Tókolisa makoki na biso ya kosakola—Zalá moninga malamu ya mosala

Mpo na nini ezali na ntina?: Yesu ayebaki ete kosakola mibalemibale ezali na ntina. Yango wana, ntango atindaki bayekoli na ye 70 mpo bákende kosakola liboso na ye, akabolaki bango mibalemibale. (Luka 10:1) Moninga ya mosala akoki kosalisa mosakoli oyo abimi elongo na ye ntango akutani na mokakatano to soki ayebi mpenza te eyano nini asengeli kopesa moto. (Mos. 4:9, 10) Ndakisa na ye ekoki koteya mosakoli oyo abimi elongo na ye mpe ntango mosusu akoki kopesa ye makanisi oyo ekosalisa ye akóma mosakoli oyo ayebi mpenza kopesa litatoli. (Mas. 27:17) Akoki mpe kolendisa ye na mwa lisolo ntango babimi na ndako moko mpo na kokɔta na ndako mosusu.—Flp. 4:8.

Ndenge ya kosala yango:

Tyá likebi ntango moninga azali kopesa litatoli. (Yak. 1:19) Ntango azali kotángela moto vɛrsɛ, yo mpe landá na Biblia na yo. Yango ekopesa yo likoki ya kosalisa ye soki esengeli.
Salelá bososoli mpo na koyeba soki esengeli opesa makanisi na lisolo mpe ntango nini kosala yango. (Mas. 25:11) Soki mosakoli oyo obimi elongo na ye azali koyekola na moto Biblia, ezali mabe te opesaka makanisi na bantango mosusu. Nzokande, ntango bozali kosakola ndako na ndako, ndeko oyo obimi elongo na ye akosepela ete otikela ye mpe ntango ya koloba soki ezali ngala na ye ya koloba. Na ntembe te, soki azali mosakoli ya sika to ayebi mpenza te ndenge ya koyanola na motuna moko to kolonga ntembe moko, akosepela ete osalisa ye. Kasi, ezala ntango ozali kosakola ndako na ndako elongo na mosakoli mosusu, kozongela moto to koyekola na moto Biblia, osengeli te kokata mosakoli mosusu maloba, kobɔtɔla ye lisolo, to kokɔtisa lisolo mosusu.
Lakisá ye makambo oyo oyebi. Soki esɛngi ete opesa mosakoli oyo obimi elongo na ye likanisi mpo na kosalisa ye abongisa ndenge na ye ya kosakola, koboya te kosala yango. (Mas. 3:27) Na ntango oyo ebongi, okoki kobanda na maloba oyo: “Omoni ete lisolo yango elekaki ndenge nini?” to “Nakoki kopesa yo mwa likanisi?” to mpe “Mbala mingi ngai nasalaka boye . . .” Kobosana te ete atako moto asepelaka bápesa ye likanisi ntango mosusu, akolɛmba nzoto soki ozali kosembola ye mpo na mwa libunga nyonso oyo asali.

Meká kosala boye na boumeli ya sanza:

Nsima ya kosakola elongo na ndeko moko, yebisá ye likambo moko oyo alobaki to asalaki oyo emonisi ete azalaki moninga malamu ya mosala.