ບົດທີ 23
ສັນຍາກັບພະເຢໂຫວາ
ຫຼັງຈາກທີ່ພວກອິດສະຣາເອນອອກມາຈາກເອຢິບໄດ້ປະມານ 2 ເດືອນ ເຂົາເຈົ້າກໍມາຮອດພູຊີນາຍແລະຕັ້ງຄ້າຍຢູ່ຫັ້ນ. ພະເຢໂຫວາເອີ້ນໂມເຊຂຶ້ນໄປເທິງພູແລະບອກວ່າ: ‘ເຮົາໄດ້ຊ່ວຍພວກອິດສະຣາເອນໄວ້. ຖ້າເຂົາເຈົ້າເຊື່ອຟັງແລະເຮັດຕາມກົດໝາຍຂອງເຮົາ ເຂົາເຈົ້າຈະເປັນຊາດພິເສດຂອງເຮົາ.’ ໂມເຊລົງມາຈາກພູແລະເລົ່າໃຫ້ພວກອິດສະຣາເອນຟັງວ່າພະເຢໂຫວາບອກຫຍັງແດ່. ແລ້ວພວກອິດສະຣາເອນຕອບແນວໃດ? ເຂົາເຈົ້າຕອບວ່າ: ‘ພວກເຮົາຈະເຮັດຕາມທຸກສິ່ງທີ່ພະເຢໂຫວາບອກ.’
ໂມເຊຂຶ້ນໄປເທິງພູອີກ. ພະເຢໂຫວາບອກລາວວ່າ: ‘ອີກ 3 ມື້ເຮົາຈະມາເວົ້າກັບເຈົ້າ. ໃຫ້ໄປເຕືອນປະຊາຊົນວ່າຫ້າມບໍ່ໃຫ້ໃຜຂຶ້ນມາເທິງພູຊີນາຍ.’ ແລ້ວໂມເຊກໍລົງມາຈາກພູແລະບອກປະຊາຊົນໃຫ້ກຽມໂຕເພື່ອຈະຟັງພະເຢໂຫວາ.
ເມື່ອຮອດມື້ທີ 3 ພວກອິດສະຣາເອນກໍເຫັນຟ້າແມບແລະຂີ້ເຝື້ອຕຶບໜາຢູ່ເທິງພູ. ເຂົາເຈົ້າໄດ້ຍິນສຽງຟ້າຮ້ອງແລະສຽງແກດັງບັກແຮງໆ ແລ້ວພະເຢໂຫວາກໍລົງມາເທິງພູນັ້ນພ້ອມກັບໄຟ. ພວກອິດສະຣາເອນຢ້ານຈົນໂຕສັ່ນ. ແລ້ວພູໜ່ວຍນັ້ນກໍສັ່ນສະເທືອນແຮງຫຼາຍແລະມີຄວັນປົກຄຸມທົ່ວພູ ແລະສຽງແກກໍດັງແຮງຂຶ້ນໆ. ແລ້ວພະເຈົ້າກໍເວົ້າວ່າ: ‘ເຮົາແມ່ນເຢໂຫວາ. ຫ້າມນະມັດສະການພະເຈົ້າອື່ນນອກຈາກເຮົາ.’
ໂມເຊກັບຂຶ້ນໄປເທິງພູອີກແລະພະເຢໂຫວາກໍໄດ້ໃຫ້ກົດໝາຍກັບລາວເພື່ອພວກອິດສະຣາເອນຈະຮູ້ວິທີນະມັດສະການເພິ່ນແລະເຮັດສິ່ງທີ່ເພິ່ນພໍໃຈ. ໂມເຊໄດ້ຂຽນກົດໝາຍທຸກຢ່າງທີ່ພະເຢໂຫວາບອກແລະອ່ານໃຫ້ພວກອິດສະຣາເອນຟັງ. ເມື່ອໂມເຊອ່ານຈົບ ເຂົາເຈົ້າກໍສັນຍາວ່າ: ‘ພວກເຮົາຊິເຮັດຕາມທຸກຢ່າງທີ່ພະເຢໂຫວາບອກ.’ ພວກອິດສະຣາເອນໄດ້ສັນຍາກັບພະເຈົ້າແລ້ວ. ແຕ່ເຂົາເຈົ້າຈະເຮັດຕາມສັນຍາບໍ?
“ເຈົ້າຕ້ອງຮັກພະເຢໂຫວາພະເຈົ້າຂອງເຈົ້າສຸດຫົວໃຈ ສຸດຊີວິດ ແລະສຸດຄວາມຄິດ.”—ມັດທາຍ 22:37