Munooda fwanya imwerumweru yaimbarimbari

1. N’nga yorambulela “yi-u yauzimu” chivi, n’nga inovwelana a-vi nokala osangalala?

KAANA imwerumweru yaimbarimbari kaunothapulela kala osangalala wa hora yoyeva, mbwenye kaana imwerumweru hora dhothene. Mwasiwa ngwan’ni ninoonga e-no? Yesu atoonga vaulalikee wavamwangoni ira: “Oraeli-iwa mbaatu ale anothuulela vyorambulela viwa vyauzimu.” (Mat. 5:3) Yesu atooidhiwa ira atu tapanduchiwile ira tafunechechenga idhiwa nolambela namapanduchiwa Yohova. Yei ndiyorambulela “yi-u yauzimu.” Voi Yohova ndi “Nlungu waimwerumweru,” atu anomlambela anooda thitho kala osangalala.—1 Timo. 1:11.

2-3. a) Movwelana na madhu a Yesu n’nga mbaatu avi enao anaode kala osangalala? b) N’nga ninofuna nitapanyen’ni muyofunjedha yei, n’nga mwasiwa ngwan’ni vyevi vinooda kala vyofuneya?

² N’nga ira nikale osangalala ninofuneela ira vyongo viniwendelenga pama? Kabe. Yesu valaleela liye, atoonga yongo inango yodabwi-a. Liye aongile ira: Atu enao “anovwa tangaranga,” namwasa wa vyothakala vyairile aliwa venango namwasa wa nyarwa dhinogumanana aliwa, anooda kala osangalala. Liye atoonga thitho vyevyi voonga vya “atu anoona nyarwa namwasa wa longomano” venango “anonyoziwa” namwasa okala anama-arela a Kristu. (Mat. 5:4, 10, 11) N’nga vinaodeye a-vi ira mutu aode kala osangalala vanogumanana liye nyarwa?

³ Yesu atofunji-a ira kaiira imwerumweru yaimbarimbari inodha vyongo vyaniwendelanga pama vaingumi yi-u. Mbwenye inofwanyeya nazindiyela vyorambulela vi-u vyauzimu thitho kala vauxamwali wapama na Yohova. (Yoswa 4:8) N’nga ninaire a-vi vyevi? Muyofunjedha yei, ninotapanya vyongo viraru vyevyo vinofwanela i-yo irana ira nifwanye imwerumweru yaimbarimbari.

NILERINGA THITHO FUNJEDHA BIBILYA

4. N’nga mutu unofwanela ira yongo ivi yoroma ira afwanye imwerumweru yaimbarimbari?

⁴ 1: Ira nikale osangalala ninofwanela dyanga yodya yauzimu. Vinyama naatu vinofuneela vyodya ira vikaena ingumi. Mbwenye atu baa-i mbanofuneela yodya yauzimu. Thitho yodya yauzimu chofuneyadi. Ngumwasiwa Yesu aongile ira: “Mutu kanakaena ingumi namwasa wa yodya baa-i, mbwenye na madhu othene okumela valomoni va Yohova.” (Mat. 4:4) Ee-no kanirumele ira dambo livire na-alerile madhu a pereso yavadhulu a Nlungu. Olemba masalimo aongile ira: ‘Oraeli-wa ngu mutu ule unodhiveliwana malamulo a Yohova thitho unoaleri nothuulela malamulwee nathana nama-iyu.’—Muleri Salimo 1:1-3.

5-6. a) N’nga ninofunjedhan’ni kumela Bibiliyani? b) N’nga leri Bibiliya unanikami-e mundhila dhivi?

⁵ Bibilyani Yohova utoniva-a malangi-o enao ananikami-e kaana ingumi yosangalala. Ninofunjedhamo vya ifunelo yanipanduchele liye, Vyevyo vinaire i-yo ira nikale vauxamwali wapama, thitho ira anilevelenga vyodawa vi-u, na idedi-edho yosangalali-a thitho vyolanyedha vyasogolo. (Jer. 29:11) Makundo aimbarimbari anofunjedha i-yo Bibiliyanala, anoiri-a mirimi-u kala yosangalala.

⁶ Ninga munoidhiwela i-yo, Bibilyani mutokala thitho makundo anonikami-a dambo na dambo. Na-arelanga malangi-o enala, ninooda kala osangalala. Mwasukwala namwasa wa nyarwa dhinogumanana nyo, mufwanyenga hora injinji yoleri thitho thuulela modi-a madhu a Yohova. Yesu aongile ira: “Oraeli-iwa mbaatu ale anovwa madhu a Nlungu noalokota!”—Luka 11:28.

