N’nga muli okezeya “dhawachela ilambo yavathi?”

I-YO othene ninodedi-edhela mwathidhi kwakwaneli-edhiwa wa yoladha ya Yesu yoonga ira: “Oraeli-iwa mbaatu ale tali opwaseya, neri-a tanodha wachela ilambo yavathi.” (Mat. 5:5) Ozoziwa tanodha wachela ilambo yavathi munofuna aliwa dhatonga vambo-i na Yesu dhulu. (Apok. 5:10; 20:6) Makristau manjinji malamboano tanodedi-edhela dhakala vailamboi modhowa nodhowa, mwarendele, mosangalala, thitho tangali olongomana. Ira vyevi viodee aliwa tanodha kaana basa linjinji ira talilabe. Kathuulelani mabasa mararuala: In’ganela ilambo yavathi, kami-a ovenyathi-iwa ira tafwanye vyofuneeleya thitho afunji-a. Kathuulelani vinofuna nyo ira vaa-eni vothonyi-edha ira muli ofunechecha dhalaba basali.

MULI OKOZEYA DHALABA NAALIWA BASA LOCHENI-A ILAMBWILA?

Vevo Yohova vaawandenle liye atu ira “tadhali-e ilambo yavathi noyin’ganela,” athapulela ira vira wa hora ilambo yavathi ingakanle limburo lapama. (Maro. 1:28) Atu tanofuna dhawachela ilamboi tanodha funeela vwela lamulo leli. Voi ira munda wa Edene kulivove, atu tanodha roma okoka saka-edha ilamboi ira ikale Paradaizo. Vasogolo va Armagedo vanodha kala basa losakanya limburo lelo linongeile va-eeni!

Leli linodha kala basa lukulu maningi. Vyevi vinonithuucha basa nlukulu yana Aisraeli vyawelenle aliwa waniwa kuma wu Babulo. Ilamboiwa yali mo-okala atu wa vyawa 70. Mbwenye Esaya atovaelatu onga ira Yohova unodha akami-a tasakanye ilamboyo. Ulosio waongole ira: “Unodha ira kokola kala ninga munda wa Edeni thitho tatamu la kokolali linodha kala ninga mundani mwa Yohova.” (Esaya 51:3) Aisraeli tatokwakwaneli-edhadi i-nda basa leli. Mofwanafwana na vyevi, Yohova unodha akami-a anofuna dhawachela ilamboi ira taode isaka-edha. Vatokala vyongo vinofwanelanyo viira va ee-ni vothonyi-edha ira muli ofunechecha dha-inda nao basali.

Ndhila imboi inathonyi-edhenyo irana vyevyi, kudhilimbi-edha samalela vandhe vinyu. Munofwanela irana vyevi angalive awandaman’nenanyo kathinairana vyevi. Munokami-a thitho vocheni-a nosaka-edha Nyumba ya Umwene venango valimburo loirela migumano. Akala vyongo vilipama wanyo munooda dhivelela malaba basa vaireya masoka a vilengo. Mwairangana vyevyo, munothoni-edha ira muli okozeya kami-a vafuneelanga atu okami-a. Munooda dhifuka ira, ‘N’nga vatokala dodoliso linango lifunjedhile miyo loi ndinodha li-indi-edha basa ndadhawachela ilambo yavathi?’

Gurupu la abali naarongola tacheni-anga Nyumba ya Umwene.

N’NGA MULI OKOZEYA DHASAMALELA ATU TANOFUNA DHAVENYETHI-IWA?

Angavenyathi-idhe mwana wa i-yana wa Yairo, Yesu atoonga ira m’va-eni mwanuo yodya. (Marku 5:42, 43) Vinooneya ira kavyali vyorucha m’samalela sikana wavyawa 12. Mbwenye kathuulelani basa linofuna dhakalavo Yesu adhakwakwaneli-edha yolanyedha loi “atu othene tali masiyeni aithuulelo tanodha uvwa madhwee.” (Juwau 5:28, 29) Pyoonelatu ira atu anofuna dhavenyathi-iwa anodhafunheela kami-iwa fwanya yodya vokala thitho vyowara. N’nga va-eni munothonyi-edha ira muli ofunechecha dhakami-a? Vatokala vyofuka vingaasi vyofuneya vithuulela.

