Kamukayikelenga ira Yohova unoudhiveliwanani

1. Mwasiwa ngwan’ni mwatoodhivelela wa Yohova? (Muone thitho iruthiruthi.)

N’nga munothuulela vahora yadhivelelenyo wa Yohova? Mwatoosakula ira vyevi namwasa oi mwatoofiya vom’mwidhiwa pama thitho m’dhiveliwana. Mwatoolanyedha ira munodha e-la vyofunavyee valimburo loroma thitho dhowanave m’dhiveliwa nariminyu othene, ingumi inyu yothene namathuulelwinyu othene thitho nakopolo dhinyu dhothene. (Mrk. 12:30) Romela vahora yeniyo udhivelinyu na Yohova ukadhi uulukulanga. N’nga munawakule a-vi mutu mwingo aufukani ira “N’nga munom’dhiveliwadi Yohova?” Mo-okaikela munom’rumela ira, “Ndinom’dhiveliwana kwaranya mutu uliwethene venango yongo iliyothene.”

2-3. N’nga Yohova unofuna ira na-akaikelenga vyan’ni, n’nga ninotapanya n’ni mu yofunjedha yei? (Jeremiya 31:3)

² N’nga munawakule a-vi mutu mwingo aufukani ira, “N’nga munothuulela ira Yohova unoudhiveliwanani?” Venango munokaikela wakula yofuka yei namwasa oviona ira muli o-ofwanelela wa Yohova ira audhiveliwenganani. Rongola mwinango wenuo kanathonyi-edhiwevo udhivela angali mwana aongile ira: “Ndinoidhiwa ira ndinom’dhiveliwana Yohova thitho kandinokaikela vyevi. Mbwenye yongo inokayikela miyo hora dhinango choi, n’nga Yohova unondidhiveliwana?” N’nga chini inaukami-eni ira mwa-akaikelenga ira Yohova unoudhiveliwanani?

³ Yohova unofuna ira mukaena inyindelo yoi liye unoudhiveliwanani. (Muleri Jeremiya 31:3.) Imbarimbari choi Yohova nguiri-idhe ira mudhe wa liye. Mungamadhi badiziwa, mwatoowachela yotuva yapereso yavadhulu maningi yeyo ndi udhivela ororomeleya wa Yohova. Vyevi vinothapulela ira liye unoudhiveliwanani maningi thitho kanodha u-iyani. Udhivela wen’na unoiri-a ira Yohova aonenga arumiwee ororomeleya thangani-avo nyo “ninga fumee yavakundu.” (Mak. 3:17.) Yohova unofuna ira mudhivwenga ninga rumiwi Paulo. Liye atokaana inyindelo yoi Yohova unom’dhiveliwa moi atoolemba ira: “Namwasa oi nditosikimizela rima ira wukwa, ingumi, angelo, maguverno, vyongo vilivo, vyongo vinodha, kopolo, imo, di-a venango yopanduchiwa iliyothene, kinodha ni-iyani-a na udhivela wa Nlungu.” (Aro. 8:38, 39) Muyofunjedha yei, ninotapanya mwasee unofwanela i-yo wenjedhela roromela wi-u ira Yohova unonidhiveliwanana navinofuna nikami-a irana vyevi.

