ເອເຊກຽນ
16 ພະເຢໂຫວາເວົ້າກັບຂ້ອຍອີກວ່າ: 2 “ລູກມະນຸດ ໃຫ້ເຈົ້າໄປບອກເມືອງເຢຣູຊາເລັມ*ໃຫ້ຮູ້ເລື່ອງການກະທຳທີ່ເປັນຕາຂີ້ດຽດຂອງເມືອງນັ້ນ.+ 3 ເຈົ້າຕ້ອງເວົ້າແບບນີ້ ‘ພະເຢໂຫວາພະເຈົ້າຜູ້ຍິ່ງໃຫຍ່ສູງສຸດບອກເມືອງເຢຣູຊາເລັມວ່າ “ເຈົ້າເກີດມາໃນແຜ່ນດິນຂອງຄົນການາອານ. ພໍ່ຂອງເຈົ້າເປັນຄົນອາໂມ+ແລະແມ່ຂອງເຈົ້າເປັນຄົນເຮດ.+ 4 ໃນມື້ທີ່ເຈົ້າເກີດບໍ່ມີໃຜຕັດສາຍແຮ່ໃຫ້ເຈົ້າ ບໍ່ມີໃຜອາບນ້ຳໃຫ້ເຈົ້າ ບໍ່ມີໃຜເອົາເກືອຖູໂຕເຈົ້າ ແລະບໍ່ມີໃຜເອົາຜ້າຫໍ່ເຈົ້າ. 5 ບໍ່ມີໃຜອີ່ຕົນເຈົ້າຫຼາຍພໍທີ່ຈະເຮັດສິ່ງເຫຼົ່ານີ້ໃຫ້ເຈົ້າ. ບໍ່ມີໃຜອີ່ຕົນເຈົ້າເລີຍ ເຈົ້າຈຶ່ງຖືກຖິ້ມໄວ້ຢູ່ທົ່ງຫຍ້າຍ້ອນມີຄົນຊັງເຈົ້າຕັ້ງແຕ່ມື້ທີ່ເຈົ້າເກີດ.
6 ຕອນທີ່ເຮົາກາຍມາ ເຮົາກໍເຫັນເຈົ້ານອນດີ້ນຢູ່ກອງເລືອດຂອງໂຕເອງ. ຕອນທີ່ເຈົ້ານອນຢູ່ກອງເລືອດ ເຮົາເວົ້າວ່າ ‘ເຈົ້າຊິບໍ່ຕາຍ!’ ເຮົາເວົ້າກັບເຈົ້າຕອນທີ່ເຈົ້ານອນຢູ່ກອງເລືອດວ່າ ‘ເຈົ້າຊິບໍ່ຕາຍ!’ 7 ເຮົາເຮັດໃຫ້ເຈົ້າມີຫຼາຍຂຶ້ນຄືກັບຫຍ້າທີ່ປົ່ງຢູ່ທົ່ງຫຍ້າ. ເຈົ້າໃຫຍ່ຂຶ້ນແລະສູງ ແລະໄດ້ໃສ່ເຄື່ອງປະດັບທີ່ງາມທີ່ສຸດ. ໜ້າເອິກເຈົ້າກໍຕຶ່ງແລະຜົມຂອງເຈົ້າກໍຍາວແລະງາມ ແຕ່ເຈົ້າຍັງປະໂປ້ຢູ່.”’
