ບົດ 43
ການສອນດ້ວຍຄຳອຸປະມາ
ເບິ່ງຄືວ່າພະເຍຊູຢູ່ໃນເມືອງກັບເອນາອູມເມື່ອພະອົງຕຳໜິພວກຟາລິຊຽນ. ຫຼັງຈາກນັ້ນໃນມື້ດຽວກັນ ພະອົງເດີນທາງອອກຈາກເຮືອນແລະຍ່າງໄປຮອດທະເລຄາລິເລທີ່ຢູ່ໃກ້ໆ ບ່ອນນັ້ນມີປະຊາຊົນຫຼາຍຄົນມາໂຮມກັນ. ພະອົງໄດ້ລົງເຮືອແລະຍະອອກຈາກຕາຝັ່ງໄປໜ້ອຍໜຶ່ງ ແລ້ວເລີ່ມສັ່ງສອນປະຊາຊົນຢູ່ຕາຝັ່ງກ່ຽວກັບລາຊະອານາຈັກຝ່າຍສະຫວັນ. ພະອົງເຮັດເຊັ່ນນັ້ນໂດຍໃຊ້ຄຳອຸປະມາຫຼືອຸທາຫອນເປັນແຕ່ລະເລື່ອງໄປ ທຸກເລື່ອງມີສາກເຫດການທີ່ຜູ້ຟັງລຶ້ງເຄີຍດີ.
ກ່ອນອື່ນ ພະເຍຊູກ່າວເຖິງຜູ້ຫວ່ານເມັດພືດ. ລາງເມັດຕົກໃສ່ແຄມທາງ ແລະນົກໄດ້ມາຈິກກິນ. ລາງເມັດຕົກລົງດິນຕື້ນໆ ເທິງພື້ນຫີນ. ເນື່ອງຈາກຮາກຢັ່ງລົງບໍ່ເລິກ ຕົ້ນອ່ອນກໍຫ່ຽວແຫ້ງໄປເມື່ອຖືກແດດຮ້ອນ. ສ່ວນເມັດພືດອື່ນໆ ຕົກກາງກົກໜາມ ເຊິ່ງຕົ້ນພືດງອກຂຶ້ນບໍ່ໄດ້. ໃນທີ່ສຸດ ລາງເມັດໄດ້ຕົກໃສ່ດິນດີ ແລ້ວເກີດໝາກຮ້ອຍທໍ່ແດ່ ຫົກສິບທໍ່ແດ່ ແລະສາມສິບທໍ່ແດ່.
ໃນຄຳອຸປະມາອີກເລື່ອງໜຶ່ງ ພະເຍຊູປຽບລາຊະອານາຈັກຂອງພະເຈົ້າຄືກັບຊາຍຄົນໜຶ່ງທີ່ຫວ່ານເມັດພືດ. ຫຼັງຈາກເວລາຜ່ານໄປ ບໍ່ວ່າຊາຍນັ້ນນອນຫຼັບຫຼືຕື່ນຂຶ້ນ ເມັດພືດກໍງອກຂຶ້ນ. ຊາຍຄົນນັ້ນບໍ່ຮູ້ວ່າພືດນັ້ນງອກຂຶ້ນມາໄດ້ແນວໃດ. ມັນໃຫຍ່ຂຶ້ນມາເອງແລະມີເມັດ. ເມື່ອເມັດເຂົ້າສຸກດີແລ້ວ ຊາຍນັ້ນກໍເກັບກ່ຽວ.