7. N’nga chini inaukami-eni ira musangalalenga mwaleringa madhu a Nlungu?

⁷ Mwaleringa madhu a Nlungu, mufwanyenga hora yothuulela ira musangalalenga na vinoleri nyoovyo. Mwaifwanafwani-o, n’nga vyongo ninga vyevi vitoroma uireelanivo? Mutu unango utoupiyelani yodya inodhiveliwana nyo. Mbwenye venango namwasa oi kamuna hora yokwakwanela, venango mutododomi-iwa namwasa othuulela vyongo vinango mudyide yodyayo mombaranya thitho aivuruwanave riyawee mwapama. Vamari-idhe nyo udya munozindiyela ira mwadya mombaranyi-a maningi thitho munofuna mwangaidyide mwavag’ono navago’no ira muvwe riyawe. N’nga mutoroma leri Bibilya mombaranya, moi ee-no nyo imwanana sangalala na vyalerinyoovyo? Mukaengana hora yokwakwanela ira musangalalenga mwaleringa madhu a Nlungu. Mufwanafwani-edhenga mathuuleloni mwinyu, uvwa vyongo vinoongiwa, thitho thuulela vilerile nyoovyo. Vyevi vinoiri-a ira musangalalenga maningi.

8. N’nga “dhaari ororomeleya na wazelu” unokwakwaneli-edha a-vi izoyee? (Muone madhu achindo.)

⁸ Yesu atoosaka “dhaari ororomeleya na wazelu” ira aniva-enga yodya yauzimu vahora yofwanelela. Thitho ninodyi-iwa pama mwauzimu.b (Mat. 24:45) Malemba ovudheleliwa ndiikundu ilukulu ya yodya yauzimu, yeyo inoniva-a dhaari. (1 Atez. 2:13) Yodya yauzimui inonikami-a idhiwa mathuulelo a Yohova, enao anofwanyeya Bibilyani. Ngumwasiwa ninoleri Marevista a Nsanja ya Namaing’anela na galamukani! thitho na myasa dhava jw.org. Ninokozeela migumano ya mwari mwa sumana thitho komoni wa sumana. Thitho mwedi uliothene ninoonela porogarama yava JW Broadcasting^® akala itokalavo muiongelo yi-u. Nadyanga mokwakwanela yodya yauzimu, vinonikami-a irana yongo yanambili yeyo inanikami-e fwanya imwerumweru yaimbarimbari.

MU-ARELENGA MAKUNDO A YOHOVA

9. N’nga ndiyongo ivi yanambili inanikami-e ira nifwanye imwerumweru yaimbarimbari?

⁹ 2: Ira nifwanye imwerumweru yaimbarimbari, ninofwanela a-rela makundo a Yohova. Olemba masalimo aongile ira: “Oraeli-iwa nguli othene oova Yohova wenuo unowenda mundhila dha Nlungu.” (Sal. 128:1) Ova Yohova unothapulela mlemeza maningi, thitho rambela irana iliyothene yeyo ya-anamsangalali-e. (Sang. 16:6) Ee-no ninovilimbi-edha ira ni-arele makundo a Nlungu okuza yapama na yothakala ninga munoongela Bibilya. (2 Akor. 7:1) Ninodha kala osangalala nairanga vinodhiveliwana Yohova thitho rambela vinoidanana liye.—Sal. 37:27; 97:10; Aroma 12:9.

10. Movwelana na lemba la Aroma 12:2, n’nga izo yi-u choi a-vi?

¹⁰ Muleri Aroma 12:2. Mutu unooda idhiwa ira Yohova utokaana utongi osakula ira yi chapama venango chothakala, mbwenye unofwanela thitho rumela makundo a Nlungu vaekene. Mwaifwanafwani-o, mutu unooda idhiwa ira Guverno litokaana ufulu okondi-a mutu tamangi-a maningi karo. Mbwenye venango mutuo kanarumele malamulwao vaekene. Vyo-arelavovyee pyoi unooda tamangi-anga maningi karo. Ee-no vyoira vi-u vinothonyi-edha ira akala ninoona ira a-rela makundo a Yohova kokami-a maningi. (Sang. 12:28) Davide anoona thitho ee-no namwasa oi voonga vya Yohova liye aongile ira: “Munodha ndiidhiwi-a ndhila ya ingumi. Namwasa wa kovinyu mutu unodha dhiveliwa mokwakwanela. Udhandha linyu lodyana utokala imwerumweru yodhowa nodhowa.”—Sal. 16:11.

