ບົດຫົກ
ປະເດັນທີ່ເຮົາທຸກຄົນຕ້ອງປະເຊີນ
1, 2. (ກ) ປະເດັນອັນໃດທີ່ຊາຕານໄດ້ຍົກຂຶ້ນມາໃນສວນເອເດນ? (ຂ) ໃນຄຳເວົ້າຂອງຊາຕານ ມີການບົ່ງເຖິງປະເດັນນັ້ນຢ່າງໃດ?
ເຮົາເຂົ້າໄປພົວພັນກັບປະເດັນສຳຄັນທີ່ສຸດເທົ່າທີ່ມະນຸດເຄີຍປະສົບມາ. ຈຸດຢືນຂອງເຮົາກ່ຽວກັບປະເດັນນີ້ຈະກຳນົດອະນາຄົດຕະຫຼອດໄປຂອງເຮົາ. ປະເດັນນີ້ໄດ້ເກີດຂຶ້ນຕອນທີ່ມີການກະບົດໃນສວນເອເດນ. ຕອນນັ້ນຊາຕານໄດ້ຖາມເອວາວ່າ “ຈິງຫຼືພະເຈົ້າໄດ້ບອກຫ້າມວ່າ ພວກເຈົ້າຢ່າຊູກິນໝາກໄມ້ທຸກຢ່າງໃນສວນນີ້ຫຼື?” ນາງຕອບວ່າ ສະເພາະແຕ່ຕົ້ນໄມ້ຕົ້ນດຽວທີ່ພະເຈົ້າກ່າວວ່າ “ຢ່າກິນ . . . ຢ້ານວ່າພວກເຈົ້າຈະຕາຍໄປ.” ຈາກນັ້ນ ຊາຕານໄດ້ກ່າວຫາພະເຢໂຫວາແບບກົງໆດ້ວຍການເວົ້າຕົວະ ໂດຍບອກວ່າຊີວິດຂອງອາດາມແລະເອວາບໍ່ໄດ້ຂຶ້ນຢູ່ກັບການເຊື່ອຟັງພະເຈົ້າ. ຊາຕານອ້າງວ່າພະເຈົ້າກີດກັນສິ່ງດີຕ່າງໆໄວ້ຈາກມະນຸດທີ່ພະອົງໄດ້ສ້າງ ນັ້ນແມ່ນຄວາມສາມາດທີ່ຈະກຳນົດມາດຕະຖານໃນການດຳເນີນຊີວິດຂອງຕົນເອງ. ຊາຕານຢືນຢັນວ່າ “ພະເຈົ້າຮູ້ຢູ່ວ່າ ພວກເຈົ້າຫາກກິນໝາກໄມ້ນັ້ນໃນວັນໃດ ຕາຂອງພວກເຈົ້າຈະມືນແຈ້ງຂຶ້ນໃນວັນນັ້ນ ແລະພວກເຈົ້າຈະເປັນເໝືອນພະເຈົ້າ ຮູ້ຈັກການດີແລະຊົ່ວ.”—ຕົ້ນເດີມ 3:1-5.
2 ທີ່ຈິງ ຊາຕານກຳລັງບອກວ່າມະນຸດຈະມີສະພາບທີ່ດີກວ່າຖ້າເຂົາເຈົ້າຕັດສິນໃຈເອົາເອງ ແທນທີ່ຈະເຊື່ອຟັງກົດໝາຍຂອງພະເຈົ້າ. ດ້ວຍເຫດນີ້ ມັນຈຶ່ງທ້າທາຍວິທີທີ່ພະເຈົ້າປົກຄອງ. ສິ່ງນີ້ໄດ້ເຮັດໃຫ້ເກີດປະເດັນສຳຄັນຫຼາຍກ່ຽວກັບສິດທິສູງສຸດຂອງພະເຈົ້າໃນການປົກຄອງເອກະພົບ ນັ້ນແມ່ນ ສິດທິອັນຖືກຕ້ອງຂອງພະອົງທີ່ຈະປົກຄອງ. ມີການຍົກຄຳຖາມຂຶ້ນມາວ່າ ສິ່ງໃດຈະດີກວ່າສຳລັບມະນຸດ ວິທີທີ່ພະເຢໂຫວາປົກຄອງຫຼືການປົກຄອງທີ່ບໍ່ໝາຍເພິ່ງພະອົງ? ຕອນນັ້ນ ພະເຢໂຫວາສາມາດລົງໂທດອາດາມແລະເອວາໄດ້ທັນທີ ແຕ່ນັ້ນຈະບໍ່ເຮັດໃຫ້ປະເດັນກ່ຽວກັບສິດທິສູງສຸດໃນການປົກຄອງຂອງພະເຈົ້າໄດ້ຮັບການຈັດການຢ່າງເປັນຕາໜ້າພໍໃຈ. ສະນັ້ນ ພະເຈົ້າໄດ້ພິສູດໃຫ້ເຫັນຜົນຂອງການບໍ່ໝາຍເພິ່ງພະອົງແລະກົດໝາຍຂອງພະອົງ ໂດຍປ່ອຍໃຫ້ສັງຄົມມະນຸດດຳເນີນໄປໄລຍະໜຶ່ງທີ່ນານພໍສົມຄວນ.
3. ແມ່ນຫຍັງເປັນປະເດັນອັນດັບຮອງທີ່ຊາຕານຍົກຂຶ້ນມາ?
