Dhandha la Yohova kai lokwiva

1. N’nga Mose athonyi-edha a-vi ira anom’nyindela Yohova vosogolela Aisraeli vokhuma wu Iguputo?

BUKHU la Aebere linoonga atu anjinji enao tali ororomeleya wa Yohova. Mbo-i mwaaliwa ndi Mose. (Aeb. 3:2-5; 11:23-25) Liye atoothonyi-edha iroromelo vokhuma wu Iguputo thitho kaovile Farau naanyakhondwee. Atom’nyindela Yohova thitho atoosogolela Aisraeli vandela bara yofiila thitho vavira aliwa kokolani. (Aeb. 11:27-29) Aisraeli anjinji tanookaikela vyoi Yohova anowasamalela mbwenye Mose atoodhowanave m’nyindela Nlungu. Mose atom’nyindela Nlungu thitho Yohovuo atooira vyongo vyodabwi-a vova-a waatwao ma-inje na vyodya kokolani.a—Eki. 15:22-25; Sal. 78:23-25.

2. Mwasiwa ngwan’ni Nlungu atom’fuka Mose ira: “N’nga dhandha la Yohova litokwiva? (Numero 11:21-23)

² Angalive ira Mose atookaana iroromelo yolimba vahora inango anokaikela vyaongile Yohova. Vanga-adhi vang’ono funa mala yawa khumela vevo vakhumile aliwa wu Iguputo Yohova atoolanyedha atwee ira unongo ava-a nyama. Mose atookaikela akala Yohova unoava-a nyama dhokwakwanela mamiliyau aatu anjinji enao tali kokolani. Vowakhula Yohova atom’fuka Mose ira: “N’nga dhandha la Yohova tokwiva”? (Muleri Numero 11:21-23.) Madhu oi “dhandha la Yohova” anoimelela zimu ochena venango ira kopolo yeniyo Nlungu ino-indi-edha liye basa voira vyongo. Veva ninooda onga ira Yohova atoofuka Mose ira, ‘n’nga unothuulela ira kandinaode irana vyongo viongile miyovi’?

3. Mwasiwa ngwan’ni ninofwanela kaana thindhi na vyongo vyaira Mose na Aisraeli?

³ N’nga mutoroma kaikelavo ira Yohova unodha uva-ani vyongo vyofuneela vaingumiinyu na vabanjani vinyu? Akala vyevi vitoroma uireelani venango khabe dhoweni nitapanyeni mwasa wa Mose na Aisraeli enao takaikela ira Nlungu unoava-a vyongo vyafuneela aliwa. Makhundo a Bibilyani anofuna i-yo tapanya anonikami-a roromela ira dhandha la Yohova kailokwiva.

VYONGO VINAFUNJEDHEVO I-YO WA MOSE NA WA ISRAELI

4. Mwasiwa ngwan’ni atu anjinji tatooroma kaikela ira Yohova kanowaava-a yodya?

⁴ N’nga yaireile chini ira Aisraeli taromenga kaikela akala Yohova unooda ava-a vyongo vyafuneela aliwa? Aisraeli vambo-i na “gulu laatu amaziza o-iyana i-yana” tatookala kokolani vahora yoyeva vaulendo wakhuma aliwa wu Iguputo nodhonga muilambo yolanyedhiwa. (Eki. 12:38; Dot. 8:15) Atu amaziza o-iyana i-yanao tatooroma dungunya ira nitochenyelana wudya mana. Thitho Aisraeli naaliwene tatooroma dungunya. (Num. 11:4-6) Atwao tatooroma lavela nyama na vyodya vyana aliwa wu Iguputo. Mose angapingeile atooroma thuulela ira liye ngwafuneela ira aava-e atwao vyodya.—Num. 11:13, 14.

5-6. N’nga ninofunjedhavon’ni va vyevyo Aisraeli vyatukhulele aliwa waatu enango?

⁵ Pyooneelatu ira Aisraeli tatootukulela a-simba waatu amaziza enango. I-yo thitho ninooda tukulela rima o-osimba ninga vinoira atu enango thitho kaninasangalalenga na vyongo vinoniva-a Yohova. Vyevi vinoireya simbwasimbwa vevo nathuulelanga vyongo vyana i-yo walelene venango thitho ninoroma silila vyongo vyaatu enango. Masiki vyongo viruche, ninooda kala osangalala nakaana rima osimba.

⁶ Aisraeli tanofuneela thuulela ira Nlungu atoowalanyedha ira anodha kaana vyongo vyapama tadhafiya ilambo yolanyedhiwa. Yolanyedha yei yali yoi inodha kwakwaneli-edhiwa tadhafiya ilambo ipya a-kala kokolani. I-yo thitho ninooda ira pama thuulelanga vyongo vinilanyedhile Yohova ira unodha niva-a ilambo ipya malo mothuulelanga vyongo vya-ana i-yo muilambwila. Nithuulelenga thitho malemba enao ananikami-e ira nim’roromelenga maningi Yohova.

