ບົດທີ 12
ການນິນທາເປັນອັນຕະລາຍແນວໃດ?
“ມີເທື່ອໜຶ່ງຂ້ອຍໄປງານລ້ຽງ ແລະມື້ຕໍ່ມາກໍມີຂ່າວລືແພ່ໄປທົ່ວວ່າຂ້ອຍມີເພດສຳພັນກັບຜູ້ຊາຍຄົນໜຶ່ງຢູ່ຫັ້ນ. ມັນບໍ່ແມ່ນຄວາມຈິງເລີຍ!”—ລິນດາ
“ບາງເທື່ອຂ້ອຍຈະໄດ້ຍິນຂ່າວລືວ່າຂ້ອຍເປັນແຟນກັບຜູ້ຍິງຄົນໜຶ່ງທັງທີ່ຂ້ອຍບໍ່ຮູ້ຈັກລາວດ້ວຍຊ້ຳ! ຄົນທີ່ມັກຊຸບຊິບນິນທາບໍ່ເຄີຍຄິດທີ່ຈະກວດສອບວ່າມັນເປັນຄວາມຈິງຫຼືບໍ່.”—ໄມຄ໌
ການນິນທາເຮັດໃຫ້ຊີວິດຄົນເຮົາເບິ່ງຄືຊັບຊ້ອນແລະໜ້າສົນໃຈຫຼາຍກວ່າໃນລະຄອນອີກ. ແອມເບີອາຍຸ 19 ປີບອກວ່າ: “ຂ້ອຍຖືກນິນທາຕະຫຼອດ. ມີຂ່າວລືວ່າຂ້ອຍກຳລັງຖືພາແລ້ວກໍໄປເອົາລູກອອກ. ແຖມຍັງລືກັນວ່າຂ້ອຍຊື້ຂາຍແລະໃຊ້ຢາເສບຕິດ. ເປັນຫຍັງເຂົາເຈົ້າຈຶ່ງເວົ້າໃຫ້ຂ້ອຍຂະໜາດນີ້? ບໍ່ເຂົ້າໃຈເລີຍ!”
ຍ້ອນຄວາມສະດວກໃນການສົ່ງອີເມວແລະຂໍ້ຄວາມ ຄົນທີ່ມີເຈຕະນາບໍ່ດີຈຶ່ງສາມາດທຳລາຍຊື່ສຽງຂອງເຈົ້າໄດ້ໂດຍບໍ່ຕ້ອງເວົ້າຫຍັງຈັກຄຳ. ພຽງແຕ່ກົດແປ້ນພິມບໍ່ເທົ່າໃດເທື່ອ ກໍສາມາດແພ່ຂ່າວລືທີ່ເສຍຫາຍໄປໃຫ້ອີກຫຼາຍສິບຄົນທີ່ຢາກຮູ້ຢາກເຫັນໄດ້! ບາງຄົນສ້າງເວັບໄຊຂຶ້ນມາເພື່ອຢາກທຳລາຍຊື່ສຽງຂອງຄົນອື່ນຊື່ໆ. ນອກຈາກນັ້ນ ຍັງມີການໃຊ້ເວັບບຼັອກເພື່ອຊຸບຊິບນິນທາຄົນນັ້ນຄົນນີ້ ເຊິ່ງຖ້າຢູ່ຕໍ່ໜ້າກໍຄືຊິບໍ່ກ້າເວົ້າແບບນັ້ນ.
ແຕ່ການເວົ້າເຖິງຄົນອື່ນເປັນສິ່ງທີ່ບໍ່ດີສະເໝີໄປບໍ?
ການເວົ້າເຖິງຄົນອື່ນບໍ່ດີສະເໝີບໍ?
ໃຫ້ໝາຍຂໍ້ຄວາມຕໍ່ໄປນີ້ວ່າແມ່ນຫຼືບໍ່ແມ່ນ.