ພະເຍຊູຍົກອຸປະມາເລື່ອງທີສາມມາກ່າວເຖິງຊາຍທີ່ຫວ່ານເມັດພືດດີ ແຕ່ “ເມື່ອຄົນທັງຫຼາຍພວມນອນຫຼັບຢູ່” ສັດຕູໄດ້ມາຫວ່ານເຂົ້ານົກໃສ່ທ່າມກາງເຂົ້າດີ. ຄົນໃຊ້ໄດ້ຖາມຊາຍນັ້ນວ່າ ຈະໃຫ້ລາວຫຼົກເຂົ້ານົກອອກຫຼືບໍ່. ຊາຍຄົນນັ້ນຕອບວ່າ “ຢ່າຊູໄປ ຢ້ານວ່າພວມເກັບເຂົ້ານົກນັ້ນ ຫມູ່ເຈົ້າຈະຫຼົກເຂົ້າດີດ້ວຍ. ຈົ່ງໃຫ້ທັງສອງໃຫຍ່ຂຶ້ນມາດ້ວຍກັນ ຈົນເຖິງລະດູກ່ຽວເຂົ້າ ແລະໃນເວລາລະດູກ່ຽວເຂົ້ານັ້ນ ເຮົາຈະບອກພວກກ່ຽວວ່າ ຈົ່ງກ່ຽວເຂົ້ານົກກ່ອນ ແລະມັດເປັນຟ່ອນເພື່ອຈະໄດ້ຈູດເສຍ ແຕ່ວ່າເຂົ້າເມັດດີນັ້ນ ຈົ່ງໂຮມໄວ້ໃສ່ໃນເລົ້າເຂົ້າຂອງເຮົາເທີ້ນ.”
ໂດຍສືບຕໍ່ການບັນຍາຍຕໍ່ຝູງຊົນຢູ່ເທິງຕາຝັ່ງ ພະເຍຊູໃຫ້ຄຳອຸປະມາອີກສອງເລື່ອງ. ພະອົງຊີ້ແຈງວ່າ “ແຜ່ນດິນສະຫວັນ [ລາຊະອານາຈັກສະຫວັນ]” ປຽບເໝືອນດັ່ງເມັດພືດມັດສະຕາດເມັດໜຶ່ງທີ່ຄົນປູກໄວ້. ເຖິງວ່າເມັດມັນຈະນ້ອຍທີ່ສຸດໃນບັນດາເມັດພືດທັງໝົດກໍຕາມ ເມື່ອງອກຂຶ້ນແລ້ວມັນຊ້ຳພັດໃຫຍ່ກວ່າພືດຜັກອື່ນໆ. ມັນກາຍເປັນຕົ້ນໄມ້ທີ່ນົກມາພັກພິງຕາມກິ່ງງ່າໄດ້.
ບາງຄົນໃນປັດຈຸບັນນີ້ຄັດຄ້ານວ່າ ຍັງມີເມັດພືດທີ່ນ້ອຍກວ່າເມັດມັດສະຕາດ, ແຕ່ພະເຍຊູບໍ່ໄດ້ສອນບົດຮຽນເລື່ອງພຶກສາສາດ. ເທົ່າທີ່ຊາວຄາລິເລຮູ້ຈັກເມັດພືດໃນສະໄໝຂອງພະອົງ ເມັດມັດສະຕາດແມ່ນນ້ອຍທີ່ສຸດແທ້ໆ. ດັ່ງນັ້ນພວກເຂົາເຈົ້າຈຶ່ງເຂົ້າໃຈໄດ້ເຖິງການເຕີບໂຕອັນງຶດງໍ້ຕາມທີ່ພະເຍຊູອະທິບາຍໃນຄຳອຸປະມາ.
ໃນທີ່ສຸດ ພະເຍຊູປຽບ “ແຜ່ນດິນສະຫວັນ” ກັບເຊື້ອແປ້ງທີ່ຍິງຄົນໜຶ່ງເອົາປົນໃສ່ແປ້ງສາມຖ້ວຍ. ພະອົງກ່າວວ່າ ເມື່ອຮອດເວລາ ເຊື້ອກໍເຮັດໃຫ້ແປ້ງທັງໝົດຟູຂຶ້ນ.