MWASEE WA-ANOFWANELA I-YO KAIKELANGA IRA YOHOVA UNONIDHIVELIWANANA

4. N’nga Satana unofuna ira niroromelenga vyonama viivi n’nga ninam’runi-e a-vi?

⁴ A-kaikela ira Yohova unonidhiveliwana, unooda nikami-a limbanana imbo-i mwa “vyoira vyainyengo” vya Satana. (Aef. 6:11) Satana unooda ira vyothene vinaode liye ira awu i-eni mlambela Yohova. Imbo-i mwamigo-ee ilukulu ino-indi-edha basa Satana ndi onga vyonama ira Yohova kanonidhiveliwana. Kamudiwale ira Satana uno-indi-edhela basa ngari va vyofooka vi-u. Hora dhinjinji liye unoniwesedha nakala ofooka venango nathuulelanga vyongo vyadawi-idhe i-yo ndulimu, nyarwa dhinogumanana i-yo va-eeni venango kaikela vyongo vyasogolo. (San. 24:10) Satana uli ninga Kalamu inofwanya ngari ira i-inde inyama ili yo-ovuneleya. Nafooka, Satana unofwanyelavo ngari ira anigonji-e. Mbwenye naroromelanga ira Yohova unonidhiveliwanana, ninooda kala okozeya ‘limbanana’ Satana na vyainyengovyee.—1 Pe. 5:8, 9; Yak. 4:7.

5. N’nga akaikela ira Yohova unonidhiveliwanana unanikami-e a-vi?

⁵ Nakala osikimizela ira Yohova unonidhiveliwanana, ninooda kala vauxamwali olimba na liye. N’nga mwasiwa ngwani ninoonga ee-no? Yohova atoonipanducha mundhila yoi nidhiveliwengana atu enango thitho nifunenga ira atu enango tanidhiveliwengana. Atu enango tanitonyi-edha udhivela, i-yo thitho ninofuneela athonyi-edha udhivela. Ee-no, naona ira Yohova unonidhiveliwana thitho nilemeza, paevo vanofunechecha i-yo m’dhiveliwana maningi. (1 Ju. 4:19) Naroma m’dhiveliwana maningi Yohova, liye thitho unonidhiveliwana maningi. Bibilya linoonga mo-ovira khundu ira: “Mum’kwivele Nlungu thitho liye unodha ukwivelani.” (Yak. 4:8) N’nga ninaire a-vi ira niroromelenga ira Yohova unonidhiveliwanana?

N’NGA CHINI INOFUNA NIKAMI-A IRA NA-AKAIKELENGA IRA YOHOVA UNONIDHIVELIWANANA?

6. N’nga ninofwanela lobelela n’ni ira na-akaikelenga ira Yohova unonidhiveliwana?

⁶ Mudhowenganave lobela thitho onga vyothene vinofuna nyo. (Luk. 18:1; Aro. 12:12) Mumvephenga Yohova hora dhothene ira aukami-eni viona ninga mwemo munouonelani liye. Onga mwaimbarimbari rima odhiomba landu, unoiri-a ira mutu athuulelenga ira vinokala vyorucha ona ira Yohova unom’dhiveliwana. Mbwenye muthuulele ira Yohova ngunlukulu kwaranya mirimi-u. (1 Ju. 3:19, 20) Liye unouidhiwani pama kwaranya munoviidhiwela nyo thitho liye unoona makalelwinyu apama oi nyo kamunooda aona. (1 Sa. 16:7; 2 Li. 6:30) Ee-no kamu-iye ‘mmwandela Yohova vyokumbanyi-a vinyu’ thitho m’vepha ira aukami-eni ira musikimizele ira liye unoudhiveliwanani. Mwamala lobela muirena vyongo movwelana na malobelwinyu vo-indi-edhela basa makhundo o-arelala.

7-8. N’nga buku la Salimo linonisimikizela a-vi ira Yohova unonidhiveliwana?

