ກະສັດສະບັບທີສອງ
8 ເອລີຊາບອກແມ່ຂອງເດັກນ້ອຍຜູ້ຊາຍທີ່ລາວເຄີຍປຸກໃຫ້ຄືນມາຈາກຕາຍວ່າ:+ “ໃຫ້ເຈົ້າກັບຄອບຄົວຍ້າຍໄປຢູ່ບ່ອນອື່ນທີ່ພວກເຈົ້າຈະຢູ່ໄດ້ ຍ້ອນພະເຢໂຫວາບອກວ່າຈະມີຄວາມອຶດຢາກ+ໃນແຜ່ນດິນນີ້ 7 ປີ.” 2 ຜູ້ຍິງຄົນນີ້ກໍເຮັດຕາມທີ່ເອລີຊາຄົນຂອງພະເຈົ້າທ່ຽງແທ້ບອກ. ລາວກັບຄອບຄົວໄປຢູ່ເຂດຂອງພວກຟີລິດສະຕີນ+ 7 ປີ.
3 ເມື່ອຮອດ 7 ປີແລ້ວ ຜູ້ຍິງຄົນນີ້ກໍກັບມາຈາກເຂດຂອງພວກຟີລິດສະຕີນ ແລ້ວລາວກໍໄປອ້ອນວອນຕໍ່ກະສັດເພື່ອຂໍເຮືອນກັບນາຄືນ. 4 ຕອນນັ້ນ ກະສັດກຳລັງຖາມເກຮາຊີທີ່ເປັນຄົນຮັບໃຊ້ຂອງເອລີຊາຄົນຂອງພະເຈົ້າທ່ຽງແທ້ວ່າ: “ເລົ່າໃຫ້ຂ້ອຍຟັງດຸ ເອລີຊາໄດ້ເຮັດການອັດສະຈັນຫຍັງແດ່?”+ 5 ຕອນທີ່ເກຮາຊີກຳລັງເລົ່າໃຫ້ກະສັດຟັງເລື່ອງທີ່ເອລີຊາປຸກຄົນໃຫ້ຄືນມາຈາກຕາຍ+ ຜູ້ຍິງທີ່ເອລີຊາປຸກລູກຊາຍຂອງລາວໃຫ້ຄືນມາຈາກຕາຍກໍເຂົ້າມາຫາກະສັດເພື່ອອ້ອນວອນຂໍເຮືອນກັບນາຄືນ.+ ເມື່ອເກຮາຊີເຫັນ ລາວກໍເວົ້າວ່າ: “ກະສັດຜູ້ເປັນນາຍຂອງຂ້ອຍ ຜູ້ຍິງຄົນນີ້ແຫຼະທີ່ຂ້ອຍກຳລັງເວົ້າເຖິງ ແລະນີ້ກໍແມ່ນລູກຊາຍຂອງລາວທີ່ເອລີຊາປຸກໃຫ້ຄືນມາຈາກຕາຍ.” 6 ກະສັດຈຶ່ງຖາມຜູ້ຍິງຄົນນັ້ນ ແລ້ວລາວກໍເລົ່າເລື່ອງທັງໝົດໃຫ້ກະສັດຟັງ. ກະສັດຈຶ່ງສັ່ງຂ້າລາຊະການຄົນໜຶ່ງວ່າ: “ເອົາທຸກສິ່ງທຸກຢ່າງສົ່ງຄືນໃຫ້ລາວ ແລະເອົາເງິນໃຫ້ລາວຕາມທີ່ລາວຄວນໄດ້ຮັບຈາກການຂາຍຜົນລະປູກໃນນາຂອງລາວຕັ້ງແຕ່ມື້ທີ່ລາວໄປຈົນຮອດຕອນນີ້.”