ການເວົ້າເຖິງຄົນອື່ນເປັນສິ່ງທີ່ບໍ່ດີສະເໝີ. □ ແມ່ນ □ ບໍ່ແມ່ນ
ຄຳຕອບທີ່ຖືກຕ້ອງແມ່ນຫຍັງ? ແທ້ໆແລ້ວ ຂຶ້ນຢູ່ກັບວ່າເຈົ້າເວົ້າເຖິງຄົນອື່ນແນວໃດ. ຖ້າເວົ້າເຖິງເຂົາເຈົ້າໃນເລື່ອງທົ່ວໄປກໍຄືຊິບໍ່ໄດ້ຜິດຫຍັງ. ທີ່ຈິງ ຄຳພີໄບເບິນບອກເຮົາໃຫ້ “ຄິດເຖິງຄົນອື່ນນຳ.” (ຟີລິບປອຍ 2:4) ແຕ່ກໍບໍ່ໄດ້ໝາຍຄວາມວ່າເຮົາຄວນເຂົ້າໄປຫຍຸ້ງໃນເລື່ອງຂອງຄົນອື່ນ. (1 ເປໂຕ 4:15) ຫຼາຍເທື່ອການລົມກັນເລື່ອງທົ່ວໄປເຮັດໃຫ້ເຮົາຮູ້ເລື່ອງດີໆ ເຊັ່ນ ໃຜກຳລັງຈະແຕ່ງດອງຫຼືໃຜເກີດລູກ. ທີ່ຈິງ ເຮົາບໍ່ສາມາດເວົ້າໄດ້ວ່າເຮົາໃສ່ໃຈຄົນອື່ນຖ້າເຮົາເອງບໍ່ເຄີຍເວົ້າເຖິງເຂົາເຈົ້າເລີຍ!
ແຕ່ການເວົ້າເລື່ອງທົ່ວໄປກໍອາດກາຍເປັນການຊຸບຊິບນິນທາໄດ້. ຕົວຢ່າງເຊັ່ນ ເມື່ອມີຄົນເວົ້າວ່າ “ຖ້າບ໋ອບກັບນ້ອຍມັກກັນກໍຄືຊິດີ.” ອີກຄົນໜຶ່ງອາດເອົາໄປເວົ້າຕໍ່ວ່າ “ບ໋ອບກັບນ້ອຍກຳລັງຄົບກັນ” ໂດຍທີ່ເຈົ້າໂຕບໍ່ຮູ້ເລື່ອງຫຍັງເລີຍ. ເຈົ້າອາດບອກວ່າ ‘ກໍບໍ່ເຫັນຊິເປັນຫຍັງນິ’ ເຈົ້າເວົ້າແບບນັ້ນໄດ້ແທ້ຍ້ອນເຈົ້າບໍ່ແມ່ນບ໋ອບກັບນ້ອຍ!
ຈູລີ້ອາຍຸ 18 ປີກໍຖືກນິນທາແບບນັ້ນ ແລະມັນເຮັດໃຫ້ລາວເຈັບໃຈ. ລາວບອກວ່າ: “ຂ້ອຍໃຈຮ້າຍແລະຮູ້ສຶກວ່າໄວ້ໃຈໃຜບໍ່ໄດ້.” ເຈນອາຍຸ 19 ປີກໍເຈິແບບດຽວກັນ. ລາວບອກວ່າ: “ຂ້ອຍຕ້ອງພະຍາຍາມຢູ່ຫ່າງໆຈາກຜູ້ຊາຍທີ່ມີຂ່າວລືວ່າເປັນແຟນຂ້ອຍ. ມັນບໍ່ຍຸຕິທຳເລີຍ ຍ້ອນເຮົາເປັນໝູ່ກັນແທ້ໆ ແຕ່ຂ່າວລືແບບນັ້ນເຮັດໃຫ້ເຮົາບໍ່ກ້າລົມກັນ!”
ປ່ຽນເລື່ອງເວົ້າ
ຖ້າເຈົ້າຢາກນິນທາຄົນອື່ນ ເຈົ້າຈະຄວບຄຸມລີ້ນຂອງໂຕເອງໄດ້ແນວໃດ? ເພື່ອຕອບຄຳຖາມນີ້ ໃຫ້ຄິດເຖິງຕອນທີ່ເຈົ້າຂັບລົດຢູ່ທາງດ່ວນທີ່ລົດຕິດຫຼາຍ. ອາດເກີດສະຖານະການບາງຢ່າງທີ່ເຮັດໃຫ້ເຈົ້າຕ້ອງປ່ຽນເລນ ຍອມໃຫ້ຄົນອື່ນແຊງ ຫຼືຢຸດລົດກະທັນຫັນ. ຖ້າເຈົ້າຕື່ນໂຕ ເຈົ້າຈະຄາດການໄດ້ລ່ວງໜ້າແລະປັບປ່ຽນຕາມນັ້ນ.
