ບົດທີ 12

ພະເຍຊູສອນເຮົາໃຫ້ອະທິດຖານ

ລູກເວົ້າກັບພະເຈົ້າເຢໂຫວາບໍ?— ພະອົງຢາກໃຫ້ລູກເວົ້າກັບພະອົງ. ເມື່ອລູກເວົ້າກັບພະເຈົ້າ ນັ້ນແມ່ນການອະທິດຖານ. ພະເຍຊູມັກຈະເວົ້າກັບພໍ່ຂອງພະອົງໃນສະຫວັນເລື້ອຍໆ. ບາງເທື່ອພະອົງຢາກຢູ່ຄົນດຽວເມື່ອພະອົງເວົ້າກັບພະເຈົ້າ. ເທື່ອໜຶ່ງ ຄຳພີໄບເບິນກ່າວວ່າ “ພະອົງໄດ້ຂຶ້ນໄປເທິງພູເຂົາທີ່ຕ່າງຫາກເພື່ອຈະໄດ້ອ້ອນວອນ. ແລະເມື່ອຄ່ຳມາແລ້ວພະອົງຢູ່ທີ່ນັ້ນຜູ້ດຽວ.”—ມັດທາຍ 14:23.

ຢູ່ບ່ອນໃດທີ່ລູກຈະອະທິດຖານຄົນດຽວເຖິງພະເຢໂຫວາ?— ລູກອາດຈະເວົ້າຄົນດຽວກັບພະເຢໂຫວາກ່ອນເຂົ້ານອນຕອນກາງຄືນ. ພະເຍຊູກ່າວວ່າ “ເວລາທ່ານອ້ອນວອນຈົ່ງເຂົ້າໄປໃນສ້ວມຂອງທ່ານ ແລະຄັນອັດປະຕູແລ້ວຈົ່ງອ້ອນວອນພະບິດາຂອງທ່ານ.” (ມັດທາຍ 6:6) ລູກອະທິດຖານເຖິງພະເຢໂຫວາກ່ອນເຂົ້ານອນທຸກຄືນບໍ?— ລູກຄວນຈະເຮັດແບບນັ້ນ.

Jesus prays aloud at Lazarus’ tomb — ພະເຍຊູອະທິດຖານເມື່ອພະອົງຢູ່ຄົນດຽວ . . . ແລະເມື່ອພະອົງຢູ່ກັບຄົນອື່ນໆ

ຕອນທີ່ມີຄົນອື່ນຢູ່ກັບພະເຍຊູ ພະອົງກໍອະທິດຖານຄືກັນ. ເມື່ອລາຊະໂລເພື່ອນຂອງພະອົງຕາຍ ພະເຍຊູອະທິດຖານກັບຄົນອື່ນຢູ່ບ່ອນຝັງສົບຂອງລາຊະໂລ. (ໂຢຮັນ 11:41, 42) ແລະພະເຍຊູກໍຍັງອະທິດຖານເມື່ອພະອົງປະຊຸມກັບເຫຼົ່າສາວົກຂອງພະອົງ. ລູກໄປປະຊຸມຢູ່ບ່ອນທີ່ມີການອະທິດຖານບໍ?— ຢູ່ຫັ້ນ ຜູ້ທີ່ມີອາຍຸຫຼາຍກວ່າມັກຈະເປັນຜູ້ອະທິດຖານ. ໃຫ້ລູກຕັ້ງໃຈຟັງສິ່ງທີ່ລາວເວົ້າຢ່າງດີເພາະລາວກຳລັງເວົ້າກັບພະເຈົ້າເພື່ອລູກ. ຈາກນັ້ນລູກກໍຈະກ່າວຄຳວ່າ “ອາແມນ” ເມື່ອລາວອະທິດຖານຈົບ. ລູກຮູ້ບໍວ່າການກ່າວຄຳ “ອາແມນ” ໃນຕອນຈົບຄຳອະທິດຖານໝາຍຄວາມວ່າແນວໃດ?— ໝາຍຄວາມວ່າລູກມັກຄຳອະທິດຖານນັ້ນ. ລູກເຫັນດ້ວຍກັບຄຳອະທິດຖານນັ້ນແລະຢາກໃຫ້ຄຳອະທິດຖານຂອງລູກເປັນແບບນັ້ນຄືກັນ.

A family listens as a prayer is said at a meeting — ເປັນຫຍັງລູກຄວນຕັ້ງໃຈຟັງຄຳອະທິດຖານທີ່ກ່າວໃນທີ່ປະຊຸມ?