3 ການໂຈມຕີຂອງຊາຕານຕໍ່ສິດອຳນາດໃນການປົກຄອງຂອງພະເຢໂຫວາບໍ່ໄດ້ຈົບລົງພ້ອມກັບເຫດການທີ່ເກີດຂຶ້ນໃນສວນເອເດນ. ມັນເຮັດໃຫ້ຄວາມພັກດີຂອງຄົນອື່ນໆທີ່ມີຕໍ່ພະເຢໂຫວາເປັນເລື່ອງໜ້າສົງໄສ. ເລື່ອງນີ້ຈຶ່ງກາຍເປັນປະເດັນອັນດັບຮອງທີ່ກ່ຽວຂ້ອງກັນຢ່າງໃກ້ຊິດ. ການທ້າທາຍຂອງມັນລວມໄປເຖິງລູກຫຼານຂອງອາດາມແລະເອວາພ້ອມກັບເຫຼົ່າບຸດຝ່າຍວິນຍານທັງໝົດຂອງພະເຈົ້າ ແລະແມ່ນກະທັ່ງບຸດຫົວປີທີ່ພະເຢໂຫວາຮັກທີ່ສຸດ. ຕົວຢ່າງເຊັ່ນ ໃນສະໄໝຂອງໂຢບ ຊາຕານໄດ້ໂຕ້ຖຽງວ່າຄົນທີ່ຮັບໃຊ້ພະເຢໂຫວາບໍ່ແມ່ນຍ້ອນເຂົາເຈົ້າຮັກພະເຈົ້າແລະມັກການປົກຄອງຂອງພະອົງ ແຕ່ຍ້ອນຄວາມເຫັນແກ່ຕົວ. ມັນອ້າງວ່າເມື່ອຄົນເຮົາຕົກຢູ່ໃນຄວາມຫຍຸ້ງຍາກລຳບາກ ທຸກຄົນຈະຍອມຈຳນົນຕໍ່ຄວາມປາຖະໜາທີ່ເຫັນແກ່ຕົວ.—ໂຢບ 2:1-6; ຄຳປາກົດ 12:10.
ສິ່ງທີ່ປະຫວັດສາດໄດ້ພິສູດໃຫ້ເຫັນ
4, 5. ປະຫວັດສາດໄດ້ພິສູດໃຫ້ເຫັນຫຍັງໃນເລື່ອງທີ່ມະນຸດຈະກຳນົດບາດກ້າວຂອງຕົນເອງນັ້ນ?
4 ຈຸດສຳຄັນຂອງປະເດັນໃນເລື່ອງສິດທິສູງສຸດໃນການປົກຄອງເປັນດັ່ງນີ້: ພະເຈົ້າບໍ່ໄດ້ສ້າງມະນຸດໃຫ້ດຳເນີນຊີວິດຢ່າງປະສົບຜົນສຳເລັດໄດ້ໂດຍບໍ່ຕ້ອງໝາຍເພິ່ງການປົກຄອງຂອງພະອົງ. ເພື່ອຜົນປະໂຫຍດຂອງເຂົາເຈົ້າ ພະອົງສ້າງເຂົາເຈົ້າໃຫ້ເພິ່ງພາກົດໝາຍທີ່ຊອບທຳຂອງພະອົງ. ຜູ້ພະຍາກອນເຢເຣມີຍອມຮັບວ່າ “ໂອ້ພະເຢໂຫວາຂ້ານ້ອຍຮູ້ຈັກວ່າທາງມະນຸດບໍ່ເປັນແຫ່ງຕົນ ແລະຄົນທີ່ທຽວໄປກໍບໍ່ມີອຳນາດຈະນຳໜ້າບາດຕີນແຫ່ງຕົນໄປ. ໂອ້ພະເຢໂຫວາເຊີນຕີສອນຂ້ານ້ອຍ.” (ເຢເຣມີ 10:23, 24) ສະນັ້ນ ພະຄຳຂອງພະເຈົ້າກະຕຸ້ນວ່າ “ຈົ່ງປົງໃຈໃນພະເຢໂຫວາດ້ວຍສຸດຈິດ ແລະຢ່າວາງໃຈໃນສະຕິປັນຍາຂອງເຈົ້າ.” (ສຸພາສິດ 3:5) ພະເຈົ້າບໍ່ພຽງແຕ່ໄດ້ສ້າງມະນຸດໃຫ້ຢູ່ພາຍໃຕ້ກົດທາງຮ່າງກາຍເພື່ອຈະມີຊີວິດຢູ່ໄດ້ເທົ່ານັ້ນ ແຕ່ພະອົງຍັງໄດ້ຕັ້ງກົດທາງສິນລະທຳຂຶ້ນມາອີກ ເຊິ່ງຖ້າເຊື່ອຟັງກໍຈະເຮັດໃຫ້ມີຄວາມສາມັກຄີປອງດອງກັນໃນສັງຄົມ.
5 ປາກົດແຈ້ງວ່າ ພະເຈົ້າຮູ້ວ່າຄອບຄົວມະນຸດຈະບໍ່ປະສົບຜົນສຳເລັດໃນການປົກຄອງຕົນເອງຖ້າຫາກບໍ່ໝາຍເພິ່ງການປົກຄອງຂອງພະອົງ. ໃນຄວາມພະຍາຍາມອັນໄຮ້ປະໂຫຍດທີ່ບໍ່ຍອມໝາຍເພິ່ງການປົກຄອງຂອງພະເຈົ້າ ມະນຸດໄດ້ຕັ້ງລະບົບການປົກຄອງ, ເສດຖະກິດ, ແລະສາສະໜາໃນຮູບແບບຕ່າງໆຂຶ້ນ. ຄວາມແຕກຕ່າງເຫຼົ່ານີ້ເຮັດໃຫ້ຄົນເຮົາເກີດການຂັດແຍ່ງກັນຢູ່ເລື້ອຍໆເຊິ່ງຜົນທີ່ຕາມມາແມ່ນຄວາມຮຸນແຮງ, ສົງຄາມ, ແລະຄວາມຕາຍ. “ຄົນທັງຫຼາຍຄຸ້ມຄອງຄົນທັງຫຼາຍໃຫ້ເປັນການອັນຕະລາຍແກ່ເຂົາ.” (ຜູ້ເທສະໜາປ່າວປະກາດ 8:9) ນັ້ນແຫຼະເປັນສິ່ງທີ່ເກີດຂຶ້ນໃນຕະຫຼອດປະຫວັດສາດມະນຸດ ດັ່ງທີ່ບອກໄວ້ລ່ວງໜ້າໃນພະຄຳຂອງພະເຈົ້າ ເຫຼົ່າຄົນຊົ່ວແລະຄົນຕົ້ມຕົວະ “ຈະທຳຊົ່ວຮ້າຍມາກກວ່າຂຶ້ນໄປ.” (2 ຕີໂມເຕ 3:13) ໃນສະຕະວັດທີ 20 ນອກຈາກໄດ້ເຫັນມະນຸດບັນລຸຜົນສຳເລັດຫຼາຍທາງດ້ານວິທະຍາສາດແລະອຸດສາຫະກຳແລ້ວ ຍັງໄດ້ເຫັນຄວາມຫາຍະນະອັນຮ້າຍແຮງທີ່ສຸດກວ່າທີ່ຜ່ານມາ. ຖ້ອຍຄຳຂອງເຢເຣມີ 10:23 ໄດ້ຮັບການພິສູດເປັນຄວາມຈິງຢ່າງລົ້ນເຫຼືອທີ່ມະນຸດບໍ່ໄດ້ຖືກສ້າງຂຶ້ນເພື່ອຈະກຳນົດບາດກ້າວຂອງຕົນເອງ.
