ຜູ້ອ່ານຢາກຮູ້ . . .
ພະຍານພະເຢໂຫວາມີຜູ້ສອນທີ່ເປັນຜູ້ຍິງບໍ?
ມີ. ພະຍານພະເຢໂຫວາທົ່ວໂລກມີຜູ້ສອນທີ່ເປັນຜູ້ຍິງຫຼາຍລ້ານຄົນ. ເຂົາເຈົ້າເປັນກຳລັງສຳຄັນໃນການປະກາດຂ່າວດີເລື່ອງການປົກຄອງຂອງພະເຈົ້າ. ຄຳເພງ 68:11, ລ.ມ ພະຍາກອນກ່ຽວກັບຜູ້ສອນເຫຼົ່ານີ້ວ່າ: “ພະເຢໂຫວາໃຫ້ຄຳສັ່ງກັບປະຊາຊົນຂອງເພິ່ນ.ພວກຜູ້ຍິງທີ່ປະກາດຂ່າວດີເປັນກອງທັບໃຫຍ່.”
ແຕ່ຢ່າເຂົ້າໃຈຜິດວ່າວຽກການສອນຂອງພະຍານພະເຢໂຫວາທີ່ເປັນຜູ້ຍິງຈະຄືກັບວຽກການສອນຂອງນັກເທດຍິງໃນສາສະໜາອື່ນໆ. ວຽກຂອງພະຍານພະເຢໂຫວາຕ່າງຈາກນັ້ນຫຼາຍເລີຍ. ໃນທາງໃດແດ່?
ປະການທຳອິດ ຄົນທີ່ໄດ້ຮັບການສອນເປັນຄົນລະກຸ່ມ. ນັກເທດຍິງໃນຄລິດຕະຈັກເຮັດໜ້າທີ່ຜູ້ນຳໃນປະຊາຄົມແລະກຸ່ມຄົນທີ່ເຂົາເຈົ້າສອນເປັນຫຼັກແມ່ນສະມາຊິກໃນໂບດຂອງໂຕເອງ. ແຕ່ສຳລັບຜູ້ສອນຂອງພະຍານພະເຢໂຫວາທີ່ເປັນຜູ້ຍິງ ກຸ່ມຄົນທີ່ເຂົາເຈົ້າສອນເປັນຫຼັກແມ່ນຄົນນອກປະຊາຄົມ ຫຼືຄົນທົ່ວໄປທີ່ເຂົາເຈົ້າພົບເມື່ອເຮັດວຽກປະກາດຕາມບ້ານແລະໃນບ່ອນອື່ນໆ.
ປະການທີສອງ ຜູ້ສອນຂອງພະຍານພະເຢໂຫວາທີ່ເປັນຜູ້ຍິງມີບົດບາດໜ້າທີ່ໃນປະຊາຄົມຕ່າງຈາກນັກເທດຍິງສາສະໜາອື່ນໆ. ນັກເທດຍິງໃນຄລິດຕະຈັກຈະເປັນຜູ້ປົກຄອງແລະສອນຫຼັກຄຳສອນຕ່າງໆໃຫ້ກັບສະມາຊິກໃນໂບດຂອງໂຕເອງ. ແຕ່ຜູ້ສອນຂອງພະຍານພະເຢໂຫວາທີ່ເປັນຜູ້ຍິງຈະບໍ່ສອນໃນປະຊາຄົມຖ້າມີຜູ້ຊາຍທີ່ຮັບບັບເຕມາແລ້ວຢູ່ນຳ. ສະເພາະຜູ້ຊາຍທີ່ໄດ້ຮັບການແຕ່ງຕັ້ງເທົ່ານັ້ນທີ່ຈະເປັນຜູ້ສອນໃນປະຊາຄົມໄດ້.—1 ຕີໂມທຽວ 3:2; ຢາໂກໂບ 3:1
