Musazi-edhenga angelo ororomeleya

1-2. (a) N’nga i-yo atu nino-iyana a-vi naangelo? (b) N’nga ninofwanafwana a-vi naangelo?

VEVO Yohova vaukami-idheni liye funjedha imbarimbari, atoouitanelani mubanja laarumiwee o-iyana i-yana thitho audhivela enao anothangani-avo angelo mamiliyau manjinji. (Dan. 7:9, 10) Nathuulela vya angelo, hora dhinjinji ninothuulela i-yana ulivo vari va i-yo naaliwa. Mofwanafwani-a, aliwa atokalao hora indendai kwaranya i-yo. (Yob. 38:4, 7) Aliwa atokaana kopolo dhinjinji kwaranya i-yo. Mo-iyana na i-yo atu voi kanili olongomana, aliwa mbolongomana.—Luk. 9:26.

² Angalive ira vatokala i-yana weu, ninofwanafwana naaliwa muvyongo vinjinji. Mofwanafwani-a, molandana naangelo, ninooda sazi-edha makalelo a Yohova thitho nitokaana ufulu osakula vyongo. Nitokaana madhina, nitokaana makalelo na vyoirana vyo-iyana-iyana vom’labela Yohova thitho nitokaana rima ofuna m’lambela Namapanduchi-u.—1 Pe. 1:12.

3. N’nga ninofunjedhevon’ni waangelo ororomeleya?

³ Voi ninofwanafwana naangelo mu vyongo vinjinji, ifwanafwani-o iwa inooda nilimbi-a thitho nikami-a. Ninooda funjedha vyongo vinjinji kumela waaliwa. Muyofunjedha yei ninoonani vinaire i-yo ira nisazi-edhenga dhiyevi-a waangelo ororomeleyala, dhiveliwana wiwa atu thitho vilimbi-edha wiwa vokami-a pingo ira ukale ochena.

ANGELO MBODHIYEVI-A

4. (a) N’nga angelo anothonyi-edha a-vi kala odhiyevi-a? (b) Mwasiwa ngwan’ni angelo anodhiyevi-a? (Salimo 89:7)

⁴ Angelo ororomeleya mbodhiyevi-a. Angalive ira anoidhiwa vyongo vinjinji, mbakopolo, azelu thitho anovelela malangi-o a Yohova. (Sal. 103:20) Talabanga mabasa anova-iwa aliwa, katinovigweli-a namwasa wa vyongo vinoira aliwa venango vioneeli-edha ira mbakopolo na vyongo vina aliwa. Anosangalala irana vyongo vinofuna Nlungu angalive ira katina idhiweye na madhiniwa ira mbaaliwa airilena vyongovyo.a (Mar. 32:24, 29; 2 Ma. 19:35) Aliwa katinorumela wachela titimi-o linofuneela dhowa wa Yohova. Mwasiwa ngwan’ni angelo mbodhiyevi-a maningi? Namwasa oi aliwa anom’dhiveliwana Yohova thitho anom’lemeza maningi.—Muleri Salimo 89:7.

