ບົດສິບສາມ
ຫາກຊີວິດສົມລົດຢູ່ໃນຂັ້ນວິກິດ
1, 2. ເມື່ອຊີວິດສົມລົດຢູ່ພາຍໃຕ້ຄວາມຕຶງຄຽດ ຄວນຈະຖາມຄຳຖາມອັນໃດ?
ໃນປີ 1988 ຍິງຊາວອີຕາລີຄົນໜຶ່ງຊື່ລູຊີອາຮູ້ສຶກຫົດຫູ່ໃຈຫຼາຍ.a ຫຼັງຈາກສິບປີ ຊີວິດສົມລົດຂອງນາງພວມຈະຈົບລົງ. ນາງພະຍາຍາມຫຼາຍເທື່ອທີ່ຈະຄືນດີກັບສາມີ ແຕ່ບໍ່ໄດ້ຜົນ. ດັ່ງນັ້ນ ນາງຈຶ່ງແຍກໄປຢູ່ຕ່າງຫາກຍ້ອນວ່າເຂົ້າກັນບໍ່ໄດ້ແລະຈາກນັ້ນຕ້ອງຜະເຊີນກັບການລ້ຽງດູລູກສາວສອງຄົນດ້ວຍຕົນເອງ. ເມື່ອເບິ່ງຄືນຫຼັງເຖິງຕອນນັ້ນລູຊີອາເລົ່າວ່າ “ຂ້ອຍໝັ້ນໃຈວ່າບໍ່ມີສິ່ງໃດຈະຮັກສາຊີວິດສົມລົດຂອງເຮົາໄວ້ໄດ້.”
2 ຫາກເຈົ້າພວມມີບັນຫາໃນຊີວິດສົມລົດ ເຈົ້າອາດເຂົ້າໃຈໄດ້ວ່າລູຊີອາຮູ້ສຶກຢ່າງໃດ. ຊີວິດສົມລົດຂອງເຈົ້າອາດຕົກຢູ່ໃນຄວາມຫຍຸ້ງຍາກແລະເຈົ້າອາດສົງໄສວ່າຊີວິດສົມລົດຂອງເຈົ້າຈະພົ້ນໄພໄດ້ຫຼືບໍ່. ຫາກເປັນກໍລະນີເຊັ່ນນີ້ ເຈົ້າຈະພົບວ່າເປັນປະໂຫຍດທີ່ຈະພິຈາລະນາຄຳຖາມນີ້: ຂ້ອຍໄດ້ຕິດຕາມຄຳແນະນຳທີ່ດີທຸກຢ່າງຊຶ່ງພະເຈົ້າປະທານໃຫ້ໃນຄຳພີໄບເບິນເພື່ອຊ່ວຍໃຫ້ຊີວິດສົມລົດປະສົບຜົນສຳເລັດບໍ?—ຄຳເພງ 119:105.
3. ເຖິງແມ່ນວ່າການປະຮ້າງກັນກາຍເປັນທີ່ນິຍົມກັນກໍຕາມ ມີການລາຍງານເຖິງປະຕິກິລິຍາເຊັ່ນໃດໃນຫມູ່ຄົນຈຳນວນຫຼາຍທີ່ປະຮ້າງກັນແລະຄອບຄົວຂອງເຂົາ?
3 ເມື່ອເກີດຄວາມຕຶງຄຽດຢ່າງຮຸນແຮງລະຫວ່າງສາມີກັບພັນລະຍາ ການເລີກລົ້ມສາຍສົມລົດລົງອາດຈະເບິ່ງຄືເປັນແນວປະຕິບັດທີ່ງ່າຍທີ່ສຸດ. ແຕ່ຂະນະທີ່ຫຼາຍປະເທດມີຄອບຄົວທີ່ແຕກແຍກເພີ່ມຂຶ້ນຢ່າງໜ້າສະດຸ້ງ ການວິໄຈເມື່ອບໍ່ດົນມານີ້ສະແດງວ່າ ຊາຍແລະຍິງສ່ວນຫຼາຍທີ່ປະຮ້າງກັນເກີດຄວາມເສຍໃຈພາຍຫຼັງທີ່ປະກັນ. ຈຳນວນໜຶ່ງມີບັນຫາດ້ານສຸຂະພາບ ທັງທາງຮ່າງກາຍແລະທາງຈິດໃຈ ຫຼາຍກວ່າຄົນເຫຼົ່ານັ້ນທີ່ຍັງຮັກສາສາຍສົມລົດໄວ້. ຄວາມສັບສົນແລະການຂາດຄວາມສຸກຂອງລູກທີ່ພໍ່ແມ່ປະກັນນັ້ນມັກຈະຄົງຢູ່ຕໍ່ໄປເປັນເວລາຫຼາຍປີ. ພໍ່ແມ່ແລະເພື່ອນຂອງຄອບຄົວທີ່ແຕກແຍກກັນກໍເປັນທຸກດ້ວຍ. ແລະພະເຈົ້າຜູ້ລິເລີ່ມການສົມລົດມີທັດສະນະຢ່າງໃດກັບສະພາບການນັ້ນ?
4. ຄວນຈັດການກັບບັນຫາໃນຊີວິດສົມລົດໂດຍວິທີໃດ?
4 ດັ່ງທີ່ໄດ້ຊີ້ໃຫ້ເຫັນໃນບົດກ່ອນໆ ພະເຈົ້າມຸ່ງໝາຍໃຫ້ການສົມລົດເປັນການຜູກພັນຕະຫຼອດຊີວິດ. (ຕົ້ນເດິມ 2:24) ຖ້າເຊັ່ນນັ້ນ ເປັນຫຍັງຊີວິດສົມລົດຫຼາຍລາຍແທ້ໆ ຈຶ່ງລົ້ມເລີກ? ສິ່ງນັ້ນຄົງບໍ່ໄດ້ເກີດຂຶ້ນທັນທີທັນໃດ. ຕາມປົກກະຕິມັກຈະມີສັນຍານເຕືອນ. ບັນຫານ້ອຍໆ ໃນຊີວິດສົມລົດອາດໃຫຍ່ຂຶ້ນໆ ຈົນກະທັ່ງເບິ່ງຄືຈະເອົາຊະນະບໍ່ໄດ້. ແຕ່ຖ້າໄດ້ຈັດການກັບບັນຫາເຫຼົ່ານີ້ທັນທີໂດຍອາໄສຄຳພີໄບເບິນແລ້ວ ການແຕກແຍກໃນຊີວິດສົມລົດຫຼາຍລາຍອາດຫຼີກເວັ້ນໄດ້.