11-12. a) N’nga ninofwanela ira polepole nan’ni nakumbanyanga Venango nasukwala b) N’nga malangi-o ava lemba la Afilipi 4:8 ananikami-e a-vi nasakulanga vyosangalali-a?

¹¹ Nakumbanyanga venango nafooka ninongofuna irana vyongo vinango vinanikami-e ira ni-iye kumbanya. Vyevi pyovweya. Mbwenye ninofwanela ira polepole ira na-aire vyongo vinoidanana Yohova.—Aef. 5:10-12, 15-17.

¹² Mukarta lelo lalembele liye makristau au Filipi, rumiwi Paulo atoalimbi-a ira tadhowenave thuulela vyongo vyevyo vili “vyolongomana, . . . vyochena, . . . vyaudhivela thitho kalelo nlilothene lapama.” (Muleri Afilipi 4:8.) Angalive ira Paulo kaaonga mo-ovira kundu vyokuza vyongo vyosangalali-a, vyaongile liyevi, vinofwanela nikami-a thuulela vyongo vyosangalali-a vinosakula i-yo. Kawesedhani irana vi: Valivothene vevo vali madhu oonga ira “vilivyothene” mulemba leli, kawesedhani e-lavo madhu oi “nyumbo,” “mafilime,” “mabukhu” Venango “majogo.” Irana vyevi unooda ukami-ani sakula vyosangalali-a vyevyo vinakale vyorumeleya venango vyo-orumeleya wa Nlungu. Ninofuna ira niirenga vyongo movwelana na makundo avadhulu a Yohova. (Sal. 119:1-3) Vyevi vinonikami-a kaana ithuulela rima yapama thitho ninooda irana yongo yaneraru yeyo inanikami-e kala osangalala.—Mayir. 23:1.

NI-ELENGA LAMBELA YOHOVA VALIMBURO LOROMA

13. N’nga ndiyongo ivi yaneraru inanikami-e ira nifwanye imwerumweru yaimbarimbari? (Juwau 4: 23, 24)

¹³ 3: Nionechechenga ira lambela Yohova ukalenga valimburo loroma vaingumi yi-u. Ninga namapanduchi-u Yohova ngofwanelela ira nimlambelenga. (Apok. 4:11; 14:6, 7) Ee-no, nionechechenga ira yongo yofuneya maningi, ikalenga lambela mundhila inorumela liye yeniyo ndimlambela “mosogoleliwa na zimu naimbarimbari.” (Muleri Juwau 4:23, 24.) Ninofuna ira zimwee unisogolelenga vomlambela naifunelo yoi niirenga vyongo movwelana na makundo aimbarimbari ofwanyeya mumadhwee. Lambela wi-u unofwanela kala valimburo loroma vaigumi yi-u, angalive ira muilambo inokala i-yo basa li-u tokondi-iwa. Va-eeni abali naarongoli-u okwaranya 100 tali perezoni namwasa okala Amboni dha Yohova.c Angalive ira vili e-no, aliwa anosangalala ira vyothene vinaode aliwa ira talobele, funjedha, thitho wandela atu enango vyokuza Nlungu na Umwenee. Nanyoziwanga venango oni-iwa nyarwa, ninooda kalave osangalala voidhiwa ira Yohova uli na i-yo thitho unodha niva-a yotuva.—Tiy. 1:12; 1 Pe. 4:14.

