ຊາມູເອນສະບັບທີສອງ
17 ອາຮີໂທເຟັນເວົ້າກັບອັບຊາໂລມວ່າ: “ຂໍໃຫ້ຂ້ອຍເລືອກເອົາທະຫານ 12.000 ຄົນ ເພື່ອອອກໄປໄລ່ລ່າດາວິດໃນຄືນນີ້. 2 ຂ້ອຍຈະໂຈມຕີລາວຕອນທີ່ລາວກຳລັງເມື່ອຍ*ແລະໝົດແຮງ.+ ຂ້ອຍຈະເຮັດໃຫ້ລາວຢ້ານ ແລະທຸກຄົນທີ່ຢູ່ນຳລາວຈະໜີໄປ ແລະຂ້ອຍຈະຂ້າແຕ່ກະສັດເທົ່ານັ້ນ.+ 3 ແລ້ວຂ້ອຍຈະພາທຸກຄົນກັບມາຫາທ່ານ. ເຂົາເຈົ້າຈະກັບມາຢ່າງປອດໄພຫຼືບໍ່ກໍຂຶ້ນຢູ່ກັບວ່າ ເຮົາຂ້າຄົນທີ່ທ່ານໄລ່ລ່າໄດ້ຫຼືບໍ່. ແລ້ວທຸກຄົນຈະຢູ່ຢ່າງສະຫງົບສຸກ.” 4 ອັບຊາໂລມກັບພວກຜູ້ນຳຂອງອິດສະຣາເອນກໍເຫັນດີກັບຂໍ້ສະເໜີນີ້.
5 ແຕ່ອັບຊາໂລມເວົ້າວ່າ: “ໃຫ້ໄປເອີ້ນຮູຊາຍ+ຄົນອາຄີມາຖາມນຳ ເພື່ອຈະຮູ້ວ່າລາວຄິດແນວໃດໃນເລື່ອງນີ້.” 6 ແລ້ວຮູຊາຍກໍມາຫາອັບຊາໂລມ. ອັບຊາໂລມຖາມລາວວ່າ: “ອາຮີໂທເຟັນແນະນຳແບບນີ້. ເຮົາຄວນເຮັດຕາມທີ່ລາວບອກບໍ? ຖ້າເຈົ້າບໍ່ເຫັນດີກໍໃຫ້ບອກວ່າພວກເຮົາຄວນເຮັດແນວໃດ.” 7 ຮູຊາຍບອກອັບຊາໂລມວ່າ: “ຄຳແນະນຳຂອງອາຮີໂທເຟັນບໍ່ດີປານໃດໃນເວລານີ້!”+
8 ຮູຊາຍເວົ້າຕື່ມອີກວ່າ: “ທ່ານກໍຮູ້ວ່າພໍ່ຂອງທ່ານກັບຄົນຂອງລາວເກັ່ງຫຼາຍ.+ ເຂົາເຈົ້າກຳລັງໃຈຮ້າຍ*ຄືກັບແມ່ໝີທີ່ລູກເສຍຢູ່ທົ່ງຫຍ້າ.+ ພໍ່ຂອງທ່ານເປັນທະຫານທີ່ເກັ່ງຫຼາຍ.+ ລາວຈະບໍ່ນອນປົນຢູ່ກັບຄົນອື່ນດອກ. 9 ຕອນນີ້ ລາວກຳລັງລີ້ຢູ່ໃນຖ້ຳຫຼືຢູ່ບ່ອນໃດບ່ອນໜຶ່ງ.+ ຖ້າໃຫ້ລາວໂຈມຕີກ່ອນ ຄົນກໍຈະເວົ້າວ່າ: ‘ພວກຂອງອັບຊາໂລມບໍ່ຊະນະແລ້ວ!’ 10 ແມ່ນແຕ່ຄົນໃຈກ້າຄືສິງ+ກໍຍັງຢ້ານ ເພາະພວກອິດສະຣາເອນທຸກຄົນຮູ້ວ່າພໍ່ຂອງທ່ານເກັ່ງຫຼາຍ+ແລະຄົນທີ່ຢູ່ນຳລາວກໍກ້າຫານຫຼາຍ. 11 ຂ້ອຍຂໍແນະນຳແບບນີ້. ໃຫ້ທ່ານລວບລວມພວກອິດສະຣາເອນທັງໝົດ ຕັ້ງແຕ່ເມືອງດານຈົນຮອດເມືອງເບເອເຊບາ+ໃຫ້ໄດ້ຫຼາຍໆຄືກັບດິນຊາຍຢູ່ແຄມທະເລ+ ແລ້ວໃຫ້ທ່ານພາເຂົາເຈົ້າໄປຕໍ່ສູ້ກັບພໍ່ທ່ານ. 12 ພວກເຮົາຈະຕໍ່ສູ້ລາວບໍ່ວ່າຈະເຈິຢູ່ໃສ ແລະພວກເຮົາຈະໂຈມຕີລາວຄືກັບນ້ຳຄ້າງທີ່ຕົກລົງພື້ນ. ທັງດາວິດແລະຄົນຂອງລາວຈະບໍ່ມີໃຜລອດຊີວິດເລີຍ. 13 ຖ້າລາວໜີເຂົ້າໄປໃນເມືອງ ພວກອິດສະຣາເອນກໍຈະເອົາເຊືອກດຶງເມືອງນັ້ນລົງໄປໃນຮ່ອມພູ ແລະແມ່ນແຕ່ຫີນກ້ອນດຽວກໍຈະບໍ່ເຫຼືອ.”
