ບົດ 118
ການຖືກທໍລະຍົດແລະຖືກຈັບກຸມ
ກາຍທ່ຽງຄືນໄປແລ້ວເມື່ອຢູດາພາກຸ່ມໃຫຍ່ທີ່ປະກອບດ້ວຍທະຫານ ພວກປະໂລຫິດໃຫຍ່ ພວກຟາລິຊຽນ ແລະຄົນອື່ນໆ ເຂົ້າໄປໃນສວນເຄດເຊມາເນ. ພວກປະໂລຫິດໄດ້ຕົກລົງທີ່ຈະຈ່າຍເງິນ 30 ແຜ່ນໃຫ້ແກ່ຢູດາສຳລັບການທໍລະຍົດຕໍ່ພະເຍຊູ.
ກ່ອນໜ້ານັ້ນ ເມື່ອຢູດາອອກໄປຈາກການຮັບປະທານປັດສະຄາແລ້ວ ເບິ່ງຄືວ່າເຂົາໄດ້ມຸ່ງໄປຫາພວກປະໂລຫິດໃຫຍ່ໂດຍກົງ. ຄົນເຫຼົ່ານີ້ໄດ້ປະຊຸມເຈົ້າໜ້າທີ່ຂອງຕົນ ກັບທະຫານກຸ່ມໜຶ່ງ. ບາງເທື່ອຢູດາອາດພາຄົນພວກນີ້ໄປບ່ອນທີ່ພະເຍຊູກັບອັກຄະສາວົກໄດ້ສະຫຼອງປັດສະຄາກ່ອນ. ເມື່ອພົບວ່າເຂົາເຈົ້າໄດ້ອອກໄປແລ້ວ ຄົນກຸ່ມໃຫຍ່ທີ່ແບກອາວຸດຖືໂຄມໄຟແລະກະບອງຕິດຕາມຢູດາກໍໄດ້ອອກຈາກເມືອງເຢຣຶຊາເລມແລ້ວຂ້າມຮ່ອມພູເຊດຣົນ.
ຕອນທີ່ຢູດາພາຝູງຊົນຂຶ້ນເທິງພູເຂົາກົກໝາກກອກ ລາວແນ່ໃຈວ່າຮູ້ບ່ອນທີ່ຈະພໍ້ພະເຍຊູໄດ້. ຕະຫຼອດສັບປະດາທີ່ຜ່ານໄປນັ້ນ ເມື່ອພະເຍຊູແລະອັກຄະສາວົກໄປໆ ມາໆ ລະຫວ່າງບ້ານເບທະນີແລະເມືອງເຢຣຶຊາເລມ ເຂົາເຈົ້າມັກຈະແວ່ເຂົ້າໄປພັກຜ່ອນແລະລົມກັນໃນສວນເຄດເຊມາເນ. ຕອນນີ້ ພະເຍຊູອາດຈະບັງຢູ່ກ້ອງຕົ້ນໝາກກອກເທດໃນຄວາມມືດກໍໄດ້ ທະຫານຈະຊີ້ຕົວພະອົງໄດ້ຢ່າງໃດ? ເຂົາອາດຈະບໍ່ເຄີຍເຫັນພະອົງມາກ່ອນກໍໄດ້. ຢູດາຈຶ່ງໃຫ້ສັນຍານວ່າ “ເຮົາຈະຈູບຜູ້ໃດເປັນຜູ້ນັ້ນ ຈົ່ງຈັບກຸມທ່ານໄວ້.”
ຢູດາພາຄົນກຸ່ມນັ້ນເຂົ້າໄປໃນສວນ ເຫັນພະເຍຊູຢູ່ນຳອັກຄະສາວົກ ຈຶ່ງກ້າວກົງເຂົ້າໄປຫາພະອົງແລ້ວກ່າວວ່າ “ພະອາຈານເຈົ້າຂ້າ ຈົ່ງຈຳເລີນເທີ້ນ.” ແລ້ວເຂົາກໍຈູບພະອົງຢ່າງອ່ອນໂຍນ.
ພະອົງຢ້ອນຖາມວ່າ “ສ່ຽວເອີຍ ທ່ານໄດ້ມາກະທຳການໃດ”? ຈາກນັ້ນ ເພື່ອຕອບຄຳຖາມຂອງພະອົງເອງພະອົງກ່າວວ່າ “ຢູດາເອີຍ ທ່ານມອບບຸດມະນຸດໄວ້ດ້ວຍຈູບຫຼື”? ແຕ່ກໍພໍແລ້ວສຳລັບຄົນທີ່ທໍລະຍົດຕໍ່ພະອົງ! ພະເຍຊູກ້າວອອກສູ່ແສງກະບອງແລະໂຄມໄຟແລ້ວຖາມວ່າ “ທ່ານທັງຫຼາຍຊອກຫາຜູ້ໃດ”?