7 ເອລີຊາໄດ້ໄປເມືອງດາມາເຊ+ ຕອນນັ້ນເບັນຮາດັດ+ກະສັດຂອງຊີເຣຍບໍ່ສະບາຍແຮງ. ມີຄົນໄປບອກກະສັດວ່າ: “ຄົນຂອງພະເຈົ້າທ່ຽງແທ້+ມາເມືອງດາມາເຊ.” 8 ກະສັດຈຶ່ງບອກຮາຊາເອນ+ວ່າ: “ໃຫ້ເຈົ້າໄປຫາຄົນຂອງພະເຈົ້າທ່ຽງແທ້ ແລະເອົາຂອງຂວັນໄປພ້ອມ.+ ຂໍໃຫ້ລາວຖາມພະເຢໂຫວາວ່າ ‘ຂ້ອຍຈະເຊົາເຈັບປ່ວຍບໍ?’” 9 ຮາຊາເອນຈຶ່ງໄປຫາເອລີຊາແລະເອົາຂອງຂວັນທີ່ເປັນແນວດີໆທຸກຢ່າງທີ່ມີໃນເມືອງດາມາເຊໃສ່ຫຼັງອູດ 40 ໂຕໄປໃຫ້ລາວນຳ. ຮາຊາເອນມາຢືນຢູ່ຕໍ່ໜ້າເອລີຊາແລະເວົ້າວ່າ: “ເບັນຮາດັດກະສັດຊີເຣຍທີ່ເປັນລູກຊາຍຂອງທ່ານ*ໃຫ້ຂ້ອຍມາຖາມທ່ານວ່າລາວຈະເຊົາເຈັບປ່ວຍບໍ?” 10 ເອລີຊາຕອບວ່າ: “ໄປບອກກະສັດວ່າ ລາວຈະເຊົາເຈັບປ່ວຍແທ້. ແຕ່ພະເຢໂຫວາບອກໃຫ້ຂ້ອຍຮູ້ວ່າລາວຈະຕາຍແນ່ນອນ.”+ 11 ເອລີຊາເບິ່ງໜ້າຮາຊາເອນຈົນລາວຮູ້ສຶກຢູ່ຍາກ ແລ້ວເອລີຊາກໍໄຫ້. 12 ຮາຊາເອນຈຶ່ງຖາມວ່າ: “ທ່ານໄຫ້ເຮັດຫຍັງ?” ເອລີຊາຕອບວ່າ: “ຍ້ອນຂ້ອຍຮູ້ວ່າເຈົ້າຈະເຮັດຊົ່ວຕໍ່ພວກອິດສະຣາເອນ.+ ເຈົ້າຈະຈູດເມືອງຕ່າງໆຂອງເຂົາເຈົ້າທີ່ມີກຳແພງອ້ອມ. ເຈົ້າຈະເອົາດາບຂ້າທະຫານທີ່ເກັ່ງໆຂອງເຂົາເຈົ້າ. ເຈົ້າຈະຂ້າລູກຂອງເຂົາເຈົ້າຢ່າງໂຫດຫ້ຽມ ແລະຈະຜ່າທ້ອງຜູ້ຍິງທີ່ຖືພາ.”+ 13 ຮາຊາເອນບອກວ່າ: “ຂ້ອຍທີ່ເປັນຜູ້ຮັບໃຊ້ຂອງທ່ານເປັນພຽງໝາໂຕໜຶ່ງທີ່ບໍ່ມີຄວາມສຳຄັນຫຍັງ. ຂ້ອຍຈະເຮັດແບບນັ້ນໄດ້ແນວໃດ?” ແຕ່ເອລີຊາບອກວ່າ: “ພະເຢໂຫວາບອກໃຫ້ຂ້ອຍຮູ້ວ່າ ເຈົ້າຈະໄດ້ເປັນກະສັດປົກຄອງຊີເຣຍ.”+
14 ຫຼັງຈາກນັ້ນ ຮາຊາເອນກໍກັບໄປຫາເຈົ້ານາຍຂອງລາວ. ກະສັດຖາມລາວວ່າ: “ເອລີຊາບອກວ່າແນວໃດ?” ຮາຊາເອນຕອບວ່າ: “ລາວບອກຂ້ອຍວ່າທ່ານຈະເຊົາເຈັບປ່ວຍແທ້.”+ 15 ມື້ຕໍ່ມາ ຮາຊາເອນກໍເອົາຜ້າປູບ່ອນຈຸ່ມນ້ຳໄປປົກໜ້າກະສັດຈົນລາວຂາດໃຈຕາຍ.+ ແລ້ວຮາຊາເອນກໍເປັນກະສັດແທນ.+
