Ndenge oyo tozwaka matomba na Eteyelo ya mosala ya Teokrasi

¹ Basaleli ya Yehova bazali na libaku oyo bato mosusu bazalaka na yango te ya koteyama na Eteyelo ya mosala ya Teokrasi. (Yis. 54:13; Yoa. 6:45) Kasi, matomba oyo tozwaka na eteyelo yango etaleli milende oyo tosalaka. Okoki koyeba ndenge Eteyelo ya mosala ya Teokrasi ezali kosalisa yo na elimo?

² Bazali kosepela na yango: Bakɛngɛli mingi na eteyelo bamoni ete ndenge tokómi koyekola na mozindo Toli mpo na koloba malamu, mosala ya kosakola na masangá na bango ekómi kosalema malamu mpenza. Lisusu, mokɛngɛli moko na Eteyelo amonaki ete kopesa biyano na lisolo ya Makanisi ya ntina na botángi ya Biblia, ezali kosalisa bandeko mingi bálandela programɛ ya botángi ya Biblia. Mpo na Lisolo No. 2, bandeko mingi bamonisi ete, lokola maloba ya ebandeli mpe ya kosukisa ezalaka lisusu te, bakómi kotalela kaka makambo oyo bakotánga. Baoyo bazali kozwa mokumba yango, bazali kotya likebi na bango na kobongisa ndenge ya kotánga.​—⁠1 Tim. 4:⁠13.

³ Moto nyonso akoki kozwa litomba: Kopesa biyano na makita epesaka esengo. (Mas. 15:23) Lokola bapesaka biso mituna ya bozongeli ya koloba bapɔsɔ mingi liboso, yango esalisaka biso tómibongisa mpo tópesa biyano na esengo mpenza. Lisusu, makanisi ya ntina na mikanda ya Biblia, oyo ezali na programɛ ya botángi ya Biblia ya Eteyelo ya mosala ya Teokrasi, ekómi sikoyo kobima na Linɔ́ngi ya Mosɛnzɛli, kobanda na nimero ya 1 Yanuali 2004. Masolo yango esalisi bandeko mingi bápesaka biyano ya kolendisa na lisolo ya Makanisi ya ntina na botángi ya Biblia.

⁴ Moto nyonso oyo akomisá nkombo na ye na eteyelo azali na libaku malamu ya kobongisa masolo mpe kosala yango. Maloba ya kolendisa oyo mokɛngɛli na Eteyelo alobaka na estrade ekoki kosalisa biso nyonso. Toli mosusu oyo mokɛngɛli apesaka na nkuku, na nsima ya makita, ekoki kosalisa mwana-kelasi mokomoko. Badevuare oyo ezali na nsuka ya mokapo mokomoko ya buku Zwá matomba na mateya ya Eteyelo ya mosala ya Teokrasi, oyo etalelamaka na lisolo ya toli mpo na koloba malamu, esalisaka biso mpe.

⁵ Ntango Eteyelo ezali kosalema to na nsuka na yango, soki oyoki likanisi moko ya Makomami oyo ebendi likebi na yo mpe ebongi osalela yango, komá yango na kati ya buku na yo Eteyelo ya mosala. Kanisá makambo oyo oyekoli, mpe talelá ndenge mateya yango oyo euti na Nzambe ezali kokolisa elimo na yo.