5. N’nga ngelo athonyi-edhe a-vi dhiyevi-a vovelela malangi-o wa Juwau? (Muone thitho iruthiruthi.)

⁵ Dhoweni nioneni mwasa m’mbo-i othonyi-edha ira angelo mbodhiyevi-a. Yawa ya 96 K.A.B., ngelo mwinango dhinalee kalinoidhiweya atooni-a rumiwi Juwau masopenya odabwi-a. (Apk. 1:1) N’nga Juwau airilen’ni angaoni masopenyao? Liye anoofuna lambela ngeluo. Mbwenye mombaranya ngelo ororomeleuo, atoom’kondi-a, liye aongile ira: “Uire polepole! Kuirena vyevyo! Miyo ndili dhaari fwaa na balaa . . . Lambela Nlungu!” (Apk. 19:10) Veva ngelula atoodhiyevi-a maningi. Liye kaafuna va-iwa lemezo venango titimi-iwa. Hora yeniyene atoom’mwandela Juwau ira unofwanela lambela Nlungu. Vahora imbo-ive yeniyo, liye kaam’mona Juwau ninga mutu o-ofuneya maningi. Angalive ira ngeluo anom’labela Yohova wa vyawa vinjinji thitho atookaana kopolo kwaranya Juwau, liye atoodhiyevi-a noonga ira rumiuo ali dhaari fwee. Angalive ira ngeluo anofuneela m’sumulula Juwau, kam’mongilena mwauwali rumiwi oululula. Malomwee atom’riyela rima thitho atoozindiyela ira vyaoni Juwau vyo vyali vyodabwi-a maningi.

6. N’nga ninasazi-edhe a-vi dhiyevi-a wa angelo?

⁶ N’nga ninasazi-edhe a-vi angelo vamwasa odhiyevi-a? I-yo thitho nava-iwa vyoira kaninofwanela vititimi-a venango funanga va-iwa lemezo namwasa wa vyongo viodile i-yo irana. (1 Ak. 4:7) Wenjedhela vevo, kaninofwanela dhionanga kala okwaranya atu enango namwasa oi nitom’labela Yohova wa hora indendai venango nitokaana vizo vinango. Thitho nairangana vyongo vinjinji vom’labela Yohova, paevo vanofuneela i-yo vionanga ninga mwana. (Luk. 9:48) Mofwanafwana naangelo, ninofuna labela atu enango. Kaninofuna viiri-a ira atu enango tanionenga kala ofuneya maningi.

7. N’nga ninathonyi-edhe a-vi dhiyevi-a navelelanga malangi-o venango m’sumulula mutu?

⁷ Hora dhinango ninofuneela velela malangi-o akopolo. Mbwenye mofwanafwana na ngelo wenuo asumulule Juwau moriya rima, i-yo thitho ninooda velela malangi-o akopolo vo-osukwali-a mutu. Akala kaninoviona kala okwaranya atu enango, ninooda velela malangi-o okumela Bibilyani mwalemezo thitho mwaudhivela.—Ako. 4:6.

ANGELO ANODHIVELIWANA ATU

8. (a) Movwelana na lemba la Luka 15:10, n’nga angelo anothonyi-edha a-vi ira anodhiveliwana atu? (b) N’nga angelo anokami-a a-vi va basa yolaleela? (Muone thitho yavakapani.)

⁸ Angelo katinovwalavwali-a vyongo vinoireela atu venango thuulelanga ira kanili ofuneya. Aliwa anodhiveliwana atu, thitho anosangalala atu odawa tachinyuwa nowelela wa Yohova venango mutu achinja ndhiladhee noroma funjedha imbarimbari. (Muleri Luka 15:10.) Aliwa anonikami-a nalabanga basa yolaleela ya Umwene. (Apk. 14:6) Angalive ira aliwa katinolaleela mooneela waatu, anooda sogolela namalaleya wa mutu unofuna funjedha vya Yohova. Mbwenye kai hora dhothene vanaonge i-yo mosikimizela ira angelo atonisogolela wa mutu mwinangwee. Thitho Yohova unooda indi-edha basa ndhila dhinango, ninga velela zimwee ira ukami-e atu anofuna m’mwidhiwa venango sogolela arumiwee. (May. 16:6, 7) Mbwenye Yohova uno-indi-edha basa maningi angelwee vonikami-a vabasa yolaleela. Ee-no nalaleelanga milanyu yapama ninooda kala osikimizela ira angelwee anonikami-a. Muone kwadru yoi “malobelwiwa tatowakuliwa.”b