ຈົ່ງເບິ່ງຕາມຄວາມເປັນຈິງ
5. ສະພາບການອັນໃດທີ່ກົງກັບຄວາມເປັນຈິງຊຶ່ງຊີວິດສົມລົດບໍ່ວ່າລາຍໃດກໍຕາມຕ້ອງຜະເຊີນ?
5 ປັດໄຈສຳຄັນອັນໜຶ່ງທີ່ບາງເທື່ອນຳໄປສູ່ບັນຫາຕ່າງໆ ແມ່ນການທີ່ຄູ່ສົມລົດຝ່າຍໜຶ່ງຫຼືທັງສອງຝ່າຍອາດມີການຄາດໝາຍແບບທີ່ບໍ່ກົງກັບຄວາມເປັນຈິງ. ນິຍາຍຮັກ, ນິດຕະຍະສານ, ລາຍການໂທລະທັດ, ແລະພາບພະຍົນຊຶ່ງເປັນທີ່ນິຍົມອາດສ້າງຄວາມຫວັງແລະຄວາມຝັນທີ່ໄກລິບຈາກຊີວິດແທ້. ເມື່ອຄວາມຝັນເຫຼົ່ານີ້ບໍ່ເປັນຈິງ ຄົນເຮົາອາດຮູ້ສຶກວ່າຖືກຫຼອກ, ບໍ່ພໍໃຈ, ຊ້ຳຍັງຮູ້ສຶກລະທົມຂົມຂື່ນ. ແຕ່ບຸກຄົນທີ່ບໍ່ສົມບູນສອງຄົນຈະປະສົບຄວາມສຸກໃນຊີວິດສົມລົດໄດ້ຢ່າງໃດ? ຕ້ອງພະຍາຍາມບາກບັ່ນເພື່ອໃຫ້ໄດ້ມາຊຶ່ງສາຍສຳພັນທີ່ປະສົບຜົນສຳເລັດ.
6. (ກ) ຄຳພີໄບເບິນໃຫ້ທັດສະນະທີ່ສົມດຸນອັນໃດໃນເລື່ອງຊີວິດສົມລົດ? (ຂ) ມີອັນໃດແດ່ທີ່ເປັນເຫດບາງຢ່າງຂອງຄວາມບໍ່ລົງຮອຍກັນໃນຊີວິດສົມລົດ?
6 ຄຳພີໄບເບິນໃຊ້ໄດ້ຜົນແທ້. ພະຄຳພີຍອມຮັບວ່າຊີວິດສົມລົດນຳມາຊຶ່ງຄວາມສຸກ ແຕ່ຍັງເຕືອນດ້ວຍວ່າ ຄົນເຫຼົ່ານັ້ນທີ່ແຕ່ງດອງ “ຈະມີຄວາມຍາກລຳບາກໃນເນື້ອໜັງ.” (1 ໂກລິນໂທ 7:28) ດັ່ງທີ່ຊີ້ຄັກແນ່ແລ້ວ ຄູ່ສົມລົດທັງສອງຝ່າຍເປັນຄົນບໍ່ສົມບູນແລະມີຄວາມໂອນອຽງທີ່ຈະເຮັດບາບ. ໂຄງສ້າງດ້ານຈິດໃຈແລະດ້ານອາລົມແລະການລ້ຽງດູທີ່ແຕ່ລະຝ່າຍໄດ້ຮັບມານັ້ນຕ່າງກັນ. ບາງເທື່ອຄູ່ສົມລົດບໍ່ເຫັນພ້ອມກັນໃນເລື່ອງເງິນ, ລູກ, ແລະຍາດພີ່ນ້ອງຂອງທັງສອງຝ່າຍ. ການບໍ່ມີເວລາພໍທີ່ຈະເຮັດສິ່ງຕ່າງໆ ດ້ວຍກັນແລະບັນຫາເລື່ອງເພດກໍອາດເປັນຕົ້ນເຫດຂອງຄວາມຂັດແຍ້ງກັນໄດ້.b ຕ້ອງໃຊ້ເວລາທີ່ຈະຈັດການກັບເລື່ອງດັ່ງນັ້ນ ແຕ່ຈົ່ງໃຫ້ມີກຳລັງໃຈ! ຄູ່ສົມລົດສ່ວນຫຼາຍສາມາດຜະເຊີນກັບບັນຫາດັ່ງກ່າວແລະພົບທາງແກ້ທີ່ທັງສອງຝ່າຍຍອມຮັບໄດ້.
ເວົ້າເລື່ອງທີ່ຜິດໃຈກັນ
7, 8. ຫາກມີຄວາມບາດໃຈຫຼືມີການເຂົ້າໃຈຜິດລະຫວ່າງຄູ່ສົມລົດ ອັນໃດເປັນວິທີຕາມຫຼັກພະຄຳພີໃນການຈັດການກັບເລື່ອງເຫຼົ່ານັ້ນ?
