ບົດ 69
ປະເດັນທີ່ວ່າໃຜເປັນບິດາ
ລະຫວ່າງເທສະການນັ້ນ ການໂຕ້ຕອບລະຫວ່າງພະເຍຊູກັບຜູ້ນຳຊາວຢິວເພີ່ມຄວາມຮຸນແຮງຍິ່ງຂຶ້ນ. ພະເຍຊູຊີ້ບອກວ່າ “ເຮົາຮູ້ຈັກວ່າ ພວກທ່ານເປັນເຊື້ອສາຍຂອງທ່ານອັບລາຫາມ ແຕ່ວ່າພວກທ່ານຊອກຫາຈະໃຫ້ເຮົາຕາຍ ເຫດວ່າພະຄຳຂອງເຮົາບໍ່ມີປ່ອງເຂົ້າໃນທ່ານທັງຫຼາຍ. ເຮົາເວົ້າສິ່ງນັ້ນທີ່ເຮົາໄດ້ເຫັນນຳພະບິດາຂອງເຮົາ ພວກທ່ານດ້ວຍຈຶ່ງກະທຳສິ່ງທັງຫຼາຍທີ່ທ່ານໄດ້ຍິນແຕ່ພໍ່ຂອງທ່ານທັງຫຼາຍ.”
ເຖິງວ່າ ບໍ່ໄດ້ລະບຸວ່າໃຜເປັນບິດາຂອງເຂົາ ພະເຍຊູຊີ້ຊັດວ່າພໍ່ຂອງພວກເຂົາຕ່າງຈາກບິດາຂອງພະອົງ. ເນື່ອງຈາກເຂົາບໍ່ຮູ້ວ່າພະເຍຊູໝາຍເຖິງໃຜ ຜູ້ນຳຊາວຢິວຈຶ່ງຕອບວ່າ “ທ່ານອັບລາຫາມເປັນພໍ່ຂອງພວກເຮົາ.” ພວກເຂົາຄິດວ່າ ເຂົາມີຄວາມເຊື່ອເຊັ່ນດຽວກັບອັບລາຫາມເຊິ່ງເປັນສະຫາຍຂອງພະເຈົ້າ.
ຢ່າງໃດກໍຕາມ ຄຳຕອບຂອງພະເຍຊູເຮັດໃຫ້ເຂົາຕົກຕະລຶງ “ຖ້າພວກທ່ານເປັນລູກຂອງທ່ານອັບລາຫາມ ທ່ານຈະໄດ້ກະທຳການຂອງທ່ານອັບລາຫາມ.” ທີ່ຈິງ ລູກແທ້ຍ່ອມເຮັດຕາມແບບຢ່າງພໍ່ຂອງຕົນ. ພະເຍຊູກ່າວວ່າ “ດຽວນີ້ ພວກທ່ານຊອກຫາຈະໃຫ້ເຮົາຕາຍ ເຮົາຜູ້ໜຶ່ງທີ່ໄດ້ເວົ້າຄວາມຈິງແກ່ພວກທ່ານ ຄວາມຈິງນັ້ນ ເຮົາໄດ້ຍິນແຕ່ພະເຈົ້າ ທ່ານອັບລາຫາມບໍ່ໄດ້ກະທຳການນັ້ນ.” ສະນັ້ນ ພະເຍຊູກ່າວອີກວ່າ “ພວກທ່ານກະທຳການແຫ່ງພໍ່ຂອງທ່ານ.”
ເຖິງຢ່າງນັ້ນ ພວກເຂົາກໍຍັງບໍ່ເຂົ້າໃຈວ່າພະເຍຊູກ່າວເຖິງຜູ້ໃດ. ເຂົາຢືນຢັນວ່າພວກເຂົາເປັນລູກຂອງອັບລາຫາມຕາມກົດໝາຍ ໂດຍບອກວ່າ “ພວກເຮົາບໍ່ໄດ້ເກີດມາຈາກການຫຼິ້ນຊູ້.” (ປ.ມ.) ໂດຍການອ້າງວ່າເຂົາເປັນຜູ້ນະມັດສະການແທ້ຄືກັບອັບລາຫາມ ພວກເຂົາອ້າງສິດວ່າ “ເຮົາມີພໍ່ອົງດຽວ ເປັນພະເຈົ້າ.” (ປ.ມ.)
ຄັນຊັ້ນ ພະເຈົ້າເປັນບິດາຂອງເຂົາເຈົ້າແທ້ໆ ບໍ? ພະເຍຊູກ່າວຕອບວ່າ “ຖ້າພະເຈົ້າເປັນພະບິດາຂອງພວກທ່ານໆ ຈະຮັກເຮົາ ເຫດວ່າເຮົາອອກມາແຕ່ພະເຈົ້າ ແລະເຮົາມາຈາກພະເຈົ້າ ເພາະວ່າເຮົາບໍ່ໄດ້ມາແຕ່ລຳພັງຂອງເຮົາເອງ ແຕ່ວ່າເປັນພະເຈົ້າທີ່ໄດ້ໃຊ້ເຮົາມາ. ເຫດສັນໃດພວກທ່ານບໍ່ເຂົ້າໃຈຖ້ອຍຄຳຂອງເຮົາ”?
