Tókolisa makoki na biso ya kosakola—Tópesaka bato ya sika formasyo

Mpo na nini ezali na ntina: Bayekoli ya sika ya Yesu basengeli koyekola kotosa “makambo nyonso” oyo apesi mitindo. Na makambo yango, ezali mpe na etinda ya koteya basusu mateya ya solo. (Mat. 28:19, 20) Bato mingi ya sika basalaka masolo na Eteyelo ya mosala ya Teokrasi mpe mbala mosusu bapesaka litatoli ya libaku malamu na bato ya libota na bango to baninga na bango. Kasi, lokola basepelaka mingi na makambo oyo bazali koyekola mpe bayebi ete Yehova alingi ete bato nyonso báyoka nsango malamu, bakoki kosɛnga ete bábimaka na mosala ya kosakola. (Rom. 10:13, 14) Soki bandimami lokola basakoli oyo bazwi naino batisimo te, ekomonisa ete basali litambe ya ntina na bokoli na bango ya elimo. Na yango, ekosɛnga kopesa bango formasyo ya malamu mpo bábangaka te.—Luka 6:40.

Ndenge ya kosala yango:

Salisá mosakoli ya sika azwa mikanda oyo akozala na mposa na yango mpo na kosakola mpe koteya. Lakisá ye ndenge obongisaka sakosi na yo ya mosala ya kosakola mpe limbolá ntina ya mokanda mokomoko oyo omemi.
Poná elongo na ye lolenge moko ya kobanda lisolo na Mosala na biso ya Bokonzi mpe bómekameka yango. Lendisá mosakoli ya sika asalela ndenge ya kobanda lisolo yango na maloba na ye moko. Bómekameka bakadre oyo esalelamaka mingi na teritware na bino, oyo ezali na buku Eteyelo ya mosala, lokasa 82. Monisá ye mpenza ntina ya kozala na molato oyo ebongi mpe kosala monzɛlɛ na bokatikati.—2 Ko. 6:3, 4.
Pesáká formasyo mokemoke. Lakisá mosakoli ya sika fishe ya teritware mpe teyá ye ndenge ya kotondisa lokasa ya nɔti ya ndako na ndako. Lakisá ye ndenge ya kokoma makambo ya moto oyo asepelaki. Teyá ye ndenge ya kosalela jw.org na mosala ya kosakola mpe mwa buku Une bonne nouvelle pour des gens de toutes nations. Salisá ye akolisa mposa ya moto oyo asololi na ye.—1 Ko. 3:6.
Zaláká motema molai mpe pesáká longonya. (Mas. 25:11) Pesáká ndakisa malamu. Molende na yo mpe likebi oyo ozali kotyela moto, ekobota mbuma na bambula ezali koya.

Meká kosala boye na boumeli ya sanza:

Bimáká na mosala kosakola ndako na ndako elongo na moyekoli na yo, ezala mpe ntango okei kozongela moto to koyekola na moto Biblia. Soki ozali na moyekoli te, zwá mosakoli oyo amesani naino na mosala ya kosakola te bósakola elongo na ye.