MURU OFUNJEDHA 23
NYUMBO 2 Dzina Lanu Ndinu Yehova
N’nga dhina la Yohova linothapulelan’ni wa nyo?
“‘Nyo muli mboni dhanga,’ unoonga e-no ndi Yohova.”—ESA. 43:10.
VINOFUNA I-YO FUNJEDHA
Muone vyongo vinaire i-yo ira nicheni-e nosikimizela dhina la Yohova.
1-2. N’nga ninoidhiwa a-vi ira dhina la Yohova tofuneya maningi wa Yesu?
DHINA la Yohova tofuneya maningi wa Yesu. Kavali mutu mwinango wenuo akami-idhe atu idhiwa dhina la Yohova kwaranya Yesu. Mwasa uvirile natoona ira Yesu ali okozeya wukwa vothonyi-edha ira Yohova ndi ochena thitho ndhiladhee dhothene tolongomana. (Mrk. 14:36; Aeb. 10:7-9) Thitho va nduli vautongi wa vyawa 1.000, Yesu unodha weleli-edha kopolo dhothene wa Babee ira dhina la Yohova licheni-iwe. (1 Ak. 15:26-28) N’nga vyothene viirile Yesu vocheni-a dhina na Nlungu vinonifunji-a n’ni? Vinooni-a ira liye unodhiveliwana maningi Yohova.
2 Yesu atodha vailambo yavathi mudhina la Babee. (Ju. 5:43; 12:13) Liye atookami-a anama-arelee idhiwa dhina la Babee. (Ju. 17:6, 26) Liye anofunji-a thitho iranga vyongo vyodabwi-a, anokami-a atu idhiwa ira Yohova ngwam’va-a zelu thitho kopolo. (Ju. 10:25) Thitho Yesu atovepa Yohova ira aing’anele anamafunjedhee “namwasa wa dhina [la Yohovuo].” (Ju. 17:11) Ee-no akala ira Yesu aona e-ni dhina la Babee, pyo-ovweya ira mutu aonge ira ndili nama-arela wa Kristu mbwenye liye a-idhiwa venango i-ndi-edhela basa dhinali.
3. N’nga ninotapanyani n’ni muyofunjedha yen’na?
3 I-yo ninga Makristau ninosazi-edha Yesu thitho ninom’dhiveliwana volemeza dhina la Yohova. (1 Pe. 2:21) Muyofunjedha yen’na ninoonani mwasee Yohova wavelele liye dhinali waatu enao tanolaleela “milanyu yapama ya Umwene.” (Mat. 24:14) Ninotapanya thitho funeya wa dhina la Yohova va kadha mutu vaekhene.
“ATU OIDHIWEYANA DHINALEE”
4. (a) N’nga Yesu a-anadhowe dhulu alamulile ira anamafunjedhee tairen’ni? (b) N’nga lamulo leli linoiri-a fuka yofuka iivi?
4 Anga-adhi vang’ono ira awelele dhulu, Yesu atowandela anamafunjedhee ira: “Mbwenye mwadhawachela zimu ochena, munodha kaana kopolo. Thitho munodha kala mboni dhanga mu Yerusalemu, wu Yudeya othene, wu Samaria fiyedha khomoni wa ilambo yavathi.” (May. 1:8) Ee-no milanyu yapama inofwanela laleeliwa uliwothene akala wu Isiraeli baa-i. Atu amitundu yothene anofuneela va-iwa ngari kala anama-arela a Yesu. (Mat. 28:19, 20) Mbwenye Yesu aongile ira “munodha kala mboni dhanga.” N’nga anamafunjedha achineneevala tanofuneela idhiwa dhina la Yohova, venango tafuneya kala mboni dha Yesu? Mwasa wava Mayirelo kapitulu 15 unonikami-a fwanya yowakula ya yofuka yeyi.
5. N’nga arumiwi naandimuwa awu Yerusalemu tathonyi-edhe a-vi ira atu othene anofuneya idhiwa dhina la Yohova? (Muone thitho iruthiruthi.)
5 Mu yawa ya 49 K.A.B., arumiwi naandimuwa awu Yerusalemu tatogumana ira katapanye vya atu o-oineliwa vinofuna aliwa irana ira takale Makristau. Komoni wa vyotapanyavyo, Yakobo, wenuo ali balee wa Yesu atoonga ira: “[Pedru] Simoni utoonga movweya pama mwemo Nlungu mwarumenle liye voroma atu amaziza enango ira vari viwa asakulevo atu enango ira taidhiweye na dhinalee.” N’nga veva Yakobo aonga vya dhina laani? Movwelana na vyevi namaongela Amosi vyalembile liye, Yakobo aongile ira: “Ndinodha irana vyevi ira atu o-alao tafunafune Yohova na rimiwa othene. Tafunafune vambo-i naatu amitundu yothene yaatu, atu oitaniwana dhina langa, uongile e-no ndi Yohova.” (May. 15:14-18) Anamafunjedha achineneevala tanofuneeleya funjedha vya Yohova thitho idhiwiyana dhinalee. Vyevi vinothapulela ira aliwa tanofuunela wandela atu enango vya dhina la Nlungu thitho atwao taaonenga ira mbaalimbo imelela dhinalo.