7 ຫຼາຍຄົນພົບວ່າຍາກທີ່ຈະສະຫງົບອາລົມຢູ່ໄດ້ເມື່ອເຂົາຖົກຖຽງເລື່ອງບາດໃຈກັນ, ຄວາມເຂົ້າໃຈຜິດ, ຫຼືຄວາມຜິດພາດສ່ວນຕົວ. ແທນທີ່ຈະເວົ້າຢ່າງກົງໆ ວ່າ “ຂ້ອຍຮູ້ສຶກວ່າເຈົ້າເຂົ້າໃຈຂ້ອຍຜິດ” ຝ່າຍໜຶ່ງອາດຈະສະແດງອາລົມອອກມາເກີນຄວນແລະເຮັດໃຫ້ບັນຫາຂະຫຍາຍຂຶ້ນ. ຫຼາຍຄົນຈະເວົ້າວ່າ “ເຈົ້າສົນໃຈແຕ່ຕົວເອງທໍ່ນັ້ນ” ຫຼື “ເຈົ້າບໍ່ຮັກຂ້ອຍ.” ເນື່ອງຈາກບໍ່ຢາກເຂົ້າສູ່ການຜິດຖຽງກັນ ອີກຝ່າຍໜຶ່ງອາດບໍ່ຍອມຕອບໂຕ້.
8 ແນວທາງດີກວ່າທີ່ຄວນຕິດຕາມແມ່ນເອົາໃຈໃສ່ຟັງຄຳແນະນຳຂອງຄຳພີໄບເບິນທີ່ວ່າ “ເມື່ອຮ້າຍ ຢ່າກະທຳຜິດ ຢ່າໃຫ້ຕາເວັນຕົກເວລາຍັງຮ້າຍຢູ່.” (ເອເຟດ 4:26) ມີການຖາມຄູ່ສົມລົດທີ່ມີຄວາມສຸກຄູ່ໜຶ່ງຕອນມື້ຄົບຮອບແຕ່ງງານ 60 ປີຂອງເຂົາກ່ຽວກັບເລື່ອງເຄັດລັບຂອງຊີວິດສົມລົດຂອງເຂົາທີ່ປະສົບຜົນສຳເລັດ. ຜູ້ທີ່ເປັນສາມີຕອບວ່າ “ເຮົາໄດ້ຮຽນຮູ້ທີ່ຈະບໍ່ເຂົ້ານອນຈົນກວ່າຈະໄດ້ຈັດການກັບເລື່ອງຜິດໃຈກັນນັ້ນໃຫ້ຮຽບຮ້ອຍ ບໍ່ວ່າສິ່ງນັ້ນຈະເປັນເລື່ອງເລັກນ້ອຍຊ່ຳໃດກໍຕາມ.”
9. (ກ) ໃນພະຄຳພີມີການລະບຸວ່າອັນໃດເປັນສ່ວນສຳຄັນຍິ່ງຂອງການສື່ຄວາມ? (ຂ) ຫຼາຍເທື່ອຄູ່ສົມລົດຕ້ອງເຮັດອັນໃດ ເຖິງແມ່ນວ່າການເຮັດເຊັ່ນນັ້ນຕ້ອງມີຄວາມກ້າແລະຄວາມຖ່ອມໃຈ?
9 ເມື່ອສາມີແລະພັນລະຍາບໍ່ເຫັນພ້ອມກັນ ແຕ່ລະຝ່າຍຈຳຕ້ອງ “ວ່ອງໄວໆ ຈະຟັງ ໃຫ້ຊ້າໆ ຈະເວົ້າ ໃຫ້ຊ້າໆ ຈະຮ້າຍ.” (ຍາໂກໂບ 1:19) ຫຼັງຈາກຮັບຟັງຢ່າງຖ້ວນຖີ່ແລ້ວ ທັງຄູ່ ອາດເຫັນຄວາມຈຳເປັນຕ້ອງຂໍໂທດ. (ຍາໂກໂບ 5:16) ການເວົ້າດ້ວຍຄວາມຈິງໃຈວ່າ “ຂໍໂທດທີ່ເຮັດໃຫ້ເຈົ້າເສຍໃຈ” ຕ້ອງໃຊ້ຄວາມຖ່ອມແລະຄວາມກ້າ. ແຕ່ການຈັດການກັບຄວາມຜິດໃຈກັນດ້ວຍທ່າທີເຊັ່ນນີ້ຈະໄດ້ຜົນດີຫຼາຍໃນການຊ່ວຍຄູ່ສົມລົດບໍ່ພຽງແຕ່ແກ້ບັນຫາຂອງເຂົາເທົ່ານັ້ນ ແຕ່ຍັງຊ່ວຍພັດທະນາຄວາມອົບອຸ່ນແລະຄວາມສະໜິດສະໜົມທີ່ຈະເຮັດໃຫ້ເຂົາປະສົບຄວາມພໍໃຈຫຼາຍຂຶ້ນໃນການເປັນເພື່ອນກັນແລະກັນ.
ການໃຫ້ສິ່ງອັນຄວນໄດ້ໃນຊີວິດສົມລົດ
10. ວິທີປ້ອງກັນເຊັ່ນໃດທີ່ໂປໂລແນະນຳຄລິດສະຕຽນຊາວໂກລິນໂທຊຶ່ງອາດນຳມາໃຊ້ໄດ້ກັບຄລິດສະຕຽນໃນທຸກມື້ນີ້?
10 ເມື່ອອັກຄະສາວົກໂປໂລຂຽນເຖິງຊາວໂກລິນໂທ ທ່ານແນະນຳໃຫ້ເຮັດການສົມລົດ “ເນື່ອງດ້ວຍການປະພຶດຜິດທາງເພດແພ່ຫຼາຍ.” (1 ໂກລິນໂທ 7:2, ລ.ມ.) ໂລກໃນທຸກມື້ນີ້ຊົ່ວຮ້າຍຄືກັນກັບເມືອງໂກລິນໂທບູຮານ ຫຼືຊົ່ວຮ້າຍຍິ່ງກວ່າອີກ. ເລື່ອງຜິດສິນທຳທີ່ຊາວໂລກສົນທະນາກັນຢ່າງເປີດເຜີຍ, ວິທີທີ່ເຂົາແຕ່ງກາຍແບບບໍ່ສຸພາບຮຽບຮ້ອຍ, ແລະເລື່ອງທາງກາມະລົມທີ່ມີສະແດງຢ່າງເດັ່ນຊັດໃນນິດຕະຍະສານແລະໜັງສື, ໂທລະທັດ, ຫຼືພາບພະຍົນ, ລ້ວນກະຕຸ້ນໃຫ້ເກີດຄວາມປາຖະໜາທາງເພດແບບຜິດທຳນອງຄອງທຳ. ສຳລັບຊາວໂກລິນໂທທີ່ມີຊີວິດຢູ່ໃນສະພາບແວດລ້ອມຄ້າຍກັນນັ້ນ ອັກຄະສາວົກໂປໂລກ່າວວ່າ “ການແຕ່ງດອງນັ້ນດີກວ່າມີໃຈເຜົາຮ້ອນດ້ວຍກາມະລາຄະ.”—1 ໂກລິນໂທ 7:9, ປ.ມ.
