Vyofuka Vyokumela Waalimbo Leri

N’nga namalemba Salimo Davide, aira wenjedhela venango aonga vyongo vyoi kavwaodeye vevo vaonga liye ira anodha m’titimi-a Yohova “dhowa nodhowa” ninga mwemo mulembiwile aliwa va Salimo 61:8?

Kabe. Vyalembile Davide pyaimbarimbari thitho pyolinyali.

Kathuulelani vyalembile liye va verusoli thitho maveruso olandana na leli. Liye aongile ira: “Ndinodhaomba nyumbo dhotitimi-a dhina linyu dhowa nodhowa ira ndikwakwaneli-edhe vyolanyedha vyanga dambo na dambo.” “Ndinoutitimi-ani nyo Yohova Nlungwanga narimanga othene thitho ndinodha lemeza dhina linyu dhowa nodhowa.” “Ndinodha titimi-a dhina linyu dhowa nodhowa ee modhowa nodhowa.”—Sal. 61:8; 86:12; 145:1, 2.

Davide kairawenjedhela thuulelanga ira venango kanodhakwa. Liye anoidhiwa ira Yohova atoonga ira yodawa inodhairi-a ira atu takwe thitho liye anorumela ira ali mutu odawa. (Maro. 3:3, 17-19; Sal. 51:4, 5) Anoidhiwa thitho ira atu ororomeleya ninga Abrahamu, Izaki na Yakobo tali tangamadhi wukwa. (Sal. 37:25; 39:4) Mbwenye madhu ali va Salimo 61:8, anothonyi-edha ira ali ofunechecha thitho osikimizela mtitimi-a Nlungu dhowa nodhowa, thapulela ira wahora yothene yana liye ingumi.—2 Sam. 7:12.

Vyongo vinango vyalembile Davide vyanookuza vyongo vyaireya va ingumiyee ninga mwemo munoonela i-yo mumadhu avadhulu ava Salimo 18, 51 na 52. Va lemba la Salimo 23, liye atom’monga Yohova ninga namakumbiza oi unosogolela, didili-a thitho barela mabilee. Naliyene thitho Davide ali namakumbiza oi e-no. Liye anofuna mlabela Nlungu ‘malambo othene aingumiyee.’—Sal. 23:6.

Kanidiwale thitho ira Yohova ngwamvudhelenle Davide ira aidhiwe vyofwanelela lemba. Vyalembile Davidevi vinothangani-avo maulosi avyongo vyafuna dhaireya sogolo. Mofwanafwani-a va lemba la Salimo 110, Davide atoonga vya hora yeniyo mbwiyee yafuna liye “dhakala udhandha lodyana la Nlungu” wa dhulu ira awachele kopolo. Kopolo dhoirela n’ni? Dhogonji-a amwidani a Nlungu no kala “namatonga vari vaatu amaziza enango availambwila.” Muzele wa Davide ndi mukumile mutu wafuna dhairana vyevi oi ndi Mesiya, afuna dhatonga angali dhulu thitho afuna dhakala namavelela “kuto wodhowa nodhowa.” (Sal. 110:1-6) Yesu atoosikimizela ira ulosi wa va Salimo 110 waonga vyaliye thitho unodhakwakwaneli-edhiwa sogolou.—Mat. 22:41-45.

Ee, Davide atovudheleliwa ira alembe vyongo vyafuna dhaireya muhoree thitho sogolou vahora inofuna liye dhavenyathi-iwa nokaana ngari yomtitimi-a Yohova dhowa nodhowa. Vyevi vinonikami-a ona ira vilembiwile va lemba la Salimo 37:10, 11, 29 vinoonga vyongo vyaireile muhora ya Israeli, thitho vinofuna dhaireya sogolou vailambo yothene, Nlungu adhakwakwaneli-edha vyolanyedhavyee.—Muone ndima 8 muyofunjedha yoi, “Weyo unodhakala na miyo Paradaizo” uli murevista leli.

Ee-no, lemba la Salimo 61:8 na maversu enango ofwanafwana na versu leli, anothonyi-edha ira Davide afuna lemeza Yohova fiyedha hora inofuna liye dhakwa. Madhu enala anoonga thitho vinofuna dhaira Davide sogolou Yohova adham’venyathi-a ira akaena akoka ingumi.