Vagumano wa gulu lotonga muhora yaarumiwi, alombwana ororomeleyala tatoozindiyela ira Makristau anofwanela khala atu oidhiweyana dhina la Nlungu (Muone ndima 5)
6-7. (a) Mwasiwa ngwan’ni Yesu atoodha vailamboi? (b) N’nga mwasa ulukhulu wadhenle liye ngwan’ni?
6 Dhina loi Yesu linothapulela ira, “Yohova ndi ivulumucho” thitho Yesu ndi dhila yeniyo Yohova i-indi-edhe liye basa vovulumucha atu enale tathonyi-edhe iroromelo. Yesu atodha vailambo yavathila dhavelela ingumiyee ira avulumuche atu. (Mat. 20:28) Khuto wenuo waveliwile watoodhula ngari ira atu tavulumuwe thitho ira tadhafwanye ingumi yo-omala.—Ju. 3:16.
7 N’nga mwasiwa ngwan’ni atu tanofuneela vulumuchiwa? Tanofuneela vulumuchiwa namwasa wa vyevile vyaireile mundani mwa Edeni. Muyofunjedha ivirile nitoona ira anamabali-u oroma, Adamu na Eva, katavwele Yohova vyevi vyatoiri-a ira katatile ngari yokaana ingumi yo-omala. (Mar. 3:6, 24) Mbwenye vatokala mwasa mwinango thitho wenuo waromi-iwidhe wenuo wali nlukhulu kwaranya vulumuchiwa waatu. Satana atoonga vyonama vyothakala maningi vyokhuza Yohova. (Mar. 3:4, 5) Ee-no vulumuchiwa wa a-ima a Adamu na Eva unovwelana namwasa nlukhulu wenuo ndi cheni-iwa wa dhina la Yohova. Voi Yesu aimelela Yohova thitho anoidhiweyana na dhinalee liye atokami-a maningi vocheni-a dhinali.
Pyo-ovweya ira mutu aonge ira ngunama-arela wa Kristu mbwenye aidhiwa venango indi-edha basa dhina la Babee?
8. N’nga atu othene anororomela Yesu anofwanela zindiyela n’ni?
8 Anama-arela othene a Yesu kaya Mbaayuda venango amitundu inango, tanofuneeleya idhiwa ira wenuo unowavulumucha ndi Yohova Nlungu, wenuo ndi Babee Yesu. (Ju. 17:3) Mofwanafwana na Yesu naaliwene thitho tanofuneela idhiweyana dhina la Yohova. Tanofuneela thitho zindiyela ira cheni-iwa wa dhinali kofuneya maningi. Idhiwa vyevi ndiweo unanikami-e ira nivulumuwe. (May 2:21, 22) Anama-arela othene ororomeleya a Yesu tanofuneela funjedha vya Yohova thitho Yesu. Lobelo la Yesu linofwanyeya va Juwau kapitulu 17 lamari-idhe na madhu oi: “Miyo nditoiri-a ira aliwa taidhiwe dhina linyu thitho ndinodha dhowanave aidhiwi-a dhinalo, ira aliwa thitho tathonyi-edhenga udhivela ninga mwemwo mwandiidhiwi-ile nyo.”—Ju. 17:26.
“NYO MULI MBONI DHANGA”
9. N’nga ninathonyi-edhe a-vi ira dhina la Yohova tofuneya maningi wa i-yo?
9 Pyooneelatu ira anama-arela othene a Yesu tanodhilimbi-edha cheni-a dhina la Yohova. (Mat. 6:9, 10) Taona ira dhina la Yohova tofuneya maningi kwaranya yongo iliyothene. Thitho vyevi pyooneelatu mu vyoira viwa. N’nga ninakami-e a-vi cheni-a dhina la Yohova venango runi-a vyonama vya Satana?
10. N’nga lemba la Esaya 42 fiedha 44 linoonga vya landu uvi? (Esaya 43:9; 44:7-9) (Muone thitho iruthiruthi.)
10 Bukhu la Esaya kapitulu 42 fiedha 44 linothonyi-edha izo ina i-yo vocheni-a dhina la Yohova. Makapitulwala tanoonga mopipirisa vya landu okhuza milungu yen’ne ili tribunale. Yohova unowandela uliwethene wen’ne unoonga ira ndili nlungu ira avelele umboni oi ngu nlungudi. Liye unovepa thitho amboni ira tadhe tadhasikimizele akala aliwa timilungu yaimbarimbari. Mbwenye kavali unavelele umbonuo.—Muleri Esaya 43:9; 44:7-9.