⁷ Muroromelenga vinoonga Yohova. Vo-indi-edhela basa zimwee ochena, Yohova atookami-a atu talembile Bibilya ira taonge imbarimbari yokhuza moda muli liye. Kathuulelani moda Davide mwaongile liye pama likhundo lothonyi-edha ira Yohova unonidhiveliwanana. Liye aongile ira: “Yohova uli duzi naatu othweya rima. Liye unovulumucha atu ovivwela tangaranga.” (Sal. 34:18 madhu achindo.) Hora dhinjinji mwasukwala, munongo thuulela ira muli mwekhene. Mbwenye Yohova unolanyedha ira vahora ninga yen’na unokala duzi nanyo, namwasa oi hora inodhikumbanyedha nyo Yohova unoona ira munofuneela maningi kami-iwa na liye. Mu Salimo n’nango, Davide alembile ira: “Mulokote mi-odanga mubudu linyu latembe.” (Sal. 56:8) Yohova unoona nasukwala thitho nagumanangana nyarwa. Liye unoukumbanyedhani maningi thitho unovwa upha ninga munodhivwela nyo. Ninga mwemo ma-inje muli aliwa ofuneya wa mutu uli vaulendo, mi-odi-u njapereso yavadhulu maningi wa Yohova. Salimo 139:3 linoonga ira: “Nyo [Yohova] munoidhiwa pama ndhila dhanga dhothene.” Yohova unoona vyothene vinoira nyo, mbwenye liye uno-ela mathuulelwee va vyongo vyapama vinoira nyo. (Aeb. 6:10) Mwasiwa ngwani? Namwasa oi liye unosimba maningi vyongo vinoira nyo ira mum’sangalali-e.a

⁸ Vo-indi-edhela basa malemba olimbi-a ninga enala, Vinokala ninga Yohova unaaniwandela ira: “Miyo ndinofuna ira uidhiwe ira ndinoudhiveliwana maningi.” Ninga muoni-iyo ndulimu, Satana unofuna ira niroromelenga vyonama vyoi Yohova kanonidhiveliwana. Ee-no akala hora dhinango munokaikela ira Yohova unoudhiveliwanani, mudhifukenga ira: ‘N’nga ndinofwanela roromelanga, “baba wavyonama” venango “Nlungu waimbarimbari”?’—Ju. 8:44; Sal. 31:5.

9. N’nga Yohova unowasikimizela n’ni atu enao anom’dhiveliwana? (Ekisodo 20:5, 6)

⁹ Muthuulelenga mwemo Yohova munovwela liye atu enango tam’thonyi-edha udhivela. Mutuulele vyevyo Yohova vyawandele liye Mose na Aisraeli. (Muleri Ekisodo 20:5, 6.) Yohova atoolanyedha ira Unongodhowanave thonyi-edha udhivela ororomeleya waatu tanom’dhiveliwana. Madhu enala anothonyi-edha ira Yohova ndi ororomeleya unodhiveliwana atu enao anom’dhiveliwana. (Nee. 1:5) Ee-no akala mutoroma kaikela ira Yohova anoudhiveliwanani murome vifuka ira: ‘N’nga miyo ndinom’dhiveliwana Yohova?’ akala nyo munom’dhivveliwana Yohova thitho munoira yongo iliyothene ira musangalali-e, kamukaikelenga ira liye unoudhiveliwanani maningi. (Dan. 9:4; 1 Ak. 8:3) Vi vinothapulela ira akala munodhiveliwana Yohova, kavali mwasa okaikelanga ira liye unoudhiveliwanani. Muroromelenga na rima othene ira Yohova unoudhiveliwanani thitho kanodha u-iyani.

10-11. N’nga Yohova unofuna ira nionenga a-vi khuto? (Agalatiya 2:20)

¹⁰ Thuulelani vya Khuto. Khuto ndi sembe yapereso yavadhulu yavelele Yohova waatu. (Ju. 3:16) N’nga yotuvayi tauva-idheni nyo mwekene? Ee! Kathuulelani vyongo vyamwireele rumiwi Paulo. A-anakale Kristau atooira vyodawa vilukulu thitho anoodawi-ave vyongo. (Aro. 7:24, 25; 1 Ti. 1:12-14) Mbwenye liye anoona Khuto ndi yotuva yam’va-idhe Yohova va liye ekhene. (Muleri Agalatiya 2:20.) Muthuulele ira ngu Yohova am’vudhelele rumiwi Paulo ira alembe vyevi. Thitho madhu othene alembiwile Bibilyani talembiwile ira tanifunji-e. (Aro. 15:4) Ee-no madhu a Paulo anooni-a mwemo Yohova munofunela liye ira nyo muonenga mwemo Khuto ninga yotuvayee wanyo. Nyo mwaonanga Khuto mundhila yen’na, Munolimbi-a iroromelo inyu yoi Yohova unoudhiveliwanani vamwekhene.