6. ໃນອີກບໍ່ດົນພະເຈົ້າຈະແກ້ໄຂເລື່ອງທີ່ມະນຸດບໍ່ໝາຍເພິ່ງພະອົງຢ່າງໃດ?
6 ຜົນກະທົບໄລຍະຍາວທີ່ເສົ້າສະຫຼົດໃຈຈາກການບໍ່ໝາຍເພິ່ງພະເຈົ້າ ໄດ້ສະແດງໃຫ້ເຫັນຈົນຄົບແລ້ວວ່າການປົກຄອງໂດຍມະນຸດບໍ່ມີທາງປະສົບຄວາມສຳເລັດເລີຍ. ການປົກຄອງຂອງພະເຈົ້າເປັນວິທີດຽວເທົ່ານັ້ນທີ່ຈະພາໄປສູ່ຄວາມສຸກ, ຄວາມເປັນເອກະພາບ, ສຸຂະພາບແຂງແຮງ, ແລະຊີວິດ. ພະຄຳຂອງພະເຈົ້າສະແດງໃຫ້ເຫັນວ່າ ຄວາມອົດທົນຂອງພະເຢໂຫວາຕໍ່ການປົກຄອງຂອງມະນຸດທີ່ບໍ່ໝາຍເພິ່ງພະອົງນັ້ນກຳລັງຈະສິ້ນສຸດແລ້ວ. (ມັດທາຍ 24:3-14; 2 ຕີໂມເຕ 3:1-5) ອີກບໍ່ດົນ ພະອົງຈະສະແດງສິດອຳນາດໃນການປົກຄອງເໜືອແຜ່ນດິນໂລກໂດຍການແຊກແຊງກິດຈະການຂອງມະນຸດ. ຄຳພີໄບເບິນບອກໄວ້ລ່ວງໜ້າວ່າ “ໃນຄາວກະສັດທັງຫຼາຍນັ້ນ [ການປົກຄອງຂອງມະນຸດທີ່ມີຢູ່ໃນເວລານີ້] ພະເຈົ້າແຫ່ງຟ້າສະຫວັນຈະຕັ້ງພະລາຊະອານາຈັກອັນໜຶ່ງໄວ້ [ໃນສະຫວັນ] ທີ່ຈະບໍ່ຈິບຫາຍສັກເທື່ອ ແລະພະລາຊະອານາຈັກນີ້ຈະບໍ່ກາຍເປັນຂອງຊາວປະເທດອື່ນ [ຈະບໍ່ມີວັນທີ່ມະນຸດຈະປົກຄອງແຜ່ນດິນໂລກອີກ] ມັນຈະໃຫ້ລາຊະອານາຈັກທັງປວງນີ້ [ໃນສະໄໝປັດຈຸບັນ] ຫັກແຕກຈິບຫາຍ ແຕ່ວ່າຕົວເອງຈະຕັ້ງຢູ່ສືບໆໄປເປັນນິດ.”—ດານຽນ 2:44.
ການລອດເຂົ້າໄປໃນໂລກໃໝ່ຂອງພະເຈົ້າ
7. ເມື່ອການປົກຄອງຂອງພະເຈົ້າເຮັດໃຫ້ການປົກຄອງຂອງມະນຸດສິ້ນສຸດລົງ ໃຜແດ່ຈະລອດ?
7 ເມື່ອການປົກຄອງຂອງພະເຈົ້າເຮັດໃຫ້ການປົກຄອງຂອງມະນຸດສິ້ນສຸດລົງ ໃຜແດ່ຈະລອດ? ຄຳພີໄບເບິນໃຫ້ຄຳຕອບດັ່ງນີ້: “ຄົນສັດຊື່ທັງຫຼາຍ [ຄົນເຫຼົ່ານັ້ນທີ່ສະໜັບສະຫນູນສິດທິໃນການປົກຄອງຂອງພະເຈົ້າ] ຈະຕັ້ງຢູ່ໃນແຜ່ນດິນ ແລະຄົນຍຸຕິທຳທັງຫຼາຍຈະຄ້າງຢູ່ຫັ້ນ. ແຕ່ວ່າຄົນຮ້າຍທັງຫຼາຍ [ຄົນເຫຼົ່ານັ້ນທີ່ບໍ່ສະໜັບສະຫນູນສິດທິໃນການປົກຄອງຂອງພະເຈົ້າ] ຈະຈິບຫາຍໄປຈາກແຜ່ນດິນ.” (ສຸພາສິດ 2:21, 22) ໃນທຳນອງດຽວກັນ ຜູ້ປະພັນຄຳເພງບອກວ່າ “ຍັງສັກເວລາໜ້ອຍແລະຄົນຮ້າຍຈະບໍ່ຢູ່ຕໍ່ໄປ . . . ຄົນຊອບທຳທັງຫຼາຍຈະມີແຜ່ນດິນໄວ້ ແລະເຂົາຈະຕັ້ງຢູ່ທີ່ນັ້ນສືບໆໄປເປັນນິດ.”—ຄຳເພງ 37:10, 29.
8. ພະເຈົ້າຈະພິສູດຢ່າງເຕັມທີເຖິງຄວາມຖືກຕ້ອງແຫ່ງສິດທິສູງສຸດໃນການປົກຄອງຂອງພະອົງຢ່າງໃດ?
