ບົດ 109
ພະເຍຊູປະນາມຜູ້ຕໍ່ຕ້ານພະອົງ
ພະເຍຊູໄດ້ເຮັດໃຫ້ຜູ້ຕໍ່ຕ້ານທາງສາສະໜາຢຸດຊະງັກຈົນເຂົາບໍ່ກ້າຖາມສິ່ງໃດອີກຕໍ່ໄປ. ດັ່ງນັ້ນ ພະອົງຈຶ່ງສວຍໂອກາດເປີດເຜີຍຄວາມຮູ້ເທົ່າບໍ່ເຖິງການຂອງເຂົາ. ພະອົງຖາມວ່າ “ທ່ານທັງຫຼາຍຄຶດເຫັນຢ່າງໃດດ້ວຍພະຄລິດ ພະອົງເປັນບຸດຂອງຜູ້ໃດ”?
ພວກຟາລິຊຽນຕອບວ່າ “ເປັນບຸດຂອງກະສັດດາວິດ.”
ເຖິງວ່າພະເຍຊູບໍ່ໄດ້ປະຕິເສດວ່າດາວິດເປັນບັນພະບຸລຸດທາງເນື້ອໜັງຂອງພະຄລິດຫຼືພະເມຊີກໍຕາມ ພະອົງກໍຍັງຖາມວ່າ “ຖ້າຢ່າງນັ້ນ ເປັນສັນໃດກະສັດດາວິດດ້ວຍພະວິນຍານ [“ການດົນບັນດານ,” ລ.ມ.] (ທີ່ຄຳເພງບົດ 110) ຈຶ່ງໄດ້ເອີ້ນຊື່ພະຄລິດວ່າພະອົງເຈົ້າ ກ່າວວ່າ ພະເຢໂຫວາໄດ້ກ່າວແກ່ພະອົງເຈົ້າຂອງຂ້າພະເຈົ້າວ່າ ຈົ່ງນັ່ງທີ່ເບື້ອງຂວາມືຂອງເຮົາຈົນເຖິງເຮົາຈະເອົາສັດຕູທັງຫຼາຍຂອງພະອົງລົງມາຢູ່ໃຕ້ຕີນຂອງພະອົງ. ເຫດສັນນີ້ ຖ້າກະສັດດາວິດເອີ້ນພະຄລິດວ່າພະອົງເຈົ້າ ພະຄລິດຈະເປັນບຸດຂອງກະສັດດາວິດຢ່າງໃດ”?
ພວກຟາລິຊຽນບໍ່ປາກ ເພາະເຂົາບໍ່ຮູ້ເອກະລັກແທ້ຂອງພະຄລິດຫຼືຜູ້ຖືກເຈີມ. ພະເມຊີບໍ່ພຽງແຕ່ເປັນລູກຫຼານທີ່ເປັນມະນຸດຂອງດາວິດເທົ່ານັ້ນ ດັ່ງທີ່ປາກົດວ່າພວກຟາລິຊຽນເຊື່ອກັນ ແຕ່ພະອົງເຄີຍດຳລົງຢູ່ໃນສະຫວັນແລະມີຖານະສູງກວ່າດາວິດ ຫຼືເປັນພະອົງເຈົ້າຂອງດາວິດ.
ຕອນນີ້ພະເຍຊູຫັນໄປຫາຝູງຊົນແລະສາວົກ ພະອົງກ່າວເຕືອນເລື່ອງພວກສະໝຽນແລະຟາລິຊຽນ. ເນື່ອງຈາກພວກນີ້ສອນພະບັນຍັດຂອງພະເຈົ້າຢູ່ໃນ “ບ່ອນນັ່ງຂອງໂມເຊ” (ປ.ມ.) ພະເຍຊູສະໜັບສະຫນູນວ່າ “ສັບພະທຸກສິ່ງທີ່ເຂົາຈະສັ່ງທ່ານທັງຫຼາຍໃຫ້ກະທຳ ຈົ່ງກະທຳແລະຂັບຕາມເທີ້ນ” ແຕ່ພະອົງເຕືອນວ່າ “ຢ່າໄດ້ກະທຳຕາມກິດຈະການຂອງເຂົາ ເພາະເຂົາສັ່ງແລະບໍ່ຂັບຕາມ.”