8 ພະເຢໂຫວາພະເຈົ້າຜູ້ຍິ່ງໃຫຍ່ສູງສຸດເວົ້າວ່າ ‘ຕອນທີ່ເຮົາກາຍມາ ເຮົາເຫັນວ່າເຈົ້າໃຫຍ່ເປັນສາວຮູ້ຈັກມັກຜູ້ບ່າວແລ້ວ ເຮົາຈຶ່ງພືເສື້ອຄຸມຂອງເຮົາອອກໄປຫົ່ມເຈົ້າ+ທີ່ປະໂປ້ຢູ່. ແລ້ວເຮົາກໍເຮັດສັນຍາແລະປະຕິຍານກັບເຈົ້າ ແລະເຈົ້າກໍເປັນຂອງເຮົາ. 9 ເຮົາອາບນ້ຳໃຫ້ເຈົ້າ ລ້າງເລືອດຢູ່ໂຕເຈົ້າ ແລະເອົານ້ຳມັນທາໂຕໃຫ້ເຈົ້າ.+ 10 ເຮົາເອົາເຄື່ອງນຸ່ງທີ່ແສ່ວງາມໆແລະເອົາເກີບໜັງທີ່ດີໆ*ໃຫ້ເຈົ້າໃສ່. ເຮົາເອົາຜ້າລີນິນເນື້ອດີຕຸ້ມເຈົ້າໄວ້ແລະໃຫ້ເຈົ້າໃສ່ເຄື່ອງນຸ່ງທີ່ແພງໆ. 11 ເຮົາເອົາເຄື່ອງປະດັບ ສາຍແຂນ ແລະສາຍຄໍໃຫ້ເຈົ້າໃສ່. 12 ເຮົາຍັງເອົາບ້ວງດັງ ຕຸ້ມຫູ ແລະມົງກຸດທີ່ງາມໆໃຫ້ເຈົ້າໃສ່ນຳ. 13 ເຄື່ອງປະດັບຂອງເຈົ້າເປັນເງິນເປັນຄຳ. ເຄື່ອງນຸ່ງຂອງເຈົ້າເປັນຜ້າລີນິນເນື້ອດີທີ່ລາຄາແພງແລະຖັກແສ່ວຢ່າງດີ. ຂອງກິນຂອງເຈົ້າມີແປ້ງລະອຽດ ນ້ຳເຜີ້ງ ແລະນ້ຳມັນໝາກກອກ. ເຈົ້າໃຫຍ່ຂຶ້ນເປັນຜູ້ຍິງທີ່ງາມຫຼາຍ+ແລະເໝາະທີ່ຈະເປັນລາຊີນີ.’”
14 “ພະເຢໂຫວາພະເຈົ້າຜູ້ຍິ່ງໃຫຍ່ສູງສຸດເວົ້າວ່າ ‘ຍ້ອນຄວາມງາມຂອງເຈົ້າ ຊື່ສຽງຂອງເຈົ້າຈຶ່ງດັງໄປຮອດຊາດຕ່າງໆ.+ ເຈົ້າງາມບໍ່ມີບ່ອນຕິຍ້ອນເຮົາເຮັດໃຫ້ເຈົ້າງາມ.’”+
15 “‘ແຕ່ເຈົ້າໝັ້ນໃຈໃນຄວາມງາມຂອງໂຕເອງ+ແລະໃຊ້ຊື່ສຽງຂອງເຈົ້າເພື່ອເປັນໂສເພນີ.+ ເຈົ້ານອນກັບທຸກຄົນທີ່ກາຍໄປກາຍມາ+ ແລະເຈົ້າກໍມອບໂຕມອບກາຍໃຫ້ທຸກຄົນທີ່ຕ້ອງການເຈົ້າ. 16 ເຈົ້າເອົາເຄື່ອງນຸ່ງສີແຈດໆຂອງເຈົ້າໄປຕົກແຕ່ງບ່ອນນະມັດສະການທີ່ເຈົ້າຂາຍໂຕ.+ ບໍ່ຄວນມີເລື່ອງແບບນີ້ເກີດຂຶ້ນເລີຍແລະບໍ່ຄວນເກີດຊ້ຳອີກຕໍ່ໄປ. 17 ເຈົ້າຍັງເອົາເຄື່ອງປະດັບທີ່ງາມໆທີ່ເປັນເງິນເປັນຄຳທີ່ເຮົາເອົາໃຫ້ເຈົ້າໄປເຮັດຮູບບູຊາທີ່ເປັນຜູ້ຊາຍ ແລ້ວເຈົ້າກໍນອນນຳຮູບເຫຼົ່ານັ້ນ.+ 18 ເຈົ້າເອົາເຄື່ອງນຸ່ງທີ່ຖັກແສ່ວງາມໆໄປປົກຮູບເຫຼົ່ານັ້ນ*ແລະເອົານ້ຳມັນກັບເຄື່ອງຫອມຂອງເຮົາໄປໃຫ້ພວກມັນ.+ 19 ເຂົ້າຈີ່ທີ່ເຮັດຈາກແປ້ງລະອຽດ ນ້ຳມັນໝາກກອກ ແລະນ້ຳເຜີ້ງທີ່ເຮົາເອົາໃຫ້ເຈົ້າໄວ້ກິນ ເຈົ້າກໍເອົາໄປໃຫ້ຮູບບູຊາເຫຼົ່ານັ້ນເພື່ອເປັນເຄື່ອງບູຊາທີ່ເຮັດໃຫ້ພວກມັນພໍໃຈ.*+ ເຈົ້າເຮັດແບບນັ້ນແທ້ໆ.’ ພະເຢໂຫວາພະເຈົ້າຜູ້ຍິ່ງໃຫຍ່ສູງສຸດເວົ້າແບບນີ້.”