ຫຼັງຈາກການຍົກຄຳອຸປະມາຫ້າເລື່ອງນີ້ແລ້ວ ພະເຍຊູລາຈາກຝູງຊົນໄປແລະເມືອເຮືອນທີ່ພະອົງພັກຢູ່. ບໍ່ດົນອັກຄະສາວົກ 12 ຄົນແລະຄົນອື່ນໆ ກໍມາຫາພະອົງຢູ່ບ່ອນນັ້ນ.
ການຮັບປະໂຫຍດຈາກຄວາມອຸປະມາຂອງພະເຍຊູ
ເມື່ອສາວົກໄດ້ມາຫາພະເຍຊູຫຼັງຈາກພະອົງບັນຍາຍໃຫ້ຝູງຊົນຟັງທີ່ຫາດຊາຍນັ້ນ ພວກເຂົາເຈົ້າສົນໃຈຢາກຮູ້ວິທີສັ່ງສອນແບບໃໝ່ຂອງພະອົງ. ເຂົາເຈົ້າເຄີຍໄດ້ຍິນພະອົງໃຊ້ອຸປະມາ ແຕ່ບໍ່ຫຼາຍປານນີ້. ດັ່ງນັ້ນ ເຂົາຈຶ່ງຖາມວ່າ “ເປັນສັນໃດພະອົງໄດ້ປາກກັບເຂົາເປັນຄຳອຸປະມາ.”
ເຫດຜົນປະການໜຶ່ງທີ່ພະອົງໄດ້ເຮັດເຊັ່ນນັ້ນກໍເພື່ອໃຫ້ສົມຈິງຕາມຄຳພະຍາກອນທີ່ວ່າ “ເຮົາຈະອ້າປາກເປັນຄຳອຸປະມາ ເຮົາຈະບອກຄຳທີ່ອຳໄວ້ ຕັ້ງແຕ່ຕົ້ນເດີມໂລກ.” ຍັງມີເຫດຜົນຫຼາຍກວ່ານີ້. ພະອົງໃຊ້ຄຳອຸປະມາເພື່ອເປີດເຜີຍເຈຕະຄະຕິໃນຫົວໃຈຂອງປະຊາຊົນ.
ທີ່ຈິງ ຄົນສ່ວນຫຼາຍສົນໃຈໃນພະເຍຊູຍ້ອນພະອົງເລົ່າເລື່ອງເກ່ງແລະເປັນຜູ້ເຮັດອັດສະຈັນເທົ່ານັ້ນ ບໍ່ແມ່ນຍ້ອນເປັນບຸກຄົນທີ່ສົມຄວນໄດ້ຮັບການບົວລະບັດໃນຖານະອົງພະຜູ້ເປັນເຈົ້າທີ່ຄວນຕິດຕາມຢ່າງບໍ່ເຫັນແກ່ຕົວ. ເຂົາບໍ່ຕ້ອງການມີໃຜມາລົບກວນວິຖີຊີວິດຫຼືໂລກະທັດຂອງຕົນ. ເຂົາບໍ່ຕ້ອງການໃຫ້ຂ່າວສານນັ້ນມີຜົນກະທົບຕໍ່ຕົນຂະໜາດນັ້ນ.
ດັ່ງນັ້ນ ພະເຍຊູກ່າວວ່າ “ເຫດສັນນີ້ ເຮົາກ່າວແກ່ເຂົາເປັນຄຳອຸປະມາ ເພາະວ່າເມື່ອເຂົາເບິ່ງເຂົາບໍ່ເຫັນແລະເມື່ອເຂົາຟັງເຂົາບໍ່ຍິນແລະບໍ່ເຂົ້າໃຈ. ແລະຄຳທຳນວາຍແຫ່ງທ່ານເອຊາອີເປັນທີ່ສຳເລັດໃນເຂົາ ຄຳທີ່ວ່າ . . . ດ້ວຍວ່າໃຈແຫ່ງພວກນີ້ແຂງກະດ້າງໄປ.”