8 ຫຼັງຈາກລະບົບຂອງຊາຕານຖືກທຳລາຍແລ້ວ ພະເຈົ້າຈະເອົາໂລກໃໝ່ເຂົ້າມາແທນ ເຊິ່ງຄວາມຮຸນແຮງທີ່ສ້າງຄວາມເສຍຫາຍ, ສົງຄາມ, ຄວາມທຸກຍາກ, ຄວາມທຸກທໍລະມານ, ຄວາມເຈັບປ່ວຍ, ແລະຄວາມຕາຍທີ່ເຮັດໃຫ້ມະນຸດຕົກເປັນທາດມາເປັນເວລາຫຼາຍພັນປີຈະຖືກກຳຈັດໃຫ້ໝົດໄປ. ຄຳພີໄບເບິນພັນລະນາໄວ້ຢ່າງງົດງາມເຖິງພະພອນຕ່າງໆທີ່ກຳລັງລໍຖ້າມະນຸດຊາດຜູ້ເຊື່ອຟັງດັ່ງນີ້: “ພະເຈົ້າຈະເຊັດນ້ຳຕາທັງຫຼາຍຈາກຕາຂອງເຂົາ ແລະຄວາມຕາຍຈະບໍ່ມີຕໍ່ໄປ ແລະຄວາມທຸກໂສກ ແລະຮ້ອງໄຫ້ ແລະເຈັບປວດຈະບໍ່ມີຕໍ່ໄປ ເຫດວ່າສິ່ງທັງຫຼາຍທີ່ເປັນເມື່ອກ່ອນນັ້ນກໍລ່ວງໄປແລ້ວ.” (ຄຳປາກົດ 21:3, 4) ໂດຍທາງລາຊະອານາຈັກທາງພາກສະຫວັນ ເຊິ່ງແມ່ນລັດຖະບານທີ່ພະຄລິດປົກຄອງ ພະເຈົ້າຈະພິສູດຢ່າງເຕັມທີເຖິງຄວາມຖືກຕ້ອງຂອງພະອົງທີ່ຈະເປັນຜູ້ມີສິດທິສູງສຸດໃນການປົກຄອງພວກເຮົາ.—ໂລມ 16:20; 2 ເປໂຕ 3:10-13; ຄຳປາກົດ 20:1-6.
ວິທີທີ່ບາງຄົນສະແດງຈຸດຢືນຕໍ່ປະເດັນນີ້
9. (ກ) ຄົນທີ່ຍັງຄົງຢູ່ໃນຄວາມພັກດີຕໍ່ພະເຢໂຫວາມີທັດສະນະຕໍ່ພະຄຳຂອງພະອົງຢ່າງໃດ? (ຂ) ໂນເອໄດ້ພິສູດເຖິງຄວາມພັກດີຂອງຕົນແນວໃດ ແລະເຮົາຈະຮັບປະໂຫຍດຈາກຕົວຢ່າງຂອງລາວຢ່າງໃດ?
9 ຕະຫຼອດປະຫວັດສາດ ມີຊາຍຍິງທີ່ມີຄວາມເຊື່ອໄດ້ພິສູດຄວາມພັກດີຕໍ່ພະເຢໂຫວາໃນຖານະຜູ້ມີສິດທິສູງສຸດໃນການປົກຄອງ. ເຂົາເຈົ້າຮູ້ວ່າຊີວິດຂອງຕົນຂຶ້ນຢູ່ກັບການຮັບຟັງແລະການເຊື່ອຟັງພະອົງ. ໂນເອເປັນຄົນແບບນັ້ນ. ດັ່ງນັ້ນ ພະເຈົ້າກ່າວແກ່ໂນເອວ່າ “ທີ່ສຸດແຫ່ງເນື້ອໜັງທັງສິ້ນໄດ້ມາເຖິງແລ້ວຕໍ່ໜ້າເຮົາ . . . ເຈົ້າຈົ່ງເອົາໄມ້ໂຄເຟ ກໍ່ສ້າງນາວາໃຫຍ່ຫຼັງໜຶ່ງ.” ຈາກນັ້ນ ໂນເອກໍໄດ້ເຮັດຕາມການຊີ້ນຳຂອງພະເຢໂຫວາ. ເຖິງແມ່ນວ່າໄດ້ຮັບຄຳເຕືອນແລ້ວກໍຕາມ ຄົນອື່ນໆໃນສະໄໝນັ້ນກໍຍັງຄົງດຳເນີນຊີວິດຄືກັບວ່າຈະບໍ່ມີສິ່ງຜິດປົກກະຕິອັນໃດເກີດຂຶ້ນ. ເຖິງຢ່າງໃດກໍດີ ໂນເອໄດ້ສ້າງນາວາໃຫຍ່ແລະເຮັດການປະກາດຢ່າງເອົາຈິງເອົາຈັງເຖິງແນວທາງອັນຊອບທຳຂອງພະເຢໂຫວາແກ່ຄົນອື່ນໆ. ບັນທຶກຍັງໄດ້ກ່າວຕໍ່ໄປອີກວ່າ “ໂນເອໄດ້ກະທຳດັ່ງນີ້ ຕາມທີ່ພະເຈົ້າໄດ້ສັ່ງແລ້ວ ທ່ານໂນເອໄດ້ກະທຳທຸກສິ່ງ.”—ຕົ້ນເດີມ 6:13-22; ເຫບເລີ 11:7; 2 ເປໂຕ 2:5.
10. (ກ) ອັບລາຫາມແລະຊາລາສະໜັບສະຫນູນສິດທິສູງສຸດໃນການປົກຄອງຂອງພະເຢໂຫວາຢ່າງໃດ? (ຂ) ຕົວຢ່າງຂອງທັງສອງໃຫ້ປະໂຫຍດແກ່ເຮົາໃນທາງໃດແດ່?
10 ອັບລາຫາມແລະຊາລາເປັນຕົວຢ່າງທີ່ດີໃນການສະໜັບສະຫນູນສິດທິສູງສຸດໃນການປົກຄອງຂອງພະເຢໂຫວາຄືກັນ ເຂົາເຈົ້າເຮັດທຸກສິ່ງຕາມທີ່ພະອົງບອກ. ທັງສອງອາໄສຢູ່ໃນເມືອງອູຣເຊິ່ງເປັນນະຄອນທີ່ຈະເລີນຮຸ່ງເຮືອງຂອງຊາວກາລະເດເອນ. ເຖິງຢ່າງນັ້ນກໍຕາມ ເມື່ອພະເຢໂຫວາບອກອັບລາຫາມໃຫ້ຍ້າຍໄປຢູ່ອີກດິນແດນໜຶ່ງເຊິ່ງທ່ານບໍ່ຮູ້ຈັກ ອັບລາຫາມກໍ “ໄດ້ອອກໄປ ຕາມທີ່ພະເຢໂຫວາໄດ້ບອກທ່ານ.” ແນ່ນອນວ່າຊາລາຄົງຈະມີຊີວິດທີ່ມີພ້ອມທຸກສິ່ງເຊັ່ນ ມີເຮືອນ, ຫມູ່ເພື່ອນ, ແລະຍາດພີ່ນ້ອງ. ເຖິງຢ່າງນັ້ນກໍຕາມ ດ້ວຍຄວາມອ່ອນນ້ອມຕໍ່ພະເຢໂຫວາແລະຕໍ່ສາມີຂອງຕົນ ນາງຈຶ່ງຮ່ວມເດີນທາງໄປແຜ່ນດິນການາອານເຊິ່ງ ນາງເອງກໍບໍ່ໄດ້ຮູ້ວ່າສະພາບການຢູ່ຫັ້ນເປັນແນວໃດຊ້ຳ.—ຕົ້ນເດີມ 11:31–12:4; ກິດຈະການ 7:2-4.
