30 ກະສັດ​ເວົ້າ​ວ່າ: “ຂ້ອຍ​ນິແຫຼະ​ເປັນ​ຜູ້​ສ້າງ​ເມືອງ​ບາບີໂລນ​ທີ່​ຍິ່ງໃຫຍ່​ໃຫ້​ເປັນ​ວັງ​ຂອງ​ຂ້ອຍ. ຂ້ອຍ​ສ້າງ​ມັນ​ດ້ວຍ​ກຳລັງ​ແລະ​ອຳນາດ​ຂອງ​ຂ້ອຍ​ເພື່ອ​ຂ້ອຍ​ຈະ​ໄດ້​ຮັບ​ກຽດ​ທີ່​ຍິ່ງໃຫຍ່.”

31 ກະສັດ​ເວົ້າ​ຍັງ​ບໍ່​ທັນ​ສຸດ​ຄວາມ​ກໍ​ມີ​ສຽງ​ມາ​ຈາກ​ເທິງ​ຟ້າ​ວ່າ: “ກະສັດ​ເນບູກາດເນັດຊາ ມີ​ຄຳ​ຕັດສິນ​ຕໍ່​ທ່ານ​ວ່າ ‘ອານາຈັກ​ຂອງ​ທ່ານ​ຈະ​ຖືກ​ຍຶດ​ໄປ​ຈາກ​ທ່ານ+ 32 ແລະ​ທ່ານ​ຈະ​ຖືກ​ໄລ່ໜີ​ບໍ່​ໃຫ້​ຢູ່​ນຳ​ຄົນ. ທ່ານ​ຈະ​ຢູ່​ກັບ​ສັດ​ໃນ​ທົ່ງຫຍ້າ​ແລະ​ກິນ​ຫຍ້າ​ຄື​ກັບ​ງົວ. ມັນ​ຈະ​ເປັນ​ແບບ​ນີ້ 7 ປີ ຈົນ​ກວ່າ​ທ່ານ​ຈະ​ສຳນຶກ​ວ່າ​ພະເຈົ້າ​ສູງ​ສຸດ​ເປັນ​ຜູ້​ປົກຄອງ​ອານາຈັກ​ຂອງ​ມະນຸດ ແລະ​ເພິ່ນ​ຈະ​ເອົາ​ອຳນາດ​ການ​ປົກຄອງ​ໃຫ້​ໃຜ​ກໍ​ໄດ້​ຕາມ​ທີ່​ເພິ່ນ​ຕ້ອງການ.’”+