ເອເຊກຽນ
14 ພວກຜູ້ນຳບາງຄົນຂອງອິດສະຣາເອນມານັ່ງຢູ່ຕໍ່ໜ້າຂ້ອຍ.+ 2 ແລ້ວພະເຢໂຫວາກໍເວົ້າກັບຂ້ອຍວ່າ: 3 “ລູກມະນຸດ ພວກນີ້ຕັ້ງໃຈນະມັດສະການຮູບບູຊາທີ່ເປັນຕາຂີ້ດຽດ*ຂອງເຂົາເຈົ້າ ແລະເຂົາເຈົ້າເປັນຕົ້ນເຫດພາໃຫ້ປະຊາຊົນເຮັດຜິດ. ເຮົາຄວນຈະຕອບຄຳຖາມຂອງເຂົາເຈົ້າບໍ?+ 4 ໃຫ້ເຈົ້າບອກເຂົາເຈົ້າແບບນີ້ ‘ພະເຢໂຫວາພະເຈົ້າຜູ້ຍິ່ງໃຫຍ່ສູງສຸດເວົ້າວ່າ “ຖ້າຄົນອິດສະຣາເອນຄົນໜຶ່ງຕັ້ງໃຈນະມັດສະການຮູບບູຊາທີ່ເປັນຕາຂີ້ດຽດຂອງໂຕເອງ ແລະເປັນຕົ້ນເຫດພາໃຫ້ປະຊາຊົນເຮັດຜິດ ແລ້ວລາວມາຖາມເຮົາໂດຍທາງຜູ້ພະຍາກອນ ເຮົາເຢໂຫວາຈະຕອບລາວໃຫ້ສົມກັບທີ່ລາວມີຮູບບູຊາທີ່ເປັນຕາຂີ້ດຽດຫຼາຍໆນັ້ນ. 5 ເຮົາຈະເຮັດໃຫ້ພວກອິດສະຣາເອນຢ້ານ ຍ້ອນເຂົາເຈົ້າທຸກຄົນປະຖິ້ມເຮົາແລະໄປນະມັດສະການຮູບບູຊາທີ່ເປັນຕາຂີ້ດຽດຂອງເຂົາເຈົ້າ.”’+
6 ໃຫ້ເຈົ້າໄປບອກພວກອິດສະຣາເອນແບບນີ້ ‘ພະເຢໂຫວາພະເຈົ້າຜູ້ຍິ່ງໃຫຍ່ສູງສຸດເວົ້າວ່າ “ໃຫ້ກັບມາຫາເຮົາ. ໃຫ້ພວກເຈົ້າຖິ້ມຮູບບູຊາທີ່ເປັນຕາຂີ້ດຽດຂອງພວກເຈົ້າ ແລະເຊົາເຮັດທຸກສິ່ງທີ່ເປັນຕາຂີ້ດຽດ.+ 7 ຖ້າຄົນອິດສະຣາເອນຫຼືຄົນຕ່າງຊາດຜູ້ໃດຜູ້ໜຶ່ງທີ່ຢູ່ອິດສະຣາເອນປະຖິ້ມເຮົາ ແລະຕັ້ງໃຈນະມັດສະການຮູບບູຊາທີ່ເປັນຕາຂີ້ດຽດຂອງໂຕເອງ ແລະເປັນຕົ້ນເຫດພາໃຫ້ຄົນອື່ນເຮັດຜິດ ແລ້ວລາວມາຖາມເຮົາໂດຍທາງຜູ້ພະຍາກອນ+ ເຮົາເຢໂຫວາຈະເປັນຜູ້ຕອບລາວເອງ. 8 ເຮົາຈະເປັນສັດຕູກັບລາວ. ສິ່ງທີ່ເຮົາເຮັດກັບລາວຈະເປັນຕົວຢ່າງເຕືອນຄົນອື່ນ ແລະເຂົາເຈົ້າຈະເຍາະເຍີ້ຍລາວ. ເຮົາຈະກຳຈັດລາວອອກໄປຈາກປະຊາຊົນຂອງເຮົາ+ ແລ້ວພວກເຈົ້າຈະຮູ້ວ່າເຮົາແມ່ນເຢໂຫວາ.”’