N’nga munaire a-vi va-eeni vothonyi-edha ira muli okozeya dhawachela ilambo ipya?

Abali anarongola tangali osangalala vakapu la ndeka tawachelanga alendo va gumano wa vilambo wu Paris.

Vaongiwa milanyu yoi namaing’anela isa unodha waredhela mpingwinyu, N’nga munoira masaka-edho ira mudhadyenee vamboi yodya nyumbani winyu? Arumiwi ahora dhothene enawo urumiwiwa wa va Beteli wachinja tadha pingoni mwinyu, venango namaing’anela isa utomari-a urumiwe, n’nga munoakami-a fwanya limburo lokala? Akala gumano wagawo venango wa isa unaireela tatamonimwinyu, n’nga nyo munodhivelela ira mumalabe naaliwa basa vagumano wa-anarome venango vasogolovee? Venango munooda dhivelela ira mumawachele alendo?

N’NGA MULI OKOZEYA DHAFUNJI-ANGA ANOFUNA DHAVENYATHI-IWA

Movelana na vinoleri i-yo va Mayirelo 24:15, ninodedi-edhela venyathi-iwa wa mamiliyau aatu. Anjinji mwaatu enala mboi katana ngari yoidhiwa vinjinji vyoonga Yohova. Aliwa tanodha kaana ngari yen’na tadhavenyathi-iwa.a Arumiwi ororomeleya a Nlungu oidhiwa vinjinji tanodha laba nawo basa lofunji-ali. (Esaya 11:9) Charlotte wenuo ukanle alaleelanga Europa, Amerca do Sul na Afrika unodedi-edhela mwaifunelo hora yeniyo. Mosangalala liye aongire ira: “Ndinodedi-edhela mwaifunilo dhafunji-a atu enao tanofuna dhavenyathi-iwa. Ndaleringa vyamutu unango wenuo ukanlewo ndulimu hora dhinjinji ndinothulelecha ira, a-akalenga ira mutu wen’na utom’mwidhiwa Yohova ingumiyee kayakale ee-ni. Ndinofuna ndidhaawandele atu ovenyathi-iwa vyoonga Yohova thitho vyongo vinoawendela pama tamlabelanga liye.”

Angalive arumiwi a Yohova enao takaena ingumi Yesu a-anadhe vailamboyi tanodha kaana vinjinji vyoi tafunjedhe. Thulelani vinakalile aliwa vyosangalali-a m’mwandela Danieli kwakwaneli-edhiwa wa maulosi enao alembile liye, mbwenye kaavwechecha. (Dan. 12:8) N’nga a-vi vamwasa okami-a Rute na Naomi idhiwa ira banjaliwa lali muzele obaliwela Mesiya? Vinodhakala vyosangalali-a laba basa lofunji-a atu vailambo yothene vo-okala nyarwa thitho yododomi-a iliyothene.

Rongola agawelanga i-yana taratado valimburo lofulelavo vyowara.

N’nga ninathonyi-edhe a-vi ira nili okozeya dhalabanawo basa leli? Ndhila imbo-i ndi dhilimbi-edha wenjedhela dodoliso li-u lofunji-a thitho i-ndanawo basa vambo-i lofunji-a atu lelo linoireya vailambo yothene. (Mat. 24:14) Angalive ira kamunooda ira vinjinji va-eeni mwasa wa tungalinyu venango vyongo vinango, thindhi linyu linooda thonyi-edha ira muli ofunechecha dhafunji-a atu ovenyathi-iwa.

Ee-no vyofuka vyofuneya maningi choi, N’nga nyo muli ofunechecha dhawachela ilambo yavathi? N’nga munosangalala ira munodha laba basa losamalela ilamboi thitho kami-a nofunji-a atu tanofuna dhavenyathi-iwa? Munooda thonyi-edha ira muli okozeya mwalabanga basa lofwanafwana na linofunanyo dhalaba mwadhawachela ilambo yavathi.

a Muone mwasa oi “Kami-a atu anjinji ira takale olongomana” mu Nsanja Ya Namaing’anela ya Setembro wa 2022.