ພະເຍຊູຍັງອະທິດຖານຕອນກິນເຂົ້າ. ພະອົງຂອບໃຈພະເຢໂຫວາສຳລັບອາຫານ. ລູກອະທິດຖານເປັນປະຈຳກ່ອນລູກກິນເຂົ້າບໍ— ເປັນການດີທີ່ເຮົາຈະຂອບໃຈພະເຢໂຫວາກ່ອນຈະກິນອາຫານ. ເມື່ອມີຫຼາຍຄົນກິນເຂົ້າຮ່ວມກັນຈະໃຫ້ຄົນໜຶ່ງອະທິດຖານ. ແຕ່ຖ້າລູກກິນເຂົ້າຄົນດຽວເດ? ຫຼືຖ້າລູກກິນເຂົ້າກັບຄົນທີ່ບໍ່ຂອບໃຈພະເຢໂຫວາເດ?— ຕອນນັ້ນ ລູກຈະຕ້ອງອະທິດຖານເອງ.

ລູກຕ້ອງອະທິດຖານອອກສຽງດັງທຸກເທື່ອບໍ? ຫຼືພະເຢໂຫວາຈະໄດ້ຍິນບໍຖ້າລູກອະທິດຖານຢູ່ໃນໃຈ?— ເຮົາຈະໄດ້ຄຳຕອບຈາກສິ່ງທີ່ເກີດຂຶ້ນກັບເນເຫມີ. ລາວເປັນຜູ້ນະມັດສະການພະເຢໂຫວາທີ່ເຮັດວຽກໃນລາຊະວັງຂອງກະສັດອາເຣຕາເຊເຣເຊແຫ່ງປະເທດເປເຣເຊ. ມື້ໜຶ່ງເນເຫມີໂສກເສົ້າຫຼາຍເພາະລາວໄດ້ຍິນວ່າກຳແພງເມືອງເຢຣຶຊາເລມເຊິ່ງເປັນເມືອງສຳຄັນຂອງຊົນຊາດຂອງລາວໄດ້ພັງລົງ.

Nehemiah prays silently; a boy prays silently before eating lunch at school — ເມື່ອໃດລູກຈະອະທິດຖານໃນໃຈຄືກັບເນເຫມີ?

ເມື່ອກະສັດໄດ້ຖາມເນເຫມີວ່າເປັນຫຍັງລາວຈຶ່ງໂສກເສົ້າ ເນເຫມີໄດ້ອະທິດຖານໃນໃຈກ່ອນ. ຈາກນັ້ນເນເຫມີກໍເລົ່າສາເຫດທີ່ລາວໂສກເສົ້າໃຫ້ກະສັດຟັງແລະຂໍອະນຸຍາດກັບໄປສ້າງກຳແພງເມືອງເຢຣຶຊາເລມຂຶ້ນໃໝ່. ແລ້ວເກີດຫຍັງຂຶ້ນ?—

ແມ່ນແລ້ວ ພະເຈົ້າຕອບຄຳອະທິດຖານຂອງເນເຫມີ. ກະສັດອະນຸຍາດໃຫ້ລາວກັບໄປ! ກະສັດຍັງໃຫ້ໄມ້ຈຳນວນຫຼາຍເພື່ອເນເຫມີຈະໃຊ້ສ້າງກຳແພງເມືອງ. ດັ່ງນັ້ນ ພະເຈົ້າຕອບຄຳອະທິດຖານຂອງເຮົາແທ້ໆ ເຖິງແມ່ນວ່າຈະເປັນການອະທິດຖານໃນໃຈກໍຕາມ.—ເນເຫມີ 1:2, 3; 2:4-8.

ຕອນນີ້ລອງຄິດເຖິງເລື່ອງນີ້ເບິ່ງ. ຕອນທີ່ອະທິດຖານລູກຄວນຈະກົ້ມຫົວບໍ? ຫຼືວ່າຈະຄູ້ເຂົ່າລົງ? ລູກຄິດແນວໃດ?— ບາງເທື່ອພະເຍຊູຄູ້ເຂົ່າເມື່ອພະອົງອະທິດຖານ. ບາງເທື່ອພະອົງກໍຢືນ. ແລະບາງເທື່ອພະອົງກໍເງີຍໜ້າຂຶ້ນເມື່ອອະທິດຖານເຊັ່ນ ຕອນທີ່ພະອົງອະທິດຖານເພື່ອລາຊະໂລ.

