Mwasiwa ngwanni ninoitaniwa Mboni dha Yohova?

Atu anjinji anothuulela ira dhina la Mboni dha Yohova ti dhina la religiau lipya. Mbwenye vyawa vyokwaranya 2.700 ndulimu, Nlungu waimbarimbari atoaromola anamalabae ira “mboni’’ dhanga. (Esaya 43:10-12) Fiedha yawa ya 1931, naidhiweyana dhina loi Anamafunjedha Bibilya. N’nga mwasiwa ngwanni nitotukhula dhina loi Mboni dha Yohova?

Dhina li-u linokhami-a atu ira tammwidhiwe Nlungwi-u. Vyolembiwa vyawale, dhina la Nlungu, Yohova, linogumaneya mamiliyau manjinji Bibilyani. Mathapulelo manjinji, dhinali litochinjiwamo e-liwamo Mbwiye venango Nlungu. Mbwenye Nlungu waimbarimbari utooni-a vochena dhina lae Yohova, wa Mose vyaonga liye ira: “Li ti dhina langa la hora yothene.” (Ekisodo 3:15) Mwa-eno liye unodhi-iani-ana anlungu enango othene onama. Nili odhitukhulela voidhiweyana dhina lochena la Nlungu.

Dhina li-uli linothaphulela basa nlukhulu linalaba i-yo. Walelene, atu anjinji tatooirela umboni iroromelo yiwa wa Yohova. Oroma ali Abeli lombwala olongomana. Vovira vyawa mazana manjinji, Nowa, Abrahamu, Sara, Mose, Davide na enango tatookhala ikhundu ya ‘rambo nlukhulu waumboni.’ (Aebere 11:4–12:1) Ninga mutu munakhalela liye mboni vaselu wa mutu a-adawile, iyo thitho nitosakhula wandela atu imbarimbari yoonga vya Nlungwi-u.

Ninasazi-a Yesu. Liye Bibilyani unaitaniwa “mboni yororomeleya na yaimbarimbari.” (Apokalipse 3:14) Mwinyaene Yesu aongile ira ‘utoidhiwi-a dhina la Nlungu’ thitho ‘anolaleela vya imbarimbari’ voonga vya Nlungu. (Juwau 17:26; 18:37) Mwasa wa vyevyo, anama-arela aimbarimbari a Kristu tanofwanela tukhula dhina la Yohova na livwei-a. Piyevyo Mboni dha Yohova vinalimbi-edha aliwa viirana.

• Mwasiwa ngwanni Anamafunjedha Bibilya atotukhula dhina loi Mboni dha Yohova?

• N’nga Yohova ukhanlena mboni dhae vailambo Yavathi hora yolaphela avi?

• Mboni ilukhulu ya Yohova mbaani?