ໝວດ 6
ໂຢບຮັກສາຄວາມສັດຊື່ໝັ້ນຄົງ
ຊາຕານຕັ້ງຂໍ້ສົງໄສໃນເລື່ອງຄວາມສັດຊື່ໝັ້ນຄົງຂອງໂຢບຕໍ່ໜ້າພະເຈົ້າ ແຕ່ໂຢບຍັງຄົງສັດຊື່ຕໍ່ພະເຢໂຫວາ
ຈະມີມະນຸດຄົນໃດສັດຊື່ຕໍ່ພະເຈົ້າບໍຖ້າຖືກທົດລອງຢ່າງໜັກໜ່ວງແລະການເຊື່ອຟັງເບິ່ງຄືບໍ່ມີປະໂຫຍດທາງວັດຖຸເລີຍ? ມີການຕັ້ງຂໍ້ສົງໄສແນວນັ້ນແລະຄຳຕອບກ່ຽວຂ້ອງກັບຊາຍທີ່ຊື່ໂຢບ.
ຕອນທີ່ຊາວອິດສະລາແອນຍັງຢູ່ໃນປະເທດເອຢິບ ໂຢບເຊິ່ງເປັນພີ່ນ້ອງຂອງອັບລາຫາມອາໄສຢູ່ຂົງເຂດອາລັບໃນປັດຈຸບັນ. ໃນຂະນະນັ້ນ ເຫຼົ່າທູດສະຫວັນໄດ້ມາປະຊຸມກັນຕໍ່ໜ້າພະເຈົ້າ ແລະຊາຕານຜູ້ກະບົດກໍຢູ່ໃນທ່າມກາງທູດເຫຼົ່ານັ້ນ. ຕໍ່ໜ້າການປະຊຸມໃນສະຫວັນ ພະເຢໂຫວາສະແດງຄວາມໝັ້ນໃຈໃນຕົວໂຢບຜູ້ຮັບໃຊ້ທີ່ພັກດີຂອງພະອົງ ທີ່ຈິງ ພະເຢໂຫວາໄດ້ກ່າວວ່າບໍ່ມີມະນຸດຄົນໃດມີຄວາມພັກດີຄືກັບໂຢບ. ແຕ່ຊາຕານອ້າງວ່າໂຢບຮັບໃຊ້ພະເຈົ້າກໍຍ້ອນພະເຈົ້າໄດ້ອວຍພອນແລະປົກປ້ອງລາວ. ຊາຕານກ່າວວ່າຖ້າເອົາທຸກສິ່ງທີ່ໂຢບມີໄປຈາກລາວ ລາວກໍຈະປ້ອຍດ່າພະເຈົ້າໂລດ.
ພະເຈົ້າຍອມໃຫ້ຊາຕານເຮັດໃຫ້ໂຢບສູນເສຍຊັບສົມບັດແລະລູກກ່ອນ ແລະຈາກນັ້ນກໍແມ່ນສຸຂະພາບຂອງລາວ. ຍ້ອນບໍ່ຮູ້ວ່າຊາຕານມີສ່ວນກ່ຽວຂ້ອງໃນເລື່ອງທັງໝົດນັ້ນ ໂຢບຈຶ່ງບໍ່ເຂົ້າໃຈວ່າ ເປັນຫຍັງພະເຈົ້າຍອມໃຫ້ລາວປະສົບກັບຄວາມຍາກລຳບາກນັ້ນ. ແນວໃດກໍຕາມ ໂຢບບໍ່ໄດ້ປ້ອຍດ່າພະເຈົ້າ.
ເພື່ອນປອມສາມຄົນມາຫາໂຢບ. ຄຳເວົ້າເປັນຊຸດທີ່ຂຽນໄວ້ໃນພະທຳໂຢບ ຊາຍເຫຼົ່ານັ້ນພະຍາຍາມເຮັດໃຫ້ໂຢບເຊື່ອຢ່າງຜິດໆວ່າລາວຖືກລົງໂທດຍ້ອນຄວາມຜິດທີ່ປິດບັງໄວ້. ເຂົາເຈົ້າຍັງກ່າວວ່າພະເຈົ້າບໍ່ຮູ້ສຶກຍິນດີຫຼືໄວ້ວາງໃຈຜູ້ຮັບໃຊ້ຂອງພະອົງ. ໂຢບບໍ່ຍອມຮັບການຫາເຫດຜົນທີ່ບໍ່ຖືກຕ້ອງຂອງພວກເຂົາ. ດ້ວຍຄວາມໝັ້ນໃຈ ໂຢບປະກາດວ່າລາວຈະຮັກສາຄວາມສັດຊື່ໝັ້ນຄົງຈົນຮອດມື້ຕາຍ!
ແຕ່ວ່າໂຢບໄດ້ເຮັດຜິດພາດເພາະເປັນຫ່ວງເລື່ອງຄວາມຊອບທຳຂອງຕົນເກີນໄປ. ຊາຍຫນຸ່ມຊື່ເອລີຫຶເຊິ່ງໄດ້ຟັງການໂຕ້ຖຽງທັງໝົດຈຶ່ງໄດ້ເວົ້າຂຶ້ນ. ເອລີຫຶຕຳໜິໂຢບທີ່ບໍ່ເຂົ້າໃຈວ່າການພິສູດຄວາມຖືກຕ້ອງແຫ່ງອຳນາດສູງສຸດໃນການປົກຄອງຂອງພະເຢໂຫວາພະເຈົ້າສຳຄັນຍິ່ງກວ່າການພິສູດຄວາມຖືກຕ້ອງຂອງມະນຸດຄົນໃດຄົນໜຶ່ງ. ເອລີຫຶຍັງຕຳໜິເພື່ອນປອມຂອງໂຢບຢ່າງຮຸນແຮງ.
ຈາກນັ້ນ ພະເຢໂຫວາໄດ້ກ່າວກັບໂຢບເພື່ອແກ້ໄຂຄວາມຄິດຂອງລາວ. ໂດຍການຊີ້ເຖິງສິ່ງເນລະມິດສ້າງທີ່ເປັນຕາງຶດງໍ້ຫຼາຍຢ່າງ ພະເຢໂຫວາເຕືອນໂຢບໃຫ້ຄິດເຖິງຄວາມຕ່ຳຕ້ອຍຂອງມະນຸດເມື່ອທຽບກັບຄວາມຍິ່ງໃຫຍ່ຂອງພະເຈົ້າ. ໂຢບຖ່ອມຕົວຍອມຮັບການແກ້ໄຂຈາກພະເຈົ້າ. ພະເຢໂຫວາ “ເຕັມດ້ວຍຄວາມອີ່ດູແລະດ້ວຍຄວາມເມດຕາ.” ເຮັດໃຫ້ສຸຂະພາບຂອງໂຢບກັບມາດີຄືເກົ່າ ແລະອວຍພອນໃຫ້ລາວມີລູກອີກສິບຄົນ. (ຢາໂກໂບ 5:11) ໂດຍການຮັກສາຄວາມສັດຊື່ໝັ້ນຄົງຕໍ່ພະເຢໂຫວາເມື່ອຕ້ອງປະເຊີນການທົດລອງຢ່າງໜັກໜ່ວງ ໂຢບໄດ້ຕອບຄຳກ່າວຫາຂອງຊາຕານທີ່ວ່າມະນຸດຈະບໍ່ສັດຊື່ຕໍ່ພະເຈົ້າຖ້າຖືກການທົດລອງ.
—ຂໍ້ມູນມາຈາກໂຢບ.