ດັ່ງນັ້ນ ທ່າທາງເຫຼົ່ານີ້ສະແດງເຖິງສິ່ງໃດ?— ແມ່ນແລ້ວ ນີ້ສະແດງວ່າທ່າທາງທີ່ລູກອະທິດຖານບໍ່ແມ່ນເລື່ອງສຳຄັນ. ບາງເທື່ອຈຶ່ງເໝາະທີ່ຈະກົ້ມຫົວແລະຫຼັບຕາ. ແລ້ວບາງເທື່ອລູກອາດຈະຄູ້ເຂົ່າລົງເຮັດຄືກັບພະເຍຊູກໍໄດ້. ແຕ່ຈື່ໄວ້ວ່າ ເຮົາຈະອະທິດຖານເຖິງພະເຈົ້າໄດ້ທຸກເວລາ ບໍ່ວ່າຈະເປັນຕອນກາງເວັນຫຼືຕອນກາງຄືນ ພະອົງໄດ້ຍິນຄຳອະທິດຖານຂອງເຮົາສະເໝີ. ສິ່ງທີ່ສຳຄັນກ່ຽວກັບການອະທິດຖານແມ່ນ ເຮົາຕ້ອງເຊື່ອຢ່າງແທ້ຈິງວ່າພະເຢໂຫວາກຳລັງຟັງຢູ່. ລູກເຊື່ອບໍວ່າພະເຢໂຫວາໄດ້ຍິນຄຳອະທິດຖານຂອງລູກ?—

A boy kneels beside his bed and prays — ຕອນທີ່ລູກອະທິດຖານລູກຈະເວົ້າເລື່ອງຫຍັງແດ່ກັບພະເຈົ້າ?

ເຮົາຄວນຈະເວົ້າສິ່ງໃດໃນຄຳອະທິດຖານເຖິງພະເຢໂຫວາ?— ບອກພໍ່ (ແມ່) ເບິ່ງດູ ເມື່ອລູກອະທິດຖານ ລູກເວົ້າເລື່ອງໃດກັບພະເຈົ້າແດ່?— ພະເຢໂຫວາໃຫ້ສິ່ງດີໆຫຼາຍຢ່າງແກ່ເຮົາ ຈຶ່ງເໝາະສົມທີ່ຈະຂອບໃຈພະອົງສຳລັບສິ່ງເຫຼົ່ານັ້ນແມ່ນບໍ?— ເຮົາຂອບໃຈພະອົງສຳລັບອາຫານທີ່ເຮົາກິນ. ແຕ່ລູກຂອບໃຈພະອົງບໍທີ່ມີທ້ອງຟ້າສີຄາມ ຕົ້ນໄມ້ສີຂຽວແລະດອກໄມ້ທີ່ງາມ?— ພະອົງໄດ້ສ້າງສິ່ງເຫຼົ່ານັ້ນຄືກັນ.

ຄັ້ງໜຶ່ງ ເຫຼົ່າສາວົກຂອງພະເຍຊູຂໍໃຫ້ພະອົງສອນເຂົາເຈົ້າອະທິດຖານ. ດັ່ງນັ້ນ ຄູຜູ້ຍິ່ງໃຫຍ່ໄດ້ສອນເຂົາເຈົ້າ ພະອົງຊີ້ໃຫ້ເຂົາເຈົ້າເຫັນສິ່ງສຳຄັນທີ່ສຸດທີ່ຈະຂໍ. ລູກຮູ້ບໍວ່າແມ່ນຫຍັງ?— ເອົາຄຳພີໄບເບິນຂອງລູກອອກມາແລ້ວເປີດໄປທີ່ພະທຳມັດທາຍບົດ 6. ໃນຂໍ້ 9 ເຖິງຂໍ້ 13 ເຮົາຈະເຫັນຂໍ້ຄວາມທີ່ຫຼາຍຄົນເອີ້ນວ່າ ຄຳອະທິດຖານຂອງພະອົງເຈົ້າ. ລອງອ່ານນຳກັນເບິ່ງດູ.

