ບົດທີ 6
ແປດຄົນລອດຊີວິດຈາກນ້ຳຖ້ວມໂລກ
ເມື່ອໂນອາກັບຄອບຄົວແລະສັດຕ່າງໆເຂົ້າໄປໃນເຮືອແລ້ວ ພະເຢໂຫວາກໍປິດປະຕູເຮືອ. ຈາກນັ້ນ ຝົນກໍເລີ່ມຕົກ. ຝົນຕົກໜັກເອົາແທ້ເອົາວ່າຈົນດັນເຮືອໃຫ້ຟູຂຶ້ນຈາກພື້ນດິນ. ໃນທີ່ສຸດນ້ຳກໍຖ້ວມໝົດໂລກ ຄົນຊົ່ວທີ່ຢູ່ນອກເຮືອຕາຍໝົດ. ແຕ່ໂນອາກັບຄອບຄົວທີ່ຢູ່ໃນເຮືອລອດຊີວິດ. ເຈົ້ານຶກພາບອອກບໍວ່າເຂົາເຈົ້າຊິດີໃຈຫຼາຍສ່ຳໃດທີ່ເຊື່ອຟັງພະເຢໂຫວາ?
ຝົນຕົກໜັກ 40 ມື້ 40 ຄືນແລ້ວກໍເຊົາ. ຈາກນັ້ນ ນ້ຳກໍຄ່ອຍໆບົກລົງ. ໃນທີ່ສຸດເຮືອກໍໄປຄ້າງຢູ່ຈອມພູ. ແຕ່ນ້ຳກໍຍັງຖ້ວມສູງຢູ່ ໂນອາກັບຄອບຄົວຈຶ່ງຍັງອອກຈາກເຮືອບໍ່ໄດ້.
ນ້ຳໄດ້ບົກລົງເລື້ອຍໆຈົນພື້ນດິນແຫ້ງ. ຫຼັງຈາກທີ່ໂນອາກັບຄອບຄົວຢູ່ໃນເຮືອມາ 1 ປີປາຍແລ້ວ ພະເຢໂຫວາກໍບອກໃຫ້ເຂົາເຈົ້າອອກຈາກເຮືອ. ເຂົາເຈົ້າໄດ້ອອກມາເຈິໂລກໃໝ່ທີ່ສະອາດແລະບໍ່ມີຄົນຊົ່ວເລີຍ. ເຂົາເຈົ້າຮູ້ສຶກຂອບໃຈພະເຢໂຫວາຫຼາຍແທ້ໆທີ່ເພິ່ນຊ່ວຍຊີວິດເຂົາເຈົ້າ ແລະເຂົາເຈົ້າກໍເຜົາເຄື່ອງບູຊາໃຫ້ເພິ່ນເພື່ອສະແດງຄວາມຂອບໃຈ.
ພະເຢໂຫວາພໍໃຈເຄື່ອງບູຊາຂອງເຂົາເຈົ້າຫຼາຍ ແລະເພິ່ນສັນຍາວ່າຈະບໍ່ທຳລາຍທຸກສິ່ງໃນໂລກດ້ວຍນ້ຳຖ້ວມອີກຈັກເທື່ອ. ແລ້ວພະເຈົ້າກໍໃຫ້ມີຮຸ້ງຢູ່ເທິງຟ້າເປັນເທື່ອທຳອິດເພື່ອເປັນສັນຍະລັກຢືນຢັນຄຳສັນຍາຂອງເພິ່ນ. ເຈົ້າເຄີຍເຫັນຮຸ້ງບໍ?
ຫຼັງຈາກນັ້ນ ພະເຢໂຫວາກໍບອກໂນອາກັບຄອບຄົວໃຫ້ມີລູກມີຫຼານຫຼາຍໆຈົນເຕັມໂລກ.
“ໂນອາເຂົ້າໄປໃນເຮືອ ເຂົາເຈົ້າບໍ່ສົນໃຈຈົນນ້ຳມາຖ້ວມແລະພັດເອົາເຂົາເຈົ້າໄປຈົນໝົດ.”—ມັດທາຍ 24:38, 39