20 “‘ເຈົ້າເອົາລູກຊາຍລູກສາວທີ່ໄດ້ກັບເຮົາ+ໄປເປັນເຄື່ອງບູຊາໃຫ້ຮູບບູຊາເຫຼົ່ານັ້ນ.+ ເຈົ້າເຮັດໂຕເປັນໂສເພນີແລ້ວຍັງບໍ່ພໍອີກຫວະ? 21 ເຈົ້າຍັງຂ້າລູກຂອງເຮົາແລະເຜົາເຂົາເຈົ້າເປັນເຄື່ອງບູຊາ.+ 22 ຕອນທີ່ເຈົ້າເຮັດທຸກຢ່າງທີ່ເປັນຕາຂີ້ດຽດແລະເຮັດໂຕເປັນໂສເພນີ ເຈົ້າລືມຕອນທີ່ເຈົ້າຍັງເປັນແອນ້ອຍນອນປະໂປ້ດີ້ນຢູ່ກອງເລືອດຂອງໂຕເອງ. 23 ເຈົ້າຈະຈິບຫາຍ. ເຈົ້າຈະຈິບຫາຍແທ້ໆ ຍ້ອນເຈົ້າໄດ້ເຮັດສິ່ງທີ່ຊົ່ວຮ້າຍທັງໝົດນີ້.’+ ພະເຢໂຫວາພະເຈົ້າຜູ້ຍິ່ງໃຫຍ່ສູງສຸດເວົ້າແບບນີ້. 24 ‘ເຈົ້າເຮັດໂນນແລະເຮັດບ່ອນນະມັດສະການສຳລັບໂຕເອງຢູ່ຕາມເດີ່ນຂອງເມືອງທຸກບ່ອນ. 25 ເຈົ້າສ້າງບ່ອນນະມັດສະການໃນບ່ອນທີ່ຄົນແນມເຫັນໄດ້ຕາມຫົນທາງທຸກເສັ້ນ. ເຈົ້າເຮັດໃຫ້ຄວາມງາມຂອງໂຕເອງກາຍເປັນສິ່ງທີ່ເປັນຕາຂີ້ດຽດ ໂດຍມອບໂຕມອບກາຍໃຫ້ທຸກຄົນທີ່ກາຍໄປກາຍມາ+ ແລະເຮັດໂຕເປັນໂສເພນີໜັກຂຶ້ນເລື້ອຍໆ.+ 26 ເຈົ້າຂາຍໂຕໃຫ້ພວກເອຢິບ+ເພື່ອນບ້ານຂອງເຈົ້າທີ່ມີຕັນຫາຫຼາຍ. ເຈົ້າເຮັດໃຫ້ເຮົາໃຈຮ້າຍຍ້ອນເຈົ້າເຮັດໂຕເປັນໂສເພນີນັບເທື່ອບໍ່ຖ້ວນ. 27 ບັດນີ້ ເຮົາຈະລົງໂທດເຈົ້າແລະເຮັດໃຫ້ເຈົ້າມີຂອງກິນໜ້ອຍລົງ.+ ເຮົາຈະປ່ອຍໃຫ້ພວກຜູ້ຍິງທີ່ຊັງເຈົ້າ+ຈັດການເຈົ້າຕາມໃຈ. ພວກນີ້ແມ່ນຄົນຟີລິດສະຕີນທີ່ຮູ້ສຶກອາຍຍ້ອນການກະທຳທີ່ເປັນຕາໜ້າລັງກຽດຂອງເຈົ້າ.+