ໃນນີ້ເຮົາຮຽນຮູ້ວ່າພະເຍຊູບອກເຮົາໃຫ້ອະທິດຖານກ່ຽວກັບຊື່ຂອງພະເຈົ້າ. ພະອົງບອກໃຫ້ອະທິດຖານຂໍໃຫ້ຊື່ຂອງພະເຈົ້າເປັນທີ່ນັບຖືອັນບໍລິສຸດ ຊື່ຂອງພະເຈົ້າແມ່ນຫຍັງ?— ແມ່ນແລ້ວ ຊື່ຂອງພະເຈົ້າແມ່ນເຢໂຫວາ ແລະເຮົາຄວນຮັກຊື່ນັ້ນ.

ປະການທີສອງ ພະເຍຊູສອນເຮົາອະທິດຖານຂໍໃຫ້ລາຊະອານາຈັກມາຕັ້ງຢູ່. ລາຊະອານາຈັກນີ້ສຳຄັນເພາະລາຊະອານາຈັກຈະນຳເອົາສັນຕິສຸກມາສູ່ແຜ່ນດິນໂລກ ແລະຈະເຮັດໃຫ້ແຜ່ນດິນໂລກເປັນອຸທິຍານ.

ປະການທີສາມ ຄູຜູ້ຍິ່ງໃຫຍ່ບອກໃຫ້ອະທິດຖານເພື່ອຈຸດປະສົງຂອງພະເຈົ້າຈະສຳເລັດເທິງແຜ່ນດິນໂລກດັ່ງທີ່ໄດ້ສຳເລັດແລ້ວໃນສະຫວັນ. ຖ້າເຮົາອະທິດຖານແບບນີ້ ເຮົາກໍຄວນເຮັດສິ່ງທີ່ພະເຈົ້າຕ້ອງການໃຫ້ເຮົາເຮັດ.

ຈາກນັ້ນ ພະເຍຊູສອນພວກເຮົາໃຫ້ອະທິດຖານເພື່ອຈະມີອາຫານທີ່ຈຳເປັນສຳລັບພວກເຮົາໃນແຕ່ລະມື້. ນອກຈາກນັ້ນ ພະອົງຍັງບອກວ່າ ພວກເຮົາຄວນບອກພະເຈົ້າວ່າເຮົາເສຍໃຈເມື່ອໄດ້ເຮັດຜິດ ແລະຂໍໃຫ້ພະເຈົ້າຍົກໂທດໃຫ້ພວກເຮົາ. ແຕ່ກ່ອນທີ່ພະອົງຈະຍົກໂທດໃຫ້ເຮົາ ເຮົາຕ້ອງຍົກໂທດໃຫ້ຄົນອື່ນຖ້າເຂົາເຈົ້າໄດ້ເຮັດຜິດຕໍ່ເຮົາ. ລູກຮູ້ສຶກວ່າເຮັດແບບນັ້ນງ່າຍບໍ?—

ປະການສຸດທ້າຍ ພະເຍຊູກ່າວວ່າພວກເຮົາຄວນອະທິດຖານເພື່ອໃຫ້ພະເຈົ້າເຢໂຫວາຈະຄຸ້ມຄອງພວກເຮົາໃຫ້ພົ້ນຈາກຊາຕານພະຍາມານເຊິ່ງເປັນຕົວຊົ່ວຮ້າຍ. ດັ່ງນັ້ນ ທັງໝົດນີ້ເປັນສິ່ງດີທີ່ຄວນຈະອະທິດຖານຕໍ່ພະເຈົ້າ.

ພວກເຮົາຄວນເຊື່ອວ່າພະເຢໂຫວາໄດ້ຍິນຄຳອະທິດຖານຂອງເຮົາ. ນອກຈາກຈະຂໍພະອົງໃຫ້ຊ່ອຍພວກເຮົາແລ້ວ ພວກເຮົາຄວນຈະຂອບໃຈພະອົງສະເໝີ. ພະອົງມີຄວາມສຸກເມື່ອພວກເຮົາອະທິດຖານດ້ວຍຄວາມຈິງໃຈ ແລະຂໍສິ່ງທີ່ຖືກຕ້ອງ. ແລະພະອົງຈະໃຫ້ສິ່ງເຫຼົ່ານັ້ນແກ່ເຮົາ. ລູກເຊື່ອຢ່າງນັ້ນບໍ?—

ມີຄຳແນະນຳດີໆເພີ່ມເຕີມກ່ຽວກັບເລື່ອງການອະທິດຖານເຊິ່ງຢູ່ໃນພະທຳໂລມ 12:12; 1 ເປໂຕ 3:12; ແລະ 1 ໂຢຮັນ 5:14.