Vyofuka vyokhumela waalimbo leri
N’nga “angelo oira sakhuliwa” oongiwa va lemba la 1 Timoteo 5:21 n’nga mbaani?
Rumiwi Paulo atoolembela karta Timoteo, wenuo ali ndimuwa fwee, thitho aongile ira: “Ndinaaulukhula mwakopolo, vamethoni va Nlungu na Kristu Yesu thitho na angelo oira sakhuliwa, ira u-arelenga malangi-o enala vo-okaana sakhulo.”—1 Ti. 5:21.
Yoroma, dhoweni nitapanyeni vya angelo enao ta-ali gulu li-uli. Pyooneelatu ira aliwa katinakale a 144.000. Vevo Paulo vyalembela liye Timoteo kartila, Makristau ozoziwa tali ta-anarome venyati-iwa dhowa dhulu. Vahora yeniyo, arumiwi thitho ozoziwa enango tali ta-anakale vyopanduchiwa vyauzimu ee-no aliwa tali ta-anakale “angelo oira sakhuliwa” enala.—1 Ak. 15:50-54; 1 At. 4:13-17; 1 Ju. 3:2.
Thitho “angelo oira sakhuliwa” katinakale angelo enao ta-avwenle Nlungu va hora ya igumula. Angelo enala tali wu ikhundu ya Satana tatookala viwanda thitho amwidani a Yesu. (Mar. 6:2; Luk. 8:30, 31; 2 Pe. 2:4) Sogolou aliwa anodha e-liwa perezoni wa vyawa 1.000 thitho vasogolovee anodha phiwa vambo-i na namanami-a.—Yud. 6; Apk. 20:1-3, 10.
“Angelo oira sakhuliwa,” enao aongile Paulo, vinooneya ira ndi angelo ororomeleya enao tali ikhundu ya “Nlungu na Kristu Yesu.”
Dhulu uli angelo mamiliyau anjinji enao tali ororomeleya. (Aeb. 12:22, 23) Mbwenye kaninofwanela thuulela ira aliwa anolaba basa dholandana vahora imbo-i. (Apk. 14:17, 18) Thuulelani ira vahora inango ngelo mbo-i atoova-iwa basa yopha anyakondo a Asuri okwakwana 185.000. (2 Mam. 19:35) Angelo anjinji tatoova-iwa basa “yodha khumi-a mu Umwene wa [Yesu’] vyogwegweducha thitho atu o-ovwela malamulo.” (Mat. 13:39-41) Angelo enango thitho anodha laba basa “yogumani-a atu asakhuliwile” dhowa dhulu. Mat. 24:31) Thitho enango tatotongiwa ira ‘tanibarelenga mundhila dhi-u dhothene.’—Sal. 91:11; Mat. 18:10; mufwanafwani-edhele na lemba la Mateu 4:11; na Luka 22:43.
“Angelo oira sakhuliwa” oongiwa va lemba la 1 Temoteo 5:21 vinooneya ira ndi angelo enao tava-iwile basa lavakhundu okami-a mipingo. Kapitulwila, Paulo atoovelela malangi-o azelu enao anakami-e andimuwa avapingoni ira talabenga pama basaliwa, dhedho dhinairi-e ira atu pingoni taalemezenga. Andimuwa avapingoni anofwanela laba basa liwa ‘mo-osakhula’ katinofwanela sakhula vyongo tonga motamanga rima. Inofwanela iri-a andimuwa avapingoni arelanga malangi-o ovudheleliwa a Paulo ndi oi talabenga mabasa apingoni “vamethoni va Nlungu na Kristu thitho angelo oira sakhuliwa.” Ee-no pyooneelatu ira angelo enango anolaba basa yokami-a pingo ninga barela arumiwi a Nlungu, akami-a va basa lolaleela thitho wandela Yohova moda vyongo vinowendela aliwa.—Mat. 18:10; Apk. 14:6.