Ninowakhula mundhila dhinjinji va landu unonikhuza (Muone ndima 10 na 11)
11. Movwelana na lemba la Esaya 43:10-12, n’nga Yohova uwandenle n’ni atwee?
11 Muleri Esaya 43:10-12. Voonga vya atwee Yohova uongile ira: “Nyo muli mboni dhanga, . . . thitho miyo ndili Nlungwinyu.”Ee-no Yohova unowafuka ira: “N’nga vatokala Nlungu mwinango kumi-avo miyo? (Esa. 44:8) Ee-no i-yo nitokaana ngari yowakhula ya yofuka yeyi. Vyoonga na vyoira vi-u vinofwanela sikimizela ira Yohova ndi Nlungu waimbarimbari. Dhinalee tavadhulu kwaranya dhina n’nango nlilothene. Vyoira vi-u vinofwanela thonyi-edha ira ninom’dhiveliwana maningi Yohova thitho ninodha kalave ororomeleya wa liye masiki ira Satana anioni-anga nyarwa maningi. Naira ee-no ninodha kami-a cheni-a dhinalee.
12. N’nga ulosi wa va Esaya 40:3, 5 wa kwakwaneli-edhiwe a-vi?
12 Navilimbi-edhanga cheni-a dhina la Yohova venango limbililee ninokhala nisasi-edhanga Yesu Kristu. Esaya atoro-edha ira “mutu mwinango [“unodha saka-edha,” madhu achindo.] ndhila ya Yohova.” (Esa. 40:3) N’nga madhu enala takwakwaneli-iwidhe a-vi? Juwau namabadiza atosaka-edha ndhila ya Yesu wen’ne adhidhe mudhina la Yohova thitho dhaonga mudhina la Yohova. (Mat. 3:3; Mrk. 1:2-4; Luk. 3:3-6) Ulosi wenuo watoonga thitho ira: “Titimi-o wa Yohova unodha oneela. (Esa. 40:5) N’nga titimi-uo waoneile a-vi? Yesu angadhidhe vailambo yavathila anooira vyongo saasawa ninga Yohova thitho vyali ninga Yohovene wenuo ngwadhidhe vailambo yavathila.—Ju. 12:45.
13. N’nga ninam’sazi-edhe a-vi Yesu?
13 Mafwanafwana na Yesu i-yo nili Mboni dha Yohova. Ninoidhiweyana dhina la Yohova thitho ninowandela atu enango vya mabasee odabwi-a. Mbwenye ira vyevi viodeye, ninofwanela kami-a atu idhiwa izo ina Yesu vocheni-a dhina la Nlungu. (May. 1:8) Yesu ndi mboni ororomeleya wa Yohova thitho i-yo nino-arela ifwanafwani-oee. (Apk. 1:5) N’nga ninathonyi-edhe a-vi ira dhina la Yohova tofuneya maningi wa i-yo?
MODA MUNATHONYI-EDHELE I-YO IRA DHINA LA YOHOVA TOFUNEYA MANINGI
14. Movwelana na lemba la Salimo 105:3, n’nga ninovivwa a-vi nathuulela vya dhina la Yohova?
14 Ninogaya namwasa oidhiweyana dhina la Yohova. (Muleri Salimo 105:3.) Yohova unosangalala maningi nagayelanga dhinalee. (Jer. 9:23, 24; 1 Ak. 1:31; 2 Ak. 10:17) Gaya namwasa wa Yohova unothapulela gayela ira Yohova ndi Nlungwi-u. Ninoona ira yen’na ndi ngari yolemeza dhinalee thitho cheni-a limbililee. Kaninofwanela kaana manyadho vowandela afwi-u abasani, axikolani, amwandamani-u venango atu enango ira i-yo nili a Mboni dha Yohova. Namanami-a unofuna ira ni-iye wandela atu enango vyokhuza dhina la Yohova. (Jer. 11:21; Apk. 12:17) Thitho Satana naanamaongelee onama tanofuna ira atu tadiwale dhina la Yohova. (Jer. 23:26, 27) Mbwenye dhiveliwana dhina la Yohova unoiri-a ira nisangalalenga “dambo nlilothene.”—Sal. 5:11; 89:16.