11. (ກ) ໂມເຊໄດ້ສະໜັບສະຫນູນສິດທິສູງສຸດໃນການປົກຄອງຂອງພະເຢໂຫວາພາຍໃຕ້ສະພາບການແນວໃດ? (ຂ) ຕົວຢ່າງຂອງໂມເຊອາດຈະເປັນປະໂຫຍດຕໍ່ເຮົາຢ່າງໃດ?
11 ໂມເຊເປັນອີກຄົນໜຶ່ງທີ່ສະໜັບສະຫນູນສິດທິສູງສຸດໃນການປົກຄອງຂອງພະເຢໂຫວາ. ລາວເຮັດເຊັ່ນນີ້ພາຍໃຕ້ສະພາບການທີ່ຍາກລຳບາກທີ່ສຸດ ນັ້ນຄືເມື່ອລາວປະເຊີນໜ້າກັບຟາໂລແຫ່ງເອຢີບ. ບໍ່ແມ່ນວ່າໂມເຊເປັນຄົນທີ່ໝັ້ນໃຈໃນຕົວເອງ. ຊ້ຳບໍ່ຫນຳ ລາວແຮ່ງບໍ່ໝັ້ນໃຈຊ້ຳວ່າຕົນຈະສາມາດເວົ້າໄດ້ດີພໍ. ເຖິງຢ່າງນັ້ນກໍຕາມ ລາວກໍເຊື່ອຟັງພະເຢໂຫວາ. ໂດຍໄດ້ຮັບການສະໜັບສະຫນູນຈາກພະເຢໂຫວາແລະດ້ວຍຄວາມຊ່ວຍເຫຼືອຈາກອາໂລນອ້າຍຂອງລາວ ໂມເຊຈຶ່ງກ່າວຊ້ຳຄຳຂອງພະເຢໂຫວາຕໍ່ຟາໂລຜູ້ດື້ດຶງຫຼາຍເທື່ອຫຼາຍທີ. ເຖິງແມ່ນວ່າພວກຍິດສະລາເອນບາງຄົນໄດ້ວິພາກວິຈານໂມເຊຢ່າງໜັກໜ່ວງກໍຕາມ ໂມເຊກໍຍັງເຮັດທຸກສິ່ງຕາມທີ່ພະເຢໂຫວາສັ່ງດ້ວຍຄວາມພັກດີ ແລະໂດຍທາງໂມເຊນີ້ເອງ ຊາດຍິດສະລາເອນຈຶ່ງໄດ້ຮັບການຊ່ວຍໃຫ້ລອດຈາກເອຢີບ.—ອົບພະຍົບ 7:6; 12:50, 51; ເຫບເລີ 11:24-27.
12. (ກ) ແມ່ນຫຍັງສະແດງວ່າຄວາມພັກດີຕໍ່ພະເຢໂຫວາພົວພັນຫຼາຍກວ່າການເຮັດໃນສິ່ງທີ່ພະເຈົ້າລະບຸເປັນລາຍລັກອັກສອນໄວ້ແລ້ວ? (ຂ) ຄວາມເຂົ້າໃຈເລື່ອງຄວາມພັກດີແບບນີ້ຈະຊ່ວຍເຮົາໃຫ້ນຳເອົາ 1 ໂຢຮັນ 2:15 ໄປໃຊ້ຢ່າງໃດ?
12 ຜູ້ທີ່ພັກດີຕໍ່ພະເຢໂຫວາບໍ່ໄດ້ອ້າງເຫດຜົນວ່າ ພະເຈົ້າຮຽກຮ້ອງໃຫ້ເຂົາເຈົ້າເຊື່ອຟັງແຕ່ໃນສິ່ງທີ່ພະອົງໄດ້ໃຫ້ຂຽນໄວ້ເທົ່ານັ້ນ. ຕອນທີ່ເມຍຂອງໂປຕີຟາພະຍາຍາມຍົວະຍວນໂຢເຊບໃຫ້ເຮັດຜິດປະເວນີກັບນາງ ຄຳສັ່ງຈາກພະເຈົ້າທີ່ຫ້າມເລື່ອງການຫຼິ້ນຊູ້ຍັງບໍ່ທັນມີເປັນລາຍລັກອັກສອນເທື່ອ. ຢ່າງໃດກໍຕາມ ໂຢເຊບຮູ້ເລື່ອງສະຖາບັນການສົມລົດທີ່ພະເຈົ້າໄດ້ຈັດຂຶ້ນໃນສວນເອເດນ. ລາວຮູ້ວ່າການມີເພດສຳພັນກັບເມຍຂອງຄົນອື່ນຈະເຮັດໃຫ້ພະເຈົ້າບໍ່ພໍໃຈ. ໂຢເຊບບໍ່ໄດ້ສົນໃຈທີ່ຈະລອງເບິ່ງຂອບເຂດທີ່ພະເຈົ້າຈະຍອມໃຫ້ລາວເປັນຄືກັບຊາວເອຢີບດ້ວຍຊ້ຳ. ລາວຍຶດໝັ້ນກັບແນວທາງຕ່າງໆຂອງພະເຢໂຫວາໂດຍຄິດຕຶກຕອງເຖິງວິທີຕ່າງໆທີ່ພະເຈົ້າປະຕິບັດກັບມະນຸດຊາດ ແລ້ວເອົາສິ່ງທີ່ລາວເຂົ້າໃຈວ່າເປັນຈຸດປະສົງຂອງພະເຈົ້າໄປໃຊ້ຢ່າງຖືກຕ້ອງ.—ຕົ້ນເດີມ 39:7-12; ຄຳເພງ 77:11, 12.
13. ມີການພິສູດວ່າຊາຕານເປັນຜູ້ເວົ້າຕົວະຢ່າງໃດໃນກໍລະນີຂອງ (ກ) ໂຢບ? (ຂ) ຊາວເຫບເລີສາມຄົນ?