9 ‘ແຕ່ຖ້າຕອນທີ່ຕອບລາວ ຜູ້ພະຍາກອນຄົນນັ້ນຖືກຕົວະ ເຮົາເຢໂຫວານິແຫຼະທີ່ຕົວະຜູ້ພະຍາກອນ.+ ແລ້ວເຮົາຈະລົງໂທດແລະກຳຈັດຜູ້ພະຍາກອນຄົນນັ້ນໄປຈາກພວກອິດສະຣາເອນປະຊາຊົນຂອງເຮົາ. 10 ເຂົາເຈົ້າຈະຕ້ອງຮັບຜົນໃນຄວາມຜິດທີ່ເຂົາເຈົ້າເຮັດ. ຄົນທີ່ມາຖາມແລະຜູ້ພະຍາກອນກໍຈະມີຄວາມຜິດຄືກັນ. 11 ແລ້ວພວກອິດສະຣາເອນຈະບໍ່ປະຖິ້ມເຮົາອີກ ແລະເຂົາເຈົ້າຈະເຊົາເຮັດສິ່ງທີ່ບໍ່ສະອາດທຸກຢ່າງທີ່ເຄີຍເຮັດ. ເຂົາເຈົ້າຈະເປັນປະຊາຊົນຂອງເຮົາ ແລະເຮົາຈະເປັນພະເຈົ້າຂອງເຂົາເຈົ້າ.’+ ພະເຢໂຫວາພະເຈົ້າຜູ້ຍິ່ງໃຫຍ່ສູງສຸດເວົ້າແບບນີ້.”
12 ພະເຢໂຫວາເວົ້າກັບຂ້ອຍອີກວ່າ: 13 “ລູກມະນຸດ ສົມມຸດວ່າປະຊາຊົນເຮັດຜິດໂດຍບໍ່ສັດຊື່ຕໍ່ເຮົາ ເຮົາຈະລົງໂທດເຂົາເຈົ້າແລະທຳລາຍບ່ອນມ້ຽນຂອງກິນ*ຂອງເຂົາເຈົ້າ.+ ເຮົາຈະເຮັດໃຫ້ເກີດຄວາມອຶດຢາກຢູ່ແຜ່ນດິນຂອງເຂົາເຈົ້າ+ ແລະເຮົາຈະທຳລາຍຄົນກັບສັດທີ່ຢູ່ຫັ້ນ.+ 14 ‘ເຖິງວ່າໂນອາ+ ດານີເອນ+ ແລະໂຢບ+ເຊິ່ງເປັນຄົນທີ່ເຮັດສິ່ງທີ່ຖືກຕ້ອງຈະຢູ່ແຜ່ນດິນນັ້ນ ທັງສາມຄົນກໍຈະຊ່ວຍໄດ້ແຕ່ຊີວິດຂອງໂຕເອງເທົ່ານັ້ນ.’+ ພະເຢໂຫວາພະເຈົ້າຜູ້ຍິ່ງໃຫຍ່ສູງສຸດເວົ້າແບບນີ້.”
15 “‘ຫຼືສົມມຸດວ່າເຮົາໃຫ້ມີສັດປ່າທີ່ດຸຮ້າຍເຂົ້າມາໃນແຜ່ນດິນແລະໃຫ້ພວກມັນຂ້າຄົນຕາຍບັກຫຼາຍໆຈົນແຜ່ນດິນຮ້າງເປົ່າ ແລະບໍ່ມີໃຜກາຍໄປກາຍມາຍ້ອນຢ້ານສັດປ່າເຫຼົ່ານັ້ນ+ 16 ເຮົາສາບານວ່າຕາບໃດທີ່ເຮົາຍັງມີຊີວິດຢູ່ ເຖິງວ່າທັງສາມຄົນຈະຢູ່ໃນແຜ່ນດິນ ເຂົາເຈົ້າກໍຈະຊ່ວຍໄດ້ແຕ່ໂຕເອງເທົ່ານັ້ນ ແຕ່ຈະຊ່ວຍລູກຊາຍຫຼືລູກສາວບໍ່ໄດ້. ແຜ່ນດິນນັ້ນຈະຮ້າງເປົ່າ.’ ພະເຢໂຫວາພະເຈົ້າຜູ້ຍິ່ງໃຫຍ່ສູງສຸດເວົ້າແບບນີ້.”