11, 12. (ກ) ອັນໃດທີ່ສາມີແລະພັນລະຍາຄວນໃຫ້ກັນແລະກັນ ແລະຄວນໃຫ້ດ້ວຍນ້ຳໃຈແບບໃດ? (ຂ) ຄວນຈັດການກັບສະຖານະການໂດຍວິທີໃດຫາກຕ້ອງມີການງົດສິ່ງອັນຄວນໄດ້ໃນຊີວິດສົມລົດຈັກໄລຍະໜຶ່ງ?
11 ເພາະສະນັ້ນ ຄຳພີໄບເບິນສັ່ງຄລິດສະຕຽນທີ່ສົມລົດແລ້ວວ່າ “ສາມີຄວນໃຫ້ແກ່ພັນລະຍາຂອງຕົນຕາມທີ່ນາງຄວນໄດ້ຮັບ ແຕ່ພັນລະຍາຄວນກະທຳເຊັ່ນກັນຕໍ່ສາມີຂອງຕົນດ້ວຍ.” (1 ໂກລິນໂທ 7:3, ລ.ມ.) ຂໍໃຫ້ສັງເກດວ່າ ມີການເນັ້ນເລື່ອງການໃຫ້—ບໍ່ແມ່ນການຮຽກຮ້ອງເອົາ. ເພດສຳພັນໃນຊີວິດສົມລົດໃຫ້ຄວາມພໍໃຈຢ່າງແທ້ຈິງໄດ້ຕໍ່ເມື່ອຕ່າງຄົນຕ່າງຄຳນຶງເຖິງຄວາມພໍໃຈຂອງອີກຝ່າຍໜຶ່ງ. ຕົວຢ່າງວ່າ ຄຳພີໄບເບິນສັ່ງສາມີໃຫ້ປະຕິບັດກັບພັນລະຍາ “ຕາມຄວາມຮູ້.” (1 ເປໂຕ 3:7) ນີ້ເປັນຄວາມຈິງໂດຍສະເພາະຢ່າງຍິ່ງໃນເລື່ອງການໃຫ້ແລະການຮັບສິ່ງອັນຄວນໄດ້ໃນຊີວິດສົມລົດ. ຫາກພັນລະຍາບໍ່ໄດ້ຮັບການປະຕິບັດຢ່າງນຸ່ມນວນແລ້ວ ນາງອາດຮູ້ສຶກວ່າຍາກທີ່ຈະພໍໃຈໃນດ້ານນີ້ຂອງຊີວິດສົມລົດ.
12 ມີບາງເທື່ອທີ່ຄູ່ສົມລົດອາດຕ້ອງຮອນສິດທີ່ຄວນຈະໄດ້ຂອງກັນແລະກັນໃນຊີວິດສົມລົດ. ອາດເປັນເຊັ່ນນີ້ກັບພັນລະຍາໃນໄລຍະໜຶ່ງຂອງເດືອນຫຼືເມື່ອນາງຮູ້ສຶກອ່ອນເພຍຫຼາຍ. (ທຽບກັບລະບຽບການພວກເລວີ 18:19.) ອາດເປັນເຊັ່ນນັ້ນກັບສາມີເມື່ອເຂົາພວມຈັດການກັບບັນຫາສຳຄັນໃນບ່ອນເຮັດການແລະຮູ້ສຶກໝົດພະລັງໃຈ. ກໍລະນີທີ່ງົດການໃຫ້ສິ່ງອັນຄວນໄດ້ໃນຊີວິດສົມລົດຈັກຄາວໜຶ່ງນັ້ນ ຍ່ອມເປັນການຈັດການທີ່ດີທີ່ສຸດຖ້າທັງສອງຝ່າຍຫາລືກັນຢ່າງກົງໄປກົງມາເລື່ອງສະພາບການນັ້ນແລະເຫັນພ້ອມກັນໂດຍ “ທັງສອງຝ່າຍຍິນຍອມ.” (1 ໂກລິນໂທ 7:5, ລ.ມ.) ການເຮັດເຊັ່ນນີ້ຈະປ້ອງກັນບໍ່ໃຫ້ຝ່າຍໃດຝ່າຍໜຶ່ງຟ້າວລົງຄວາມເຫັນຜິດໆ. ແຕ່ຖ້າພັນລະຍາຕັ້ງໃຈຮອນສິດຂອງສາມີ ຫຼືຫາກສາມີຈົງໃຈບໍ່ໃຫ້ສິ່ງອັນຄວນໄດ້ໃນຊີວິດສົມລົດດ້ວຍທ່າທີທີ່ສະແດງຄວາມຮັກແລ້ວ ອາດເປີດໂອກາດໃຫ້ຄູ່ຂອງເຂົາຕົກເຂົ້າສູ່ການລໍ້ໃຈໄດ້. ໃນສະຖານະການເຊັ່ນນັ້ນ ບັນຫາອາດເກີດຂຶ້ນໃນຊີວິດສົມລົດໄດ້.
13. ຄລິດສະຕຽນຈະຮັກສາຄວາມຄຶດຂອງຕົນໃຫ້ສະອາດໄດ້ໂດຍວິທີໃດ?
