ພະບັນຍັດ
14 “ພວກເຈົ້າເປັນລູກຂອງພະເຢໂຫວາພະເຈົ້າຂອງພວກເຈົ້າ. ຫ້າມປາດໂຕເອງ+ຫຼືແຖຄິ້ວ*ເພື່ອໄວ້ທຸກໃຫ້ຄົນຕາຍ.+ 2 ພວກເຈົ້າເປັນຊາດທີ່ພະເຢໂຫວາພະເຈົ້າຖືວ່າບໍລິສຸດ.+ ພະເຢໂຫວາໄດ້ເລືອກພວກເຈົ້າຈາກຊາດຕ່າງໆໃນໂລກນີ້ ເພື່ອໃຫ້ເປັນຄົນຂອງເພິ່ນແລະເປັນຊັບສົມບັດພິເສດ*ຂອງເພິ່ນ.+
3 ຫ້າມເຈົ້າກິນສັດທີ່ພະເຈົ້າຂີ້ດຽດ.+ 4 ສັດທີ່ເຈົ້າກິນໄດ້ມີຄື:+ ງົວ ແກະ ແບ້ 5 ກວາງຊະນິດຕ່າງໆ ແບ້ປ່າ ແກະປ່າ ແລະແກະທີ່ຢູ່ພູ. 6 ເຈົ້າກິນສັດທີ່ມີຕີນແຍກເປັນ 2 ກີບແລະຄ້ຽວເອື້ອງໄດ້. 7 ແຕ່ຫ້າມກິນສັດທີ່ມີແຕ່ຄ້ຽວເອື້ອງ ຫຼືມີແຕ່ຕີນແຍກເປັນ 2 ກີບ ເຊັ່ນ: ໂຕອູດ ໂຕກະຕ່າຍປ່າ ແລະໂຕຣັອກແບດເຈີ້.* ສັດເຫຼົ່ານີ້ຄ້ຽວເອື້ອງແຕ່ຕີນມັນບໍ່ໄດ້ແຍກເປັນ 2 ກີບ. ມັນເປັນສັດທີ່ຖືວ່າບໍ່ສະອາດ.+ 8 ໂຕໝູກໍຫ້າມກິນ ເພາະຕີນມັນແຍກເປັນ 2 ກີບ ແຕ່ບໍ່ໄດ້ຄ້ຽວເອື້ອງ. ມັນເປັນສັດທີ່ຖືວ່າບໍ່ສະອາດ. ຢ່າກິນຊີ້ນຂອງສັດເຫຼົ່ານີ້ ຫຼືຈັບບາຍຊາກຂອງພວກມັນ.
9 ສັດທັງໝົດທີ່ຢູ່ໃນນ້ຳທີ່ມີຄີແລະມີເກັດ ເຈົ້າກິນໄດ້+ 10 ແຕ່ຫ້າມກິນສັດທີ່ບໍ່ມີຄີແລະບໍ່ມີເກັດ ມັນເປັນສັດທີ່ຖືວ່າບໍ່ສະອາດ.
11 ນົກທັງໝົດທີ່ຖືວ່າສະອາດ ເຈົ້າກິນໄດ້ 12 ແຕ່ຫ້າມກິນນົກຕໍ່ໄປນີ້ຄື: ນົກອິນຊີ ແຫຼວກິນປາ ແຮ້ງດຳ+ 13 ແຫຼວແດງ ແຫຼວດຳ ແຫຼວນ້ອຍໆຊະນິດອື່ນໆ 14 ກາທຸກຊະນິດ 15 ນົກກະຈອກເທດ ນົກເຄົ້າ ນົກນາງນວນ ແຫຼວຊະນິດອື່ນໆ 16 ນົກເຄົ້ານ້ອຍ ນົກເຄົ້າຫູຍາວ ຫົງ 17 ນົກກະທຸງ ແຮ້ງ ນົກເປັດນ້ຳ 18 ນົກກະສາ ນົກຍາງທຸກຊະນິດ ນົກກະລາງຫົວຂວານ ແລະເຈຍ. 19 ແມງໄມ້ທຸກຊະນິດທີ່ຢູ່ນຳກັນເປັນຝູງກໍຖືວ່າບໍ່ສະອາດ ຫ້າມເຈົ້າກິນ. 20 ສັດທີ່ບິນໄດ້ເຊິ່ງຖືວ່າສະອາດ ເຈົ້າກິນໄດ້.