ພວກເຂົາເປັນຄົນໜ້າຊື່ໃຈຄົດ ແລະພະເຍຊູປະນາມເຂົາດ້ວຍພາສາຢ່າງດຽວກັນທີ່ພະອົງໄດ້ໃຊ້ຕອນທີ່ກິນເຂົ້າຢູ່ເຮືອນຂອງຟາລິຊຽນຄົນໜຶ່ງຫຼາຍເດືອນກ່ອນ. ພະອົງກ່າວວ່າ “ການທັງຫຼາຍຂອງເຂົາໆກະທຳເພື່ອໃຫ້ຄົນທັງຫຼາຍເຫັນເຂົາ.” ແລະພະອົງຍົກຕົວຢ່າງຂຶ້ນມາວ່າ:
“ເຄື່ອງແຕ່ງແພຄຽນຫົວຂອງເຂົາໆ ກະທຳໃຫ້ກວ້າງຂວາງ.” ແອບນ້ອຍໆ ເຫຼົ່ານີ້ທີ່ເຂົາໃສ່ໄວ້ຢູ່ໜ້າຜາກຫຼືຢູ່ແຂນນັ້ນ ເຊິ່ງບັນຈຸພະບັນຍັດສີ່ຕອນແມ່ນ ອຸປະຍົກໜີ 13:1-10, 11-16; ແລະພະບັນຍັດ 6:4-9; 11:13-21. ພວກຟາລິຊຽນເພີ່ມຂະໜາດຂອງແອບເຫຼົ່ານີ້ເພື່ອໃຫ້ເກີດຄວາມປະທັບໃຈວ່າເຂົາເປັນຄົນເຄັ່ງຄັດໃນເລື່ອງພະບັນຍັດ.
ພະເຍຊູກ່າວຕໍ່ໄປວ່າ ພວກເຂົາ ‘ກະທຳຍອຍເສື້ອໃຫ້ຍາວໄປ.’ ທີ່ຈົດເຊັນບັນຊີ 15:38-40 ພວກຍິດສະລາເອນໄດ້ຮັບບັນຊາໃຫ້ເຮັດຍອຍເສື້ອຂອງຕົນ ແຕ່ພວກຟາລິຊຽນເຮັດຍອຍເສື້ອຂອງຕົນໃຫ້ຍາວກວ່າຂອງຄົນອື່ນໆ. ທຸກສິ່ງທຸກຢ່າງທີ່ເຮັດໄປກໍເພື່ອໂອ້ອວດ! ພະເຍຊູກ່າວວ່າ “ເຂົາມັກນັ່ງທີ່ສູງໃນການລ້ຽງກັນ.”
ເປັນຕາໜ້າເສົ້າທີ່ພວກສາວົກຂອງພະອົງເອງກໍໄດ້ຮັບຜົນກະທົບຈາກການເຮັດໃຫ້ຕົນເປັນຄົນເດັ່ນດັງເຊັ່ນກັນ. ດັ່ງນັ້ນ ພະອົງຈຶ່ງແນະນຳວ່າ “ຝ່າຍທ່ານທັງຫຼາຍຢ່າເປັນທີ່ເອີ້ນຊື່ວ່າ ອາຈານເຈົ້າຂ້າ ເພາະວ່າຜູ້ໜຶ່ງຜູ້ດຽວເປັນພະອາຈານຂອງທ່ານທັງຫຼາຍແມ່ນພະຄລິດ ແລະທ່ານທັງຫຼາຍເປັນພີ່ນ້ອງກັນທຸກຄົນ. ແລະຢ່າຊູເອີ້ນຊື່ຜູ້ໃດວ່າ ພໍ່ໃນແຜ່ນດິນໂລກ ເພາະວ່າຜູ້ໜຶ່ງຜູ້ດຽວເປັນພະບິດາຂອງທ່ານທັງຫຼາຍແມ່ນຜູ້ຢູ່ໃນສະຫວັນ. ຢ່າໃຫ້ຜູ້ໃດເອີ້ນຊື່ທ່ານທັງຫຼາຍວ່າ ເຈົ້ານາຍ ເພາະວ່າຜູ້ໜຶ່ງຜູ້ດຽວເປັນເຈົ້ານາຍຂອງທ່ານທັງຫຼາຍແມ່ນພະຄລິດ.” ເຫຼົ່າສາວົກຕ້ອງກຳຈັດຄວາມປາຖະໜາທີ່ຢາກເປັນຄົນສຳຄັນທີ່ສຸດ! ພະເຍຊູຕັກເຕືອນວ່າ “ຜູ້ໃຫຍ່ທີ່ສຸດໃນທ່າມກາງທ່ານທັງຫຼາຍ ຈະເປັນຂ້າໃຊ້ຂອງທ່ານທັງຫຼາຍ.”
ຈາກນັ້ນພະອົງຖະແຫຼງວິບາກເປັນເລື່ອງໆ ຕໍ່ໆ ກັນແກ່ພວກສະໝຽນແລະພວກຟາລິຊຽນ ພ້ອມທັງເອີ້ນພວກເຂົາຫຼາຍເທື່ອຫຼາຍຫົນວ່າຄົນໜ້າຊື່ໃຈຄົດ. ພະອົງກ່າວວ່າ “ທ່ານທັງຫຼາຍໄດ້ອັດແຜ່ນດິນ [“ລາຊະອານາຈັກ,” ລ.ມ.] ສະຫວັນຕໍ່ໜ້າຄົນທັງຫຼາຍ” ແລະ “ທ່ານທັງຫຼາຍກັດກິນຄອບຄົວຂອງພວກແມ່ໝ້າຍ ແລະອ້ອນວອນໃຫ້ຍືດຍາວຈະມີໜ້າມີຕາ.”