ເລື່ອງການເວົ້າກໍຄືກັນ. ປົກກະຕິແລ້ວເຮົາສາມາດຮູ້ໄດ້ວ່າການລົມກັນກຳລັງຈະກາຍເປັນການຊຸບຊິບນິນທາຕອນໃດ. ເມື່ອສິ່ງນັ້ນເກີດຂຶ້ນ ເຈົ້າຈະ ‘ປ່ຽນເລນຫຼືປ່ຽນເລື່ອງລົມ’ ບໍ? ຖ້າບໍ່ ການຊຸບຊິບນິນທາກໍຈະສ້າງບັນຫາຕາມມາ. ໄມຄ໌ເລົ່າວ່າ: “ຂ້ອຍນິນທາຜູ້ຍິງຄົນໜຶ່ງວ່າລາວບ້າຜູ້ຊາຍ. ເມື່ອລາວຮູ້ ລາວກໍມາຫາຂ້ອຍ. ຂ້ອຍຈະບໍ່ມີວັນລືມນ້ຳສຽງຂອງລາວວ່າລາວເຈັບປວດສ່ຳໃດເພາະຄຳເວົ້າທີ່ບໍ່ຄິດຂອງຂ້ອຍ. ເຮົາແກ້ໄຂເລື່ອງຕ່າງໆແລ້ວ ແຕ່ຂ້ອຍກໍຍັງຮູ້ສຶກບໍ່ດີທີ່ເຮັດໃຫ້ລາວເຈັບປວດແບບນັ້ນ!”
ແນ່ນອນວ່າ ຄຳເວົ້າສາມາດເຮັດໃຫ້ເຈັບໄດ້. ແມ່ນແຕ່ຄຳພີໄບເບິນກໍຍັງບອກວ່າ “ຄຳເວົ້າທີ່ບໍ່ຄິດເປັນຄືກັບດາບທີ່ສຽບແທງ.” (ສຸພາສິດ 12:18) ນັ້ນເປັນເຫດຜົນທີ່ເຈົ້າຄວນຈະຄິດຢ່າງຮອບຄອບກ່ອນເວົ້າ! ເພາະຖ້າເຈົ້າເລີ່ມເວົ້າຢ່າງເມົາມັນແລ້ວ ມັນກໍຄືຊິເບກຍາກ. ຄາໂຣລິນອາຍຸ 17 ປີບອກວ່າ: “ເຮົາຕ້ອງລະວັງສິ່ງທີ່ເຮົາເວົ້າ. ຖ້າເຮົາໄດ້ຍິນຈາກແຫຼ່ງທີ່ບໍ່ໜ້າເຊື່ອຖືແລ້ວເອົາໄປເວົ້າຕໍ່ ເຮົາອາດກາຍເປັນຄົນທີ່ເຜີຍແພ່ເລື່ອງຕົວະ.” ແຕ່ຖ້າເລື່ອງທີ່ເຈົ້າໄດ້ຍິນມາເປັນເລື່ອງຊຸບຊິບນິນທາ ກໍໃຫ້ເຮັດຕາມຄຳແນະນຳຂອງອັກຄະສາວົກໂປໂລທີ່ວ່າ: “ໃຫ້ພວກເຈົ້າຕັ້ງໃຈໃຊ້ຊີວິດແບບສະຫງົບ ຢ່າໄປຫຍຸ້ງກັບເລື່ອງຂອງຄົນອື່ນ.”—1 ເທຊະໂລນິກ 4:11
ເຈົ້າຈະສົນໃຈຄົນອື່ນໂດຍບໍ່ເຂົ້າໄປຫຍຸ້ງກ່ຽວກັບເລື່ອງສ່ວນໂຕຂອງເຂົາເຈົ້າໄດ້ແນວໃດ? ກ່ອນທີ່ຈະເວົ້າເຖິງໃຜ ກໍໃຫ້ຖາມໂຕເອງວ່າ: ‘ຂ້ອຍຮູ້ເລື່ອງນັ້ນແທ້ໆບໍ? ຂ້ອຍມີເຈຕະນາຫຍັງທີ່ຈະເລົ່າເລື່ອງນັ້ນ? ຖ້າຂ້ອຍເລົ່າແລ້ວ ຄົນອື່ນຈະເບິ່ງຂ້ອຍແນວໃດ?’ ຄຳຖາມສຸດທ້າຍນັ້ນສຳຄັນ ເພາະຖ້າຄົນອື່ນຮູ້ວ່າເຈົ້າມັກຊຸບຊິບນິນທາ ຊື່ສຽງຂອງເຈົ້າກໍຈະເສຍຫາຍຫຼາຍກວ່າຄົນທີ່ຖືກເວົ້າເຖິງອີກ.