ຄຳພີໄບເບິນອະທິບາຍວ່າຜູ້ທີ່ປົກຄອງຫຼືເບິ່ງແຍງປະຊາຄົມຕ້ອງເປັນຜູ້ຊາຍເທົ່ານັ້ນ. ຂໍສັງເກດຕົວຢ່າງທີ່ອັກຄະສາວົກໂປໂລວາງໄວ້ເມື່ອຂຽນຈົດໝາຍໄປເຖິງຕີໂຕທີ່ເປັນຜູ້ດູແລຄືກັນ. ໂປໂລຂຽນວ່າ: “ຕອນທີ່ຂ້ອຍອອກຈາກເກາະກະເຣເຕ ຂ້ອຍໃຫ້ເຈົ້າຢູ່ທີ່ນັ້ນຕໍ່ໄປເພື່ອ...ໃຫ້ແຕ່ງຕັ້ງພວກຜູ້ດູແລໄວ້ໃນເມືອງຕ່າງໆ.” ໂປໂລຍັງເວົ້າອີກວ່າຜູ້ຊາຍທຸກຄົນທີ່ໄດ້ຮັບການແຕ່ງຕັ້ງຈະຕ້ອງ “ບໍ່ມີບ່ອນຕິ ມີເມຍຄົນດຽວ.” (ຕີໂຕ 1:5, 6) ເມື່ອໂປໂລຂຽນຈົດໝາຍເຖິງຕີໂມທຽວ ລາວໄດ້ໃຫ້ຄຳແນະນຳຄ້າຍໆກັນທີ່ວ່າ: “ຖ້າຜູ້ຊາຍຄົນໃດພະຍາຍາມທີ່ຈະໄດ້ເປັນຜູ້ດູແລກໍສະແດງວ່າລາວຢາກເຮັດວຽກທີ່ດີ. ຜູ້ດູແລຕ້ອງເປັນຄົນບໍ່ມີບ່ອນຕິ ມີເມຍຄົນດຽວ...ມີຄວາມສາມາດທີ່ຈະສອນ.”—1 ຕີໂມທຽວ 3:1, 2
ເປັນຫຍັງສະເພາະຜູ້ຊາຍເທົ່ານັ້ນທີ່ໄດ້ຮັບການແຕ່ງຕັ້ງເປັນຜູ້ດູແລໃນປະຊາຄົມ? ໂປໂລອະທິບາຍວ່າ: “ຂ້ອຍບໍ່ອະນຸຍາດໃຫ້ຜູ້ຍິງສອນຫຼືໃຊ້ອຳນາດເໜືອຜູ້ຊາຍ ແຕ່ໃຫ້ຢູ່ງຽບໆ. ເພາະພະເຈົ້າສ້າງອາດາມກ່ອນເອວາ.” (1 ຕີໂມທຽວ 2:12, 13) ການທີ່ພະເຈົ້າໄດ້ສ້າງຜູ້ຊາຍກ່ອນຜູ້ຍິງສະແດງໃຫ້ເຫັນວ່າເພິ່ນຢາກໃຫ້ຜູ້ຊາຍເຮັດໜ້າທີ່ສອນແລະປົກຄອງເບິ່ງແຍງ.
ຜູ້ສອນຂອງພະເຢໂຫວາເຮັດຕາມຕົວຢ່າງຂອງພະຄລິດຜູ້ນຳຂອງເຂົາເຈົ້າ. ລູກາຂຽນກ່ຽວກັບວຽກຮັບໃຊ້ຂອງພະເຢຊູວ່າ: ‘ພະເຢຊູເດີນທາງໄປຕາມເມືອງແລະຕາມບ້ານເພື່ອປະກາດຂ່າວເລື່ອງການປົກຄອງຂອງພະເຈົ້າ.’ ຕໍ່ມາພະເຢຊູກໍໄດ້ສົ່ງລູກສິດຂອງເພິ່ນອອກໄປເຮັດວຽກແບບດຽວກັນ: “ພວກເຂົາຈຶ່ງໄປຕາມບ້ານທົ່ວຂົງເຂດນັ້ນເພື່ອປະກາດຂ່າວດີ.”—ລູກາ 8:1; 9:2-6
ປັດຈຸບັນ ຜູ້ສອນຂອງພະເຢໂຫວາທັງຊາຍແລະຍິງມີສ່ວນຮ່ວມຢ່າງເຕັມທີເພື່ອໃຫ້ວຽກປະກາດສຳເລັດຄືກັບທີ່ພະເຢຊູພະຍາກອນໄວ້ວ່າ: “ຈະມີການປະກາດຂ່າວດີເລື່ອງການປົກຄອງຂອງພະເຈົ້າໄປທົ່ວໂລກ ເພື່ອໃຫ້ຄົນທຸກຊາດມີໂອກາດໄດ້ຍິນ ແລ້ວຈຸດຈົບກໍຈະມາເຖິງ.”—ມັດທາຍ 24:14