ພະເຍຊູກ່າວຕໍ່ໄປວ່າ “ຕາຂອງທ່ານທັງຫຼາຍກໍເປັນສຸກເພາະໄດ້ເຫັນ ແລະຫູຂອງທ່ານກໍເປັນສຸກເພາະໄດ້ຍິນ. ເຫດວ່າຈິງແທ້ ເຮົາກ່າວແກ່ທ່ານທັງຫຼາຍວ່າ ຜູ້ທຳນວາຍແລະຜູ້ຊອບທຳຫຼາຍຄົນຢາກໄດ້ເຫັນການທີ່ທ່ານທັງຫຼາຍເຫັນຢູ່ ແຕ່ວ່າເຂົາບໍ່ໄດ້ເຫັນ ແລະເຂົາຢາກໄດ້ຍິນຄຳທີ່ທ່ານທັງຫຼາຍໄດ້ຍິນແຕ່ວ່າເຂົາບໍ່ໄດ້ຍິນ.”
ແມ່ນແລ້ວ ອັກຄະສາວົກ 12 ຄົນແລະຜູ້ທີ່ຢູ່ນຳເຂົາເຈົ້າໄດ້ສະແດງວ່າເປັນຄົນມີຫົວໃຈຮັບເອົາ. ສະນັ້ນ ພະເຍຊູກ່າວດັ່ງນີ້ “ຂໍ້ເລິກແຫ່ງແຜ່ນດິນສະຫວັນເປັນທີ່ໂປດປະທານແກ່ທ່ານທັງຫຼາຍໃຫ້ຮູ້ຈັກ ແຕ່ວ່າບໍ່ໂປດໃຫ້ແກ່ຄົນທັງຫຼາຍນັ້ນ.” ເນື່ອງຈາກເຫຼົ່າສາວົກຢາກເຂົ້າໃຈ ພະເຍຊູຈຶ່ງໄດ້ອະທິບາຍຄຳອຸປະມາເລື່ອງຜູ້ຫວ່ານພືດໃຫ້ຟັງ.
“ເຂົ້າປູກນັ້ນເປັນພະຄຳຂອງພະເຈົ້າ” ຕາມພະເຍຊູກ່າວ ແລະດິນນັ້ນແມ່ນຫົວໃຈ. ກ່ຽວກັບເມັດພືດທີ່ຕົກໃສ່ດິນແໜ້ນຢູ່ແຄມທາງນັ້ນ ພະອົງຊີ້ແຈງວ່າ “ພະຍາມານມາແລະຍາດເອົາພະຄຳອອກຈາກໃຈຂອງເຂົາຢ້ານວ່າເຂົາຈະໄດ້ພົ້ນເວລາເຊື່ອ.”
ສ່ວນພືດທີ່ຫວ່ານລົງດິນເຊິ່ງພື້ນດິນເປັນຫີນນັ້ນ ແມ່ນກ່ຽວຂ້ອງກັບຫົວໃຈຂອງຜູ້ຮັບເອົາພະຄຳດ້ວຍຄວາມຍິນດີ. ແນວໃດກໍຕາມ ຍ້ອນພະຄຳບໍ່ສາມາດຢັ່ງຮາກລົງເລິກໃນຫົວໃຈຊະນິດນີ້ ເວລາມີການທົດລອງຫຼືການຂົ່ມເຫງ ຄົນພວກນີ້ຈຶ່ງໄດ້ປະຖິ້ມຄວາມເຊື່ອ.
ສຳລັບພືດທີ່ຕົກລົງທ່າມກາງກົກໜາມ ພະເຍຊູຊີ້ເຖິງບຸກຄົນທີ່ໄດ້ຍິນພະຄຳແລ້ວ, ແຕ່ເຂົາຍອມໃຫ້ຄວາມກັງວົນ, ຊັບສົມບັດ, ແລະຄວາມສະຫນຸກສະໜານຍຶດເຂົາໄວ້ ດັ່ງນັ້ນ ເຂົາຈຶ່ງສະຫງັດງັນໄປ ບໍ່ງອກງາມເທົ່າທີ່ຄວນ.