28 ຍ້ອນເຈົ້າບໍ່ຮູ້ຈັກພໍ ເຈົ້າຈຶ່ງຂາຍໂຕໃຫ້ພວກອັດຊີເຣຍ.+ ເຖິງວ່າຈະຂາຍໂຕໃຫ້ເຂົາເຈົ້າແລ້ວ ແຕ່ເຈົ້າກໍຍັງບໍ່ໜຳໃຈ. 29 ເຈົ້າຂາຍໂຕຫຼາຍຂຶ້ນອີກໃນແຜ່ນດິນຂອງພວກພໍ່ຄ້າ*ແລະຂາຍໂຕໃຫ້ພວກການເດອາ+ ແຕ່ປານນັ້ນເຈົ້າກໍຍັງບໍ່ໜຳໃຈ.’ 30 ພະເຢໂຫວາພະເຈົ້າຜູ້ຍິ່ງໃຫຍ່ສູງສຸດເວົ້າວ່າ ‘ຕອນທີ່ເຈົ້າເຮັດສິ່ງເຫຼົ່ານີ້ ເຈົ້າບໍ່ໄດ້ເຮັດໃຫ້ໃຈຂອງເຈົ້າເຂັ້ມແຂງ.* ເຈົ້າເຮັດໂຕເປັນໂສເພນີທີ່ບໍ່ຮູ້ຈັກອາຍ.+ 31 ຕອນທີ່ເຈົ້າເຮັດໂນນໃນບ່ອນທີ່ຄົນແນມເຫັນໄດ້ຕາມຫົນທາງທຸກເສັ້ນແລະເຮັດບ່ອນນະມັດສະການຢູ່ຕາມເດີ່ນຂອງເມືອງທຸກບ່ອນ ທີ່ຈິງເຈົ້າບໍ່ໄດ້ເປັນໂສເພນີ ຍ້ອນເຈົ້າບໍ່ໄດ້ເອົາເງິນ. 32 ແຕ່ເຈົ້າເປັນເມຍທີ່ຫຼິ້ນຊູ້ທີ່ນອນກັບຄົນແປກໜ້າແທນທີ່ຈະນອນກັບຜົວຂອງໂຕເອງ.+ 33 ຕາມທຳມະດາຄົນມັກເອົາຂອງຂວັນໃຫ້ໂສເພນີ+ ແຕ່ເຈົ້າພັດເປັນຜູ້ເອົາຂອງຂວັນໃຫ້ທຸກຄົນທີ່ຢາກນອນນຳເຈົ້າ.+ ເຈົ້າເອົາເງິນຈ້າງຄົນຈາກທຸກບ່ອນໃຫ້ມານອນນຳເຈົ້າ.+ 34 ເຈົ້າເຮັດບໍ່ຄືກັບໂສເພນີຄົນອື່ນໆແລະບໍ່ມີໃຜເຮັດຄືເຈົ້າ. ເຈົ້າຈ່າຍເງິນໃຫ້ຄົນອື່ນ ແທນທີ່ເຂົາເຈົ້າຈະຈ່າຍໃຫ້ເຈົ້າ. ເຈົ້າເຮັດກົງກັນຂ້າມກັບໂສເພນີຄົນອື່ນ.’
35 ເຈົ້າທີ່ເປັນໂສເພນີ+ ໃຫ້ຟັງສິ່ງທີ່ພະເຢໂຫວາເວົ້າ. 36 ພະເຢໂຫວາພະເຈົ້າຜູ້ຍິ່ງໃຫຍ່ສູງສຸດເວົ້າວ່າ ‘ເຈົ້າມີຕັນຫາຫຼາຍແລະປະໂປ້ຢູ່. ເຈົ້າຂາຍໂຕໃຫ້ຄົນທີ່ມັກນອນນຳເຈົ້າແລະໃຫ້ຮູບບູຊາທີ່ເປັນຕາຂີ້ດຽດ.*+ ເຈົ້າເຖິງຂັ້ນວ່າເອົາເລືອດຂອງລູກໂຕເອງໄປເປັນເຄື່ອງບູຊາ.