13 ເຊັ່ນດຽວກັບຄລິດສະຕຽນທຸກຄົນ ຜູ້ຮັບໃຊ້ທີ່ສົມລົດແລ້ວຂອງພະເຈົ້າຕ້ອງຫຼີກເວັ້ນສື່ລາມົກ ຊຶ່ງອາດກໍ່ໃຫ້ເກີດຄວາມປາຖະໜາທີ່ບໍ່ສະອາດແລະຜິດທຳມະຊາດ. (ໂກໂລດ 3:5) ເຂົາຕ້ອງລະວັງຄວາມຄຶດແລະການກະທຳຂອງຕົນເມື່ອຕິດຕໍ່ກ່ຽວຂ້ອງກັບສະມາຊິກທຸກຄົນທີ່ເປັນເພດກົງກັນຂ້າມ. ພະເຍຊູເຕືອນວ່າ “ທຸກຄົນທີ່ເບິ່ງຍິງຜູ້ໜຶ່ງດ້ວຍໃຈຄຶດຢາກໄດ້ໃນຍິງນັ້ນ ຜູ້ນັ້ນໄດ້ຫຼິ້ນຊູ້ສູ່ໃນໃຈເອງກັບຍິງນັ້ນແລ້ວ.” (ມັດທາຽ 5:28) ໂດຍເອົາຄຳແນະນຳຂອງຄຳພີໄບເບິນກ່ຽວກັບເລື່ອງເພດມາໃຊ້ ຄູ່ສົມລົດໜ້າຈະສາມາດຫຼີກເວັ້ນການຕົກເຂົ້າສູ່ການລໍ້ໃຈແລະເຮັດການຫຼິ້ນຊູ້. ເຂົາສາມາດມີຄວາມສຸກກັບການມີເພດສຳພັນທີ່ໜ້າຍິນດີໃນຊີວິດສົມລົດຕໍ່ໄປໄດ້ຊຶ່ງເລື່ອງເພດຖືວ່າແມ່ນຂອງປະທານອັນມີຄ່າທີ່ດີງາມຈາກພະເຢໂຫວາ ຜູ້ລິເລີ່ມການສົມລົດ.—ສຸພາສິດ 5:15-19.
ເຫດຜົນຕາມຫຼັກຄຳພີໄບເບິນສຳລັບການປະຮ້າງ
14. ບາງເທື່ອມີສະຖານະການໜ້າເສົ້າອັນໃດເກີດຂຶ້ນ? ເພາະເຫດໃດ?
14 ໜ້າຍິນດີ ໃນຊີວິດສົມລົດຂອງຄລິດສະຕຽນສ່ວນຫຼາຍ ບັນຫາໃດໆ ທີ່ເກີດຂຶ້ນສາມາດຈັດການໄດ້. ແຕ່ບາງເທື່ອບໍ່ເປັນເຊັ່ນນັ້ນ. ເພາະວ່າມະນຸດບໍ່ສົມບູນແລະຢູ່ໃນໂລກທີ່ມີບາບຊຶ່ງຢູ່ພາຍໃຕ້ການຄວບຄຸມຂອງຊາຕານ ຊີວິດສົມລົດບາງລາຍຈຶ່ງເຖິງຂັ້ນວິກິດ. (1 ໂຍຮັນ 5:19) ຄລິດສະຕຽນຄວນຮັບມືກັບສະພາບການທີ່ລຳບາກເຊັ່ນນີ້ຢ່າງໃດ?
15. (ກ) ອັນໃດເປັນເຫດຜົນດຽວຕາມຫຼັກພະຄຳພີສຳລັບການປະຮ້າງແລ້ວແຕ່ງດອງໃໝ່ໄດ້? (ຂ) ເປັນຫຍັງບາງຄົນຕັດສິນໃຈທີ່ຈະບໍ່ປະຮ້າງກັບຄູ່ສົມລົດທີ່ບໍ່ສັດຊື່ຕໍ່ຕົນ?
15 ດັ່ງທີ່ກ່າວໄວ້ໃນບົດ 2 ຂອງໜັງສືນີ້ ການຜິດປະເວນີເປັນເຫດຜົນດຽວຕາມຫຼັກຄຳພີໄບເບິນສຳລັບການປະຮ້າງແລ້ວແຕ່ງດອງໃໝ່ໄດ້.c (ມັດທາຽ 19:9) ຫາກເຈົ້າມີຫຼັກຖານຊັດວ່າ ຄູ່ສົມລົດຂອງເຈົ້າບໍ່ສັດຊື່ຕໍ່ເຈົ້າ ເຈົ້າກໍຜະເຊີນກັບການຕັດສິນໃຈທີ່ລຳບາກ. ເຈົ້າຈະຮັກສາສາຍສົມລົດໄວ້ຫຼືວ່າຈະປະຮ້າງ? ບໍ່ມີກົດເກນ. ຄລິດສະຕຽນບາງຄົນຍົກໂທດທັງສິ້ນໃຫ້ຄູ່ສົມລົດທີ່ກັບໃຈແທ້ຈິງແລະສາຍສົມລົດທີ່ຮັກສາໄວ້ນັ້ນໄດ້ກັບກາຍເປັນດີ. ຄົນອື່ນໄດ້ຕັດສິນໃຈບໍ່ປະຮ້າງເພາະເຫັນແກ່ລູກ.
16. (ກ) ມີປັດໄຈອັນໃດແດ່ທີ່ໄດ້ກະຕຸ້ນບາງຄົນໃຫ້ປະຮ້າງກັບຄູ່ສົມລົດທີ່ເຮັດຜິດ? (ຂ) ເມື່ອຝ່າຍທີ່ບໍ່ມີຄວາມຜິດຕັດສິນໃຈທີ່ຈະປະຮ້າງຫຼືບໍ່ປະຮ້າງນັ້ນ ເປັນຫຍັງບໍ່ຄວນທີ່ໃຜໆ ຈະວິພາກວິຈານການຕັດສິນໃຈຂອງເຂົາ?
