ພະບັນຍັດ
19 “ເມື່ອພະເຢໂຫວາພະເຈົ້າຂອງເຈົ້າທຳລາຍຊາດຕ່າງໆໃນແຜ່ນດິນທີ່ພະເຢໂຫວາພະເຈົ້າຈະເອົາໃຫ້ເຈົ້າ ແລ້ວເຈົ້າໄດ້ເຂົ້າໄປຍຶດແລະຢູ່ໃນບ້ານກັບເມືອງຕ່າງໆແລ້ວ+ 2 ໃຫ້ກັນເມືອງໄວ້ 3 ເມືອງ ໃນແຜ່ນດິນທີ່ພະເຢໂຫວາພະເຈົ້າຂອງເຈົ້າຈະເອົາໃຫ້ເຈົ້ານັ້ນ.+ 3 ເຈົ້າຕ້ອງແບ່ງເຂດໃນແຜ່ນດິນທີ່ພະເຢໂຫວາພະເຈົ້າຂອງເຈົ້າຈະເອົາໃຫ້ເຈົ້າເປັນ 3 ສ່ວນ ແລະແຕ່ລະສ່ວນຕ້ອງມີເມືອງລີ້ໄພເມືອງໜຶ່ງ. ໃຫ້ເຮັດຫົນທາງໄປເມືອງເຫຼົ່ານັ້ນ ເພື່ອຄົນທີ່ຂ້າຄົນໂດຍບໍ່ໄດ້ຕັ້ງໃຈຈະໜີໄປເມືອງໃດເມືອງໜຶ່ງໄດ້.
4 ຖ້າຜູ້ໃດຂ້າຄົນຕາຍ ແລະລາວບໍ່ຢາກຖືກຂ້າ ລາວຕ້ອງເຮັດແນວນີ້. ເມື່ອລາວເຮັດໃຫ້ຄົນອື່ນຕາຍໂດຍບໍ່ໄດ້ຕັ້ງໃຈ ແລະບໍ່ໄດ້ກຽດຊັງກັນມາກ່ອນ+ 5 ຍົກຕົວຢ່າງ: ເມື່ອລາວໄປຕັດຟືນຢູ່ໃນປ່າ ແລະລາວຍົກຂວານຊິຕັດໄມ້ ແຕ່ຫົວຂວານຫຼຸດຈາກດ້າມໄປຖືກຄົນອື່ນ ແລ້ວເຮັດໃຫ້ຄົນນັ້ນຕາຍ ລາວກໍຕ້ອງໜີໄປເມືອງລີ້ໄພເມືອງໃດເມືອງໜຶ່ງໃນ 3 ເມືອງນີ້.+ 6 ແຕ່ຖ້າລາວໜີໄປບໍ່ທັນຍ້ອນເມືອງເຫຼົ່ານັ້ນຢູ່ໄກໂພດ ຄົນທີ່ມີສິດແກ້ແຄ້ນ+ທີ່ກຳລັງໃຈຮ້າຍແຮງກໍຈະນຳລາວທັນແລະຂ້າລາວໄດ້. ລາວບໍ່ສົມຄວນຕາຍເພາະລາວບໍ່ໄດ້ກຽດຊັງຄົນທີ່ຕາຍນັ້ນ.+ 7 ຍ້ອນແນວນີ້ ຂ້ອຍຈຶ່ງສັ່ງເຈົ້າວ່າ ‘ໃຫ້ກັນເມືອງໄວ້ 3 ເມືອງ.’