ໃນທີ່ສຸດ ສຳລັບເມັດພືດທີ່ຫວ່ານລົງເທິງດິນດີນັ້ນພະເຍຊູກ່າວວ່າ ຄົນເຫຼົ່ານີ້ແມ່ນຜູ້ທີ່ຟັງພະຄຳດ້ວຍຫົວໃຈເຫຼື້ອມໃສສັດທາແລະຮັກສາໄວ້ ຈຶ່ງເກີດຜົນດ້ວຍຄວາມພຽນ.
ຖືວ່າເປັນພະພອນແກ່ເຫຼົ່າສາວົກທີ່ໄດ້ຫາພົບພະເຍຊູເພື່ອໄດ້ຄຳອະທິບາຍສິ່ງທີ່ພະອົງສັ່ງສອນ! ພະເຍຊູປະສົງໃຫ້ຄຳອຸປະມາຂອງພະອົງເປັນທີ່ເຂົ້າໃຈໄດ້ ເພື່ອຖ່າຍທອດຄວາມຈິງໃຫ້ແກ່ຄົນອື່ນ. ພະອົງຖາມວ່າ “ເຂົາເອົາໂຄມໄຟມາ ເພື່ອຈະບັງໄວ້ທັງລຸ່ມກະບຸງ ຫຼືທັງລຸ່ມຕຽງນອນຫຼື”? ບໍ່ເປັນເຊັ່ນນັ້ນ ແຕ່ “ຕັ້ງໄວ້ເທິງຕີນໂຄມໄຟ.” ດັ່ງນັ້ນ ພະເຍຊູກ່າວເສີມວ່າ “ຈົ່ງລະວັງໃຫ້ດີ ດ້ວຍສິ່ງທັງຫຼາຍທີ່ທ່ານໄດ້ຍິນ.”
ໄດ້ພະພອນໂດຍຮັບຄຳສັ່ງສອນຫຼາຍຂຶ້ນ
ຫຼັງຈາກພວກສາວົກໄດ້ຮັບຄຳອະທິບາຍກ່ຽວກັບອຸປະມາເລື່ອງຜູ້ຫວ່ານພືດ ເຂົາເຈົ້າຕ້ອງການຮຽນຮູ້ຫຼາຍຂຶ້ນ. ເຂົາຂໍຮ້ອງວ່າ “ຄຳອຸປະມາແຫ່ງເຂົ້ານົກໃນນານັ້ນ ຂໍພະອົງເຊີນແກ້ໃຫ້ຫມູ່ຂ້າພະເຈົ້າເຂົ້າໃຈເທີ້ນ.”
ເຫຼົ່າສາວົກມີທັດສະນະຕ່າງຈາກຝູງຊົນທີ່ຢູ່ຫາດຊາຍນັ້ນແທ້ໆ! ພວກນັ້ນບໍ່ປາຖະໜາຈະຮຽນຮູ້ຄວາມໝາຍທີ່ແຝງຢູ່ໃນອຸປະມາຕ່າງໆ ຢ່າງຈິງຈັງ ເຂົາພໍໃຈຮູ້ແຕ່ສັງເຂບເທົ່ານັ້ນ. ເມື່ອທຽບລະຫວ່າງຄົນທົ່ວໄປທີ່ຢູ່ແຄມທະເລກັບສາວົກທີ່ມັກຊັກຖາມເຊິ່ງໄດ້ມາຫາພະອົງຢູ່ເຮືອນ ພະເຍຊູຈຶ່ງກ່າວວ່າ:
“ທ່ານຈະເອົາຂອງຜອງຢ່າງໃດຈະຜອງໃຫ້ເຂົາ ເຂົາຈະເອົາຂອງຜອງຢ່າງນັ້ນຈະຜອງໃຫ້ທ່ານ ແລະເຂົາຍັງຈະຕື່ມອີກແກ່ທ່ານທັງຫຼາຍ.” ເຫຼົ່າສາວົກຜອງດ້ວຍການໃຫ້ຄວາມສົນໃຈແລະຕັ້ງອົກຕັ້ງໃຈເອົາໃຈໃສ່ຕໍ່ຄຳຂອງພະເຍຊູ. ດັ່ງນັ້ນເຂົາຈຶ່ງໄດ້ພະພອນຄືການຮັບຄຳແນະນຳເພີ່ມຂຶ້ນ. ສະນັ້ນພະເຍຊູຈຶ່ງຕອບຄຳຖາມຂອງເຫຼົ່າສາວົກ ໂດຍອະທິບາຍວ່າ:
“ຜູ້ທີ່ຫວ່ານເມັດດີນັ້ນເປັນບຸດມະນຸດ ແລະທົ່ງນານັ້ນເປັນໂລກນີ້ ແລະເມັດດີເປັນລູກທັງຫຼາຍແຫ່ງແຜ່ນດິນ [ຂອງພະເຈົ້າ] ແລະເຂົ້ານົກເປັນລູກທັງຫຼາຍຂອງຜູ້ຊົ່ວຮ້າຍ ແລະຜູ້ສັດຕູທີ່ໄດ້ຫວ່ານເຂົ້ານົກເປັນພະຍາມານ ແລະລະດູກ່ຽວເຂົ້ານັ້ນເປັນທີ່ສຸດແຫ່ງໂລກນີ້ ແລະຜູ້ກ່ຽວເຂົ້ານັ້ນເປັນພວກທູດສະຫວັນ.”
ຫຼັງຈາກພະອົງໄດ້ລະບຸລັກສະນະສະເພາະແຕ່ລະຢ່າງໃນຄຳອຸປະມາແລ້ວ ພະເຍຊູພັນລະນາເຖິງຜົນທີ່ຕາມມາ. ພະອົງບອກວ່າ ໃນໄລຍະອະວະສານຂອງລະບົບແຫ່ງສິ່ງຕ່າງໆ ຜູ້ກ່ຽວຫຼືທູດສະຫວັນຈະແຍກຄລິດສະຕຽນປອມເຊິ່ງປຽບຄືເຂົ້ານົກອອກຈາກ “ລູກທັງຫຼາຍແຫ່ງແຜ່ນດິນ [ຂອງພະເຈົ້າ].” ແລ້ວ “ລູກທັງຫຼາຍຂອງຜູ້ຊົ່ວຮ້າຍ” ຈະຖືກໝາຍໄວ້ໃຫ້ພິນາດ ແຕ່ລູກຂອງລາຊະອານາຈັກຂອງພະເຈົ້າ “ພວກຊອບທຳ” ຈະຮຸ່ງເຮືອງສຸກໃສໃນລາຊະອານາຈັກແຫ່ງພະບິດາ.
ຕໍ່ຈາກນັ້ນ ພະເຍຊູອວຍພອນສາວົກທີ່ໄຕ່ຖາມພະອົງດ້ວຍອຸປະມາອີກສາມເລື່ອງ. ຄຳອຸປະມາເລື່ອງທຳອິດ ພະອົງກ່າວວ່າ “ແຜ່ນດິນສະຫວັນເປັນເໝືອນດັ່ງສິ່ງຂອງແພງ ທີ່ເຊື່ອງໄວ້ໃນທົ່ງນາ ທີ່ທ່ານຜູ້ໜຶ່ງເມື່ອໄດ້ພົບແລ້ວໄດ້ອຳໄວ້ ແລະເພາະຄວາມຍິນດີ ທ່ານຈຶ່ງໄປຂາຍສັບພະທຸກສິ່ງທີ່ທ່ານມີຢູ່ ແລະໄປຊື້ນານັ້ນ.”