16 ໃນອີກດ້ານໜຶ່ງ ການກະທຳທີ່ຜິດບາບອາດຍັງຜົນໃຫ້ເກີດການຕັ້ງທ້ອງຫຼືເປັນໂລກຕິດຕໍ່ທາງເພດ. ຫຼືບາງທີລູກອາດຈຳຕ້ອງໄດ້ຮັບການປົກປ້ອງຈາກພໍ່ຫຼືແມ່ທີ່ເຮັດຜິດທາງເພດ. ປາກົດຊັດວ່າ ມີຫຼາຍໆ ສິ່ງທີ່ຄວນພິຈາລະນາກ່ອນເຮັດການຕັດສິນໃຈ. ຢ່າງໃດກໍດີ ຫາກເຈົ້າຮູ້ເລື່ອງການນອກໃຈຂອງຄູ່ສົມລົດຂອງເຈົ້າແລ້ວ ແລະຫຼັງຈາກນັ້ນກັບມີເພດສຳພັນກັບຄູ່ຂອງເຈົ້າອີກ ດັ່ງນີ້ເຈົ້າສະແດງວ່າ ເຈົ້າໃຫ້ອະໄພຄູ່ສົມລົດຂອງເຈົ້າແລ້ວແລະປາຖະໜາຈະຮັກສາສາຍສົມລົດໄວ້. ເຫດຜົນຂອງການປະຮ້າງແລ້ວແຕ່ງດອງໃໝ່ໄດ້ຕາມຫຼັກພະຄຳພີຈຶ່ງເປັນໂມຄະໄປ. ບໍ່ຄວນມີໃຜໄປຫຍຸ້ງເລື່ອງຂອງຄົນອື່ນແລ້ວພະຍາຍາມຊັກຈູງການຕັດສິນໃຈຂອງເຈົ້າ ອີກທັງບໍ່ຄວນທີ່ໃຜໆ ຈະວິພາກວິຈານການຕັດສິນໃຈທີ່ເຈົ້າເຮັດລົງໄປ. ເຈົ້າຈະຕ້ອງທົນຢູ່ກັບຜົນທີ່ເກີດຈາກສິ່ງທີ່ເຈົ້າຕັດສິນໃຈນັ້ນ. “ແຕ່ລະຄົນຈະແບກພາລະຂອງຕົນເອງ.”—ຄາລາຊີ 6:5, ລ.ມ.
ເຫດຜົນສຳລັບການແຍກກັນຢູ່
17. ຫາກບໍ່ມີການເຮັດຜິດປະເວນີ ພະຄຳພີວາງຂໍ້ຈຳກັດອັນໃດເລື່ອງການແຍກກັນຢູ່ຫຼືການປະຮ້າງ?
17 ມີສະຖານະການອັນຄວນບໍໃນການແຍກກັນຢູ່ຫຼືປະຮ້າງຈາກຄູ່ສົມລົດເຖິງແມ່ນວ່າເຂົາບໍ່ໄດ້ເຮັດຜິດປະເວນີ? ມີ ແຕ່ໃນກໍລະນີເຊັ່ນນັ້ນ ຄລິດສະຕຽນບໍ່ມີອິດສະຫຼະທີ່ຈະສົນໃຈຄົນອື່ນຊຶ່ງບໍ່ແມ່ນຄູ່ຂອງຕົນໂດຍມຸ່ງໝາຍຈະແຕ່ງດອງໃໝ່. (ມັດທາຽ 5:32) ຄຳພີໄບເບິນແມ່ນວ່າຈະອະນຸຍາດໃຫ້ມີການແຍກກັນຢູ່ເຊັ່ນນັ້ນກໍຕາມ ໄດ້ລະບຸວ່າ ຄົນທີ່ແຍກກັນຢູ່ນັ້ນ ‘ຢ່າໃຫ້ໄປມີໃໝ່ຫຼືບໍ່ກໍໃຫ້ກັບຄືນດີກັບສາມີເກົ່າ.’ (1 ໂກລິນໂທ 7:11) ສະຖານະການເຖິງຂີດສຸດອັນໃດແດ່ທີ່ອາດເຮັດໃຫ້ການແຍກກັນຢູ່ເບິ່ງຄືວ່າເໝາະສົມ?
18, 19. ສະພາບການເຖິງຂີດສຸດອັນໃດແດ່ທີ່ອາດເຮັດໃຫ້ຄູ່ສົມລົດພິຈາລະນາຄວາມເໝາະສົມໃນເລື່ອງການແຍກກັນຢູ່ຢ່າງຖືກຕ້ອງຕາມກົດໝາຍຫຼືປະຮ້າງ ເຖິງແມ່ນວ່າອາດແຕ່ງດອງໃໝ່ບໍ່ໄດ້?
18 ຄອບຄົວອາດຍາກຈົນລົງຍ້ອນຄວາມຄ້ານຢ່າງເຫັນໄດ້ຊັດແລະນິດໄສທີ່ບໍ່ດີຂອງສາມີ.d ເຂົາອາດເອົາລາຍໄດ້ຂອງຄອບຄົວໄປເສຍການພະນັນຈົນໝົດຫຼືໃຊ້ເງິນນັ້ນເພື່ອຈູນເຈືອການຕິດຢາເສບຕິດຫຼືເຫຼົ້າ. ຄຳພີໄບເບິນຖະແຫຼງວ່າ “ຖ້າແມ່ນຜູ້ໃດບໍ່ຈັດຫາມາລ້ຽງຄົນເຫຼົ່ານັ້ນຊຶ່ງເປັນຂອງຕົນເອງ ແລະໂດຍສະເພາະຄົນເຫຼົ່ານັ້ນຊຶ່ງເປັນສະມາຊິກແຫ່ງຄອບຄົວຂອງຕົນ ຜູ້ນັ້ນກໍໄດ້ປະຕິເສດເສຍຊຶ່ງຄວາມເຊື່ອ ແລະນັບວ່າຊົ່ວຮ້າຍກວ່າຄົນທີ່ບໍ່ມີຄວາມເຊື່ອເລີຍດ້ວຍຊ້ຳ.” (1 ຕີໂມເຕ 5:8, ລ.ມ.) ຫາກຄົນເຊັ່ນນັ້ນບໍ່ຍອມປ່ຽນແນວທາງຂອງຕົນ ບາງທີຍັງເອົາເງິນທີ່ພັນລະຍາຫາມາໄດ້ນັ້ນໄປໃຊ້ໃນການກະທຳຊົ່ວຮ້າຍຂອງເຂົາ ພັນລະຍາກໍອາດເລືອກທີ່ຈະປົກປ້ອງສະຫວັດດີພາບຂອງນາງແລະຂອງລູກໆ ໄວ້ໂດຍການແຍກກັນຢູ່ຢ່າງຖືກຕ້ອງຕາມກົດໝາຍ.