ພະເຍຊູກ່າວວ່າ “ວິບາກແກ່ທ່ານທັງຫຼາຍ ຜູ້ຕາບອດທີ່ນຳໜ້າທາງ.” ພະອົງຕຳໜິການຂາດຄ່ານິຍົມທາງຝ່າຍວິນຍານຂອງພວກຟາລິຊຽນດັ່ງເຊັ່ນປາກົດຈາກການແບ່ງແຍກຕາມນ້ຳໃຈທີ່ເຂົາເຮັດຢູ່ຫັ້ນ. ຕົວຢ່າງເຊັ່ນ ເຂົາບອກວ່າ ‘ຖ້າຜູ້ໃດສາບານຕໍ່ພະວິຫານຈະບໍ່ເປັນຫຍັງ ແຕ່ຫາກຜູ້ໃດສາບານຕໍ່ຄຳຂອງພະວິຫານ ຜູ້ນັ້ນຕ້ອງປະຕິບັດຕາມທີ່ໄດ້ສາບານໄວ້.’ ໂດຍການເນັ້ນຄວາມສຳຄັນຂອງຄຳໃນພະວິຫານຍິ່ງກວ່າຄຸນຄ່າທາງຝ່າຍວິນຍານຂອງສະຖານທີ່ໃນການນະມັດສະການ ເຂົາເຜີຍໃຫ້ເຫັນວ່າຕົນເອງເປັນຄົນຕາບອດທາງດ້ານສິນທຳ.
ດັ່ງນັ້ນ ຄືກັບສິ່ງທີ່ພະອົງເຄີຍເຮັດກ່ອນໜ້ານັ້ນ ພະເຍຊູຕິຕຽນພວກຟາລິຊຽນທີ່ໄດ້ປ່ອຍປະລະເລີຍ “ສ່ວນຂໍ້ສຳຄັນຂອງພະບັນຍັດ ຄືຄວາມຍຸຕິທຳ ຄວາມເມດຕາ ຄວາມສັດຊື່” (ປ.ມ.) ຂະນະທີ່ໃຫ້ຄວາມສົນໃຈຫຼາຍຕໍ່ການຖວາຍໜຶ່ງສ່ວນສິບຂອງຢາຮາກໄມ້ທີ່ບໍ່ສຳຄັນ.
ພະເຍຊູເອີ້ນຟາລິຊຽນພວກນີ້ວ່າ “ພວກນຳໜ້າທາງຕາບອດ ຜູ້ຕອງແມງໝີ່ອອກເສຍ ແລະກືນຕົວອູດ.” ເຂົາຕອງແມງໝີ່ຈາກເຫຼົ້າອະງຸ່ນ ບໍ່ແມ່ນວ່າມັນເປັນແມງໄມ້ທໍ່ນັ້ນ ແຕ່ຍ້ອນວ່າມັນບໍ່ສະອາດທາງດ້ານພິທີກຳ. ຊ້ຳບໍ່ຫນຳເຂົາບໍ່ເອົາໃຈໃສ່ຕໍ່ເລື່ອງທີ່ສຳຄັນກວ່າໃນພະບັນຍັດເຊິ່ງປຽບໄດ້ກັບການກືນຕົວອູດລົງໄປ ເຊິ່ງເປັນສັດບໍ່ສະອາດທາງດ້ານພິທີກຳຄືກັນ. ມັດທາຽ 22:41–23:24; ມາລະໂກ 12:35-40; ລຶກາ 20:41-47; ພວກເລວີ 11:4, 21-24.
▪ ເປັນຫຍັງພວກຟາລິຊຽນຈຶ່ງບໍ່ປາກເມື່ອພະເຍຊູຖາມເຖິງຂໍ້ຄວາມທີ່ດາວິດກ່າວໄວ້ໃນຄຳເພງບົດ 110?
▪ ເປັນຫຍັງພວກຟາລິຊຽນຂະຫຍາຍແອບໃສ່ຂໍ້ພະຄຳພີຂອງຕົນໃຫ້ກວ້າງຂຶ້ນແລະຂະຫຍາຍຍອຍເສື້ອໃຫ້ຍາວອອກ?
▪ ພະເຍຊູໃຫ້ຄຳແນະນຳແນວໃດແກ່ເຫຼົ່າສາວົກຂອງພະອົງ?
▪ ພວກຟາລິຊຽນເຮັດໃຫ້ເກີດການແບ່ງແຍກຕາມນ້ຳໃຈຂອງເຂົາແນວໃດ ແລະພະເຍຊູຕິຕຽນເຂົາວ່າປ່ອຍປະລະເລີຍເລື່ອງທີ່ສຳຄັນກວ່າຢ່າງໃດ?