ຄຳຕອບແມ່ນ “ພະເຍຊູຊາວນາຊາເລດ.”
ພະເຍຊູຕອບວ່າ “ເຮົາເປັນຜູ້ນັ້ນ” ຂະນະພະອົງຢືນຢ່າງອົງອາດຕໍ່ໜ້າເຂົາ. ເພາະງົງງວຍເນື່ອງຈາກຄວາມກ້າຫານຂອງພະອົງແລະບໍ່ຮູ້ວ່າຈະເກີດສິ່ງໃດຂຶ້ນ ຄົນພວກນັ້ນຈຶ່ງຖອຍຫຼັງແລະລົ້ມລົງກັບພື້ນ.
ພະເຍຊູກ່າວຢ່າງສະຫງົບຕໍ່ໄປວ່າ “ເຮົາໄດ້ກ່າວແກ່ທ່ານທັງຫຼາຍວ່າ ເຮົາເປັນຜູ້ນັ້ນ. ເຫດສັນນີ້ ຖ້າທ່ານທັງຫຼາຍຊອກຫາເຮົາ ຈົ່ງໃຫ້ຄົນທັງຫຼາຍນີ້ໄປເສຍເທີ້ນ.” ກ່ອນໜ້ານັ້ນບໍ່ດົນຕອນຢູ່ຫ້ອງຊັ້ນເທິງ ພະເຍຊູກ່າວນຳພະບິດາໃນຄຳອະທິດຖານວ່າພະອົງໄດ້ຮັກສາອັກຄະສາວົກທີ່ສັດຊື່ຂອງພະອົງໄວ້ບໍ່ໃຫ້ເຂົາເຈົ້າຄົນໜຶ່ງຄົນໃດເສີຍໄປ “ເທົ່າເວັ້ນໄວ້ແຕ່ລູກແຫ່ງຄວາມຈິບຫາຍ.” ດັ່ງນັ້ນ ເພື່ອໃຫ້ຄຳຂອງພະອົງເປັນຈິງ ພະອົງຂໍໃຫ້ປ່ອຍສາວົກຂອງພະອົງໄປ.
ເມື່ອພວກທະຫານຕັ້ງສະຕິໄດ້ແລ້ວ ຈຶ່ງຢືນຂຶ້ນແລະເລີ່ມມັດພະເຍຊູໄວ້ ພວກອັກຄະສາວົກພໍຈະຮູ້ວ່າມີຫຍັງຈະເກີດຂຶ້ນ. ເຂົາເຈົ້າຖາມວ່າ “ພະອົງເຈົ້າຂ້າ ພວກຂ້າພະເຈົ້າຈະເອົາດາບຟັນຫຼື”? ກ່ອນພະເຍຊູຈະຕອບ ເປໂຕຊັກດາບໜຶ່ງໃນສອງອັນທີ່ອັກຄະສາວົກເອົາມານຳນັ້ນ ຟັນມາລະໂຂຂ້າໃຊ້ຄົນໜຶ່ງຂອງປະໂລຫິດໃຫຍ່. ເປໂຕຟັນບໍ່ຖືກຫົວຂອງຂ້າໃຊ້ນັ້ນ ແຕ່ພາດໄປຕັດເອົາຫູກ້ຳຂວາລາວຂາດ.
ພະເຍຊູກ່າວຕອນທີ່ພະອົງເຂົ້າແຊກວ່າ “ຢ່າເສຍເທີ້ນ.” ໂດຍບາຍຫູຂອງມາລະໂຂພະອົງເຮັດໃຫ້ແຜລາວດີ. ຈາກນັ້ນພະອົງຈຶ່ງສອນບົດຮຽນທີ່ສຳຄັນ ໂດຍສັ່ງເປໂຕວ່າ “ຈົ່ງເອົາດາບຂອງທ່ານໃສ່ໄວ້ໃນຝັກມັນ ເພາະວ່າຄົນທັງປວງທີ່ຖືເອົາດາບຈະຈິບຫາຍດ້ວຍດາບ. ທ່ານຄຶດວ່າເຮົາອາດອ້ອນວອນພະບິດາຂອງເຮົາບໍ່ໄດ້ຫຼື ແລະໃນບັດດຽວນີ້ ພະເຈົ້າຈະປະທານພວກທູດສະຫວັນໃຫ້ແກ່ເຮົາຫຼາຍກວ່າສິບສອງກອງທັບ”?