ພະເຍຊູໄດ້ພະຍາຍາມຊີ້ໃຫ້ພວກຜູ້ນຳທາງສາສະໜາເຫຼົ່ານີ້ເຫັນຜົນທີ່ເກີດຈາກການປະຕິເສດພະອົງ. ບັດນີ້ພະອົງກ່າວກົງໆ ວ່າ “ພະຍາມານເປັນພໍ່ຂອງພວກທ່ານ ແລະພວກທ່ານຢາກກະທຳຕາມຄວາມປາຖະໜາອັນຊົ່ວແຫ່ງພໍ່ຂອງທ່ານ.” ພະຍາມານເປັນພໍ່ແນວໃດ? ພະເຍຊູຊີ້ຕົວພະຍາມານວ່າເປັນຜູ້ຂ້າຄົນ ແລະກ່າວອີກວ່າ ມັນ “ເປັນຜູ້ຕົວະ ແລະເປັນພໍ່ແຫ່ງຄວາມຕົວະ.” ດັ່ງນັ້ນ ພະເຍຊູສະຫລຸບວ່າ “ຜູ້ທີ່ເປັນແຕ່ພະເຈົ້າ ກໍຟັງຄຳທັງຫຼາຍຂອງພະເຈົ້າ ເຫດສັນນີ້ພວກທ່ານບໍ່ຟັງເພາະພວກທ່ານບໍ່ເປັນແຕ່ພະເຈົ້າ.”
ຍ້ອນຄຳຕິຕຽນຂອງພະເຍຊູ ຊາວຢິວໄດ້ຄຽດຮ້າຍຫຼາຍຈຶ່ງຕອບວ່າ “ພວກເຮົາບໍ່ເວົ້າຖືກຫຼື ວ່າທ່ານເປັນຊາວສະມາລີ ແລະມີຜີຮ້າຍສິງຢູ່”? ການໃຊ້ຄຳ “ຊາວສະມາລີ” ສະແດງວ່າເປັນການດູຖູກດູແຄນຢຽດຫຍາມ ຊາວສະມາລີເປັນກຸ່ມຊົນທີ່ຄົນຢິວກຽດຊັງ.
ໂດຍການເບິ່ງຂ້າມການໃສ່ຮ້າຍດູໝິ່ນວ່າເປັນຊາວສະມາລີ ພະເຍຊູກ່າວວ່າ “ເຮົາບໍ່ມີຜີຮ້າຍສິງຢູ່ ແຕ່ວ່າເຮົານັບຖືພະບິດາຂອງເຮົາ ແລະພວກທ່ານໃຫ້ຄວາມປະໝາດມາຖືກເຮົາ.” ຫຼັງຈາກນັ້ນ ພະເຍຊູໃຫ້ຄຳສັນຍາທີ່ກໍ່ຄວາມສະດຸ້ງໃຈວ່າ “ຖ້າຜູ້ໜຶ່ງຜູ້ໃດຖືຮັກສາພະຄຳຂອງເຮົາ ຜູ້ນັ້ນຈະບໍ່ຫ່ອນເຫັນຄວາມຕາຍສັກເທື່ອ.” ແນ່ນອນ ພະເຍຊູບໍ່ໄດ້ໝາຍຄວາມວ່າທຸກຄົນທີ່ຕິດຕາມພະອົງຈະບໍ່ຕາຍ. ພະອົງໝາຍຄວາມວ່າເຂົາຈະບໍ່ຖືກທຳລາຍຕະຫຼອດໄປຫຼືພົບ “ຄວາມຕາຍທີສອງ” ເຊິ່ງຈະບໍ່ມີການຟື້ນຄືນຈາກຕາຍອີກເລີຍ.
ຊາວຢິວຊ້ຳພັດຖືຄຳກ່າວຂອງພະເຍຊູຕາມຕົວອັກສອນ. ດັ່ງນັ້ນເຂົາຈຶ່ງເວົ້າຂຶ້ນວ່າ “ດຽວນີ້ພວກເຮົາຮູ້ຈັກວ່າທ່ານມີຜີຮ້າຍສິງຢູ່. ທ່ານອັບລາຫາມໄດ້ຕາຍແລະພວກຜູ້ທຳນວາຍຕາຍດ້ວຍ ແລະທ່ານເວົ້າວ່າ ຖ້າຜູ້ໜຶ່ງຜູ້ໃດຖືຮັກສາພະຄຳຂອງເຮົາ ຜູ້ນັ້ນຈະບໍ່ຫ່ອນຊີມຄວາມຕາຍສັກເທື່ອ. ທ່ານໃຫຍ່ກວ່າຕາອັບລາຫາມທີ່ໄດ້ຕາຍຫຼື. ແລະພວກຜູ້ທຳນວາຍໄດ້ຕາຍ ທ່ານໄດ້ກະທຳໃຫ້ຕົວເປັນຜູ້ໃດ”?