13 ເຖິງແມ່ນວ່າຖືກທົດລອງຢ່າງໜັກ ຄົນເຫຼົ່ານັ້ນທີ່ຮູ້ຈັກພະເຢໂຫວາຢ່າງແທ້ຈິງກໍຈະບໍ່ໜີຈາກພະອົງ. ຊາຕານໄດ້ກ່າວວ່າຖ້າໂຢບສູນເສຍຊັບສິນແລະສຸຂະພາບຂອງຕົນແລ້ວ ແມ່ນວ່າໂຢບຜູ້ທີ່ພະເຢໂຫວາຍົກຍ້ອງກໍຈະປະຖິ້ມພະເຈົ້າ. ໂຢບໄດ້ພິສູດວ່າຊາຕານເວົ້າຕົວະ ເຖິງແມ່ນວ່າໂຢບເອງບໍ່ໄດ້ຮູ້ເຖິງເຫດຜົນຂອງຄວາມຫາຍະນະຕ່າງໆທີ່ສຸມໃສ່ລາວກໍຕາມ. (ໂຢບ 2:9, 10) ຫຼາຍຮ້ອຍປີຕໍ່ມາ ຊາຕານຍັງພະຍາຍາມພິສູດປະເດັນນີ້ ໂດຍເຮັດໃຫ້ກະສັດບາບີໂລນທີ່ເປັນເດືອດເປັນແຄ້ນຂົ່ມຂູ່ຊາຍຫນຸ່ມຊາວເຫບເລີສາມຄົນວ່າ ເຂົາເຈົ້າຈະຕ້ອງຕາຍໃນເຕົາໄຟທີ່ຮ້ອນກ້າຖ້າບໍ່ຍອມກົ້ມລົງຂາບໄຫວ້ຮູບປັ້ນທີ່ກະສັດໄດ້ຕັ້ງໄວ້ນັ້ນ. ເມື່ອຖືກບັງຄັບໃຫ້ເລືອກລະຫວ່າງການເຊື່ອຟັງຄຳສັ່ງຂອງກະສັດກັບການເຊື່ອຟັງກົດໝາຍຂອງພະເຢໂຫວາທີ່ຫ້າມການນະມັດສະການຮູບປັ້ນ ເຂົາເຈົ້າຢືນຢັນຢ່າງເດັດດ່ຽວວ່າຈະຮັບໃຊ້ພະເຢໂຫວາອົງຍິ່ງໃຫຍ່ຜູ້ມີສິດທິສູງສຸດໃນການປົກຄອງແຫ່ງຕົນເທົ່ານັ້ນ. ຄວາມສັດຊື່ຕໍ່ພະເຈົ້າເປັນສິ່ງທີ່ມີຄ່າຫຼາຍກວ່າຊີວິດຂອງເຂົາເຈົ້າໃນເວລານັ້ນ!—ດານຽນ 3:14-18.
14. ໃນຖານະມະນຸດທີ່ບໍ່ສົມບູນ ເຮົາຈະພິສູດຄວາມພັກດີຕໍ່ພະເຢໂຫວາຢ່າງແທ້ຈິງໄດ້ແນວໃດ?
14 ຈາກຕົວຢ່າງຕ່າງໆເຫຼົ່ານີ້ເຮົາຈະລົງຄວາມເຫັນວ່າ ຜູ້ທີ່ຈະພັກດີຕໍ່ພະເຢໂຫວາຈະຕ້ອງເປັນຄົນສົມບູນ ແລະຄົນທີ່ເຮັດຜິດພາດຈະເປັນຄົນທີ່ລົ້ມແຫຼວທັງໝົດບໍ? ບໍ່ເປັນເຊັ່ນນັ້ນເລີຍ! ຄຳພີໄບເບິນບອກເຮົາວ່າ ລາງເທື່ອໂມເຊກໍເຮັດຜິດເຊັ່ນກັນ. ເຖິງແມ່ນວ່າພະເຢໂຫວາບໍ່ພໍໃຈກໍຕາມ ແຕ່ພະອົງກໍບໍ່ໄດ້ປະຖິ້ມໂມເຊ. ເຫຼົ່າສາວົກຂອງພະເຍຊູຄລິດກໍມີຂໍ້ບົກພ່ອງຄືກັນ. ເມື່ອຄຳນຶງເຖິງຄວາມບໍ່ສົມບູນທີ່ເຮົາໄດ້ຮັບເປັນມໍລະດົກ ພະເຢໂຫວາພໍໃຈຫາກເຮົາບໍ່ເຈຕະນາ ລະເລີຍພະປະສົງຂອງພະອົງໃນທາງໃດທາງໜຶ່ງ. ຫາກເຮົາເຂົ້າໄປພົວພັນກັບການເຮັດຜິດເນື່ອງຈາກຄວາມອ່ອນແອ ນັບວ່າສຳຄັນທີ່ຕ້ອງປະໃຈເກົ່າເອົາໃຈໃໝ່ແທ້ໆແລະບໍ່ເຮັດຜິດແບບນັ້ນຈົນຕິດເປັນນິດໄສ. ໂດຍວິທີນີ້ ຈຶ່ງເປັນການສະແດງໃຫ້ເຫັນຢ່າງແທ້ຈິງວ່າເຮົາຮັກສິ່ງທີ່ພະເຢໂຫວາກ່າວວ່າດີແລະກຽດຊັງສິ່ງທີ່ພະອົງບອກວ່າບໍ່ດີ. ໂດຍອາໄສຄວາມເຊື່ອໃນເຄື່ອງບູຊາໄຖ່ບາບຂອງພະເຍຊູເປັນພື້ນຖານ ເຮົາຈະມີຖານະທີ່ສະອາດຕໍ່ໜ້າພະເຈົ້າ.—ອາໂມດ 5:15; ກິດຈະການ 3:19; ເຫບເລີ 9:14.
15. (ກ) ທ່າມກາງມະນຸດທັງໝົດ ໃຜສາມາດຮັກສາຄວາມພັກດີຕໍ່ພະເຈົ້າໄດ້ຢ່າງຄົບຖ້ວນ ແລະເລື່ອງນີ້ພິສູດເຖິງສິ່ງໃດ? (ຂ) ເຮົາໄດ້ຮັບຄວາມຊ່ວຍເຫຼືອຈາກສິ່ງທີ່ພະເຍຊູເຮັດຢ່າງໃດ?