¹¹ Ninom’simba Yohova namwasa oruma Yesu udha vailambwila dhanikwela. Mbwenye mwasa mwinango wadhele Yesu vailambwila ndi dhawandela atu imbarimbari ya Nlungu. (Ju. 18:37) Mwaifwanafwani-o, Yesu atoofunji-a atu ira Yohova unodhiveliwana maningi a-imee.

YESU UNONIKAMI-A IRA NA-AKAIKELENGA IRA YOHOVA UNONIDHIVELIWANA

12. Mwasiwa ngwani kaninakaikele vyevyo Yesu vyaongile liye vyokhuza Yohova?

¹² Yesu angali vailambo yavathivano, anoodhiveliwana funji-a atu makalelo a Yohova Nlungu. (Luk. 10:22) I-yo kaninokaikela ira vyongo vyafunji-a Yesu vyokhuza Yohova pyaimbarimbari. Namwasa oi Yesu atookala dhulu wahora indendai kwaranya mutu uliwethene. (Ako. 1:15). Liye atoona ekene mwemo Yohova munodhiveliwana liye a-imee ororomeleya. N’nga Yesu unokami-a a-vi atu roromela ira Yohova unonidhiveliwana?

13. N’nga Yesu unofuna ira nimonenga a-vi Yohova?

¹³ Yesu unofuna ira nim’monenga Yohova ninga mwemo munom’monela liye. Mu mabukhu amilanyu yapama, Yesu atoom’monga Yohova ira “Baba” fendo dhokwaranya 160. Aonganga na ananama-arelee, liye anoodhiveliwana indi-edha basa madhu oi “Babinyu” venango “Babinyu wadhulu.” (Mat. 5:16; 6:26) Yesu a-anadhe vailambwila arumiwi ororomeleya a Yohova tano-indi-edha basa madhu ninga, ‘wakopolo dhothene’ ‘Wadhuludhulu’ venango ira ‘Namapanducha Nlukulu.’ Vom’mongana Yohova. Mbwenye Yesu ano-indi-edha basa madhu oi ‘Baba,’ vofuna thonyi-edha ira Yohova unodhiveliwana maningi arumiwee ninga mwemo Baba waudhivela munodhiveliwela liye a-imee. Dhoweni nitapanyeni fendo mbili vevo Yesu va-indi-edhe liye basa madhu oi “Baba.”

14. N’nga Yesu athonyi-edhe a-vi ira uliothene wa i-yo ndi wapereso yavadhulu wa Babi-u wadhulu? (Mateu 10:29-31) (Muone thitho iruthiruthi.)

¹⁴ Dhoweni nitapanyeni madhu aongile Yesu va Mateu 10:29-31. (Muleri.) Mbalame ndidhing’ono maningi dhoi kadhinooda m’dhiveliwana venango m’lambela Yohova. Mbwenye angalive ee-no Babi-u unoona ira tapereso yavadhulu thitho unoidhiwa imbo-i yagwela vathi. Ee-no n’nga akala Yohova unoona ira mbalamedhi tapereso yavadhulu, n’nga a-vi arumiwee ororomeleya enao tanom’lambela namwasa om’dhiveliwana? Yesu atoonga thitho ira Yohova unoidhiwa injiva wasisi lili muruni mwa mutu uliwethene. Akala Yohova unoidhiwa vyongo ving’ono ving’ono vya-iyo, kaninofwanela kaikela ira Yohova unonidhiveliwanana. Va pyoneelatu ira Yesu unofuna ira niroromelenga ira Babi-u unoniona ira nili apereso yavadhulu.

