YOFUNJEDHA 14

Mwasiwa ngwani Nlungu ukhaana gulu lae?

1. Mwasiwa ngwani Nlungu atosakhula Aisrayeli ndulimu ira takhale gulu lae?

1. Mbumba ya Nlungu ya Anaisaraeli awale; 2. Makristau a hora yawale talaleelanga

Nlungu atoongelatu ira banja la Abrahamu langaulukhunle. Vasogolo viwa banja la Abrahamu lo-oulukhula fiya vokhala mbumba la Aisrayeli. Yohova o-osakhula mbumba leli ira limlabelenga. Aliwa tanofwanela khala ovwela malamulo a Nlungu, na mlambela mwandhila yofwanelela. (Salimo 147:19, 20) Eno, atu enango tangakhami-iwile na Nlungu dhela mwa mbumba leli.—Muleri Maromelo 22:18.

Nlungu o-osakhula Aisrayeli ira takhale Mboni dhae. Atu enango tangaodile mmwidhiwa Yohova dhela mwa mbumba la Aisrayeli. (Dotornomio 4:6) Istoria ya mbumba leli inooni-a ira tiphama vwela malamulo a Yohova.—Muleri Esaya 43:10, 12.

2. Mwasiwa ngwani makristau aimbarimbari tali ovwelana?

Vira wa hora, Aisrayeli too-iya vwela malamulo a Nlungu. Eno, Yohova owakhonda ira takhale mboni dhae. Nlungu o-osakhula gulu linango laatu. (Mateu 21:43; 23:37, 38) Malambo ano, Yohova unoidi-edha basa makristau aimbarimbari ira takhale mboni dhae.—Muleri Mayirelo 15:14, 17.

Yesu atokhozeeli-a anama-arelae ira talaleelenga mwasa wa Umwene wa Nlungu wa maziza othene ira takhale anamafunjedhae. (Mateu 10:7, 11; 24:14; 28:19, 20) Mamari-edho ailambo ya Satanai tali vakwikwi vinjinji, titho makristau aimbarimbari tana basa lolaleela mwasa wa Umwene wa Nlungu. Ti fendo yoroma Nlungu khaana gulu lamamiliyau aatu mmamburo o-iyana-iyana. (Apokalipse 7:9, 10) Iyavo vyongo vyevi, makristau aimbarimbari tanodhivelana na khami-ana neri-a mbovwelana. Vailambo yothene aliwa tanofunjedha vyongo vimbo-ive mwasa wa Bibilya.—Muleri Aebere 10:24, 25.

3. N’nga religiau la Mboni dha Yohova liromile avi?

Iruthiruthi ya Mboni dha Yohova talaleelanga yawa ya 1900 thitho malamboano; Mabukhu okhumela bibilyani muviongelo vyo-iyana-iyana.

Khumela mu yawa ya 1870, gulu loyeva laanamafunjedha a Bibilya lo-oroma vwechecha phama vinafunji-a Bibilya. Aliwa tanoidhiwa ira Yesu afuna ira makristau talaleelenga mwasa wa Umwene wa Nlungu. Eno aliwa to-oroma laleela mwasa wa Umwene vailambo yothene. Mu yawa ya 1931, aliwa tatoroma idhiweya na dhina loi Mboni dha Yohova.—Muleri Mayirelo 1:8; 2:1, 4; 5:42.

4. N’nga mbaani unaing’anela mabasa a Mboni dha Yohova?

Romela wanle Yesu ngunamatonga wamakristau aimbarimbari. Ndulimu, liye ato-indi-edha gulu limbo-i ira likhami-e na funji-a mipingo. Gulu leli lali laarumiwi na andimuwa enango. (Mayirelo 16:4, 5) Malambo ano, gulu laandimuwa oidhiwa vinjinji tinaing’anela mabasa a Mboni dha Yohova. Gulu leli linoitaniwa Gulu Lotonga. Aliwa anoing’anela mabasa othapulela, dinda na gawa mabukhu okhumela bibilyani muviongelo vyokwaranya 750 vailambo yothene. Gulu Lotonga linoindi-edha basa Bibilya ira likhami-e na funji-a mipingo yokwaranya mamiliyau 10. Va mpingo uliwathene vano-eliwa alombwana amakhalelo aphama ira takhale andimuwa a mpingo. Aliwa mbaatu aphama titho tanoonela phama mabila a Nlungu.—Muleri 1 Pedru 5:2, 3.

Mboni dha Yohova dhinolaleela mwasa wa Umwene wa Nlungu. Ninga vyairecha arumiwi, iyo titho ninolaleelecha mamidhi. (Mayirelo 20:20) Titho iyo ninofunji-a Bibilya atu ana ifunelo yoi tafunje mwasa wa Nlungu. Iyavo khala wi-u anamalambela, iyo Amboni dha Yohova nili banja lina babiwa waudhivela. Nili abali na arongola anokhami-ana unango na fwae. (2 Atezalonika 1:3) Leli tibanja laimwerumweru vinjinji vailambo yothene, neri-a njimbumba inaira ifunelo ya Nlungu titho inokhami-a atu enango.—Muleri Salimo 33:12; Mayirelo 20:35.

Ira mwiidhiwe vyowenjedheleya, muone muru wa 19 wa bukhu loi Zimene Baibulo Limaphunzitsa.