7. N’nga mwasiwa ngwan’ni ninofwanela roromela ira dhandha la Yohova kai lokwiva?

⁷ Mbwenye ninooda dabwa ira mwasiwa ngwan’ni Nlungu atom’fuka Mose ira: “N’nga dhandha la Yohova tokwiva”? Vinooneya ira Yohova afuna m’kami-a Mose idhiwa vyongo vinli. Yoroma, dhandha la Yohova takopolo maningi. Thitho yanambili, linooda fiya wuliothene vofuna kami-a atu. Nlungu angaodile ava-a Aisraeli nyama angalive ira tali kokolani. Nlungu atoo-indi-edha basa “dhandha lakopolo thitho wono othapuwa” ira aakami-e. (Sal. 136:11, 12) Ee-no nagumanana nyarwa kanikaikelenga ira dhandha la Yohova linooda nifwanya nonikami-a.—Sal. 138:6, 7.

8. N’nga ninarambele a-vi vyongo vyairile atu enango kokolani? (Muone thitho iruthiruthi.)

⁸ Va-anavire hora, Yohova atookwakwaneli-edha vyalanyedhile liye thitho atoova-a atwao vizili vinjinji. Mbwenye Aisraeli katasimbile vyodabwi-a vyairele Nlungu. Malomwee atu anjinji tathonyi-edha rima waidyani. Aliwa tanoo-inda vizili vinjinji dambo lilothene. Yohova atoonyanyuwela atu “enao tathonyi-edhe rima waidyani” thitho atoowalanga. (Num. 11:31-34) N’nga ninofunjedhavon’ni? Ninofwanela ira polepole ira na-arome rima waidyani. Akala nili ofuma venango osauwa, ninofwanela dhilimbi-edha ira nilokhote ‘fumi-u dhulu’ kala vauxamwali wapama na Yohova thitho Yesu. (Mat. 6:19, 20; Luk. 16:9) Naira ee-no kaninodha kaikela navang’onovene ira Yohova unodha nisamalela.

9. Va mwasa yoi Yohova unodha nikami-a, n’nga ninakale osikimizela vyan’ni?

⁹ Yohova ngokhozeya kami-a atwee malamboano. Mbwenye vyevi kavinothapulela ira kaninarambulele kobiri venango yodya.b Likhundo toi Yohova kanani-iye okhene. Liye unodha nikami-a va nyarwa dho-iyana i-yana dhinagumanena i-yo. Dhoweni nitapanyeni ndhila mbili dhedho dhinathonyi-edhele i-yo ira ninororomela ira unodha nisamalela: (1) nagumanana nyarwa dha fuma (2) nathuulelanga vya mwemo munafwanyele i-yo vyofuneeleya sogolou.

NAGUMANANA NYARWA DHA FUMA

10. N’nga ninagumanena nyarwa dhiivi dha fuma?

¹⁰ Vanowandamela i-yo komoni wailambwila, nyarwa dha fuma ndinongo wenjedheleya. Vyongo ninga nyarwa vyandale khondo masoka avilengo venango sau vinooda romi-a nyarwa dha fuma. Vinooda ninongela kobiri, vyongo vi-u, nyumba venango basa yanimalela. Ninofuneeleya sakhula basa inango venango thamela wu tatamo n’nango naifunelo yoi niodenga samalela banjali-u. N’nga chini inanikami-e ira nim’nyindelenga Yohova vosakhula vyoira?

11. N’nga chini inanikami-e nagumanana nyarwa dha fuma? (Luka 12:29-31)

¹¹ Yongo funeya maningi inaire i-yo ndi lobela wa Yohova. (San. 16:3) Nim’vephenga ira anikami-e sakhula pama vyoira thitho ira anikami-e ira na-arucheyenga namwasa wa nyarwa dhi-u. (Muleri Luka 12:29-31.) Mulobelenga thitho ira aukami-eni kaana rima osimba. (1 Ti. 6:7, 8) Musakesakenga mumabukhwi-u ira muidhiwe vyevyo vinaire nyo akala mutogumanana nyarwa dha fuma. Atu anjinji anoonga ira myasa dha va jw.org dhatowakami-a vahora yagumanena aliwa nyarwa dha fuma.

12. N’nga ndi vyofuka viivi vinakami-e kristau vosakhula vyoira vyokhuza banjalee?

¹² Atu enango tatodhirumeli-avo dhowa malaba basa undendai na banjaliwa mbwenye vyo-arevovyee kai vyapama. Mwasakanga basa, kamuthuulelenga kobiri dhedho dhinafwanye nyo. Mbwenye muthuulelenga thitho mwemo munakhuzele aliwa uxamwalinyu na Yohova. (Luk. 14:28) Munooda dhifuka ira: “Chini inaireele banjali-u akala ira nditodhowa wolapela? N’nga ndinongooda fwanyeya vamigumanoni? Thitho muurumiwini”? Akala mutokaana a-ima munofwanela dhifuka yofuka yofuneila: ‘Akala nditokhumavo, ndinaodenga a-vi samalela a-imanga “vowava-a malangi-o thitho afunji-a movwelana na vyaongile Yohova’”(Aef. 6:4) Muwendelenga mathuulelo a Nlungu akala abali venango afwinyu enao ta-analemeza makhundo a malemba.c Tony, wenuo unokala mavirelo adhuwa wu Asia, ukadhi avephiwanga maulendo mangasi ira amalabe basa lapama uilambo yaundhe. Mbwenye angalobelele mwasula thitho tapanya na i-yanee atoothuulela ira karumele. Malomwee tatootapanya ira tayevi-e vyongo vyagula aliwa. Tony aongile ira: “Fiyedhela vano nditokami-a atu anjinji idhiwa Yohova thitho a-imi-u ira tadhiveliwengana imbarimbari. Banjali-u litofunjedha ira akala lino-arela lemba la Mateu 6:33, Yohova unodha nisamalela.”