14 ອັບຊາໂລມກັບພວກຜູ້ນຳຂອງອິດສະຣາເອນເວົ້າວ່າ: “ຄຳແນະນຳຂອງຮູຊາຍຄົນອາຄີດີກວ່າ+ຄຳແນະນຳຂອງອາຮີໂທເຟັນ!” ມັນເປັນແບບນີ້ກໍຍ້ອນພະເຢໂຫວາຕັ້ງໃຈໄວ້ແລ້ວວ່າຈະເຮັດໃຫ້ແຜນການດີໆຂອງອາຮີໂທເຟັນ+ບໍ່ເກີດຜົນ ເພື່ອພະເຢໂຫວາຈະທຳລາຍອັບຊາໂລມ.+
15 ຕໍ່ມາ ຮູຊາຍກໍໄປບອກຊາໂດກແລະອາບີອາທາ+ທີ່ເປັນປະໂລຫິດວ່າ: “ອາຮີໂທເຟັນແນະນຳອັບຊາໂລມແລະພວກຜູ້ນຳຂອງອິດສະຣາເອນແບບໜຶ່ງ ແຕ່ຂ້ອຍແນະນຳອີກແບບໜຶ່ງ. 16 ໃຫ້ພວກເຈົ້າຟ້າວສົ່ງຄົນໄປເຕືອນດາວິດວ່າ ‘ຄືນມື້ນີ້ ຢ່າຢູ່ທາງຂ້າມແມ່ນ້ຳຈໍແດນທີ່ຢູ່ບ່ອນກັນດານ ແຕ່ໃຫ້ຟ້າວຂ້າມໄປໂລດ. ຄັນບໍ່ຊັ້ນທັງກະສັດແລະທຸກຄົນທີ່ຢູ່ນຳທ່ານຈະຖືກຂ້າໝົດ.’”+
17 ຕອນນັ້ນ ໂຢນາທານ+ແລະອາຮີມາອາດ+ຢູ່ເອັນໂຣເກນ.+ ເຂົາເຈົ້າບໍ່ກ້າເຂົ້າໄປໃນເມືອງຍ້ອນຢ້ານຄົນເຫັນ. ສາວໃຊ້ຄົນໜຶ່ງຈຶ່ງໄປຫາເຂົາເຈົ້າແລະເລົ່າໃຫ້ຟັງວ່າເກີດຫຍັງຂຶ້ນ. ແລ້ວທັງສອງກໍໄປບອກກະສັດດາວິດ. 18 ມີຜູ້ຊາຍຄົນໜຶ່ງເຫັນໂຢນາທານກັບອາຮີມາອາດ ແລະລາວກໍໄປບອກອັບຊາໂລມ. ໂຢນາທານກັບອາຮີມາອາດຈຶ່ງຟ້າວໜີໄປເຮືອນຂອງຜູ້ຊາຍຄົນໜຶ່ງຢູ່ບາຮູຣີມ.+ ລາວມີນ້ຳສ້າງຢູ່ເດີ່ນບ້ານ. ສອງຄົນນີ້ຈຶ່ງລົງໄປລີ້ຢູ່ນ້ຳສ້າງ. 19 ເມຍຂອງຜູ້ຊາຍຄົນນັ້ນໄດ້ເອົາຜ້າປົກນ້ຳສ້າງໄວ້ແລະເອົາເຂົ້າເປືອກຢາຍໃສ່ຜ້ານັ້ນ ແລະບໍ່ມີໃຜຮູ້ເລື່ອງນີ້ເລີຍ. 20 ຄົນຂອງອັບຊາໂລມໄປເຮືອນຂອງຜູ້ຍິງຄົນນັ້ນແລະຖາມວ່າ: “ອາຮີມາອາດກັບໂຢນາທານຢູ່ໃສ?” ຜູ້ຍິງຄົນນັ້ນຕອບວ່າ: “ເຂົາເຈົ້າຂ້າມແມ່ນ້ຳໄປແລ້ວ.”+ ຄົນຂອງອັບຊາໂລມໄປຊອກຫາ 2 ຄົນນັ້ນແຕ່ກໍບໍ່ເຫັນ. ເຂົາເຈົ້າຈຶ່ງກັບເມືອເມືອງເຢຣູຊາເລັມ.