ຈາກການໂຕ້ຕອບກັນເທື່ອນີ້ ເຫັນໄດ້ຊັດວ່າພະເຍຊູຊີ້ໃຫ້ເຂົາຮູ້ຄວາມຈິງທີ່ວ່າ ພະອົງເປັນເມຊີຕາມຄຳສັນຍາ. ຢ່າງໃດກໍຕາມ ແທນທີ່ຈະຕອບຄຳຖາມຂອງເຂົາກ່ຽວກັບລັກສະນະຂອງພະອົງໂດຍກົງ ພະເຍຊູກ່າວວ່າ “ຖ້າເຮົາໃຫ້ກຽດແກ່ຕົວເຮົາເອງ ກຽດຂອງເຮົາກໍບໍ່ມີຄວາມໝາຍ ພະອົງຜູ້ຊົງໃຫ້ກຽດແກ່ເຮົານັ້ນຄືພະບິດາຂອງເຮົາ ຜູ້ຊຶ່ງພວກທ່ານກ່າວວ່າຊົງເປັນພະເຈົ້າຂອງພວກທ່ານ. ພວກທ່ານຍັງບໍ່ຮູ້ຈັກພະອົງ ແຕ່ຝ່າຍເຮົາ ເຮົາຮູ້ຈັກພະອົງ ຖ້າເຮົາເວົ້າວ່າເຮົາບໍ່ຮູ້ຈັກພະອົງ ເຮົາກໍເປັນຄົນຕົວະເໝືອນພວກທ່ານ.” (ປ.ມ.)
ພະເຍຊູກ່າວຕໍ່ໄປໂດຍພາດພິງເຖິງອັບລາຫາມຜູ້ສັດຊື່ອີກວ່າ “ທ່ານອັບລາຫາມຕາຂອງພວກທ່ານກໍໄດ້ຕື່ນດ້ວຍຄວາມຍິນດີເພາະທ່ານຈະເຫັນວັນຂອງເຮົາ ແລະທ່ານໄດ້ເຫັນວັນນັ້ນແລະໄດ້ຊົມຊື່ນຍິນດີ.” ແມ່ນແລ້ວດ້ວຍຕາແຫ່ງຄວາມເຊື່ອ ອັບລາຫາມຄອຍຖ້າການປາກົດຕົວຂອງພະເມຊີຕາມຄຳສັນຍາ. ຊາວຢິວຕອບຢ່າງບໍ່ເຊື່ອວ່າ “ອາຍຸທ່ານບໍ່ທັນເຖິງຫ້າສິບປີ ແລະທ່ານໄດ້ເຫັນທ່ານອັບລາຫາມຫຼື”?
ພະເຍຊູຕອບວ່າ “ຈິງແທ້ໆ ເຮົາກ່າວແກ່ພວກທ່ານວ່າ ກ່ອນທ່ານອັບລາຫາມໄດ້ເກີດ ເຮົາກໍເປັນຢູ່ແລ້ວ.” ພະເຍຊູກ່າວເຖິງສະພາບພະອົງເປັນບຸກຄົນກາຍວິນຍານທີ່ມີລິດກ້າໃນສະຫວັນກ່ອນມາເກີດເປັນມະນຸດ.
ດ້ວຍຄວາມແຄ້ນເຄືອງຕໍ່ຄຳອ້າງທີ່ວ່າ ພະອົງມີຊີວິດກ່ອນອັບລາຫາມ ພວກຢິວຈຶ່ງຈັບກ້ອນຫີນຂຶ້ນກະວ່າຈະຄວ່າງໃສ່ພະອົງ ແຕ່ພະເຍຊູຫຼົບແລະອອກຈາກພະວິຫານໄປໂດຍບໍ່ໄດ້ຮັບການອັນຕະລາຍ. ໂຍຮັນ 8:37-59; ຄຳປາກົດ 3:14; 21:8.
▪ ພະເຍຊູຊີ້ໃຫ້ເຫັນວ່າ ບິດາຂອງພະອົງຕ່າງກັບພໍ່ຂອງຜູ້ຕໍ່ຕ້ານຢ່າງໃດ?
▪ ການທີ່ພວກຢິວເອີ້ນພະເຍຊູວ່າເປັນຊາວສະມາລີນັ້ນ ມີຈຸດມຸ່ງໝາຍຢ່າງໃດ?
▪ ພະເຍຊູກ່າວວ່າ ສາວົກຈະບໍ່ເຫັນຄວາມຕາຍນັ້ນໃນຄວາມໝາຍໃດ?