ພະເຍຊູເຕັມໃຈທີ່ຈະຖືກຈັບກຸມ ເພາະພະອົງອະທິບາຍວ່າ “ເຫດສັນນີ້ພະຄຳພີທີ່ຈົດວ່າ ຈຳເປັນຢ່າງນັ້ນ ຈະເປັນທີ່ສຳເລັດຢ່າງໃດ”? ແລະພະອົງກ່າວເສີມວ່າ “ຈອກທີ່ພະບິດາໄດ້ປະທານໃຫ້ເຮົາ ເຮົາຈະບໍ່ກິນຫຼື”? ພະເຍຊູຍິນຍອມກັບຄວາມປະສົງຂອງພະເຈົ້າສຳລັບພະອົງໂດຍຕະຫຼອດ!
ຕໍ່ຈາກນັ້ນ ພະເຍຊູກ່າວຕໍ່ຝູງຊົນ. ພະອົງຖາມວ່າ “ທ່ານທັງຫຼາຍຖືດາບຖືໄມ້ຄ້ອນອອກມາຈະຈັບເຮົາເໝືອນດັ່ງຈະຈັບຄົນຂະໂມຍຫຼື. ເຮົາໄດ້ນັ່ງຢູ່ໃນທ່າມກາງທ່ານທັງຫຼາຍທຸກວັນສັ່ງສອນໃນວິຫານ ແລະທ່ານທັງຫຼາຍບໍ່ໄດ້ຈັບເຮົາ. ແຕ່ວ່າການທັງຫຼາຍນີ້ໄດ້ບັງເກີດມາ ເພື່ອພະຄຳພີຂອງພວກຜູ້ທຳນວາຍຈະໄດ້ສຳເລັດແລ້ວ.”
ໃນຕອນນັ້ນ ພວກທະຫານ ນາຍທະຫານ ພ້ອມທັງເຈົ້າໜ້າທີ່ຂອງພວກຢິວໄດ້ຈັບພະເຍຊູແລະມັດພະອົງໄວ້. ເມື່ອເຫັນເຊັ່ນນີ້ ເຫຼົ່າອັກຄະສາວົກຈຶ່ງປະພະເຍຊູແລ້ວໜີໄປ. ຢ່າງໃດກໍດີ ຊາຍຫນຸ່ມຄົນໜຶ່ງຄືຈະແມ່ນສາວົກມາລະໂກຍັງຢູ່ທ່າມກາງຝູງຊົນ. ລາວອາດຢູ່ໃນເຮືອນຫຼັງທີ່ພະເຍຊູສະຫຼອງປັດສະຄາ ແລະຫຼັງຈາກນັ້ນໄດ້ຕິດຕາມຝູງຊົນອອກຈາກທີ່ນັ້ນ. ຢ່າງໃດກໍຕາມ ຕອນນີ້ຄົນພວກນັ້ນຈື່ລາວໄດ້ແລະພະຍາຍາມຈະຈັບລາວ. ແຕ່ລາວໄດ້ປະເສື້ອຄຸມຜ້າປ່ານໄວ້ແລ້ວກໍໜີໄປ. ມັດທາຽ 26:47-56; ມາລະໂກ 14:43-52; ລຶກາ 22:47-53; ໂຍຮັນ 17:12; 18:3-12.
▪ ເປັນຫຍັງຢູດາແນ່ໃຈວ່າເຂົາຈະພໍ້ພະເຍຊູໃນສວນເຄດເຊມາເນ?
▪ ພະເຍຊູສະແດງຄວາມຫ່ວງໃຍຕໍ່ເຫຼົ່າອັກຄະສາວົກຂອງພະອົງຢ່າງໃດ?
▪ ເປໂຕເຮັດຫຍັງເພື່ອປົກປ້ອງພະເຍຊູ ແຕ່ພະເຍຊູກ່າວຕໍ່ເປໂຕຢ່າງໃດ?
▪ ພະເຍຊູເຜີຍໃຫ້ເຫັນວ່າ ພະອົງຍິນຍອມກັບຄວາມປະສົງຂອງພະເຈົ້າສຳລັບພະອົງໂດຍຕະຫຼອດດ້ວຍວິທີໃດ?
▪ ເມື່ອເຫຼົ່າອັກຄະສາວົກໄດ້ປະພະເຍຊູໄປ ໃຜຍັງຢູ່ຕໍ່ ແລະເກີດຫຍັງຂຶ້ນກັບລາວ?