Basengeli ‘koyamba liloba na motema na bango mobimba’!
1 Bamilio ya bato bazali koyekola Biblia na Batatoli ya Yehova. Soki balingi kozwa bomoi ya seko, basengeli ‘koyamba liloba na motema na bango mobimba.’ Basengeli kosala lokola bato 3 000 oyo babongolaki motema mpe bazwaki batisimo mokolo ya Pantekote ya mobu 33 ya Ntango na Biso. (Mis. 2:41) Mokumba nini tozali na yango mpo na likambo yango lelo?
2 Tosengeli kosalisa bato oyo tozali koyekola na bango Biblia ete bákangama na Yehova. (1 Tim. 4:7-10) Na ntina yango, siplema ya Mosala na biso ya Bokonzi ya Yúni 1996 na paragrafe 20 epesi makanisi oyo: “Na boumeli ya boyekoli, luká mabaku ya kotonga botɔndi [ya moyekoli ya Biblia] epai na Yehova mpo na bizaleli na ye. Monisá mayoki mozindo ozali na yango mpo na Nzambe. Salisá moyekoli na kokanisa na lolenge akoki kokolisa boyokani ya malamu ya ye moko elongo na Yehova.”
3 Mokakatano oyo tokutanaka na yango: Bato mingi ya mangomba ya lokuta basepelaka na losambo oyo esɛngaka bobele mwa ntango moke mpe mwa milende moke. Bamonaka ntina te ya kosala mbongwana na bomoi na bango. (2 Tim. 3:5) Mpo na biso, mokakatano ezali ya kosalisa baoyo tozali koyekola na bango Biblia básosola ete losambo ya solo ezali kosɛnga bango makambo mosusu koleka kozala bobele bayoki mpamba ya liloba ya Nzambe. Basengeli kosalela makambo oyo bazali koyekola kati na bomoi na bango. (Yak. 1:22-25) Soki na etamboli na bango, likambo moko ezali kosepelisa Nzambe te, basengeli koyeba ete esengeli na bango ‘kobongwa’ mpe kosala makambo oyo ezali sembo mpo ete Nzambe andima bango. (Mis. 3:19) Mpo na kozwa bomoi ya seko, basengeli kosala ‘milende makasi’ mpe kotɛlɛma ngwi mpo na solo.—Luka 13:24, 25.
4 Ntango tozali kotalela makambo ndenge na ndenge ya bizaleli malamu, tótuna moto oyo tozali koyekola na ye Biblia lolenge mpenza atalelaka bizaleli yango mpe nini asengeli kosala soki amoni ntina ya kosala mbongwana na bomoi na ye. Tóbenda likebi na ye na ebongiseli ya Nzambe oyo ezali koteya ye solo mpe tólendisa ye ete ayanganaka na makita nyonso.—Ebe. 10:25.
5 Tómityela mokano ya koteya bayekoli na kosimbáká mitema na bango. Tokosepela na kolendisáká bato ya sika ete báyamba liloba ya Nzambe na motema na bango mobimba mpe bázwa batisimo.—1 Tes. 2:13.