ເມື່ອເຈົ້າຖືກນິນທາ
ເຈົ້າຈະເຮັດແນວໃດຖ້າເຈົ້າຖືກນິນທາ? ປັນຍາຈານ 7:9 ເຕືອນວ່າ “ຢ່າເປັນຄົນຄຽດງ່າຍ.” ຢ່າຄິດຫຼາຍຫຼືຈິງຈັງເກີນໄປ ໃຫ້ພະຍາຍາມເຮັດຕາມທີ່ຄຳພີໄບເບິນບອກວ່າ: “ຢ່າໄປໃສ່ໃຈທຸກຄຳທີ່ຄົນອື່ນເວົ້າ . . . ຍ້ອນເຈົ້າເອງກໍຮູ້ດີວ່າເຈົ້າກໍເຄີຍເວົ້າແນວບໍ່ດີໃຫ້ຄົນອື່ນຄືກັນ.”—ປັນຍາຈານ 7:21, 22
ແນ່ນອນວ່າ ການນິນທາເປັນສິ່ງທີ່ຜິດ. ແຕ່ຖ້າເຈົ້າຕອບໂຕ້ໂດຍໃຊ້ອາລົມ ຄົນອື່ນອາດຈະເບິ່ງເຈົ້າບໍ່ດີຫຼາຍກວ່າຄົນທີ່ນິນທາອີກ! ຄັນຊັ້ນເປັນຫຍັງບໍ່ລອງເຮັດຄືເຣເນ້ເບິ່ງ? ລາວບອກວ່າ: “ຂ້ອຍເຈັບໃຈຕະຫຼອດເມື່ອມີຄົນເວົ້າບໍ່ດີກ່ຽວກັບຂ້ອຍ ແຕ່ຂ້ອຍພະຍາຍາມບໍ່ຄິດຫຼາຍ ເພາະຮູ້ວ່າດຽວອາທິດໜ້າເຂົາເຈົ້າກໍລືມເລື່ອງຂ້ອຍແລະໄປເວົ້າເລື່ອງອື່ນແທນ.”a
ດັ່ງນັ້ນ ຖ້າໃນການສົນທະນາເລີ່ມມີການຊຸບຊິບນິນທາ ກໍໃຫ້ເຈົ້າປ່ຽນໄປລົມເລື່ອງອື່ນ ແລະຖ້າມີຄົນເວົ້າເຖິງເຈົ້າໃນທາງທີ່ບໍ່ດີ ກໍໃຫ້ໃຈເຢັນໆແລະຢ່າໃຊ້ອາລົມ. ຂໍໃຫ້ຈື່ໄວ້ວ່າ ການກະທຳດັງກວ່າຄຳເວົ້າ. (1 ເປໂຕ 2:12) ຖ້າເຈົ້າເຮັດແບບນັ້ນ ເຈົ້າກໍຈະມີຄວາມສຳພັນທີ່ດີກັບຄົນອື່ນແລະພະເຈົ້າກໍຈະພໍໃຈເຈົ້າ.