+ 37 ຍ້ອນແນວນີ້ ເຮົາຈະລວບລວມທຸກຄົນທີ່ມັກນອນນຳເຈົ້າ ເຊິ່ງມີທັງຜູ້ທີ່ເຈົ້າຮັກແລະຜູ້ທີ່ເຈົ້າຊັງ. ເຮົາຈະລວບລວມເຂົາເຈົ້າຈາກທຸກບ່ອນໃຫ້ມາຕໍ່ສູ້ເຈົ້າ. ເຮົາຈະຈີກເຄື່ອງນຸ່ງຂອງເຈົ້າຕໍ່ໜ້າເຂົາເຈົ້າ ແລ້ວເຂົາເຈົ້າຈະເຫັນເຈົ້າປະໂປ້.+
38 ເຮົາຈະໃຫ້ເຈົ້າຖືກໂທດແບບດຽວກັບຜູ້ຍິງທີ່ຫຼິ້ນຊູ້+ແລະຜູ້ຍິງທີ່ຂ້າຄົນ.+ ເຮົາຈະໃຫ້ເຈົ້າຖືກຂ້າຍ້ອນເຮົາຄຽດແລະໃຈຮ້າຍໃຫ້ເຈົ້າຫຼາຍ.+ 39 ເຮົາຈະໃຫ້ຄົນທີ່ມັກນອນນຳເຈົ້າຈັດການເຈົ້າ. ເຂົາເຈົ້າຈະທຳລາຍໂນນແລະມ້າງບ່ອນນະມັດສະການຂອງເຈົ້າ.+ ເຂົາເຈົ້າຈະຈີກເຄື່ອງນຸ່ງຂອງເຈົ້າ+ແລະເອົາເຄື່ອງປະດັບທີ່ງາມໆຂອງເຈົ້າໄປ+ ແລ້ວເຂົາເຈົ້າຈະປ່ອຍໃຫ້ເຈົ້າປະໂປ້. 40 ເຂົາເຈົ້າຈະພາຄົນບັກຫຼາຍໆມາຕໍ່ສູ້ເຈົ້າ+ ດຶກກ້ອນຫີນໃສ່ເຈົ້າ+ ແລະເອົາດາບຂ້າເຈົ້າ.+ 41 ເຂົາເຈົ້າຈະຈູດເຮືອນຂອງເຈົ້າ+ ແລະລົງໂທດເຈົ້າຕໍ່ໜ້າຜູ້ຍິງຫຼາຍຄົນ. ເຮົາຈະເຮັດໃຫ້ເຈົ້າເຊົາເປັນໂສເພນີ+ ແລະເຈົ້າຈະເຊົາເອົາເງິນຈ້າງຄົນ. 42 ເຮົາຈະປ່ອຍຄວາມໃຈຮ້າຍຂອງເຮົາໃສ່ເຈົ້າຈົນເຮົາພໍໃຈ+ ແລ້ວເຮົາກໍຈະເຊົາໃຈຮ້າຍ.+ ເຮົາຈະໃຈເຢັນລົງແລະບໍ່ໃຈຮ້າຍໃຫ້ເຈົ້າອີກ.’
43 ພະເຢໂຫວາພະເຈົ້າຜູ້ຍິ່ງໃຫຍ່ສູງສຸດເວົ້າວ່າ ‘ຍ້ອນເຈົ້າລືມຕອນທີ່ເຈົ້າຍັງເປັນແອນ້ອຍ+ ແລະຍ້ອນເຈົ້າໄດ້ເຮັດໃຫ້ເຮົາໃຈຮ້າຍໂດຍເຮັດສິ່ງເຫຼົ່ານີ້ ບັດນີ້ ເຮົາຈະໃຫ້ເຈົ້າໄດ້ຮັບຜົນຈາກການກະທຳຂອງໂຕເອງ. ເຈົ້າຈະບໍ່ໄດ້ເຮັດສິ່ງທີ່ໜ້າລັງກຽດແລະສິ່ງທີ່ເປັນຕາຂີ້ດຽດອີກຕໍ່ໄປ.