15. N’nga itana va dhina la Yohova unothapulela n’ni?
15 Ninodhowanave itana va dhina la Yohova. (Joe. 2:32; Aro. 10:13, 14) Itana va dhina la Yohova kunothapulela idhiwa dhinalo noli-indi-edhanga basa. Unothapulela idhiwa vyoi Nlungu utokao, m’roromela thitho m’nyindela ira unodha nikami-a thitho nisogolela. (Sal. 20:7; 99:6; 116:4; 145:18) Ninokami-a atu enango idhiwa dhina la Nlungu thitho makhalelwe apama. Ninowalimbi-a ira tachinyuwe noiranga vyongo vinakami-e ira Yohova asangalalenga naaliwa.—Esa. 12:4; May. 2:21, 38.
16. N’nga ninathonyi-edhe a-vi ira Satana ngonama?
16 Ninorumela oni-iwa nyarwa namwasa wa dhina la Yohova. (Yak. 5:10, 11) Nakalave ororomeleya vanogumanana i-yo nyarwa ninothonyi-edha ira Satana ngonama. Hora ya Yobo Satana atoongana atu othene ira enao anom’labela Yohova ira: “Mutu unooda velela iliyothene ina liye ira avulumuche ingumiyee.” (Yob. 2:4) Satana atoonga ira atu anooda m’labela Yohova akala ira vyongo vinoawendela pama. Mbwenye akala anogumanana nyarwa, anodha-iya m’labela Yohova. Yobo ali ororomeleya thitho atothonyi-edha ira vyevi pyonama. I-yo thitho nitokaana ngari yothonyi-edha ira Satana masiki aire a-vi, kanina-iye m’labela Yohova. Kanikaikele navang’ono vene ira Yohova unodha niing’anela namwasa wa dhinalee.—Ju. 17:11.
17. Movwelana na lemba la 1 Pedru 2:12, n’nga ninalemeze a-vi dhina la Yohova?
17 Ninolemeza dhina la Yohova. (San. 30:9; Jer. 7:8-11) Voi ninoimelela Yohova thitho ninoitaniwana dhinalee, ninooda lititimi-a dhinalo venango linyozi-a. (Muleri 1 Pedro 2:12.) Ee-no ninofwanela vilimbi-edha ira vyoonga thitho vyoira vi-u vim’titimi-enga Yohova. Nairanga vyevi, masiki kanili atu olongomana, ninooda lemeza dhina la Yohova.
18. N’nga ninathonyi-edhe a-vi ira dhina la Yohova tofuneya maningi wa i-yo? (Muone thitho madhu achindo.)
18 Ninoona ira dhina la Yohova tofuneya maningi kwaranya mwemo atu munonionela aliwa. (Sal. 138:2) Mwasiwa ngwan’ni kaana mathuulelo enala kofuneya maningi? Atu enango anooda ninyoza namwasa oi ninodhiveliwana dhina la Yohova.a Yesu atoorumela wukwa oiri-a manyadho ninga lipanga namwasa ofuna lemeza dhina la Yohova. Liye “kaabanle ira vyoiri-a manyadho vim’mwireele.” Thapulela ira kaavikhumbanyedha maningi vya mwemo atu mwamonela aliwa. (Aeb. 12:2-4) Liye afunechecha irana ifunelo ya Nlungu.—Mat. 26:39.
19. N’nga nyo munovivwa a-vi mwathuulela vya dhina la Yohova?
19 Ninogayela dhina la Yohova thitho ninoona ira yen’na ndi ngari ilukulu idhiweyana ira nili Mboni dha Yohova. Namwasa wen’na ninokala ofunechecha dhowanave titimi-a dhina la Yohova masiki ira atu enango taninyozenga. Dhina la Yohova tofuneya maningi wa i-yo kwaranya mwemule atu munolionela aliwa. Ee-no akala Satana unaniirele vyongo vyoi a-vi, dhoweni nidhowenave titimi-a dhina la Yohova. Naira ee-no ninodha thonyi-edha ira dhina la Yohova tofuneya maningi wa i-yo ninga mwemo Yesu Kristu mwalionela liye.
NYUMBO 10 Tamandani Yehova Mulungu Wathu
a Angalive ira Yobo, oi ali ororomeleya, atoodhodhomeya angathuulele mwemo afwee araru mwaongela aliwa. Voroma, a-imee othene tatookwa thitho vyongovyee vyanganongenle, “Yobo kadawile venango m’momba landu Nlungu ira utoirana vyongo vyothakala.” (Yob. 1:22; 2:10) Mbwenye vasogolovee, afweao tangaongile ira Yobo utoira vyongo vinango vyothakala, tatooroma ‘onga mo-othuulela pama.’ Liye aona ira yongo yofuneya maningi khubarela limbililee kwaranya cheni-a dhina la Nlungu.—Yob. 6:3; 13:4, 5; 32:2; 34:5.