Luká na likebi mpenza bato oyo balobaka te mpe bayokaka te oyo bafandaka na teritware na bino
1 Yehova azali kopesa libyangi oyo: “Yaká! . . . Oyo azali na mposa akamata mai na bomoi lokola likabo.” (Emon. 22:17) Na kati ya bato oyo bazali kondima libyangi yango, ezali mpe na bato mingi oyo balobaka te mpe bayokaka te. Yango esali ete na boumeli ya bambula 13 oyo euti koleka, masangá 27 mpe bituluku 43 oyo esalelaka elobeli ya bikela esalema na filiale ya États-Unis.
2 Atako masangá mpe bituluku oyo esalelaka elobeli ya bikela ezali kosala milende mingi na mosala ya kosakola mpo na kokutana na bato oyo balobaka te mpe bayokaka te oyo bafandaka na bateritware na bango, ezali na bato mosusu mingi oyo balobaka te mpe bayokaka te oyo tokutani na bango naino te mpe bazwi naino litatoli te.
3 Ndenge nini okoki kopesa lisungi na yo? Ntango ozalaka na bisika oyo bato bazalaka mingi, omonaka bato bazali koloba na bikela? Oyebi moto moko na mosala na bino to na eteyelo na bino oyo azali na ndeko moko oyo alobaka te mpe ayokaka te? Ntango ozali kosala misala na yo ya mokolo na mokolo, tyaká likebi mingi mpo na koluka bato oyo balobaka te mpe bayokaka te. Kasi ndenge nini okoki mpenza koyeba soki bakozwa litatoli na ntina ya Bokonzi?
4 Ndenge ya kopesa bango litatoli: Yebisá lisangá to etuluku moko oyo esalelaka elobeli ya bikela oyo ezali na esika oyo moto yango oyo alobaka te mpe ayokaka te afandaka. Bato mingi oyo balobaka te mpe bayokaka te bakolaka mbangu ntango bazali koyekola solo soki bazali koyangana na makita ya lisangá oyo esalemaka na elobeli ya bikela elongo na bato mosusu oyo balobaka te mpe bayokaka te oyo bazali Batatoli. Yango wana, soki na esika ofandaka ezali na lisangá moko to etuluku moko oyo esalaka makita na elobeli ya bikela, mokomeli ya lisangá na bino asengeli kotindela yango makambo nyonso oyo basengeli koyeba mpo na oyo etali bato nyonso oyo balobaka te mpe bayokaka te oyo bazali na teritware na bino.
5 Bongo okosala boni soki, na zingazinga, lisangá ata moko ya motindo wana ezali te mpo na kopesa lisungi ya elimo epai ya bato oyo balobaka te mpe bayokaka te oyo bazali na teritware na bino? Ndenge nini okoki kopesa lisungi na yo? Mpo na nini te kozongela lisusu bato mosusu ya libota oyo ezali na moto (to bato) ya ndenge wana oyo bayokaka malamu mpo na kosolola na bango? Yebisá bango ete olingi kolakisa bango kasɛti video oyo esalemi na elobeli ya bikela mpo na kolamwisa mposa ya ndeko na bango oyo alobaka te mpe ayokaka te. Basakoli mosusu kutu bayekoli elobeli ya bikela mpo na kosolola malamu na bato oyo balobaka te mpe bayokaka te. (Mis. 16:9, 10) Tokoki kozwa kasɛti video ya mwa buku Azali kosɛnga mpe buku Boyebi na Elobeli ya Bikela ya Amerika. Emonani ete kosalela yango mpo na kotambwisa boyekoli ya Biblia esili kobimisa mbuma ya malamu ebele.
6 Soki ozali kotyaka likebi mingi mpo na koluka bato oyo balobaka te mpe bayokaka te oyo bazali na esika oyo ofandi, okoki kopesa bango libaku ya kozwa mai ya bomoi kozanga kofuta.—Mat. 10:11; Emon. 7:9.