8 ຖ້າພະເຢໂຫວາພະເຈົ້າຂອງເຈົ້າຂະຫຍາຍເຂດແດນຂອງເຈົ້າໃຫ້ກວ້າງອອກໄປຕາມທີ່ເພິ່ນໄດ້ສັນຍາກັບປູ່ຍ່າຕານາຍຂອງເຈົ້າ+ ແລະເພິ່ນໄດ້ເອົາແຜ່ນດິນທັງໝົດທີ່ເພິ່ນໄດ້ສັນຍາວ່າຈະເອົາໃຫ້ປູ່ຍ່າຕານາຍຂອງເຈົ້າໃຫ້ກັບເຈົ້າ+ 9 ຖ້າເຈົ້າສັດຊື່ແລະເຊື່ອຟັງກົດໝາຍທັງໝົດທີ່ຂ້ອຍກຳລັງບອກເຈົ້າໃນມື້ນີ້ ຄືໃຫ້ຮັກພະເຢໂຫວາພະເຈົ້າຂອງເຈົ້າ ແລະໃຊ້ຊີວິດຕາມແນວທາງຂອງເພິ່ນສະເໝີ+ ໃຫ້ພວກເຈົ້າກັນເມືອງໄວ້ຕື່ມອີກ 3 ເມືອງເປັນ 6 ເມືອງ.+ 10 ເມື່ອເຮັດແນວນີ້ ຄົນທີ່ບໍ່ມີຄວາມຜິດກໍຈະບໍ່ຖືກຂ້າ+ໃນແຜ່ນດິນທີ່ພະເຢໂຫວາພະເຈົ້າຂອງເຈົ້າໄດ້ເອົາໃຫ້ເຈົ້າເປັນມໍລະດົກ ແລະເຈົ້າຈະບໍ່ຖືກເອີ້ນວ່າເປັນຜູ້ຂ້າຄົນ.+
11 ຖ້າຜູ້ໃດກຽດຊັງຄົນໃດຄົນໜຶ່ງ+ ແລະໄດ້ໄປດັກຊຸ້ມທຳຮ້າຍລາວຈົນຕາຍ ແລ້ວກໍໜີໄປເມືອງລີ້ໄພເມືອງໃດເມືອງໜຶ່ງ 12 ພວກຜູ້ນຳທີ່ຢູ່ໃນເມືອງຂອງລາວຕ້ອງເອີ້ນລາວອອກຈາກເມືອງລີ້ໄພນັ້ນ ແລະສົ່ງລາວໃຫ້ຄົນທີ່ມີສິດແກ້ແຄ້ນ. ລາວຈະຕ້ອງຕາຍ.+ 13 ຢ່າອີ່ຕົນລາວ. ເຈົ້າຕ້ອງກຳຈັດຜູ້ທີ່ຂ້າຄົນທີ່ບໍ່ມີຄວາມຜິດອອກໄປຈາກອິດສະຣາເອນ+ ແລ້ວເຈົ້າຈະມີຊີວິດທີ່ດີ.
14 ເມື່ອເຈົ້າໄດ້ຮັບມໍລະດົກໃນແຜ່ນດິນທີ່ພະເຢໂຫວາພະເຈົ້າຂອງເຈົ້າຈະເອົາໃຫ້ແລ້ວ ຫ້າມເຈົ້າຍ້າຍຫຼັກແດນຂອງເພື່ອນບ້ານ+ທີ່ປູ່ຍ່າຕານາຍໄດ້ຝັງໄວ້.
15 ຖ້າມີພະຍານພຽງຄົນດຽວ ຈະບໍ່ສາມາດຕັດສິນຜູ້ໃດຜູ້ໜຶ່ງໃນຄວາມຜິດທີ່ລາວອາດຈະເຮັດ+ ແຕ່ຖ້າມີພະຍານ 2 ຫຼື 3 ຄົນຂຶ້ນໄປກໍຈະຢືນຢັນເລື່ອງນັ້ນໄດ້.+ 16 ຖ້າມີຄົນໜຶ່ງໃສ່ຮ້າຍຫຼືກ່າວຫາວ່າອີກຄົນໜຶ່ງເຮັດຜິດ+ 17 ທັງສອງຄົນທີ່ມີເລື່ອງຜິດຖຽງກັນນັ້ນຕ້ອງໄປຢູ່ຕໍ່ໜ້າພະເຢໂຫວາ ພວກປະໂລຫິດ ແລະພວກຜູ້ຕັດສິນທີ່ເຮັດວຽກໃນຕອນນັ້ນ.+ 18 ພວກຜູ້ຕັດສິນຕ້ອງຖາມເບິ່ງຢ່າງຄັກແນ່+ ແລະຖ້າຜູ້ທີ່ເປັນພະຍານໄດ້ເວົ້າຕົວະແລະໃສ່ຮ້າຍພີ່ນ້ອງຂອງລາວ 19 ເຈົ້າຕ້ອງເຮັດກັບລາວຄືກັບທີ່ລາວໄດ້ເຮັດຕໍ່ພີ່ນ້ອງຂອງລາວ.+ ເຈົ້າຕ້ອງກຳຈັດຄວາມຊົ່ວຮ້າຍໃຫ້ໝົດໄປຈາກພວກເຈົ້າ.+ 20 ເມື່ອຄົນອື່ນໄດ້ຍິນເລື່ອງນີ້ກໍຈະຢ້ານ ແລະຈະບໍ່ມີໃຜກ້າເຮັດຊົ່ວແນວນີ້ອີກ.+ 21 ຢ່າອີ່ຕົນລາວ.+ ຊີວິດຕ້ອງແທນຊີວິດ ຕາແທນຕາ ແຂ້ວແທນແຂ້ວ ມືແທນມື ແລະຕີນແທນຕີນ.”+