“Nzela ya Nzambe ezali Nzela ya Bomoi” —Liyangani ya 1998 mpe 1999 ebɛlɛmi!

BOBELE na Burundi, na Congo-Brazzaville, mpe Congo-Kinshasa, mayangani 59 malɛngɛlami kobanda na sanza ya Augústo kino Sɛtɛ́mbɛ. Ekoki kozala ete, liyangani moko ya mikolo misato ekosalema na engumba moko penepene na esika yo ofandi. Na bisika mingi, manaka ekobanda mokolo nyonso—kobanda Mwamitano kino Mwalomingo—na miziki na ngonga ya 9:30 ya ntɔngɔ.

Manaka ya Mwamitano na ntɔngɔ ekolobela mingi lapolo ya bokoli ya mosala ya kosakola Bokonzi na bisika ndenge na ndenge na mokili. Mpe motó na likambo ya liyangani ekomonisama na lisukulu-moboko, “Lisiko ya Klisto—Nzela ya Nzambe mpo na lobiko.”

Na nsima ya nzanga, masukulu-matongani, “Baboti—Bóteya bana na bino nzela ya Nzambe,” ekopesa batoli likoló na lolenge ya kolendisa bilenge ete bálinga mpe básalela Yehova. Manaka ya mpokwa ekosuka na lisukulu “Bomoi ezalaka nsima ya liwa?”

Manaka ya Mwapɔsɔ na ntɔngɔ ekomonisa mosala ya kozalisa bayekoli oyo Batatoli ya Yehova bazali kokokisa, na biteni misato, “Tósalisa bato ete bálanda nzela oyo ezali komema na bomoi,” “Tólonga mokakatano ya kozanga kokutana na bato,” mpe “Tóteya bayekoli makambo nyonso Klisto alakaki.” Na nsuka ya manaka ya ntɔngɔ, ebongiseli ekozala mpo ete bayekoli ya sika bábatisama.

Lisukulu ya ebandeli nsima ya nzanga, “Tósalaka na mokano ya kozwa bomoi ezangi nsuka,” ekolendisa biso tókanisaka kati na mabondeli na bantina oyo tozali kosalela Nzambe. Lisukulu “Tópesa motuya na ‘makabo na motindo na mibali,’ oyo bazali koteya nzela ya Nzambe” mpe “Longolá bomoto ya kala mpe latá oyo ya sika” ekozala botaleli ya vɛrsɛ mokomoko ya Baefese mokapo 4. Na nsima, toli kitoko ya Makomami ekopesama na lisukulu “Omibatela na litɔnɔ nyonso ya mokili” mpe masukulu-matongani na biteni misato “Bilenge—Bólanda nzela ya Nzambe.” Manaka ya nsima ya nzanga ekosuka na lisukulu “Mozalisi—Bomoto na ye mpe banzela na ye.”

Manaka ya Mwalomingo na ntɔngɔ ekomonisa masukulu-matongani na biteni misato oyo makolobela mikapo ya nsuka ya mokanda ya Ezekiele kati na Biblia mpe lisusu kokokisama ya bisakweli na yango. Manaka ya ntɔngɔ ekosuka na lisano-liteya oyo ekosalema na molato ya Bayuda ya kala, yango ekotalela mingi bosembo ya bilenge Baebele misato. Likambo ya ntina mingi nsima ya nzanga ekozala lisukulu ya bato banso. Ekozala na motó na likambo ete: “Nzela bobele moko oyo ezali komema na bomoi ya seko.”

Na ntembe te, okopambolama mingi na elimo soki okozala wana mikolo nyonso misato. Tobyangi yo na esengo nyonso ete ozala wana na boumeli ya liyangani mobimba, mpe okofuta mbongo te. Mpo na koyeba esika ya liyangani oyo ekosalema penepene na esika ofandi, kutaná na Batatoli ya Yehova na Ndako ya Bokonzi na esika ofandi to tindá nkoma na babimisi ya zulunalo oyo.