9. N’nga ninasazi-edhe a-vi angelo vamwasa odhiveliwana atu?

⁹ N’nga ninasazi-edhe a-vi angelo vodhiveliwana atu? Navwa milanyu yoi mutu mwinango utoweleli-edhiwa pingoni, nisangalalenga ninga mwemo munoirela angelo. Niirengana vyongo vyothene vinaode i-yo voawachela na mandha menli thitho asikimizeli-a ira ninowadhiveliwana. (Luk. 15:4-7; 2 Ak. 2:6-8) Ninooda thitho asazi-edha angelo voirana vyevyo vinaode i-yo va basa yolaleela. (Nam. 11:6) Angelo anonikami-a nalaleelanga milanyu yapama, ee-no i-yo thitho nikami-enga abali naarongoli-u talabanga basila. Mofwanafwani-a, ninooda ira masaka-edho oi nimalaleele na namalaleya ukondile a-idhiwa vyongo vinjinji. Ninooda thitho kami-a abali naarongoli-u oulula venango enao anobulela ira naaliwene thitho talaleelenga.

10. N’nga ninofunjedhavon’ni va vyongo vyam’muireele sara?

¹⁰ N’nga a-vi akala kaninaode irana vyongo vinjinji namwasa wa mwemo vyongo mukalele aliwa vaingumii-u? Ninooda fwanya ndhila dhoi nilabenga basa vambo-i naangelo volaleela. Ifwanafwani-o ndi rongola mwinango wau Indiya dhinalee Sara,c angairile upainiya wa vyawa 20, Sara atoobulela thitho akalecha ogonathene. Vyevi vyatoom’sukwali-a thitho vyali vyovweya. Mbwenye namwasa oi anooleri Bibilya hora dhothene thitho abali naarongolee tanookami-a mwaudhivela, vang’ono na vang’ono Sara atooroma okoka sangalala. Mbwenye liye anoofuneela fwanya ndhila ipya yolaleela movwelana na mwemo vyongo mwali aliwa vahoriyo. Voi kaaoda kala vathi venango lemba makarta, anoolaleela va telefonini. Liye aongile ira: “Vaulendo owelela, Aliwa tanoom’mwandela vyaatu enango tafuna funjedha. Va myedi yoyeva baa-i Sara atookaana anamafunjedha Bibilya okwakwana 70, oi kaaode afunji-a. Ee-no liye atoovelela anamafunjedha enango waabali naarongola pingoni. Va-eeni anjinji mwaanamafunjedhao anofwanyeya vamigumanoni. Angelo tatoosangalala maningi volaba basa naabali naarongola ninga Sara, wenuo airile vyongo vyothene vabasa yolaeela!

ANGELO ANOVILELA

11. N’nga angelo ororomeleya athonyi-edhe a-vi vilela?

¹¹ Angelo ororomeleya ndiifwanafwani-o yapama maningi vamwasa ovilela. Aliwa takadhi tavilelanga vyongo vyo-olongomana thitho vyothakala wavyawa mamiliyau manjinji. Aliwa tatoona Satana naangelo enango anjinji enao talaba naaliwa vambo-i tam’dhimbinuwelanga Yohova. (Mar. 3:1; 6:1, 2; Yud. 6) Bibilya linoniwandela vya ngelo mwinango ororomeleya wenuo alimbam’nena iwanda yakopolo. (Dan. 10:13) Wenjedhela vevo, wavyawa vinjinji angelo takadhi taonanga atu oyeva baa-i tasakulanga lambela Yohova. Angalive ira vili e-no, angelo ororomeleyala anaadhowanave m’labela Yohova mosangalala thitho mwathindhi. Aliwa anoidhiwa ira vahora yofwanelela, Yohova unodha kumi-a vyongo vyothene vyo-olongomana.