ພະອົງເລົ່າຕໍ່ໄປວ່າ “ອັນໜຶ່ງອີກ ແຜ່ນດິນສະຫວັນເປັນເໝືອນດັ່ງນາຍຮ້ອຍ [“ພໍ່ຄ້າຜູ້ໜຶ່ງ,” ປ.ມ.] ທີ່ຊອກຫາແກ້ວຫອຍອັນດີອັນງາມ ແລະເມື່ອໄດ້ພົບແກ້ວຫອຍໜ່ວຍໜຶ່ງທີ່ມີລາຄາແພງປະເສີດຫຼາຍແລ້ວ ທ່ານໄປຂາຍສັບພະທຸກສິ່ງທີ່ທ່ານມີຢູ່ ແລະໄດ້ໄປຊື້ແກ້ວຫອຍນັ້ນ.”
ພະເຍຊູເອງປຽບເໝືອນຜູ້ທີ່ພົບຂຸມຊັບທີ່ເຊື່ອງໄວ້ ແລະຄືນາຍຮ້ອຍຫຼືພໍ່ຄ້າຜູ້ໜຶ່ງຜູ້ທີ່ພົບແກ້ວຫອຍລາຄາແພງ. ພະອົງໄດ້ຂາຍທຸກສິ່ງ ໄດ້ສະລະຕຳແໜ່ງອັນມີກຽດສະຫງ່າໃນສະຫວັນແລະໄດ້ມາກຳເນີດເປັນມະນຸດທີ່ຕ່ຳຕ້ອຍ. ຈາກນັ້ນ ໃນຖານະເປັນມະນຸດຢູ່ເທິງໂລກນີ້ ພະອົງຮັບຄຳຕິຕຽນແລະການຂົ່ມເຫງດ້ວຍຄວາມກຽດຊັງ ເຊິ່ງເປັນການພິສູດວ່າ ພະອົງຄູ່ຄວນກັບການເປັນຜູ້ປົກຄອງລາຊະອານາຈັກຂອງພະເຈົ້າ.
ສາວົກຂອງພະເຍຊູຕ້ອງປະເຊີນກັບການທ້າທາຍເຊັ່ນກັນທີ່ຈະຂາຍທຸກສິ່ງເພື່ອໄດ້ລາງວັນອັນຍອດຢ້ຽມເພື່ອກາຍເປັນຜູ້ຮ່ວມປົກຄອງກັບພະຄລິດ ຫຼືເປັນພົນລະເມືອງຢູ່ເທິງແຜ່ນດິນໂລກພາຍໃຕ້ລາຊະອານາຈັກ. ເຮົາຈະຖືວ່າການມີສ່ວນໃນລາຊະອານາຈັກຂອງພະເຈົ້າເປັນສິ່ງລ້ຳຄ່າຍິ່ງກວ່າແນວອື່ນທັງໝົດໃນຊີວິດ ເໝືອນກັບຂຸມຊັບມີຄ່າມະຫາສານ ຫຼືເໝືອນແກ້ວຫອຍທີ່ສູງຄ່າບໍ?
ໃນທີ່ສຸດ ພະເຍຊູປຽບ “ລາຊະອານາຈັກສະຫວັນ” ຄືກັບດາງກວາດທີ່ລາກປາທຸກຊະນິດໄດ້. ເມື່ອແຍກປາ ປາທີ່ບໍ່ດີແລ້ວກໍຈະໂຍນຖິ້ມໄປ ເກັບໄວ້ແຕ່ປາດີ. ພະເຍຊູກ່າວວ່າ ຈະເປັນເຊັ່ນນັ້ນໃນຕອນອະວະສານຂອງລະບົບນີ້ ທູດສະຫວັນຈະແຍກຄົນຊົ່ວອອກຈາກຄົນຊອບທຳ ກັນຄົນຊົ່ວໄວ້ເພື່ອທຳລາຍລ້າງ.