21 ຫ້າມເຈົ້າກິນສັດທີ່ຕາຍເອງ+ ແຕ່ເຈົ້າເອົາສັດນັ້ນໃຫ້ຄົນຕ່າງຊາດທີ່ຢູ່ໃນເມືອງຂອງເຈົ້າກິນໄດ້ ຫຼືຈະຂາຍໃຫ້ລາວກໍໄດ້ ຍ້ອນພະເຢໂຫວາພະເຈົ້າຂອງເຈົ້າຖືວ່າເຈົ້າເປັນຊາດທີ່ບໍລິສຸດ.
ຫ້າມຕົ້ມແບ້ນ້ອຍໃນນ້ຳນົມແມ່ຂອງມັນ.+
22 ໃນແຕ່ລະປີ ເຈົ້າຕ້ອງເອົາ 1 ສ່ວນ 10 ຂອງຜົນລະປູກທຸກຢ່າງຈາກໄຮ່ຈາກສວນຂອງເຈົ້າມາໃຫ້.+ 23 ເຈົ້າຈະກິນ 1 ສ່ວນ 10 ຈາກເຂົ້າ ເຫຼົ້າແວງໃໝ່ ນ້ຳມັນໝາກກອກ ແລະລູກສັດໂຕທຳອິດຈາກຝູງສັດຂອງເຈົ້າຕໍ່ໜ້າພະເຢໂຫວາພະເຈົ້າຂອງເຈົ້າໃນບ່ອນທີ່ເພິ່ນໄດ້ເລືອກໄວ້ສຳລັບຊື່ຂອງເພິ່ນ.+ ເມື່ອເຈົ້າເຮັດແນວນັ້ນ ເຈົ້າກໍຈະຮຽນຮູ້ທີ່ຈະຢ້ານຢຳພະເຢໂຫວາພະເຈົ້າຂອງເຈົ້າສະເໝີ.+
24 ແຕ່ຖ້າເຈົ້າຢູ່ໄກ ແລະບໍ່ສາມາດເອົາສັດກັບແນວກິນໄປໃນບ່ອນທີ່ພະເຢໂຫວາພະເຈົ້າຂອງເຈົ້າໄດ້ເລືອກໄວ້ສຳລັບຊື່ຂອງເພິ່ນ+ (ຍ້ອນພະເຢໂຫວາພະເຈົ້າຂອງເຈົ້າຈະອວຍພອນເຈົ້າ) 25 ເຈົ້າຈະເອົາສິ່ງເຫຼົ່ານັ້ນໄປຂາຍແລະຖືເງິນໄປແທນ ໃນບ່ອນທີ່ພະເຢໂຫວາພະເຈົ້າຂອງເຈົ້າໄດ້ເລືອກໄວ້ກໍໄດ້. 26 ເຈົ້າຈະໃຊ້ເງິນນັ້ນຊື້ແນວກິນຫຼືຊື້ໂຕສັດກໍໄດ້ ເຊັ່ນ: ງົວ ແກະ ແບ້ ເຫຼົ້າແວງກັບເຫຼົ້າອື່ນໆ ແລະອີ່ຫຍັງກໍໄດ້ທີ່ເຈົ້າຕ້ອງການ. ໃຫ້ເຈົ້າກິນສິ່ງເຫຼົ່ານັ້ນຕໍ່ໜ້າພະເຢໂຫວາພະເຈົ້າຂອງເຈົ້າຢ່າງມີຄວາມສຸກ ພ້ອມກັບຄົນໃນເຮືອນຂອງເຈົ້າ.+ 27 ຢ່າລືມເບິ່ງແຍງຄົນເລວີທີ່ຢູ່ໃນເມືອງຂອງເຈົ້າ+ ເພາະເຂົາເຈົ້າບໍ່ໄດ້ຮັບສ່ວນແບ່ງຫຼືດິນມູນຄືກັບເຈົ້າ.+
28 ທຸກໆ 3 ປີ ເຈົ້າຕ້ອງເອົາ 1 ສ່ວນ 10 ຂອງຜົນລະປູກຂອງເຈົ້າໃນປີນັ້ນມາໄວ້ໃນເມືອງຂອງເຈົ້າ+ 29 ແລ້ວຄົນເລວີທີ່ບໍ່ໄດ້ຮັບສ່ວນແບ່ງຫຼືດິນມູນຄືກັບເຈົ້າ ຄົນຕ່າງຊາດທີ່ຢູ່ນຳເຈົ້າ ລູກກຳພ້າພໍ່* ແລະແມ່ໝ້າຍທີ່ຢູ່ໃນເມືອງຂອງເຈົ້າຈະໄດ້ກິນຈົນອີ່ມ.+ ເມື່ອເຈົ້າເຮັດແນວນີ້ ພະເຢໂຫວາພະເຈົ້າຂອງເຈົ້າຈະອວຍພອນເຈົ້າໃນທຸກສິ່ງທີ່ເຈົ້າເຮັດ.”+