[ຂໍ້ຄວາມໄຂເງື່ອນ]
a ໃນບາງກໍລະນີ ອາດເປັນເລື່ອງດີທີ່ຈະໄປລົມກັບຜູ້ທີ່ນິນທາເຈົ້າຢ່າງຜ່ອນໜັກຜ່ອນເບົາ. ສ່ວນໃຫຍ່ແລ້ວບໍ່ຈຳເປັນຕ້ອງເຮັດແບບນັ້ນ ເພາະ “ຄວາມຮັກເຮັດໃຫ້ຄົນເຮົາເຕັມໃຈຍົກໂທດໃຫ້ຄົນອື່ນ.”—1 ເປໂຕ 4:8
ຂໍ້ຄຳພີຫຼັກ
“ຄົນທີ່ລະວັງຄຳເວົ້າກໍປົກປ້ອງຊີວິດຂອງໂຕເອງ ແຕ່ຄົນທີ່ເວົ້າຫຼາຍໂພດຈະເຈິຄວາມຈິບຫາຍ.”—ສຸພາສິດ 13:3
ຄຳແນະນຳ
ຖ້າເຈົ້າໄດ້ຍິນຄົນອື່ນຊຸບຊິບນິນທາ ເຈົ້າອາດເວົ້າວ່າ: “ຂ້ອຍວ່າເຮົາຢ່າເວົ້າເລື່ອງນີ້ເລີຍ. ເພາະເຈົ້າໂຕກໍບໍ່ຢູ່ ອີກຢ່າງເຮົາກໍບໍ່ຮູ້ວ່າເລື່ອງມັນເປັນແນວໃດແທ້ໆ.”
ເຈົ້າຮູ້ບໍ . . . ?
ພຽງແຕ່ຟັງຄົນອື່ນຊຸບຊິບນິນທາ ເຈົ້າກໍມີສ່ວນຜິດແລ້ວ. ຖ້າເຈົ້າປ່ອຍໃຫ້ລາວນິນທາຕໍ່ໄປກໍສ່ຳກັບເຈົ້າປ່ອຍໃຫ້ຂ່າວນັ້ນແພ່ກະຈາຍໄປຫຼາຍຂຶ້ນ!
ແຜນພາກປະຕິບັດ!
ຖ້າຂ້ອຍໄດ້ຍິນຂ່າວລືແລ້ວຢາກເອົາໄປເລົ່າຕໍ່ ຂ້ອຍຈະ ․․․․․
ຖ້າມີຄົນເວົ້າເຖິງຂ້ອຍໃນທາງທີ່ບໍ່ດີ ຂ້ອຍຈະ ․․․․․
ສິ່ງທີ່ຂ້ອຍຢາກຖາມພໍ່ແມ່ກ່ຽວກັບເລື່ອງນີ້ແມ່ນ ․․․․․
ເຈົ້າຄິດແນວໃດ?
● ເຮົາເວົ້າເຖິງຄົນອື່ນໃນເລື່ອງໃດໄດ້ແດ່?
● ເຈົ້າເຄີຍຖືກນິນທາບໍ? ຖ້າເຄີຍ ເຈົ້າຮຽນຮູ້ຫຍັງຈາກປະສົບການນັ້ນ?
● ຖ້າເຈົ້າເອົາເລື່ອງທີ່ຄົນອື່ນນິນທາໄປເລົ່າຕໍ່ ເຈົ້າຈະເສຍຊື່ສຽງແນວໃດ?
[ຖ້ອຍຄຳທີ່ຍົກມາໜ້າ 107]
“ຂ້ອຍນິນທາໝູ່ຄົນໜຶ່ງ ເມື່ອລາວຮູ້ເລື່ອງ ລາວກໍມາຫາຂ້ອຍແລະຂ້ອຍບໍ່ຮູ້ຈະແກ້ໂຕແນວໃດ. ຕອນນັ້ນແຫຼະທີ່ຂ້ອຍໄດ້ຮຽນຮູ້ວ່າ ຖ້າມີບັນຫາກັບໃຜກໍໃຫ້ໄປລົມຄົນນັ້ນກົງໆດີກວ່າທີ່ຈະນິນທາລາວລັບຫຼັງ!”—ພ໋ອນລ້າ
[ຮູບພາບໜ້າ 108]
ການນິນທາເປັນຄືກັບອາວຸດທີ່ທຳລາຍຊື່ສຽງຂອງຄົນອື່ນໄດ້