15. N’nga madhu a Yesu a va Juwau 6:44, anoniwandela vyoi a-vi vyokhuza Babi-u wadhulu?

¹⁵ Dhoweni nione thitho hora dhinango vevo Yesu va-indi-edhe liye basa madhu oi “Baba” (Muleri Juwau 6:44.) Mwaudhivela noriya rima, Yohova ngwairi-idhe ira mufunjedhe imbarimbari. Mwasiwa ngwani liye atooira vyevi? Namwasa oi Babinyu wadhulu atoona ira nyo mutokaana rima wapama na makalelo apama. (May. 13:48) Vahora yaonga Yesu madhu ali va Juwau 6:44, vinooneya ira aongana vyalembile Jeremiya vili mulemba li-indiwile mu yofunjedha yei. Valemba leli Yohova atoowandela atwee ira: “Nditouriyelani rima thitho nouthonyi-edhani udhivela ororomeleya [venango ira ndinodhowanave uthonyi-edhani udhivela ororomeleya].” (Jer. 31:3; Mufwanafwani-edhele na Oseya 11:4.) N’nga madhu enala anothapulela n’ni? Babinyu wadhulu unadhowanave ona makalelwinyu apama angalive ira nyo kamunoaona.

16. (a) N’nga ninooda onga ira Yesu unoniwandela n’ni, n’nga mwasiwa ngwan’ni kaninofwanela kaikela? (b) Mwasiwa n’ngwani ninofwanela roromelanga maningi ira Yohova ndi Babi-u waudhivela? (Muone kwadru loi “Baba wenuo unofuneela i-yo othene.”)

¹⁶ Voonga vya Babi-u Yohova, vyakala ninga Yesu unoonga ira: “Yohova kai Babanga baa-i mbwenye liye thitho ngu Babinyu. Miyo ndinousikimizelani ira unoudhiveliwanani va mwekene.” Ee-no akala hora dhinango munokaikela udhivela wa Yohova, Murome thuulela mopwaseya nodhifuka ira: ‘N’nga ndi zelu kaikela mwana wa Nlungu oi unomwidhiwa pama Babi-u thitho unoonga imbarimbari hora dhothene?’—1 Pe. 2:22.

MULIMBI-ENGA IROROMELWINYU

17. Mwasiwa ngwan’ni ninofwanela dhilimbi-edha ira na-akaikelelnga vyoi Yohova unonidhiveliwana?

¹⁷ Ninofwanela limbi-a iroromelwi-u ira na-akaikelenga vyoi Yohova unonidhiveliwana. Ninga muonele i-yo yofunjedha yei, Satana mwidani-u ndi owenjela unodhowanave ira masaka-edho ira aniimwanani-e mlabela Yohova. Vofuna fooki-a iroromelwi-u, Satana unodhowanave niiri-a ira nikaikelenga vyoi Nlungu unonidhiveliwana. Mbwenye i-yo kanirumeli-e ira Satana aganyali!—Yob. 27:5.

18. N’nga ninaire a-vi ira niroromelenga maningi ira Yohova unonidhiveliwana?

¹⁸ Ira mwa-akaikelenga vyoi Yohova unoudhiveliwanani, mudhowenave lobela ira aukhami-eni ira mudhionenga ninga mwemo munouonelani liye. Muthuulelenga vyokhuza vyevyo mulimbo lemba Bibilya vyaongile liye vyokhuza udhivelee. Muthuulelenga mwemo munovwela liye atu enango tanthonyi-edhanga udhivela, liye thitho unoathonyi-edha udhivela. Muthuulelenga mwasee unouiri-ani ona Khuto kala yotuva yenio yauva-idheni liye vamwekene. Muroromelenga thitho madhu a Yesu oonga ira Yohova ndi Babinyu. Ee-no mutu unango adhaufukani ira, “N’nga Yohova unoudhiveliwanani?” munodha wakhula molimba rima ira, “Ee unondidhiveliwana thitho dambo nlilothene ndinoira vyothene vinaode miyo vothonyi-edha ira namiyene thitho ndinom’dhiveliwana.”