44 ຖ້າເບິ່ງເດີ້ ຄົນທີ່ມັກເວົ້າຄຳສຸພາສິດກໍຈະໃຊ້ຄຳສຸພາສິດນີ້ກັບເຈົ້າທີ່ວ່າ “ແມ່ເປັນແນວໃດ ລູກສາວກໍຈະເປັນແນວນັ້ນ!”+ 45 ເຈົ້າກໍເປັນຄືກັບແມ່ຂອງເຈົ້າຫັ້ນແຫຼະທີ່ດູຖູກລູກດູຖູກຜົວ ແລະເປັນຄືກັບເອື້ອຍກັບນ້ອງສາວຂອງເຈົ້າທີ່ດູຖູກລູກດູຖູກຜົວຂອງເຂົາເຈົ້າ. ແມ່ຂອງເຈົ້າເປັນຄົນເຮດແລະພໍ່ຂອງເຈົ້າເປັນຄົນອາໂມ.’”+
46 “‘ເອື້ອຍຂອງເຈົ້າແມ່ນຊາມາເຣຍ+ທີ່ຢູ່ທາງເໜືອຂອງເຈົ້າ*ກັບພວກລູກສາວ*ຂອງລາວ+ ແລະນ້ອງສາວຂອງເຈົ້າແມ່ນໂຊໂດມ+ທີ່ຢູ່ທາງໃຕ້ຂອງເຈົ້າ*ກັບພວກລູກສາວຂອງລາວ.+ 47 ເຈົ້າບໍ່ພຽງແຕ່ເຮັດສິ່ງທີ່ເປັນຕາຂີ້ດຽດຄືກັບເຂົາເຈົ້າ ແຕ່ໃນເວລາສັ້ນໆເຈົ້າເຮັດຊົ່ວຫຼາຍກວ່າເຂົາເຈົ້າອີກ.’+ 48 ພະເຢໂຫວາພະເຈົ້າຜູ້ຍິ່ງໃຫຍ່ສູງສຸດເວົ້າວ່າ ‘ເຮົາສາບານວ່າຕາບໃດທີ່ເຮົາຍັງມີຊີວິດຢູ່ໂຊໂດມນ້ອງສາວຂອງເຈົ້າກັບພວກລູກສາວຂອງລາວບໍ່ເຄີຍເຮັດຊົ່ວສ່ຳກັບທີ່ເຈົ້າແລະພວກລູກສາວຂອງເຈົ້າເຮັດ. 49 ໂຊໂດມນ້ອງສາວຂອງເຈົ້າເຮັດຜິດຫຼາຍຢ່າງ. ລາວກັບພວກລູກສາວຂອງລາວ+ຍິ່ງຫຼາຍ.+ ເຂົາເຈົ້າມີຂອງກິນເຫຼືອເຟືອ+ ຢູ່ຢ່າງປອດໄພ+ ແລະບໍ່ມີແນວກັງວົນ ແຕ່ເຂົາເຈົ້າບໍ່ໄດ້ຊ່ວຍເຫຼືອຄົນທີ່ທຸກຍາກ.+ 50 ເຂົາເຈົ້າບໍ່ເຊົາຍິ່ງຈອງຫອງ+ແລະຍັງເຮັດສິ່ງທີ່ເປັນຕາຂີ້ດຽດຕໍ່ໜ້າເຮົາ.+ ສົມຄວນແລ້ວທີ່ເຮົາທຳລາຍເຂົາເຈົ້າ.+
51 ຊາມາເຣຍ+ເຮັດຜິດບໍ່ຮອດເຄິ່ງໜຶ່ງຂອງເຈົ້າຊ້ຳ. ເຈົ້າເຮັດສິ່ງທີ່ເປັນຕາຂີ້ດຽດຫຼາຍກວ່າເຂົາເຈົ້າ ແລະສິ່ງທີ່ເປັນຕາຂີ້ດຽດທັງໝົດທີ່ເຈົ້າເຮັດນັ້ນເຮັດໃຫ້ເອື້ອຍກັບນ້ອງສາວຂອງເຈົ້າເບິ່ງຄືວ່າເປັນຄົນດີໄປເລີຍ.+ 52 ຕອນນີ້ ເຈົ້າຕ້ອງອັບອາຍຂາຍໜ້າຍ້ອນເຈົ້າເຮັດໃຫ້ການກະທຳຂອງເອື້ອຍກັບນ້ອງສາວຂອງເຈົ້າກາຍເປັນເລື່ອງທີ່ຖືກຕ້ອງ. ຄວາມຜິດຂອງເຈົ້າເປັນຕາຂີ້ດຽດຫຼາຍກວ່າຄວາມຜິດຂອງເຂົາເຈົ້າອີກ. ບັດນີ້ ເຈົ້າຕ້ອງອັບອາຍຂາຍໜ້າຍ້ອນເຈົ້າເຮັດໃຫ້ເອື້ອຍກັບນ້ອງສາວຂອງເຈົ້າເບິ່ງຄືວ່າເປັນຄົນດີ.’
