ຊີວິດຄລິດສະຕຽນ
ພົບຄວາມສຸກໃນການປະກາດຂ່າວດີ
ເຈົ້າເຄີຍພົບຄວາມຫຍຸ້ງຍາກໃນການປະກາດບໍ? ຫຼາຍຄົນຈະຕອບວ່າແມ່ນ. ແລະຍ້ອນຫຍັງ? ບາງເທື່ອເຈົ້າຂອງເຮືອນບໍ່ຕອບຮັບ ຫຼືເຮົາຢ້ານທີ່ຈະເວົ້າກັບຄົນແປກໜ້າ. ສິ່ງເຫຼົ່ານີ້ອາດເຮັດໃຫ້ເຮົາສູນເສຍຄວາມຍິນດີ. ແນວໃດກໍຕາມ ເຮົານະມັດສະການພະເຈົ້າແຫ່ງຄວາມສຸກ ຜູ້ທີ່ຢາກໃຫ້ເຮົາຮັບໃຊ້ພະອົງດ້ວຍຄວາມຍິນດີ. (ເພງ. 100:2; 1 ຕິໂມ. 1:11) ມີສາມເຫດຜົນຫຍັງແດ່ທີ່ເຮັດໃຫ້ເຮົາມີຄວາມສຸກໃນການປະກາດ?
ໜຶ່ງ ເຮົາປະກາດຂ່າວດີແຫ່ງຄວາມຫວັງ. ເຖິງແມ່ນວ່າຄວາມຫວັງນັ້ນໄດ້ຫຼຸດລົງໃນທຸກມື້ນີ້ ແຕ່ພວກເຮົາສາມາດຊ່ວຍຜູ້ຄົນໃຫ້ເຂົ້າໃຈ “ຂ່າວທີ່ດີກວ່າ.” (ເອຊາ. 52:7, ລ.ມ.) ຂ່າວດີເລື່ອງການປົກຄອງຂອງພະເຈົ້າໃຫ້ຄວາມຍິນດີແກ່ເຮົາ. ກ່ອນໄປປະກາດ ຂໍໃຫ້ຄິດເຖິງພະພອນທີ່ການປົກຄອງຂອງພະເຈົ້າຈະເຮັດເທິງແຜ່ນດິນໂລກ.
ສອງ ຂ່າວດີທີ່ເຮົາປະກາດເປັນປະໂຫຍດຕໍ່ຜູ້ຄົນທັງທາງຮ່າງກາຍ ແລະຈິດໃຈ. ພວກເຂົາຮຽນຮູ້ທີ່ຈະປະຖິ້ມນິດໄສທີ່ບໍ່ດີ ແລະມີຄວາມຫວັງທີ່ຈະໄດ້ຊີວິດຕະຫຼອດໄປ. (ເອຊາ. 48:17, 18; ໂລມ 1:16) ສົມມຸດວ່າພວກເຮົາເປັນໜ່ວຍກູ້ໄພທີ່ຊອກຫາ ແລະຊ່ວຍຊີວິດຜູ້ຄົນ. ບາງຄົນອາດບໍ່ຍອມຮັບການຊ່ວຍເຫຼືອ ແຕ່ພວກເຮົາກໍຍັງເຮັດວຽກນັ້ນຕໍ່ໆໄປ.—ມັດ. 10:11-14.
ສາມ ສຳຄັນທີ່ສຸດ ການປະກາດຂອງເຮົາແມ່ນເຮັດໃຫ້ພະເຢໂຫວາໄດ້ຮັບກຽດ. ພະອົງຮູ້ຄຸນຄ່າຫຼາຍຕໍ່ວຽກຂອງເຮົາ. (ເອຊາ. 43:10; ເຫບ. 6:10) ນອກຈາກນັ້ນພະອົງມີຄວາມເອື້ອເຟື້ອ ທີ່ຈະໃຫ້ພະລັງບໍລິສຸດເພື່ອຊ່ວຍເຮົາໃຫ້ເຮັດວຽກນີ້ສຳເລັດ. ດັ່ງນັ້ນ ຈົ່ງຂໍຄວາມຍິນດີ ເຊິ່ງເປັນໝາກຂອງພະລັງບໍລິສຸດ. (ຄລາ. 5:22) ຈາກການຊ່ວຍເຫຼືອຂອງພະອົງເຮົາຈະເອົາຊະນະຄວາມກັງວົນ ແລະປະກາດດ້ວຍຄວາມກ້າຫານໄດ້. (ກິດ. 4:31) ເຖິງວ່າມີຜູ້ຄົນບໍ່ຕອບຮັບ ພວກເຮົາກໍຈະມີຄວາມສຸກໃນການປະກາດຂ່າວດີ.—ເອເຊກ. 3:3.
ທັດສະນະແບບໃດທີ່ເຈົ້າຢາກມີໃນວຽກປະກາດ?
ເບິ່ງວິດີໂອ ກັບມາມີຄວາມສຸກກັບການສຶກສາແລະການໄຄ່ຄວນອີກຄັ້ງ ແລະຕອບຄຳຖາມລຸ່ມນີ້:
ເຖິງແມ່ນວ່າເຮົາຈະໃຊ້ເວລາຫຼາຍໃນການປະກາດແຕ່ລະເດືອນ ເປັນຫຍັງພວກເຮົາຈຶ່ງຕ້ອງສຶກສາສ່ວນຕົວຢ່າງສະໝ່ຳສະເໝີ?
ເຮົາຈະຮຽນແບບຕົວຢ່າງຂອງແມຣີ້ແນວໃດ?
ເຈົ້າຈະຈັດເວລາສຳລັບຄິດຕຶກຕອງພະຄຳຂອງພະເຈົ້າເມື່ອໃດ?
ເມື່ອເຈົ້າປະກາດຂ່າວດີ ອັນໃດເຮັດໃຫ້ເຈົ້າມີຄວາມສຸກ?