Iruthiruthi yooni-a pulatifomu na nguwo ya-eliwile dhulu wa pulatifomu
1922 Vyevyo Vyaireile Vyawa 100 Vivirilevyo
“NLUNGU . . . unonikami-a ira . . . niganyali dhela mwa . . . Yesu Kristu.” (1 Akor. 15:57) Madhwala tali a lemba la yawa ya 1922, tatoasikimizeli-a anamafunjedha Bibilya ira Yohova unodha ava-a yotuva namwasa ororomeleya wiwa. Muyawa yeniyo liye atoaraeli-a anamalaleya athindhala. Atoaraeli-a vevo varomile aliwa dinda mabukhwiwa okene thitho i-ndi-edha basa radiyo vomwadha milanyu ya Umwene. Vyevyo vyaireile vasogolovee muyawa yeniyo, vyatothonyi-edha ira Yohova anookami-a atwee. Anamafunjedha Bibilya tatogumaneya vambo-i vagumano o-odiwaleya waireele wu Cedar Point, wu Ohio, U.S.A. Vyevo vyaireile vagumanula vyatokuza basa la gulu la Yohova kumela hora yeniyo fiyedha va-eni.
“TALI MATHUULELO OSANGALALI-A”
Vevo basa lolaleela laulukula aliwa, abali au Beteli ya Brooklyn tatodinda marevista, mbwenye tanyindela maipereza enango ira taadindelenga mabukhu amakapa olimba. Vira wa myedi injinji ipereza yaakami-a vodinda mabukhu yanoimwanana dinda mabukhu okwakwanela oi ta-indi-edhiwenga basa volaleela. Ee-no bali Rutherford atomfuka bali Robert Martin, wenuo aing’anela fabriki-u, akala vyali vyoodeya ira tadindenga mabukhu okene.
Fabrika yau Concord Street wu Brooklyn, Nova Iorque
Bali Martin aongile ira: “Enala tali mathuulelo osangalali-a maningi namwasa oi vyevi vyathapulela ira nanofuneela kaana fabriki-uene yodinda mabukhu.” E-no abali tatogula limburo wu ndhila ya Concord 18 wu Brooklyn na mafwarameto enango ofuneya.
Mbwenye kai atu othene tasangalale na vyevyo vyaireilevi. Perezidente wa ipereza yeniyo yadinda mabukhwi-uale, atodha wendelela limburo li-uli. Liye aongile ira: “Mutokaana mafwarameto apama maningi odindana mabukhu, mbwenye kavali na mutwene m’mbo-i unam-indi-edhele nyo basa. Vavira myedi 6, vyothene vyevi vinodha kala vingamadhi nongeya.”
Bali Martin aongile ira: “Vyaongile liyevi vyaoneya niga pyovweya. Mbwenye i-yo nanoidhiwa ira Yohova ngwenuo unanikami-e thitho atonikami-adi.” Bali Martin aonga vyaimbarimbari namwasa oi mo-odimbela makina mapyala, va dambo tanodinda mabukhu 2.000.
Anamalaba tangali vaduzi na makina afabrika
LALEELA ATU ANJINJI DHELA VA RADIYONI
Wenjedhela vodinda mabukhu okene, atu a Yohova tatoroma i-ndi-edha basa radiyo volaleela milanyu yapama. Dimingu nathana va 26 wa Fevereiro wa 1922, Bali Rutherford atoonga vahora yoroma varadiyoni. Liye atoonga mwasa wa muru oi, “Mamiliau aatu anjinji enao tana ingumi katinodha wukwa” varadiyoni ya KOG wu Los Angeles, wu California, U.S.A.
