ພາກຜະໜວກ
ພະເຍຊູຄລິດ—ຜູ້ເປັນເມຊີຕາມທີ່ໄດ້ສັນຍາໄວ້
ເພື່ອຊ່ວຍເຮົາໃຫ້ຮູ້ວ່າໃຜເປັນເມຊີ ພະເຢໂຫວາພະເຈົ້າໄດ້ດົນໃຈຜູ້ພະຍາກອນຫຼາຍຄົນທີ່ຂຽນຄຳພີໄບເບິນໃຫ້ບັນທຶກຂໍ້ມູນເລື່ອງການເກີດ ວຽກງານການຮັບໃຊ້ແລະການສິ້ນຊີວິດຂອງຜູ້ຊ່ວຍໃຫ້ລອດຕາມຄຳສັນຍາຜູ້ນີ້. ຄຳພະຍາກອນທັງໝົດນີ້ໃນຄຳພີໄບເບິນສຳເລັດເປັນຈິງໃນໂຕພະເຍຊູຄລິດ. ຄຳພະຍາກອນເຫຼົ່ານີ້ຖືກຕ້ອງແລະມີລາຍລະອຽດທີ່ໜ້າງຶດງໍ້. ເພື່ອເປັນຕົວຢ່າງ ຂໍໃຫ້ສຶກສາຄຳພະຍາກອນບາງຂໍ້ທີ່ໄດ້ບອກໄວ້ລ່ວງໜ້າກ່ຽວກັບເຫດການຕ່າງໆທີ່ກ່ຽວຂ້ອງກັບການເກີດແລະຊີວິດໃນໄວເດັກຂອງຜູ້ເປັນເມຊີ.
ຜູ້ພະຍາກອນເອຊາອີໄດ້ບອກໄວ້ລ່ວງໜ້າວ່າເມຊີຈະເປັນລູກຫຼານກະສັດດາວິດ. (ເອຊາອີ 9:7) ພະເຍຊູໄດ້ເກີດໃນເຊື້ອສາຍຂອງດາວິດແທ້ໆ.—ມັດທາຍ 1:1, 6-17.
ມີເກ ຜູ້ພະຍາກອນອີກຄົນໜຶ່ງຂອງພະເຈົ້າໄດ້ບອກໄວ້ລ່ວງໜ້າວ່າໃນທີ່ສຸດເດັກນ້ອຍຄົນນີ້ຈະເຕີບໃຫຍ່ຂຶ້ນແລ້ວເປັນຜູ້ປົກຄອງ ແລະລາວຈະເກີດໃນເມືອງ “ເບດເລເຫມເອຟະຣາຕາ.” (ມີເກ 5:2) ໃນສະໄໝທີ່ພະເຍຊູເກີດ ມີສອງເມືອງໃນອິດສະລາແອນທີ່ຊື່ເບດເລເຫມ. ເມືອງໜຶ່ງຕັ້ງຢູ່ໃກ້ເມືອງນາຊາເລດເຊິ່ງຢູ່ທາງພາກເໜືອຂອງປະເທດ ແລະອີກເມືອງໜຶ່ງຕັ້ງຢູ່ໃກ້ເມືອງເຢຣຶຊາເລມໃນແຂວງຢູເດ. ເມືອງເບດເລເຫມທີ່ຢູ່ໃກ້ເມືອງເຢຣຶຊາເລມນັ້ນແຕ່ກີ້ເອີ້ນວ່າເອຟະຣາຕາ. ພະເຍຊູເກີດຢູ່ເມືອງນັ້ນແທ້ຕາມທີ່ຄຳພະຍາກອນໄດ້ບອກໄວ້ລ່ວງໜ້າຢ່າງຖືກຕ້ອງ!—ມັດທາຍ 2:1.
ຄຳພະຍາກອນອີກຂໍ້ໜຶ່ງໄດ້ບອກໄວ້ລ່ວງໜ້າວ່າລູກຊາຍຂອງພະເຈົ້າຈະຖືກເອີ້ນ “ອອກມາຈາກເອຄີບໂຕ.” ຕອນເປັນເດັກນ້ອຍ ພະເຍຊູຖືກພາໄປເອຢີບ. ພະອົງຖືກພາກັບມາພາຍຫຼັງທີ່ເຫໂລດສິ້ນຊີວິດ ໂດຍວິທີນີ້ຈຶ່ງເຮັດໃຫ້ຄຳພະຍາກອນຂໍ້ນີ້ສຳເລັດເປັນຈິງ.—ໂອເຊ 11:1; ມັດທາຍ 2:15.
ຕາຕະລາງທີ່ສະແດງໃນໜ້າ 200 ມີຂໍ້ພະຄຳພີຕ່າງໆທີ່ຈັດໄວ້ຢູ່ທາງລຸ່ມຫົວຂໍ້ທີ່ວ່າ “ຄຳພະຍາກອນ” ເຊິ່ງບັນທຶກຂໍ້ມູນຕ່າງໆກ່ຽວກັບຜູ້ເປັນເມຊີ. ຂໍໃຫ້ສົມທຽບຂໍ້ພະຄຳພີເຫຼົ່ານີ້ກັບຂໍ້ພະຄຳພີທີ່ຢູ່ທາງລຸ່ມຫົວຂໍ້ “ຄວາມສຳເລັດເປັນຈິງ.” ການເຮັດແນວນີ້ຈະຊ່ວຍໃຫ້ຄວາມເຊື່ອທີ່ເຮົາມີຕໍ່ຄວາມຈິງກ່ຽວກັບພະຄຳຂອງພະເຈົ້າເຂັ້ມແຂງຫຼາຍຂຶ້ນ.
ໃນຂະນະທີ່ເຮົາພິຈາລະນາຂໍ້ພະຄຳພີເຫຼົ່ານີ້ ຂໍໃຫ້ຈື່ໄວ້ວ່າຂໍ້ພະຄຳພີເຫຼົ່ານີ້ທີ່ມີລັກສະນະຄືເປັນຄຳພະຍາກອນໄດ້ຂຽນໄວ້ເປັນເວລາຫຼາຍຮ້ອຍປີກ່ອນທີ່ພະເຍຊູເກີດ. ພະເຍຊູກ່າວວ່າ “ສັບພະຄຳທີ່ຂຽນໄວ້ເຖິງເຮົາໃນພະບັນຍັດຂອງທ່ານໂມເຊ ແລະໃນໜັງສືຂອງພວກຜູ້ທຳນວາຍ ແລະຄຳເພງຕ້ອງຈະບັງເກີດມາ.” (ລືກາ 24:44) ດັ່ງທີ່ເຈົ້າສາມາດພິສູດໄດ້ດ້ວຍຄຳພີໄບເບິນຂອງເຈົ້າເອງ ທຸກລາຍລະອຽດຂອງຄຳພະຍາກອນເຫຼົ່ານັ້ນໄດ້ສຳເລັດເປັນຈິງ!