-edha Yesu.