Atu vaduziduzi 25.000 tatovuruwana mwasula. Atu enango tatolemba makarta vosimba porogramila. Limbo-i mwamakartao lakumele wa Willard Ashford wau Santa Ana, wu California. Liye atomsiba Bali Rutherford namwasa “olimbi-a thitho osangalali-a.” Liye atowenjedhela onga ira: “Banjanimwi-u mwatokala atu araru enao tabulela. Ee-no kavyakale vyoodeya vuruwana mwasinyula aakale ira kuongiwile dhela va radiyoni, masiki vya-akale ira munakambela duzi na wani-u wuno.”
Masumana o-arela, maporogarama manjinji tatoroma vwei-iwa va radiyoni. Vevo yawai yamala aliwa, lipoti la mu Nsanja ya Olonda yaongile ira “atu vaduziduzi 300.000, tali tangavwide milanyu yapama dhela va [radiyoni].”
Anamafunjedha Bibilya tatolimbi-iwa maningi na vyevi. Ee-no tatothuulela vyokaana radiyo wiiwine wu Staten Island vaduzi na Beteli yau Brooklyn. Vyawa vyo-arela, aliwa tatoroma i-ndi-edha basa radiyo wa WBBR, ira taode mwadha milanyu yapama waatu anjinji thitho mumatatamo manjinji.
“ADV”
Nsanja ya Olonda ya 15 wa Junho wa 1922, yatomwadha milanyu yoi vanokala gumano nlukulu unofuna dhaireela wu Cedar Point, Ohio, romela 5 fiyedha 13 wa Setembro wa 1922. Anamafunjedha Bibilya tatosangalala maningi tangafiile wu Cedar Point.
Mumwasee odhulela gumanula, Bali Rutherford atoawandela atu othene tadhidhao ira: “Kandinokaikela ira Mbwiye . . . unoraeli-a gumanula thitho unoiri-a ira milanyu yapama ilaleeliwe vailamboi kwaranya nduli mothene.” Oonga mwasa uliwethene vagumanula anoonga molimbi-a abali naarongola ira talabenga basa lolaleela.
Mwinji waatu ungali vagumano wenuo waireile yawa ya 1922 wu Cedar Point, Ohio
Va Xixanu 8 wa Setembro atu owandamela 8.000, enao tadhanle musalau mwaireela gumanula, tanodedi-edha mwaifunelo ira tavuruwane mwasa wa bali Rutherford. Aliwa tadedi-edhela ira unodha onga yathapulela madhu oi “ADV,” enao tali vamapapelini oitanelana gumanuo. Atwao tangakaathidhe, vinooneya ira atu enango tatoona ira sogolo wa pulatifomu utokala nguwo yovindiwa. Arthur Claus wenuo adhidhe vagumanuo kumela waniwa Tulsa wu Oklahoma, U.S.A., atofwanya limburo lapama naifunelo yoi avuruwanenga pama, namwasa oi vahora yeniyo kwaali vyofii-edha madhu (ninga makuluna na vyongo vinango).
“Nanoovuruwana mopwaseya vakadha madhu aliothene aonga liye”
Vofuna ira va-akale vyododomi-a, charamani atoonga ira kavali mutu uliothene arumeli-iwe volowa musalau mwaireela gumanuo vahora ya mwasa wa bali Rutherford. Hora ya 9:30 ya namaebe-i, bali Rutherford atoroma Kamba mwasee voonga madhu a Yesu anofwanyeya va lemba la Mateu 4:17 oonga ira: “Umwene wadhulu utowandamela.” Voonga vyevyo vyafuna dhaireya ira atwao tavwe vya Umwenuo, liye aongile ira: “Yesu atoonga ira hora yokalavowee, unodha laba basa lo-anda ira aagumani-e atwee ororomeleya.”
Vothuulela vyaireile vahora yeniyo, bali Claus wenuo ali salauni mwagumanuo atoonga ira: “Ndanoovuruwana mopwaseya vakadha madhu aliothene aonga liye.” Mo-odedi-edhela bali Claus atobulela thitho anofuneeleya kuma salaunimo. Liye atokumamo salaunimo angalive ira kaafuna namwasa oi anoidhiwa ira kanarumeli-iwa volowa okoka.
