Tókolisa makoki na biso ya kosakola—Kokabola buku Biblia eteyaka

Mpo na nini ezali na ntina: Buku Biblia eteyaka ezali esaleli na biso ya libosoliboso mpo na koteya. Nzokande, liboso ya kobanda koyekola na moto, tosengeli kopesa ye yango. Yango wana, biso nyonso tosengeli kosala makasi ya koyeba malamumalamu kokabola buku yango na mosala ya kosakola. (Mas. 22:29) Ezali na ndenge mingi ya kosala mpe mosakoli akosalela oyo ebongi na ye.

Ndenge ya kosala yango:

Tuná motuna moko oyo ekolamusa mposa ya moto mpo na kobenda likebi na ye na mokapo moko oyo eyokani na motuna yango na kati ya buku. Okoki kutu kopona motuna moko na kati ya mituna oyo ezali na ebandeli ya mokapo mokomoko. Nsima ya koyoka eyano ya moto yango, tángá vɛrsɛ oyo ebongi mpe lakisá ye paragrafe moko oyo elobeli likambo yango mpe ntango mosusu, bokoki kolobela yango na mokuse.
Lolenge mosusu ya kosala ezali ya kosalela mituna oyo ezali na nkasa ya ebandeli mpo na kolamusa mposa ya moto mpe na nsima, kolakisa ye na buku eyano oyo Biblia epesi. Na ndakisa, okoki kolobela likama moko oyo euti kosalema, oyo balobeli na bansango mpe kolimbola ete bato mingi balukaka biyano na mituna oyo ezali na lokasa 3. To okoki koloba ete ozali kotala bato ya kartye mpo na koyebisa bango lolenge malamu ya kotalela mikolo oyo ezali koya. Na nsima, lakisá bililingi oyo ezali na nkasa 4-5, mpe tuná ye boye: “Na bilaka oyo, elaka nini olingi mpenza ete ekokisama?” Lolenge mosusu ezali ya koloba ete ozali kotala bato mpo na kosalisa bango bázwa biyano na mituna minene ya bomoi. Na nsima, lakisá moto yango mituna oyo ezali na nsuka ya lokasa 6, mpe tuná ye motuna nini esepelisi ye mingi koleka.
Sɛngá bato ete bóbanda mbala moko koyekola Biblia. Okoki koloba boye: “Tozali kolakisa bato ya kartye na biso buku oyo mpo na koyekola Biblia. Osilá komona yango? [Tiká ye apesa eyano.] Soki ozali na mwa miniti, nakoki kolakisa yo ndenge ya koyekola yango, mpe tokosalela Biblia na yo moko.”

Meká kosala boye na boumeli ya sanza:

Bómekameka ndenge ya kosala yango na losambo na bino na kati ya libota.
Ntango ozali na mosala ya kosakola, sololá na basakoli mosusu ndenge oyo okani koloba. (Mas. 27:17) Luká ndenge mosusu ya kobanda lisolo soki ya liboso esimbi te.