19 ອາດມີການຄຳນຶງເຖິງການດຳເນີນຕາມກົດໝາຍເຊັ່ນນີ້ດ້ວຍຫາກຄູ່ສົມລົດໃຊ້ຄວາມຮຸນແຮງຢ່າງສຸດຂີດກັບຄູ່ຂອງເຂົາ ບາງທີທຸບຕີເຂົາຊ້ຳແລ້ວຊ້ຳອີກຈົນເຖິງຂັ້ນທີ່ສຸຂະພາບແລະແມ່ນແຕ່ຊີວິດຕົກຢູ່ໃນອັນຕະລາຍ. ນອກຈາກນີ້ ຫາກຄູ່ສົມລົດພະຍາຍາມຢ່າງບໍ່ລົດລະທີ່ຈະບັງຄັບໃຫ້ຄູ່ຂອງເຂົາລະເມີດພະບັນຊາຂອງພະເຈົ້າໂດຍວິທີໃດວິທີໜຶ່ງ ຝ່າຍທີ່ຖືກຄຸກຄາມອາດຄຳນຶງເຖິງການແຍກກັນຢູ່ດ້ວຍ ໂດຍສະເພາະຫາກເລື່ອງນັ້ນເຖິງຈຸດທີ່ຊີວິດຝ່າຍວິນຍານຕົກຢູ່ໃນອັນຕະລາຍ. ຝ່າຍທີ່ສ່ຽງອັນຕະລາຍອາດລົງຄວາມເຫັນວ່າ ວິທີດຽວທີ່ຈະ “ເຊື່ອຟັງພະເຈົ້າໃນຖານະເປັນຜູ້ຄອບຄອງຍິ່ງກວ່າຟັງມະນຸດ” ກໍຄືການແຍກກັນຢູ່ຢ່າງຖືກຕ້ອງຕາມກົດໝາຍ.—ກິດຈະການ 5:29, ລ.ມ.
20. (ກ) ໃນກໍລະນີທີ່ເກີດການແຕກຫັກໃນຄອບຄົວ ຫມູ່ເພື່ອນແລະຜູ້ເຖົ້າແກ່ທີ່ອາວຸໂສອາດສະເໜີແນະອັນໃດໃຫ້ ແລະພວກເຂົາບໍ່ຄວນສະເໜີອັນໃດ? (ຂ) ບຸກຄົນທີ່ແຕ່ງດອງແລ້ວບໍ່ຄວນໃຊ້ສິ່ງທີ່ຄຳພີໄບເບິນກ່າວເຖິງການແຍກກັນຢູ່ແລະການປະຮ້າງເປັນຂໍ້ແກ້ຕົວທີ່ຈະເຮັດອັນໃດ?
20 ໃນທຸກກໍລະນີຂອງການກະທຳຢ່າງໂຫດຮ້າຍຕໍ່ຄູ່ສົມລົດ ບໍ່ຄວນມີໃຜມາບີບຄັ້ນຝ່າຍບໍ່ຜິດໃຫ້ແຍກຫຼືຄົງຢູ່ຕໍ່ໄປກັບຄູ່ສົມລົດ. ຂະນະທີ່ຫມູ່ເພື່ອນແລະຜູ້ເຖົ້າແກ່ທີ່ອາວຸໂສອາດໃຫ້ການຊ່ວຍເຫຼືອແລະຄຳແນະນຳຕາມຫຼັກຄຳພີໄບເບິນ ຄົນເຫຼົ່ານີ້ບໍ່ອາດຮູ້ເລື່ອງລະອຽດທັງໝົດຂອງສິ່ງທີ່ເປັນໄປລະຫວ່າງສາມີແລະພັນລະຍາ. ສະເພາະພະເຢໂຫວາເທົ່ານັ້ນຮູ້ເລື່ອງນີ້. ແນ່ນອນ ພັນລະຍາຄລິດສະຕຽນຄົງຈະບໍ່ນັບຖືການຈັດກຽມຂອງພະເຈົ້າເລື່ອງການສົມລົດ ຫາກນາງໃຊ້ຂໍ້ອ້າງທີ່ບໍ່ສົມເຫດສົມຜົນເພື່ອໃຫ້ພົ້ນຈາກຊີວິດສົມລົດ. ແຕ່ຖ້າສະຖານະການທີ່ເປັນອັນຕະລາຍເຖິງຂີດສຸດມີຢູ່ເລື້ອຍໆ ກໍບໍ່ຄວນມີໃຜຈະວິພາກວິຈານນາງ ຫາກນາງເລືອກທີ່ຈະແຍກຈາກຄູ່ສົມລົດ. ອາດກ່າວໄດ້ເຊັ່ນດຽວກັນກັບສາມີຄລິດສະຕຽນຊຶ່ງຫາທາງແຍກຈາກຄູ່ສົມລົດ. “ເຮົາທຸກຄົນຈະຢືນຢູ່ຕໍ່ໜ້າບັນລັງແຫ່ງການພິພາກສາຂອງພະເຈົ້າ.”—ໂລມ 14:10, ລ.ມ.