15 ຢ່າງໃດກໍຕາມ ການເຊື່ອຟັງຢ່າງຄົບຖ້ວນ ຕໍ່ສິດທິສູງສຸດໃນການປົກຄອງຂອງພະເຢໂຫວາເປັນເລື່ອງທີ່ເປັນໄປບໍ່ໄດ້ສຳລັບມະນຸດບໍ? ຄຳຕອບສຳລັບເລື່ອງນີ້ຄ້າຍກັບວ່າເປັນ “ຄວາມລັບທີ່ສັກສິດ” ມາເປັນເວລາ 4,000 ປີແລ້ວ. (1 ຕີໂມເຕ 3:16, ລ.ມ.) ເຖິງແມ່ນວ່າອາດາມຮັບການສ້າງຢ່າງສົມບູນກໍຕາມ ແຕ່ລາວກໍບໍ່ໄດ້ວາງຕົວຢ່າງທີ່ສົມບູນໃນເລື່ອງຄວາມເຫຼື້ອມໃສຕໍ່ພະເຈົ້າ. ແລ້ວໃຜຈະເຮັດໄດ້? ແນ່ນອນລູກຫຼານທີ່ຜິດບາບຂອງລາວເຮັດບໍ່ໄດ້ຈັກຄົນ. ມີພຽງມະນຸດຄົນດຽວທີ່ເຮັດແບບນັ້ນໄດ້ ນັ້ນແມ່ນພະເຍຊູຄລິດ. (ເຫບເລີ 4:15) ສິ່ງທີ່ພະເຍຊູເຮັດສຳເລັດໄປແລ້ວໄດ້ພິສູດວ່າອາດາມເຊິ່ງຢູ່ໃນສະພາບການທີ່ເອື້ອອຳນວຍຫຼາຍກວ່າ ສາມາດຮັກສາຄວາມພັກດີຢ່າງຄົບຖ້ວນໄດ້ຖ້າລາວຕ້ອງການຈະເຮັດ. ຄວາມຜິດພາດນີ້ບໍ່ແມ່ນຍ້ອນຜົນງານໃນການສ້າງຂອງພະເຈົ້າ. ດັ່ງນັ້ນ ພະເຍຊູຄລິດຈຶ່ງເປັນຕົວຢ່າງໃຫ້ເຮົາຮຽນແບບຕາມ ບໍ່ພຽງແຕ່ໃນການສະແດງຄວາມເຊື່ອຟັງຕໍ່ກົດໝາຍຂອງພະເຈົ້າເທົ່ານັ້ນ ແຕ່ເຮົາເອງຍັງຕ້ອງສະແດງຄວາມເຫຼື້ອມໃສສັດທາຕໍ່ພະເຢໂຫວາຜູ້ມີສິດທິສູງສຸດໃນການປົກຄອງເອກະພົບນຳອີກ.—ພະບັນຍັດ 32:4, 5.
ຄຳຕອບຂອງເຮົາເອງແມ່ນຫຍັງ?
16. ເປັນຫຍັງເຮົາຈຶ່ງຕ້ອງຕື່ນຕົວຢູ່ສະເໝີໃນເລື່ອງທັດສະນະທີ່ເຮົາມີຕໍ່ສິດທິສູງສຸດໃນການປົກຄອງຂອງພະເຢໂຫວາ?
16 ທຸກມື້ນີ້ເຮົາແຕ່ລະຄົນຕ້ອງປະເຊີນກັບປະເດັນເລື່ອງສິດທິສູງສຸດໃນການປົກຄອງເອກະພົບ. ຖ້າເຮົາປະກາດຢ່າງເປີດເຜີຍວ່າເຮົາຢູ່ຝ່າຍພະເຢໂຫວາ ເຮົາກໍຕົກເປັນເປົ້າຂອງຊາຕານໂລດ. ມັນຈະກົດດັນເຮົາຈາກທຸກໆດ້ານແລະຈະເຮັດຕໍ່ໆໄປຈົນເຖິງອະວະສານແຫ່ງລະບົບຊົ່ວຂອງມັນ. ເຮົາຕ້ອງລະມັດລະວັງຢູ່ຕະຫຼອດເວລາ. (1 ເປໂຕ 5:8) ຄວາມປະພຶດຂອງເຮົາສະແດງໃຫ້ເຫັນຈຸດຢືນຂອງເຮົາທີ່ມີຕໍ່ປະເດັນໃຫຍ່ແຫ່ງສິດທິສູງສຸດໃນການປົກຄອງຂອງພະເຢໂຫວາ ແລະປະເດັນຮອງລົງມາແມ່ນເລື່ອງຄວາມສັດຊື່ໝັ້ນຄົງຕໍ່ພະເຈົ້າເມື່ອຖືກທົດລອງ. ເຮົາບໍ່ອາດຍອມຮັບວ່າຄວາມປະພຶດທີ່ບໍ່ພັກດີເປັນເລື່ອງທີ່ບໍ່ສຳຄັນ ເພາະເປັນສິ່ງທີ່ປະຕິບັດກັນຢ່າງແຜ່ຫຼາຍໃນໂລກນີ້. ການຮັກສາຄວາມສັດຊື່ໝັ້ນຄົງຮຽກຮ້ອງໃຫ້ເຮົາພະຍາຍາມນຳເອົາແນວທາງອັນຊອບທຳຂອງພະເຢໂຫວາໄປໃຊ້ກັບທຸກແງ່ມຸມຂອງຊີວິດ.
17. ມີຫຍັງທີ່ກ່ຽວຂ້ອງກັບຕົ້ນກຳເນີດຂອງການຕົວະແລະການລັກຂະໂມຍເຊິ່ງຄວນຈະເຮັດໃຫ້ເຮົາຫຼີກລ້ຽງການເຮັດເຊັ່ນນັ້ນ?