12. Chini inanikami-e ira nivilelenga?

¹² N’nga ninasazi-edhe a-vi angelo vamwasa ovilela? Mofwanafwana naangelo, i-yo thitho ninooda gumanana vyongo vyo-olongomana venango runi-iwa. Mbwenye ninororomela ira vahora yofwanelela Yohova unodha kumi-avo vyothakala vyothene. Ee-no mofwanafwana naangelo ororomeleya, “kanino-iya irana vyongo vyapama.” (Agl. 6:9) Mbwenye Nlungu unolanyedha ira unodha nikami-a vilela. (1 Ak. 10:13) Nivepenga Yohova ira aniva-e zimwee ira unikami-e kala oleva rima, thitho osangalala. (Agl. 5:22; Ako. 1:11) N’nga a-vi naruni-iwanga? Mum’nyindelenga maningi Yohova thitho kamutekenyeye. Hora dhothene unodha ukami-ani thitho uva-ani kopolo.—Aeb. 13:6.

ANGELO ANOKAMI-A IRA PINGO UKALE OCHENA

13. N’nga angelo tava-iwile basa yavakhundu iivi malambo omari-ala? (Mateu 13:47-49)

¹³ Malambo omari-ala, Yohova utovelela waangelo basa yolaleela. (Muleri Mateu 13:47-49.) Basila inoiri-a ira atu anjinji takaena ifunelo na milanyu yapama. Enango mwaatwala, anochinja fiya vokala Makristau aimbarimbari, voi atu enango katinochinja. Angelo atova-iwa basa yoi “takumi-e vyongo vyothakala vari vaatu olongomana.” Vyevi vinothapulela ira basa liwa kukami-a pingo ira ukale ochena. Mbwenye kavinothapulela ira mutu uliwethene u-iidhe gumaneya vambo-i na i-yo vamyasa yo-iyana-iyana kanaode welela. Thitho kavinothapulela ira pingoni kamunodha kala nyarwa. Mbwenye ninooda sikimizela ira angelo anolaba basa mwathindhi vokami-a ira pingo ukale ochena.

14-15. N’nga ninasazi-edhe a-vi angelo vamwasa okami-a pingo ira ukale ochena? (Muone thitho viruthiruthi.)

¹⁴ N’nga ninasazi-edhe a-vi angelo vokami-a pingo ira ukale ochena? Ninooda irana vyevyo vodhilimbi-edha kaana makalelo apama thitho kala vauxamwali olimba na Yohova. Ninodhilimbi-edha barela mirimi-u vosakula atu owaredhana thitho rambela yongo iliyothene inanidodomi-e mathuulelo. (Sal. 101:3) Ninooda ira pama kami-a Makristau afwi-u ira takaleve ororomeleya wa Yohova. Mofwanafwani-a, n’nga ninaire a-vi akala nitovwa ira Kristau fwi-u utoira yodawa ilukulu? Ninooda m’limbi-a mutuo ira amawandele andimuwa avapingoni, akala kanoonga, i-yo ninooda awandela andimuwa avapingonao. Naona ira Kristau uliwethene uxamwalee na Yohova utoroma dodomeya, akami-iwe mombaranya!—Yak. 5:14, 15.

¹⁵ Pyovi-a tangaranga ira atu enango anoira vyodawa vilukulu anokumi-iwa pingoni. Vyaireya ee-no “nino-iya vwelana” naaliwa.d (1 Ak. 5:9-13) Vyevi vinokami-a ira pingo ukale ochena. A-rela malangi-o a yofunjedha yei unooda akami-a atu takumi-iwile pingoni thuulela vyowelela wa Yohova. Tawelela ninosangalala vambo-i na Yohova thitho angelo.—Luk. 15:7.

16. N’nga nyo munodha dhilimbi-edha a-rela angelo mundhila iivi?

¹⁶ Ndingari ilukulu Yohova nirumeli-a ira nifunjedhe vyokuza angelo, thitho makalelwiwa apama ninga dhiyevi-a, dhiveliwana atu, vilela nokami-a ira pingo ukale ochena. Nasazi-edhanga angelo ororomeleyala, i-yo thitho ninodha kala banja laarumiwee modhowa nodhowa.