17 “‘ຫຼືສົມມຸດວ່າເຮົາຊີ້ດາບໄປໃສ່ແຜ່ນດິນນັ້ນ+ແລະບອກວ່າ: “ໃຫ້ດາບໄປທົ່ວແຜ່ນດິນ” ແລະເຮົາໄດ້ຂ້າທັງຄົນແລະສັດ+ 18 ເຮົາສາບານວ່າຕາບໃດທີ່ເຮົາຍັງມີຊີວິດຢູ່ ເຖິງວ່າທັງສາມຄົນຈະຢູ່ໃນແຜ່ນດິນ ເຂົາເຈົ້າກໍຈະຊ່ວຍໄດ້ແຕ່ໂຕເອງເທົ່ານັ້ນ ແຕ່ຈະຊ່ວຍລູກຊາຍຫຼືລູກສາວບໍ່ໄດ້.’ ເຮົາເຢໂຫວາພະເຈົ້າຜູ້ຍິ່ງໃຫຍ່ສູງສຸດເວົ້າແບບນີ້.”
19 “‘ຫຼືສົມມຸດວ່າເຮົາໃຫ້ມີໂລກລະບາດໃນແຜ່ນດິນນັ້ນ+ ແລະປ່ອຍຄວາມໃຈຮ້າຍຂອງເຮົາໃສ່ແຜ່ນດິນນັ້ນເພື່ອໃຫ້ຄົນແລະສັດຕາຍ 20 ເຮົາສາບານວ່າຕາບໃດທີ່ເຮົາຍັງມີຊີວິດຢູ່ ເຖິງວ່າໂນອາ+ ດານີເອນ+ ແລະໂຢບ+ເຊິ່ງເປັນຄົນທີ່ເຮັດສິ່ງທີ່ຖືກຕ້ອງຈະຢູ່ແຜ່ນດິນນັ້ນ ເຂົາເຈົ້າກໍຈະຊ່ວຍໄດ້ແຕ່ໂຕເອງເທົ່ານັ້ນ ແຕ່ຈະຊ່ວຍລູກຊາຍຫຼືລູກສາວບໍ່ໄດ້.’ ພະເຢໂຫວາພະເຈົ້າຜູ້ຍິ່ງໃຫຍ່ສູງສຸດເວົ້າແບບນີ້.”+
21 “ພະເຢໂຫວາພະເຈົ້າຜູ້ຍິ່ງໃຫຍ່ສູງສຸດເວົ້າວ່າ ‘ມັນຈະເປັນແບບນີ້ ເມື່ອເຮົາລົງໂທດເມືອງເຢຣູຊາເລັມໂດຍໃຊ້ດາບ ຄວາມອຶດຢາກ ສັດປ່າທີ່ດຸຮ້າຍ ແລະໂລກລະບາດ.+ ທັງສີ່ຢ່າງນີ້+ຈະເຮັດໃຫ້ຄົນແລະສັດໃນເມືອງນັ້ນຕາຍ.+ 22 ແຕ່ຈະມີບາງຄົນໃນເມືອງນັ້ນລອດ. ເຂົາເຈົ້າຈະຖືກພາອອກມາ+ພ້ອມກັບລູກຊາຍແລະລູກສາວ. ເຂົາເຈົ້າຈະມາຫາພວກເຈົ້າ ແລະເມື່ອພວກເຈົ້າເຫັນການກະທຳຂອງເຂົາເຈົ້າ ພວກເຈົ້າກໍຈະເຂົ້າໃຈເຫດຜົນທີ່ເຮົາເຮັດທຸກຢ່າງເພື່ອໃຫ້ເມືອງເຢຣູຊາເລັມຈິບຫາຍ.’”
23 “‘ພວກເຈົ້າຈະເຂົ້າໃຈເມື່ອພວກເຈົ້າເຫັນການກະທຳຂອງເຂົາເຈົ້າ ແລ້ວພວກເຈົ້າຈະຮູ້ວ່າເຮົາມີເຫດຜົນແທ້ໆທີ່ທຳລາຍເມືອງນັ້ນ.’+ ພະເຢໂຫວາພະເຈົ້າຜູ້ຍິ່ງໃຫຍ່ສູງສຸດເວົ້າແບບນີ້.”