Nkombo yango ezali na lobwaku
OYEBI nkombo Saint-Moritz? Mbala mosusu oyebi yango, mpo ezali esika moko oyo ekendá nsango na mokili mobimba epai bato bakendaka konje; ezali na lobwaku ya Engadine, na Suisse. Kasi Saint-Moritz ezali esika moko oyo ebendaka likebi ya bato banda kala mpo na lobwaku na yango ya kitoko oyo ezali na kati ya bangomba oyo etondi na nɛjɛ na ngámbo ya sudi-ɛsti ya Suisse, pene na ndelo ya Italie. Kuna, ezali mpe na parkɛ ya ekólo Suisse; esika yango kitoko etondi na biloko oyo Nzambe akelá mpe na banzete ná banyama kitoko ndenge na ndenge oyo ekumisaka Mozalisi Monene, Yehova. (Nz. 148:7-10) Kasi, ezali mpe bongo mpo na bitiká ya biloko ya kala ya bato oyo bazalaki wana na katikati ya ekeke ya 17.
Likambo moko oyo emonanaka na bandako mingi na lobwaku yango ekoki kobenda likebi na yo. Na bisika mingi, okoki komona nkombo ya Nzambe ekomami liboso ya ndako, na ndakisa na likoló ya porte ya monene. Na bikeke oyo eleki, bazalaki na momeseno ya kosala mayemi na bifelo, na libándá ya bandako; bazalaki kosala mayemi likoló ya efelo, kopalola efelo, to kokata na libanga. Elilingi oyo omoni wana ezali ya ndako moko na mboka Bever. Maloba oyo ekomami wana elobi: “Na mobu 1715. Yehova azali ebandeli, mpe Yehova azali nsuka. Makambo nyonso kaka na lisalisi ya Nzambe, mpe eloko moko te ekoki kosalema soki azali te.” Omoni, makomi wana ya kala ezongeli nkombo ya Nzambe mbala mibale.
Na mboka Madulain, ezali mpe na makomi mosusu oyo eumeli koleka. Elobi boye: “Nzembo 127. Soki Yehova atongi ndako te, bato oyo batongi yango basali mosala wana ya makasi kaka mpamba. Lucius Rumedius. Na mobu 1654.”
Mpo na nini bakomaki nkombo ya Nzambe polele ndenge wana na lobwaku yango? Kala mpenza, liboso ya mbongwana oyo ebimisaki Lingomba ya Protesta, babimisaki Biblia na monɔkɔ ya Romanche, monɔkɔ moko oyo eutaki na Latin, oyo ezalaki kolobama na Engadine. Kutu, ezalaki buku ya liboso oyo ebongolamaki na monɔkɔ yango. Lokola makambo oyo batángaki na Liloba ya Nzambe esimbaki mitema na bango, bato mingi ya mboka yango bakomaki, na bifelo ya libándá ya bandako na bango, kaka bankombo na bango moko te kasi mpe maloba oyo bazwaki na Biblia, oyo ezalaki na nkombo ya Nzambe.
Ya solo, tii lelo, makomi yango ezali kaka koyebisa nkombo ya Yehova mpe kokumisa ye, bikeke mingi nsima ya ntango oyo yango ekomamaki mpo na mbala ya liboso na bandako wana. Tosɛngi bapaya mpe bato oyo bafandaka na lobwaku yango báyekola makambo mosusu mingi na ntina etali Nzambe monene, Yehova; báya na ndako mosusu oyo ezalaka mpe na nkombo na ye—Ndako ya Bokonzi ya Batatoli ya Yehova na Bever.
[Eutelo ya bafɔtɔ na lokasa 7]
© Stähli Rolf A/age fotostock