53 ‘ເຮົາຈະລວບລວມໂຊໂດມກັບພວກລູກສາວ ແລະຊາມາເຣຍກັບພວກລູກສາວໃຫ້ກັບຄືນມາຈາກການເປັນຊະເລີຍ. ເຮົາຈະລວບລວມເຈົ້າທີ່ເປັນຊະເລີຍໃຫ້ກັບຄືນມາພ້ອມກັບເຂົາເຈົ້າ+ 54 ເພື່ອໃຫ້ເຈົ້າອັບອາຍຂາຍໜ້າ. ເຈົ້າຈະຮູ້ສຶກອາຍ ຍ້ອນສິ່ງທີ່ເຈົ້າເຮັດໄດ້ເຮັດໃຫ້ເຂົາເຈົ້າຮູ້ສຶກດີຂຶ້ນ. 55 ໂຊໂດມກັບພວກລູກສາວ ແລະຊາມາເຣຍກັບພວກລູກສາວທີ່ເປັນເອື້ອຍນ້ອງຂອງເຈົ້າຈະກັບມາຢູ່ໃນສະພາບເກົ່າ ແລະເຈົ້າກັບພວກລູກສາວກໍຈະກັບມາຢູ່ໃນສະພາບເກົ່າຄືກັນ.+ 56 ເຈົ້າຄິດວ່າມັນບໍ່ມີປະໂຫຍດຫຍັງທີ່ຈະເວົ້າເຖິງໂຊໂດມນ້ອງສາວຂອງເຈົ້າຕອນທີ່ເຈົ້າຍັງຍິ່ງຢູ່ 57 ຕອນທີ່ຄວາມຊົ່ວຂອງເຈົ້າຍັງບໍ່ຖືກເປີດເຜີຍ.+ ແຕ່ຕອນນີ້ ພວກລູກສາວຂອງຊີເຣຍກັບເພື່ອນບ້ານຂອງເຂົາເຈົ້າຈະເຍາະເຍີ້ຍເຈົ້າ ແລະພວກລູກສາວຂອງຟີລິດສະຕີນ+ທີ່ຢູ່ອ້ອມຂ້າງເຈົ້າຈະດູຖູກເຈົ້າ. 58 ເຈົ້າຈະຕ້ອງຮັບຜົນຈາກການກະທຳທີ່ໜ້າລັງກຽດແລະສິ່ງທີ່ເປັນຕາຂີ້ດຽດທີ່ເຈົ້າເຮັດ.’ ພະເຢໂຫວາເວົ້າແບບນີ້.”
59 “ພະເຢໂຫວາພະເຈົ້າຜູ້ຍິ່ງໃຫຍ່ສູງສຸດເວົ້າວ່າ ‘ຕອນນີ້ ເຮົາຈະເຮັດກັບເຈົ້າຄືກັບທີ່ເຈົ້າເຄີຍເຮັດ+ ຍ້ອນເຈົ້າດູຖູກຄຳປະຕິຍານໂດຍບໍ່ເຮັດຕາມສັນຍາຂອງເຮົາ.+ 60 ແຕ່ເຮົາຈະຈື່ສັນຍາທີ່ເຮົາເຮັດກັບເຈົ້າຕອນທີ່ເຈົ້າຍັງເປັນແອນ້ອຍຢູ່ ແລະເຮົາຈະເຮັດສັນຍາຕະຫຼອດໄປກັບເຈົ້າ.+ 61 ຕອນທີ່ເຈົ້າຕ້ອນຮັບເອື້ອຍກັບນ້ອງສາວຂອງເຈົ້າ ເຈົ້າຈະຈື່ສິ່ງທີ່ເຈົ້າເຄີຍເຮັດແລະຈະຮູ້ສຶກອາຍ.+ ເຮົາຈະໃຫ້ເຂົາເຈົ້າເປັນລູກສາວຂອງເຈົ້າ ແຕ່ບໍ່ແມ່ນຍ້ອນສັນຍາທີ່ເຮົາເຮັດກັບເຈົ້າ.’
62 ‘ເຮົາຈະເຮັດສັນຍາກັບເຈົ້າ ແລ້ວເຈົ້າຈະຮູ້ວ່າເຮົາແມ່ນເຢໂຫວາ. 63 ເມື່ອເຮົາຍົກໂທດໃຫ້ເຈົ້າທັງໆທີ່ເຈົ້າເຮັດຜິດຂະໜາດນີ້+ ເຈົ້າກໍຈະຈື່ສິ່ງທີ່ເຈົ້າເຄີຍເຮັດແລະຈະອາຍຫຼາຍຈົນບໍ່ກ້າເວົ້າຫຍັງ.’+ ພະເຢໂຫວາພະເຈົ້າຜູ້ຍິ່ງໃຫຍ່ສູງສຸດເວົ້າແບບນີ້.”