16 ໃນປີທີ 5 ທີ່ເຢໂຮຣາມ+ລູກຊາຍຂອງອາຮາບເປັນກະສັດປົກຄອງອິດສະຣາເອນ ເຢໂຮຊາຟັດເປັນກະສັດປົກຄອງຢູດາ ແລະເຢໂຮຣາມ+ລູກຊາຍຂອງລາວກໍເປັນກະສັດປົກຄອງຢູດານຳກັນກັບພໍ່. 17 ເຢໂຮຣາມລູກຊາຍຂອງເຢໂຮຊາຟັດເປັນກະສັດຕອນອາຍຸ 32 ປີ ແລະລາວປົກຄອງຢູ່ເມືອງເຢຣູຊາເລັມ 8 ປີ. 18 ລາວເຮັດຊົ່ວຄືກັບຄອບຄົວຂອງອາຮາບ+ແລະກະສັດອົງອື່ນໆຂອງອິດສະຣາເອນ+ ຍ້ອນລາວແຕ່ງດອງກັບລູກສາວຂອງອາຮາບ.+ ລາວບໍ່ເຊົາເຮັດສິ່ງທີ່ພະເຢໂຫວາເບິ່ງວ່າຊົ່ວ.+ 19 ແຕ່ພະເຢໂຫວາບໍ່ຢາກທຳລາຍຢູດາ ຍ້ອນເຫັນແກ່ດາວິດຜູ້ຮັບໃຊ້ຂອງເພິ່ນ+ ເພາະເພິ່ນໄດ້ສັນຍາວ່າດາວິດກັບລູກຫຼານຂອງລາວຈະປົກຄອງ*ຕໍ່ໆໄປ.+
20 ໃນສະໄໝຂອງກະສັດເຢໂຮຣາມ ພວກເອໂດມໄດ້ກະບົດຕໍ່ຢູດາ+ແລະຕັ້ງກະສັດຂຶ້ນມາເອງ.+ 21 ເຢໂຮຣາມຈຶ່ງພາກອງທັບລົດມ້າທັງໝົດຂອງລາວຂ້າມໄປຊາອີ. ເມື່ອຂ້າມໄປແລ້ວ ພວກເອໂດມກໍມາລ້ອມເຢໂຮຣາມກັບພວກຫົວໜ້າກອງທັບລົດມ້າ. ເຢໂຮຣາມໄດ້ໂຈມຕີພວກນັ້ນໃນຕອນກາງຄືນແລະເອົາຊະນະເຂົາເຈົ້າໄດ້. ແລ້ວພວກທະຫານກໍໜີກັບເມືອເຮືອນຂອງໂຕເອງ. 22 ເອໂດມໄດ້ກະບົດຕໍ່ຢູດາຈົນຮອດທຸກມື້ນີ້ ແລະໃນຕອນນັ້ນເມືອງລິບນາ+ກໍກະບົດຕໍ່ຢູດາຄືກັນ.
23 ເລື່ອງຕ່າງໆຂອງເຢໂຮຣາມແລະທຸກສິ່ງທີ່ລາວເຮັດກໍຂຽນໄວ້ໃນປຶ້ມປະຫວັດຂອງພວກກະສັດຢູດາ. 24 ເມື່ອເຢໂຮຣາມຕາຍ ເຂົາເຈົ້າໄດ້ຝັງລາວໄວ້ກັບປູ່ຍ່າຕານາຍຂອງລາວຢູ່ເມືອງຂອງດາວິດ.+ ອາຮາຊີຢາ+ລູກຊາຍຂອງລາວກໍເປັນກະສັດແທນ.
25 ໃນປີທີ 12 ທີ່ເຢໂຮຣາມລູກຊາຍຂອງອາຮາບເປັນກະສັດປົກຄອງອິດສະຣາເອນ ອາຮາຊີຢາລູກຊາຍຂອງເຢໂຮຣາມກໍເປັນກະສັດປົກຄອງຢູດາ.+ 26 ອາຮາຊີຢາເປັນກະສັດຕອນອາຍຸ 22 ປີ ແລະລາວປົກຄອງຢູ່ເມືອງເຢຣູຊາເລັມ 1 ປີ. ແມ່ຂອງລາວຊື່ອາທາລີຢາ+ເປັນຫຼານສາວ*ຂອງອົມຣີ+ກະສັດອິດສະຣາເອນ. 27 ອາຮາຊີຢາບໍ່ເຊົາເຮັດສິ່ງທີ່ພະເຢໂຫວາເບິ່ງວ່າຊົ່ວ. ລາວເຮັດຊົ່ວຄືກັບຄອບຄົວຂອງອາຮາບ+ ຍ້ອນລາວເປັນພີ່ນ້ອງກັບຄອບຄົວຂອງອາຮາບ.+ 28 ອາຮາຊີຢາໄປກັບເຢໂຮຣາມລູກຊາຍຂອງອາຮາບເພື່ອເຮັດສົງຄາມກັບຮາຊາເອນກະສັດຂອງຊີເຣຍຢູ່ເມືອງຣາໂມດກິລຽດ.+ ແຕ່ເຢໂຮຣາມຖືກພວກຊີເຣຍຍິງທະນູໃສ່ຈົນບາດເຈັບ.+ 29 ກະສັດເຢໂຮຣາມຈຶ່ງກັບໄປເມືອງເຢດຊະເຣເອນ+ເພື່ອປົວບາດທີ່ຖືກພວກຊີເຣຍຍິງທະນູໃສ່ຕອນທີ່ຕໍ່ສູ້ກັບຮາຊາເອນກະສັດຂອງຊີເຣຍ+ຢູ່ເມືອງຣາມາ.* ອາຮາຊີຢາລູກຊາຍຂອງເຢໂຮຣາມກະສັດຂອງຢູດາຈຶ່ງໄປຢາມເຢໂຮຣາມລູກຊາຍຂອງອາຮາບຢູ່ເມືອງເຢດຊະເຣເອນ ຍ້ອນລາວບາດເຈັບ.