Vangavirile maminutu oyeva atoroma vivwa pama. Liye atoonga ira awelelanga okoka salauni waireela gumanuo, atovwa atu taimba maningi mandha. Vyevyo vyatomsangalali-a maningi! Voi atosikimizela ira avuruwane ikundu ya gumano i-adhiyo. Angalive ira anofuneela gwela vadhulu va salauni mwaireela gumanuo. Bali Claus wenuo ana vyawa 23 vahora yeniyo, atofwanya ndhila yogwelela vadhuluvo! Vadhulu va salauila vatokala majanela enao tali odhuliwene thitho atoonga ira “mwasuo wanovweya pama maningi vadhuluvo.”
Mbwenye bali Claus vadhuluvo kaalivo ekene, atoafwanyavo afwee enango. M’mbo-i mwaaliwa dhinalee ali Frank Jhonson, atomfuka bali Claus ira: “N’nga utokaana mbene oirwa?”
Bali Arthur atowakula ira: “Ee nditokaana.”
Frank aongile ira: “Uli yowakula ya malobelwi-u. Utoona nguwo ilukulu ivindiwilela? Imangiwile namaperego alivala. Umvuruwanenga pama Namatonga.a Aonga ira, “Laleyani, laleyani,” ugwande migo-i 4 ila.”
E-no bali Arthur mbene ungali mandhani, anodedi-edha ira hora ifiye. Vo-odimbela mwasa wa bali Rutherford watofiya voriya maningi. Modhiveliwa thitho mwakopolo, bali Rutherford atoonga mokuwa ira: “Mukale mboni dha Mbwiye thitho dhororomeleya. Dhowananive wana kondo fiyedha ikundu iliyothene ya Babulo inganongiwile. Laleelani milanyu uikundu iliyothene. Ilambo yothene iidhiwe ira Yohova ndi Nlungu thitho Yesu Kristu ndi Mwene wamamwene na Mbwiye wamambwiye. Peeno tidambo nlukulu kwaranya malambo othene. Muone, Mwene uromile wale tonga! Thitho nyo muli anamalabee olaleya vya Umwenuo. Ee-no, laleyani, laleya, laleyani vya Umwene na Umwenee!”
Bali Arthur aongile ira liye vambo-i naabali enangwale tatogwanda migo-idhile thito nguwile yatoroma thathuwa vang’ono navang’ono. Movwelana na vilembo vyoi “ADV” vile, vanguwonivo vali madhu oi: “Laleyani vya Umwene na Umwenee.”
BASA LOFUNEYA MANINGI
Gumano waireile wu Cedar Point watokami-a abali ira taonenga basa lolaleela vya Umwene kala lofuneya maningi thitho atu ofunechecha tanosangala labanao basali. Kopotala unango (va-eeni unanitiwa ira painiya) wau Oklahoma, U.S.A., alembile ira: “Nalaleelecha matatamo a migodi yau malasha, wewo atu anjinji tali osauwa maningi.” Liye atoonga ira atu Anjinji tavwa milanyu yofwanyeya murevista la Golden Age, lelo malamboano linolionga i-yo ira Galamukani!, “tanogwi-a mi-odi.” Liye aongile ira: “Nanosangalala namwasa oi nanooda adidili-a.”
Anamafunjedha Bibilya tanoidhiwa funeya wa madhu a Yesu ofwanyeya va lemba la Luka 10:2, oonga ira: “Vyo-ada ndi vinjinji mbwenye anyabsa mboyeva.” Yawai yamala aliwa, aliwa tali tangasikimizele rima ira talaleele milanyu yapama ya Umwene uikundu iliyothene yailambo yavathi.
a Hora dhinango bali Rutherford aidhiweyana ira “Namatonga” namwasa oi atolabavo basa leli wu Missouri, U.S.A.