21 ຫຼັງຈາກຄົນຂອງອັບຊາໂລມໄປແລ້ວ ອາຮີມາອາດກັບໂຢນາທານກໍອອກມາຈາກນ້ຳສ້າງ ແລ້ວໄປບອກກະສັດດາວິດວ່າ: “ໃຫ້ຟ້າວຂ້າມແມ່ນ້ຳໄປໄວໆ ເພາະອາຮີໂທເຟັນແນະນຳພວກນັ້ນໃຫ້ມາໄລ່ລ່າທ່ານ.”+ 22 ດາວິດກັບທຸກຄົນທີ່ຢູ່ນຳລາວຈຶ່ງຟ້າວຂ້າມແມ່ນ້ຳຈໍແດນ. ທຸກຄົນຂ້າມແມ່ນ້ຳຈໍແດນກ່ອນຕາເວັນຂຶ້ນ.
23 ເມື່ອອາຮີໂທເຟັນເຫັນວ່າອັບຊາໂລມບໍ່ເຮັດຕາມຄຳແນະນຳຂອງລາວ ລາວຈຶ່ງເອົາອານໃສ່ຫຼັງລາແລ້ວຂີ່ກັບໄປບ້ານເກີດຂອງໂຕເອງ.+ ຫຼັງຈາກລາວຂຽນສັ່ງເລື່ອງຕ່າງໆໃນຄອບຄົວແລ້ວ+ ລາວກໍແຂວນຄໍຕາຍ.+ ລາວຖືກຝັງຢູ່ບ່ອນຝັງສົບຂອງຄອບຄົວ.
24 ຕອນນັ້ນ ດາວິດໄປຮອດເມືອງມາຮານາຢິມ+ ສ່ວນອັບຊາໂລມແລະພວກອິດສະຣາເອນທັງໝົດກໍຂ້າມແມ່ນ້ຳຈໍແດນໄປຄືກັນ. 25 ອັບຊາໂລມໃຫ້ອາມາສາ+ເປັນຫົວໜ້າກອງທັບແທນໂຢອາບ.+ ອາມາສາເປັນລູກຊາຍຂອງຢີດຣາກັບອາບີກາຍ.+ ອາບີກາຍເປັນລູກສາວຂອງນາຮາດແລະເປັນນ້ອງສາວຂອງເຊຣູຢາແມ່ຂອງໂຢອາບ. 26 ອັບຊາໂລມແລະພວກອິດສະຣາເອນຕັ້ງຄ້າຍຢູ່ກິລຽດ.+
27 ເມື່ອດາວິດໄປຮອດເມືອງມາຮານາຢິມ ໂຊບີລູກຊາຍຂອງນາຮາດຈາກເມືອງຣັບບາ+ໃນເຂດຂອງພວກອຳໂມນ ມາກີ+ລູກຊາຍຂອງອຳມີເອນຈາກເມືອງໂລເດບາ ແລະບາຊິລາຍ+ຄົນກິລຽດຈາກເມືອງໂຣເກລີມ 28 ໄດ້ເອົາບ່ອນຢູ່ບ່ອນນອນ ຊາມ ໝໍ້ດິນ ເຂົ້າວີດ* ເຂົ້າບາເລ ແປ້ງ ເຂົ້າຂົ້ວ ໝາກຖົ່ວປາກອ້າ ໝາກຖົ່ວເລັນທິວ ອາຫານແຫ້ງຊະນິດອື່ນໆ 29 ນ້ຳເຜີ້ງ ເນີຍ ແກະ ແລະຊີດສ໌*ມາໃຫ້. ເຂົາເຈົ້າເອົາເຄື່ອງທັງໝົດນີ້ມາໃຫ້ດາວິດກັບຄົນທີ່ຢູ່ນຳລາວກິນ.+ ເຂົາເຈົ້າລົມກັນຕອນຢູ່ບ່ອນກັນດານວ່າ: “ພວກນີ້ຄືຊິຫິວເຂົ້າຫິວນ້ຳແລະເມື່ອຍຫຼາຍ.”+