Tózala na mpiko, kasi tózala mpe bato oyo batyaka kimya
1 Bato mingi oyo toyebisaka bango nsango malamu balobelaka mateya oyo bandimaka na motema mobimba, atako mateya yango eyokani na solo ya Biblia te. Atako tosengeli kosakola na mpiko nyonso, tosengeli mpe ‘kozalaka na kimya elongo na bato nyonso’ mpe koboya kosilikisaka basusu mpambampamba. (Lom. 12:18; Mis. 4:29) Kasi, ndenge nini tokoki kozala na mpiko mpe kozala bato oyo batyaka kimya ntango tozali koyebisa moto nsango malamu ya Bokonzi?
2 Tóluka makambo oyo biso ná ye tondimaka: Moto oyo atyaka kimya aswanaka te. Soki tozali kobimisa ntembe mpambampamba na mateya oyo ekɔtelá mpenza moto oyo tozali kosolola na ye, akondima te koyoka biso. Soki alobi likanisi moko ya libunga, tokoki kolobela na mayele mpenza likanisi mosusu oyo ye mpe andimaka. Soki tozali kolobela mingi makambo oyo biso ná ye tondimaka, akoki komiyoka malamu mpe tokoki kosimba motema na ye.
3 Soki moto oyo tozali kosolola na ye abimisi likanisi moko ya libunga, kasi biso tolobeli yango te, yango elimboli nde ete tozali kokakola mateya ya solo to kolɛmbisa yango? Te. Mokumba na biso baministre baklisto ezali te ya kokweisa makanisi nyonso ya libunga oyo bato bakoki kobimisa; kasi nde ya kosakwela bango nsango malamu ya Bokonzi ya Nzambe. (Mat. 24:14) Soki moto abimisi likanisi moko ya libunga, tózala motema mɔtɔmɔtɔ te; tómona yango nde lokola libaku ya koyeba makanisi na ye malamu.—Mas. 16:23.
4 Tókoba kopesa bango lokumu: Na bantango mosusu, esɛngaka tókweisa mateya ya lokuta na mpiko mpenza. Nzokande, lokola tozali bato oyo batyaka kimya, toboyaka kosɛka bato oyo bandimaka mateya ya lokuta mpe baoyo bateyaka yango, mpe tobengaka bango na bankombo ya kotyola te. Soki tozali komonisa ete toleki bango, bakondima koyoka biso te; kasi, soki tozali na komikitisa mpe na boboto, bato oyo balingaka mateya ya solo bakondima koyoka biso. Soki tozali komemya bato oyo bazali koyoka biso mpe komemya mateya oyo bandimaka, bakomona ete tozali kopesa bango lokumu, mpe ekozala pɛtɛɛ mpo bándima nsango oyo tomemeli bango.
5 Ntoma Paulo azalaki kotalela bindimeli ya bato oyo azalaki kosakwela mpe azalaki koluka koyebisa bango nsango malamu na ndenge oyo ekosimba mitema na bango. (Mis. 17:22-31) Andimaki kokóma “makambo nyonso epai ya bato ya ndenge nyonso,” mpo ‘akoka kobikisa bamosusu.’ (1 Kol. 9:22) Biso mpe tokolanda ndakisa na ye soki tozali koluka kotya kimya ntango tozali kosakola nsango malamu na mpiko nyonso.