Bazali na mposa ya lisalisi na yo

¹ “Matɔndi mingi mpo na nyonso oyo bozali kosala mpo na biso. Esalisaka biso mpenza.” Maloba oyo emonisi mpenza botɔndi oyo tozalaka na yango mpo na bankulutu mpe basaleli na misala ya masangá na biso. Lokola ebongiseli ya Nzambe ezali se kokóma monene, ezali ntango nyonso na mposa ya mibali oyo bakɔmɛli mpo na kosala na masangá pene na 100 000 na mokili mobimba. Soki ozali ndeko mobali mpe ozwá batisimo, lisangá ezali na mposa ya lisalisi na yo.

² “Luká kozwa mikumba”: Okoki kosala nini mpo na kozwa mikumba? (1 Tim. 3:⁠1) Libosoliboso, osengeli kozala ndakisa malamu na makambo nyonso ya bomoi na yo. (1 Tim. 4:12; Tito 2:​6-8; 1 Pet. 5:⁠3) Omipesa mingi na mosala ya kosakola mpe salisá basusu básala mpe bongo. (2 Tim. 4:⁠5) Luká bolamu ya baninga na yo bandimi. (Lom. 12:13) Zalá moyekoli ya molende ya Liloba ya Nzambe, mpe kolisá ‘mayele ya koteya.’ (Tito 1:9; 1 Tim. 4:13) Saláká na molende misala oyo bankulutu bapesi yo. (1 Tim. 3:10) Soki ozali tata ya libota, ‘kambáká ndako na yo moko na ndenge ya malamu mingi.’​—⁠1 Tim. 3:​4, 5, 12.

³ Kozala nkulutu to mosaleli na misala ezali mosala makasi mpe esɛngaka komipimela makambo mosusu. (1 Tim. 5:17) Yango wana, ntango ozali koluka kozwa mikumba, mposa na yo esengeli kozala ya kosalela basusu na komikitisa nyonso. (Mat. 20:​25-28; Yoa. 13:​3-5, 12-17) Kanisá malamumalamu ezaleli ya Timote, mpe luká komekola ye. (Filp. 2:​20-22) Lokola Timote, tiká etamboli na yo ya malamu etinda bandeko bápesa yo mikumba. (Mis. 16:​1, 2) Ntango ozali kolona bizaleli ya elimo oyo esengeli mpo na kokokisa mikumba mosusu, mpe kosalela toli nyonso oyo bakoki kopesa yo mpo na kobongisa lisusu bomoto na yo, “bokoli na yo [ekomonana] polele na miso ya bato nyonso.”​—⁠1 Tim. 4:⁠15.

⁴ Baboti, bóteya bana na bino báyeba kopesa mabɔkɔ: Bana bakoki koyekola kopesa mabɔkɔ banda bomwana. Bóteya bango bálandaka makita na likebi, básakolaka, mpe bázalaka na etamboli ya malamu na Ndako ya Bokonzi mpe na eteyelo. Bóteya bango básalelaka basusu, na makambo lokola kotya bopɛtɔ na Ndako ya Bokonzi, kosalisa mibange, mpe bongo na bongo. Bósalisa bango báyokaka esengo ya kosalela basusu. (Mis. 20:35) Formasyo ya ndenge wana ekosalisa bango bákóma babongisi-nzela, basaleli na misala mpe bankulutu na mikolo ezali koya.

Eteni 4​—Tótambwisa boyekoli ya Biblia na ndenge oyo ekosalisa bato bákola

Lakisá moyekoli ndenge ya komibongisaka

¹ Moyekoli oyo atángaka lisolo liboso ya koyekola, oyo atyaka bilembo na biyano, mpe akanisaka ndenge akoloba yango na maloba na ye moko, akolaka noki na elimo. Yango wana, soki obandi koyekola na moto moko, bongisá lisolo moko elongo na ye mpo na komonisa ye ndenge ya komibongisa. Mpo na bayekoli mingi, ezalaka malamu kobongisa mokapo to liteya mobimba elongo.

² Kotya bilembo mpe kokoma makanisi na mopanzi ya lokasa: Lakisá ye ndenge ya komona biyano ya mituna oyo ezali na mokanda. Lakisá moyekoli mokanda na yo ndenge otyá bilembo kaka na maloba ya ntina. Ntango bozali koyekola, akoki kolanda ndakisa na yo, mpe kotya bilembo na mokanda na ye, kaka na maloba oyo ekosalisa ye ayeba eyano mbala moko. (Luka 6:40) Na nsima, sɛngá ye apesa eyano na maloba na ye moko. Yango ekosalisa yo oyeba soki azali mpenza kokanga ntina ya makambo oyo azali koyekola.

³ Likambo mosusu ya ntina oyo moyekoli asengeli kosala ntango azali kobongisa boyekoli, ezali ya kotalela malamumalamu bavɛrsɛ oyo batii maloba na yango na lisolo te. (Mis. 17:11) Salisá ye amona ndenge vɛrsɛ mokomoko oyo batii maloba na yango na lisolo te esimbi likambo moko oyo balobeli na paragrafe. Lakisá ye ndenge ya kokoma, na mokuse, mwa makanisi na mopanzi ya lokasa. Salisá ye amoni ete makambo oyo azali koyekola euti mpenza na Biblia. Na ntango ya boyekoli, lendisáká ye asalelaka mingi bavɛrsɛ oyo batii maloba na yango na lisolo te ntango azali kopesa biyano.

⁴ Koyeba lisolo na mokuse mpe bozongeli: Liboso moyekoli abanda kotalela likambo mokomoko ya lisolo oyo alingi kobongisa, ekozala malamu aluka naino koyeba lisolo yango na mokuse. Monisá ye ete akoki koyeba lisolo na mokuse soki atángi motó ya likambo, mitó ya makambo mike, mpe atali bililingi. Monisá ye ete liboso asilisa komibongisa, ekozala malamu azongela makanisi ya ntina ya lisolo yango, mbala mosusu akoki kosalela etanda ya bozongeli, soki ezali. Yango ekosalisa ye akanga makambo oyo ayekoli.

⁵ Soki olakisi moyekoli kobongisa boyekoli malamu, yango ekosalisa ye apesaka biyano ya malamu na makita ya lisangá. Yango ekosalisa ye mpe akóma na momeseno malamu ya koyekolaka ye moko, oyo ekopesa ye matomba ata ntango bokosilisa koyekola.