KHOZEELA VYONGO VYASOGOLO

13. N’nga ndi vyongo viivi vyevyo vinaire i-yo vokhozeela vyongo vyasogolo?

¹³ N’nga ninathonyi-edhe a-vi ira ninom’nyindela Yohova nakhozeelanga vyongo vyasogolo vahora inaulule i-yo? Bibilya linonilimbi-a ira nilabenga basa mwathindhi ira na-aone nyarwa kaana vyofuneya vaingumi sogolou. (San. 6:6-11) Akala pyoodeya, ndi zelu lokhota kobiri inangwe ira nidhailabi-edhe basa sogolou. Kobiri dhinovunela. (Nam. 7:12) Mbwenye kanirumeli-e ira funa kobiri ikale yongo yofuneya maningi vaingumii-u.

14. Mwasiwa ngwan’ni ninofwanela thuulela lemba la Aebere 13:5 nakhozeelanga vyongo vyasogolo?

¹⁴ Yesu atoothonyi-edha ira kai zelu kaana kobiri mbwenye a-kala “ofuma wa Nlungu.” (Luk. 12:16-21) Vale aongile ira vyabebe-i kavinoidhiweya. (San. 23:4, 5; Yak. 4:13-15) I-yo Makristau ninogumanana nyarwa dhinango. Yesu atoonga ira ninofwanela kala okhozeya i-ya fumi-u ira nikale namafunjedhee. (Luk. 14:33, na madhu achindo.) Makristau awu Yudeya tatoorumela i-ya vyongo viwa thitho katadungunya. (Aeb. 10:34) Malamboano thitho abali naarongola anorumela i-ya vyongo viwa venango mabasiwa naifunelo yoi ta-avolowele vyandale. (Apk. 13:16, 17) N’nga chini yaakami-idhe irana vyevi? Aliwa taroromela maningi yolanyedha ya Yohova yoi: “Kandinodha u-iyani venango utawani navang’onovene.” (Muleri Aebere 13:5.) Ninodhilimbi-edha khozeela vyasogolo, mbwenye nagumanana nyarwa mo-dedi-edhela ninororomela ira unodha nikami-a.

15. N’nga anamabala anofwanela kaana mathuulelo avi va mwasa waa-imiwa? (Muone thihto iruthiruthi.)

¹⁵ Makalelo enango, mabanja anokaana ifunelo yoi a-imiwa tadhaakami-e anamabaliwao tadhaulula. Bibilya linoonga ira anamabala anofwanela samala a-imiwa. (2 Ak. 12:14) Vyaimbarimbari ira anamabala taulula tanofuneela kami-iwa naa-imiwa thitho a-ima anjinji anokala osangalala irana vyevyo. (1 Ti. 5:4) Mbwenye anamabala Aikristau anozindiyela ira angalive onokala osangalala maningi akala ira tatokaana a-ima akami-a ira takale arumiwi a Yohova akala naifunelo yoi tadhaakami-e sogolou.—3 Ju. 4.

16. N’nga anamabala anoira a-vi ira takhozeeli-edhe a-imiwa ira tadhakaena vyofuneeleya vyavaingumini? (Aefeso 4:28)

¹⁶ Mwaava-enga a-iminyu ifwanafwani-o va mwasa om’nyindela Yohova. Mwaafunji-enga laba basa romela tangali a-ima. (San. 29:21; muleri Aefeso 4:28.) Taulukhula mwaawandelenga ira talimbi-edhelenga xikolani. Anamabala anofwanela sakasaka thitho indi-edha basa makhundo a Bibilyani vokami-a a-imiwa ira ta-indi-edhelenga basa pama funja naifunelo yoi tadhafwanye vyofuneeleya vaingumiiwa wu talabelanga Yohova.

17. N’nga kaninofwanela kaikela vyan’ni?

¹⁷ I-yo arumiwi a Yohova ninofwanela nyindela ira utokaana kopolo thitho rima ofunechecha nikami-a fwanya vyofuneya. Vanowandamela i-yo komoni wailambwila, ninodha wesedhiwa vamwasa om’nyindela Yohova. Peno ninogumana vyoi a-vi, ninofwanela m’nyindela Yohova unodha indi-edha basa kopolodhee vonikami-a ira nifwanye vyofuneya vaingumi. Kanikaikelenga ira wonwe othathuwa thitho dhandhelee lakopolo linodha nikami-a uliothene uli i-yo.