17 ຍົກຕົວຢ່າງ ເຮົາບໍ່ສາມາດຮຽນເອົາແບບຢ່າງຂອງຊາຕານເຊິ່ງເປັນ “ພໍ່ແຫ່ງຄວາມຕົວະ.” (ໂຢຮັນ 8:44) ເຮົາຕ້ອງເປັນຄົນສັດຊື່ໃນການຕິດຕໍ່ພົວພັນກັບຄົນອື່ນ. ໃນລະບົບຂອງຊາຕານ ຄົນຫນຸ່ມສາວມັກຈະບໍ່ເວົ້າຄວາມຈິງກັບພໍ່ແມ່ຂອງຕົນ. ເຖິງແນວນັ້ນກໍຕາມ ຫນຸ່ມສາວຄລິດສະຕຽນພັດຫຼີກລ້ຽງການເຮັດສິ່ງນີ້ ແລະດ້ວຍເຫດນີ້ ເຂົາເຈົ້າຈຶ່ງພິສູດຂໍ້ກ່າວຫາບໍ່ຈິງຂອງຊາຕານທີ່ວ່າ ໄພ່ພົນຂອງພະເຈົ້າຈະປະຖິ້ມຄວາມສັດຊື່ໝັ້ນຄົງເມື່ອຖືກທົດລອງ. (ໂຢບ 1:9-11; ສຸພາສິດ 6:16-19) ນອກນັ້ນ ຍັງມີການປະກອບທຸລະກິດບາງຢ່າງເຊິ່ງອາດຈະບົ່ງບອກວ່າຄົນນັ້ນຢູ່ຝ່າຍ “ພໍ່ແຫ່ງຄວາມຕົວະ” ແທນທີ່ຈະຢູ່ຝ່າຍພະເຈົ້າແຫ່ງຄວາມຈິງ. (ມີເກ 6:11, 12) ເຮົາຄວນຫຼີກລ້ຽງການເຮັດທຸລະກິດແບບນີ້. ນອກຈາກນີ້ ການລັກຂະໂມຍກໍບໍ່ແມ່ນສິ່ງທີ່ຖືກຕ້ອງເລີຍ ເຖິງແມ່ນວ່າຄົນນັ້ນຈະຂັດສົນຫຼືຜູ້ທີ່ຖືກລັກສິ່ງຂອງຈະເປັນຄົນຮັ່ງມີກໍຕາມ. (ສຸພາສິດ 6:30, 31; 1 ເປໂຕ 4:15) ແມ່ນວ່າໃນທ້ອງຖິ່ນທີ່ເຮົາອາໄສຢູ່ ການລັກຂະໂມຍເປັນເລື່ອງທຳມະດາຫຼືສິ່ງທີ່ເອົາໄປນັ້ນບໍ່ມີຄ່າຫຼາຍ ການລັກຂະໂມຍກໍຍັງຜິດຕໍ່ກົດໝາຍຂອງພະເຈົ້າ.—ລືກາ 16:10; ໂລມ 12:2; ເອເຟດ 4:28.
18. (ກ) ໃນຕອນສິ້ນສຸດແຫ່ງການປົກຄອງພັນປີຂອງພະຄລິດ ມະນຸດຊາດທັງປວງຈະປະເຊີນກັບການທົດລອງຫຍັງແດ່? (ຂ) ເຮົາຄວນປູກຝັງນິດໄສແບບໃດໃນຕອນນີ້?
18 ລະຫວ່າງການປົກຄອງພັນປີຂອງພະຄລິດ ຊາຕານແລະພວກຜີປີສາດຂອງມັນຈະຖືກກັກຂັງຢູ່ໃນເຫວເລິກ ແລະຈະບໍ່ມີອິດທິພົນເໜືອມະນຸດຊາດອີກຕໍ່ໄປ. ຈັ່ງແມ່ນເບົາອົກເບົາໃຈແທ້ໆ! ຢ່າງໃດກໍຕາມ ພາຍຫຼັງພັນປີຜ່ານໄປແລ້ວ ພວກມັນຈະຖືກປ່ອຍອອກມາໄລຍະສັ້ນໆ. ໃນເວລານັ້ນ ຊາຕານແລະພັກພວກຂອງມັນຈະສ້າງຄວາມກົດດັນແກ່ບັນດາມະນຸດຊາດທີ່ໄດ້ຮັບການຟື້ນຟູເຊິ່ງກຳລັງຮັກສາຄວາມສັດຊື່ໝັ້ນຄົງຕໍ່ພະເຈົ້າ. (ຄຳປາກົດ 20:7-10) ຖ້າເຮົາມີສິດທິພິເສດທີ່ຈະມີຊີວິດຢູ່ໃນຕອນນັ້ນ ເຮົາຈະເຮັດແນວໃດຕໍ່ປະເດັນໃຫຍ່ໃນເລື່ອງສິດທິສູງສຸດໃນການປົກຄອງເອກະພົບນີ້? ເນື່ອງຈາກຕອນນັ້ນມະນຸດທຸກຄົນຈະເປັນຄົນສົມບູນ ການກະທຳໃດໆທີ່ບໍ່ພັກດີຈະຖືວ່າເປັນການກະທຳໂດຍເຈຕະນາແລະຈະນຳເຖິງຄວາມພິນາດຕະຫຼອດການ. ຖືວ່າສຳຄັນພຽງໃດທີ່ເຮົາຈະປູກຝັງນິດໄສການເຊື່ອຟັງຕັ້ງແຕ່ດຽວນີ້ຕໍ່ການຊີ້ນຳຕ່າງໆທີ່ພະເຢໂຫວາໄດ້ໃຫ້ເຮົາ ທັງໂດຍທາງພະຄຳແລະທາງອົງການຂອງພະອົງ! ເມື່ອເຮົາເຮັດເຊັ່ນນັ້ນ ກໍສະແດງວ່າເຮົາເຫຼື້ອມໃສຢ່າງແທ້ຈິງຕໍ່ພະອົງໃນຖານະເປັນຜູ້ມີສິດທິສູງສຸດໃນການປົກຄອງເອກະພົບ.
ການພິຈາລະນາທົບທວນ
• ແມ່ນຫຍັງເປັນປະເດັນສຳຄັນທີ່ເຮົາທຸກໆຄົນຈະຕ້ອງປະເຊີນ? ເຮົາເຂົ້າໄປພົວພັນໄດ້ຢ່າງໃດ?
• ຊາຍຍິງໃນສະໄໝບູຮານໄດ້ພິສູດເຖິງຄວາມພັກດີຂອງຕົນຕໍ່ພະເຢໂຫວາໃນວິທີເດັນຕ່າງໆໃດແດ່?
• ເປັນຫຍັງຈຶ່ງສຳຄັນຢ່າງຍິ່ງທີ່ເຮົາຈະຖວາຍກຽດແກ່ພະເຢໂຫວາດ້ວຍສິ່ງທີ່ເຮົາປະຕິບັດໃນແຕ່ລະມື້?