IFWANAFWANI-O YA ZOMBWE UNANGO

14. N’nga chini yam’mwireele bali unango wazombwe wau Tajikistan, n’nga mwasiwa ngwan’ni?

¹⁴ Vyongo vyaireele atu enango vinonisimikizeli-edha ira makundo mararu atapanyile i-yowala anonikami-a fwanya imwerumweru yaimbarimbari vo-otukulela moda uli vyongo vaigumi yi-u. Kathuulelani vyongo vyam’mwireele zombwe unango wa vyawa 19 dhinalee Jovidon Bobojonov wau Tajikistan, namwasa oi atokonda volowa unyakondo. Va 4 wa Outubro yawa ya 2019, liye atoomangiwa nofungeliwa perezoni wa myedi mingasi thitho atoireliwa uwalanga ninga lipanga. Vyo-olongomana vyam’mwireelavi, vyatoongiwa maradiyoni na makarta muvilambo vinjinji. Malipoti tatoothonyi-edha ira liye atookomiwa vokanyi-edhiwa ira alumbele ira unodhakala ororomeleya wu malamulo aunyakondo, thitho wara vyowara vyaunyakondo. Vasogolovee liye atootongiwa ira ngodawa thitho atoofungeliwa perezoni, fiyedha vevo perezidenti wailambwiyo vyamlevelele liye, notonga ira akumi-iwe perezoni. Vahora yothene yagumanana liye vyevi, Jovidon atoodhowanave kala ororomeleya thitho osangalala. N’nga chini yamkami-idhe? Liye hora dhothene anoothuulela vyorambulelavyee vyauzimu.

15. N’nga Jovidon aira a-vi ira adye yodya yauzimu angali perezoni?

¹⁵ Angali perezoni Jovidon anoodya yodya yauzimu angalive ira kaanave Bibilya, venango mabukhu enango. N’nga vyevi vyaodeya a-vi? Abali naarongola tadhowanga mamva-a vyodya tanoolemba lemba la siku vamapasta mwa-ela aliwa vyodyavyo. Ee-no anooda leri Bibilya thitho thuulela makundwee dambo nlilothene. Angakumi-iwile perezonimo, liye atoovelela malangi-o waatu othene ta-agumanena vyowesedha vilukulu ira: “pyofuneya maningi ira mulimbi-e uxamwalinyu na Yohova voleri madhwee thitho mabukwi-u.”

16. N’nga Jovidon athuulela maningi vyan’ni?

¹⁶ Bali-ula anoo-arela makundo a Yohova. Malo mothuulelanga ira vyongo vyothakala, liye anoothuulela maningi vya Yohova thitho vyevyo vyaona liye ira pyofwanelela. Liye anoodabwa na vyongo vyobaleya vyevyo vipanduchile Nlungu. Namaebe-i uliothene undhe wacha anoovwa ula wa mbalame. Nama-iyu anoona mwedi na nyenyedi. Liye aongile ira: “Vyotuva vyokumela wa Yohovavi vyanondilimbi-a thitho vyanoondikami-a kala osangalala.” Nasimbanga yodya yauzimu thitho vyongo vyothene vinoniva-a Yohova, ninokaana imwerumwweru rimani thitho imwerumweru yeyo inonikami-a ira nivilelenga maningi.

17. N’nga madhu ava lemba la 1 Pedru 1:6, 7 anakami-e a-vi mutu uguman’nena ninga vyaguman’nena Jovidon?

¹⁷ Jovidon anoo-ela thitho lambela Yohova valimburo loroma. Liye anooidhiwa funeya okalave orormeleya wa Nlungu waimbarimbari. Yesu aongile ira: “Yohova Nlungwao, ngunofwanelawee mlambela. Thitho unofwanela mlabela liye ekene baa-i.” (Luka 4:8) Anyakondo thitho andimuwiwa tanoofuna ira Jovidon a-iye religiaulee. Mbwenye liye anoolobelecha kumela vathi va rima dambo nlilothene thitho nama-iyu uliothene, vepanga Yohova ira amkami-e ira a-angonje thitho akaleve ororomeleya. Angalive ira atooireliwa vyongo vyo-olongomana, Jovidon atooda kalave ororomeleya. Va-eni unosangalala maningi kwaranya mwemo mwasangalalela liye a-ana-indiwe, mangiwa thitho e-liwa perezoni, namwasa oi unoona ira utokaana iroromelo yawesedhiwile.—Muleri 1 Pedru 1:6, 7.

18. N’nga ninaire a-vi ira nidhowenave kala osangalala?

¹⁸ Yohova unoidhiwa vinofuneela i-yo ira nikale osangalala. Akala muno-arela vyongo viraru vitapanyile i-yovi vyevyo vinokami-a ira mutu afwanyedi imwerumweru yaimbarimbari, munodha dhowanave kala osangala angalive ira munogumanana nyarwa dhilukulu. Nyo thitho munodha fiya voonga ira: “Oraeli-iwa mbaatu ale Nlungwiwa ngu Yohova!”—Sal. 144:15.