ພະເຍຊູເອງເລີ່ມໂຄງການຈັບປານີ້ໂດຍຮຽກສາວົກກຸ່ມທຳອິດໃຫ້ເປັນ “ຜູ້ຫາຄົນ” (ປ.ມ.) ພາຍໃຕ້ການດູແລຈາກທູດສະຫວັນ ວຽກງານຈັບຄົນນີ້ດຳເນີນຕໍ່ເນື່ອງມາຫຼາຍສະຕະວັດ. ໃນທີ່ສຸດເຖິງເວລາລາກ “ດາງກວາດ” ເຂົ້າມາ ເຊິ່ງໝາຍເຖິງອົງການທັງສິ້ນໃນໂລກນີ້ທີ່ອ້າງຕົວເປັນຄລິດສະຕຽນ ລວມທັງປະຊາຄົມຄລິດສະຕຽນຜູ້ຖືກເຈີມດ້ວຍ.
ເຖິງແມ່ນວ່າປາທີ່ບໍ່ດີຖືກເລືອກຖິ້ມໄປສູ່ຄວາມພິນາດ ເຮົາກໍຮູ້ສຶກຂອບຄຸນທີ່ “ປາຢ່າງດີ” ຖືກເກັບຮັກສາໄວ້. ໂດຍການສະແດງຄວາມປາຖະໜາຢ່າງຈິງຈັງທີ່ຢາກໄດ້ຄວາມຮູ້ແລະຄວາມເຂົ້າໃຈຫຼາຍຂຶ້ນເຊັ່ນດຽວກັບສາວົກຂອງພະເຍຊູ ເຮົາຈະໄດ້ພະພອນບໍ່ພຽງແຕ່ຮັບຄວາມຮູ້ຫຼາຍຂຶ້ນເທົ່ານັ້ນ ແຕ່ພະເຈົ້າຍັງຈະອວຍພອນໃຫ້ເຮົາໄດ້ຊີວິດຕະຫຼອດໄປ. ມັດທາຽ 13:1-52; ມາລະໂກ 4:1-34; ລຶກາ 8:4-18; ຄຳເພງ 78:2; ເອຊາອີ 6:9, 10.
▪ ພະເຍຊູໄດ້ກ່າວຄຳອຸປະມາໃຫ້ຝູງຊົນຟັງເມື່ອໃດແລະຢູ່ໃສ?
▪ ພະເຍຊູຍົກອຸປະມາຫ້າເລື່ອງໃດແດ່ຂຶ້ນມາກ່າວຕໍ່ຝູງຊົນ?
▪ ຍ້ອນຫຍັງພະເຍຊູຈຶ່ງກ່າວວ່າ ເມັດມັດສະຕາດນ້ອຍທີ່ສຸດໃນບັນດາເມັດພືດທັງມວນ?
▪ ເປັນຫຍັງພະເຍຊູຈຶ່ງກ່າວເປັນຄຳອຸປະມາ?
▪ ສາວົກຂອງພະເຍຊູສະແດງຕົວຕ່າງຈາກຝູງຊົນແນວໃດ?
▪ ກ່ຽວກັບອຸປະມາເລື່ອງຄົນຫວ່ານພືດ ພະເຍຊູຊີ້ແຈງເຖິງຫຍັງ?
▪ ສາວົກຂອງພະເຍຊູແຕກຕ່າງຈາກຝູງຊົນທີ່ຫາດຊາຍແນວໃດ?
▪ ຜູ້ຫວ່ານພືດ, ທົ່ງນາ, ເມັດດີ, ສັດຕູ, ລະດູກ່ຽວ, ແລະຜູ້ກ່ຽວເປັນພາບເລັງເຖິງໃຜ ຫຼືສິ່ງໃດ?
▪ ຄຳອຸປະມາອີກສາມເລື່ອງທີ່ພະເຍຊູຍົກຂຶ້ນມານັ້ນມີເລື່ອງໃດແດ່ ແລະອຸປະມາເຫຼົ່ານີ້ໃຫ້ບົດຮຽນຫຍັງແກ່ເຮົາ?