Baboti​—bókɔtisa bizaleli malamu epai ya bana na bino

¹ Babotamaka na bizaleli ya malamu te, to bazwaka yango mbala moko te. Epai mosusu, kokɔtisa bizaleli ya malamu epai ya mwana esɛngaka ntango. Liloba oyo ebongolami awa na “kokɔtisa” elimboli “kopesa malɛmbɛmalɛmbɛ” to “kotangisa mokemoke.” Esengeli ete baboti básalaka yango mbala na mbala mpo na “kobɔkɔla [bana na bango] na mateya mpe na disipilini ya Yehova.”​—Ef. 6:4, NW.

² Bandá ntango azali naino moke: Makoki ya bana mike mpo na koyekola mpe mpo na kosala makambo ya sika ezalaka mpenza ya kokamwa. Atako bakóló bamonaka ntango mosusu ete ezali mpasi mpo na koyekola monɔkɔ ya sika, bana oyo bakɔti naino kelasi te bakoki koyekola minɔkɔ mibale to misato na mbala moko. Kokanisa te ete lokola mwana na yo azali naino moke akoki te mpo na koyekola bizaleli ya malamu. Soki abandi koyekola solo ya Biblia ntango azali naino moke mpe alandi koyekola yango, ntango akokola makanisi na ye ekotonda na boyebi oyo ekokómisa ye na “mayele mpo na kobika.”​—2 Tim. 3:15, NW.

³ Mosala ya kosakola ezala momeseno: Ezaleli malamu oyo esengeli kokɔtisa epai ya mwana ntango bɔɔngɔ ezali naino pɛtɛpɛtɛ ezali ya kosakola mbala na mbala nsango malamu ya Bokonzi ya Nzambe. Baboti mingi babandaka kosala yango ntango bazali komema bana na bango na mosala ya kosakola na ndako na ndako ntango bana na bango bazali naino mike. Soki baboti bazali ntango nyonso komipesa na mosala ya kopesa litatoli, yango ekosalisa bana na bango básepela na mosala yango mpe bázala na molende na mosala ya kosakola. Baboti bakoki kolakisa bana ndenge ya kopesa litatoli na mitindo nyonso ya mosala ya kosakola.

⁴ Kokomisa nkombo na Eteyelo ya mosala ya Teokrasi mpe esalisaka bana. Eteyaka bango lolenge malamu ya koyekola, ya kotánga mpe ya kokanga ntina malamu mpenza. Bayekolaka kosolola masolo ya Biblia, ndenge ya kozongela bato oyo basepeli, mpe ndenge ya koyekola na bato Biblia. Kobongisama motindo wana etindaka bango bámonisa mposa ya kosala mosala ya mobongisi-nzela mpe kosala milende mpo na kozwa mikumba mosusu minene ya mosala. Bandeko mingi oyo basalaka na Betele mpe bamisionɛrɛ bakanisaka na esengo mpenza bambula na bango ya liboso na Eteyelo ya mosala ya Teokrasi mpe bamonaka ete yango esalisaki bango bákolisa bizaleli malamu.

⁵ Biso nyonso tozali lokola lima na mabɔkɔ ya Yehova, Moyemi Monene ya mbeki. (Yis. 64:8) Soki lima ezali naino pɛtɛpɛtɛ ezalaka mpasi te mpo na kobongisa yango. Kasi soki ekauki mingi, ekómaka makasi. Ezali mpe bongo mpo na bato. Ntango bazali naino bilenge, bamesanaka nokinoki na makambo ndenge na ndenge​—mpe ntango bazali naino mike, bɔɔngɔ na bango ezalaka pɛtɛpɛtɛ mpenza. Bambula na bango ya bomwana ezalaka ntango ya koyekola libela makambo ya malamu to ya mabe. Lokola baboti oyo bayebi kobatela bana na bango, bóbanda kokɔtisa bizaleli malamu ya mosala ya kosakola epai ya bana na bino ntango bazali naino mike.