Tókolisa makoki na biso ya kosakola—Ndenge ya kobanda lisolo mpo na kopesa litatoli ya libaku malamu

Mpo na nini ezali na ntina?: Ntango tosakolaka ndako na ndako, mbala mingi tokutaka bato mingi te na bandako na bango. Nzokande, tokoki kokutana na bango ntango tozali na bisi, na engbunduka to na pɛpɔ, ntango tozali kozela mpo na kokutana na monganga, na ntango ya bopemi na mosala to na kelasi mpe bongo na bongo. Mokano ya Yehova ezali ete moto nyonso azwa libaku ya koyoka nsango ya Bokonzi. (1 Tim. 2:3, 4) Mbala mingi, mpo tópesa litatoli, tosengeli kobanda lisolo.

Ndenge ya kosala yango:

Yebá kopona. Moto yango azali komimonisa lokola moninga mpe azali na mposa ya kosolola? Esika bozali ekoki kopesa nzela na lisolo ya malamu? Basakoli mosusu babandaka na kotala moto na elongi mpe na nsima kosɛka mwa moke. Soki moto yango mpe asɛki, bamekaka kobanda lisolo.
Soki kobanga eyeli yo, salá libondeli ya mokuse na nse ya motema.—Neh. 2:4; Mis. 4:29.
Bandá na koloba likambo moko ya moke, na ndakisa mbote. Ntango Yesu asololaki na mwasi Mosamaria, abandaki mbala moko te kolobela Bokonzi. (Yoa. 4:7) Ntango mosusu, lisolo ekoki kobanda na kopesa moto longonya lokola: “Bana na bino bazalaka na bizaleli malamu!” Lolenge mosusu ya kobanda lisolo ezali ya kotuna motuna lokola: “Olandaki bansango lobi na mpokwa?”
Ntango lisolo ebandi, luká libaku ya kolobela nsango malamu, kasi kokende mbangumbangu te. Tiká mwa ntango eleka mpo lisolo ekola. Mbala mosusu, okoki koloba likambo moko oyo ekoki kobenda likebi ya moto mpe kotinda ye atuna yo motuna. Na ndakisa, soki bozali kolobela makambo ya libota, okoli koloba boye: “Namonaki toli moko ya malamu oyo etali kobɔkɔla bana.” Soki bozali kolobela likambo moko oyo oyokaki na bansango, okoki koloba boye: “Nasepelaki mingi ntango natángaki nsango moko ya malamu oyo emonisi ete makambo ekobongwana.” Kolɛmba nzoto te soki lisolo ekatani liboso ete opesa litatoli.
Memáká batrakte to mikanda mosusu oyo okoki kopesa moto oyo asepeli.

Meká kosala boye na boumeli ya sanza:

Pɔsɔ nyonso, mekáká kobanda lisolo ata na moto moko na mokano ya kopesa ye litatoli ya libaku malamu.