ວິທີກອບກູ້ຊີວິດສົມລົດທີ່ແຕກສະຫຼາຍ
21. ປະສົບການອັນໃດສະແດງວ່າ ຄຳແນະນຳຂອງຄຳພີໄບເບິນໃນເລື່ອງຊີວິດສົມລົດນັ້ນໃຊ້ໄດ້ຜົນ?
21 ສາມເດືອນພາຍຫຼັງທີ່ລູຊີອາຊຶ່ງກ່າວເຖິງໃນຕອນຕົ້ນໄດ້ແຍກຈາກສາມີ ນາງໄດ້ພົບພະຍານພະເຢໂຫວາແລ້ວເລີ່ມສຶກສາຄຳພີໄບເບິນກັບພວກເຂົາ. ນາງອະທິບາຍວ່າ “ສິ່ງທີ່ເຮັດໃຫ້ຂ້ອຍປະຫຼາດໃຈຢ່າງຍິ່ງກໍແມ່ນຄຳພີໄບເບິນສະເໜີທາງແກ້ທີ່ໃຊ້ໄດ້ຜົນແທ້ໆ ສຳລັບບັນຫາຂອງຂ້ອຍ. ຫຼັງຈາກການສຶກສາພຽງອາທິດດຽວທໍ່ນັ້ນ ຂ້ອຍຕ້ອງການຈະຄືນດີກັບສາມີທັນທີ. ທຸກມື້ນີ້ຂ້ອຍເວົ້າໄດ້ວ່າ ພະເຢໂຫວາຮູ້ວິທີກອບກູ້ຊີວິດສົມລົດໃນຕອນສຸກເສີນ ເພາະຄຳສອນຂອງພະອົງຊ່ວຍຄູ່ສົມລົດໃຫ້ຮຽນຮູ້ວິທີທີ່ຈະໃຫ້ຄວາມນັບຖືຕໍ່ກັນ. ບໍ່ເປັນຄວາມຈິງດັ່ງທີ່ບາງຄົນອ້າງວ່າ ພະຍານພະເຢໂຫວາເຮັດໃຫ້ຄອບຄົວແຕກແຍກ. ໃນກໍລະນີຂອງຂ້ອຍ ສິ່ງທີ່ເປັນຈິງນັ້ນກົງກັນຂ້າມແທ້ໆ. ລູຊີອາຮຽນຮູ້ທີ່ຈະນຳຫຼັກການໃນຄຳພີໄບເບິນມາໃຊ້ໃນຊີວິດສົມລົດຂອງນາງ.
22. ຄູ່ສົມລົດທຸກຄູ່ຄວນມີຄວາມໝັ້ນໃຈໃນສິ່ງໃດ?
22 ລູຊີອາບໍ່ແມ່ນກໍລະນີຍົກເວັ້ນ. ຊີວິດສົມລົດໜ້າຈະເປັນພະພອນບໍ່ແມ່ນພາລະໜັກ. ເພື່ອຈຸດປະສົງນັ້ນ ພະເຢໂຫວາໄດ້ກຽມແຫຼ່ງຍອດຢ້ຽມທີ່ສຸດຂອງຄຳແນະນຳກ່ຽວກັບຊີວິດສົມລົດເທົ່າທີ່ເຄີຍບັນທຶກມາ—ພະຄຳອັນລ້ຳຄ່າຂອງພະອົງ. ຄຳພີໄບເບິນສາມາດເຮັດໃຫ້ “ຜູ້ທີ່ຂາດປະສົບການມີປັນຍາ.” (ຄຳເພງ 19:7-11, ລ.ມ.) ພະຄຳພີໄດ້ກອບກູ້ຊີວິດສົມລົດຫຼາຍໆ ລາຍທີ່ຢູ່ໃນຂັ້ນວິກິດ ແລະໄດ້ຊ່ວຍຊີວິດສົມລົດອີກຫຼາຍໆ ລາຍທີ່ມີບັນຫາຮ້າຍແຮງໃຫ້ດີຂຶ້ນ. ຂໍໃຫ້ຄູ່ສົມລົດທຸກຄູ່ມີຄວາມໝັ້ນໃຈເຕັມປ່ຽມໃນຄຳແນະນຳເລື່ອງຊີວິດສົມລົດທີ່ພະເຢໂຫວາພະເຈົ້າຈັດໄວ້ໃຫ້. ຄຳແນະນຳນັ້ນໃຊ້ໄດ້ຜົນແທ້ໆ!
a ເປັນຊື່ສົມມຸດ.
b ມີການພິຈາລະນາຂອບເຂດເຫຼົ່ານີ້ໃນບົດກ່ອນໆ.
c ຖ້ອຍຄຳໃນຄຳພີໄບເບິນທີ່ໄດ້ຮັບການແປວ່າ “ການຜິດປະເວນີ” ໝາຍລວມເຖິງການກະທຳທີ່ກ່ຽວກັບການຫຼິ້ນຊູ້, ການຮັກຮ່ວມເພດ, ການຮ່ວມເພດກັບສັດ, ແລະການກະທຳທີ່ເຈຕະນາແບບອື່ນໆ ຊຶ່ງບໍ່ຖືກທຳນອງຄອງທຳອັນກ່ຽວຂ້ອງກັບການໃຊ້ອະໄວຍະວະເພດ.
d ນີ້ບໍ່ໄດ້ໝາຍລວມເຖິງສະພາບການຊຶ່ງສາມີແມ່ນວ່າຈະມີຄວາມຕັ້ງໃຈ ກໍບໍ່ສາມາດຫາລ້ຽງຄອບຄົວໄດ້ເນື່ອງຈາກເຫດຜົນທີ່ເຂົາຄວບຄຸມບໍ່ໄດ້ ເຊັ່ນຄວາມເຈັບປ່ວຍຫຼືການຂາດໂອກາດໄດ້ຮັບການວ່າຈ້າງ.